Kolozi 4

1Maremwaalyaihi, wawɨnya yɨhɨthaayadɨvɨta yaasɨwa'wawɨnyaraavɨ tewaanya nayaa yɨda'maraangebwinajɨ tɨvɨkɨta avaainanyajɨ jɨla! Dara jawɨrila! “Nabaai nemɨ Naangerɨ kwaakewɨ mwaidaa sahwaraavɨ nayaa maremwalaana! Nemɨnyɨjɨ Naangei nemɨre marenemwaaidei Sɨgunyavɨ mwaalɨka!” Sarevɨ nayaa sara jɨla!

Naangerɨ wɨja'nebulyɨ mwasawɨnyaraavɨ wia'nebulyɨ sabwinesɨ.

2Sarɨmɨ Gotɨyarɨ wɨjavurɨ nayaa dɨragɨnna dɨlɨmwagarila! Naangerɨ yɨdaanganyavɨ nayaa pada'galayawɨ'dɨvɨ' Gotɨyarɨ “Su! Su!” duzɨla! 3Nabaai Gotɨyarɨ wɨjahaa' nemɨ sainaavɨ dara negaimwagathe'na jɨthaanganyɨla! “Gotɨyare yagaalya' Apozelɨyara wɨjɨwaakya'neraavɨne kaadihɨsa' wɨbaasana! Kɨraazɨtɨyarɨne nebulya' yoimavajalɨkurakya' wɨdɨpɨka!” dapɨjɨ sara jɨthaanganyɨla! Nebula daza' wɨdevɨna kalavuzavɨ wɨla nyɨrakesavɨ sara duzɨla! 4Nebula daza' wɨdɨwɨjavaaibɨ' nɨmɨ ku'maayaba nayaa jalɨkurakɨdeinyɨna Gotɨyarɨ jɨthaanganyɨla!

5Sarɨmɨ sɨmunya nayaa yawɨ'dɨvɨ' a'mwe mwasɨlaanyaraavɨ Naangerɨ malɨmwagarigasaraayaba kaanya nayaa jamarila! Yuyagaa' sara jɨla! Yɨrɨkerɨka yaasɨwa'na nabothɨka! 6Sarɨmɨre yagaalya yuyagaa' yanga'ne tewaanaange wɨdadaapi saaiyɨkunaabwia'bɨ' waburya kuna wima'nana! Sarevɨdaa'nyɨ gɨmɨre lɨmwangebwina a'mwe gazarɨzarɨ yagaalya ayɨna ja'nawɨja' sarɨmɨ kuna yɨnɨga wi'na yɨpɨneihɨlyɨ.

Pɨkarya aayagaa'ne yagaalyasɨ “Nya'mwana,” wɨjasɨ sangɨnesɨ.

7Nɨmɨnyɨna nyɨma'naabade yuya sanna Tɨkikaazai sarɨmɨnyɨna bayɨhɨzɨwaakadelyɨ. Sahwarɨna tewaanya nyɨvu'nadelyɨ. Sai nemɨnyɨne negaimwadevwi dɨragɨnna lɨmwaga'delyɨ. Sarei nemɨjɨ Naangerɨ ye'mwannawɨdaayadelyɨ. 8Sarɨmɨnyawɨnna nɨmɨ maryasɨvanaabɨhe yune dathahɨrɨwaai ya'nei. Yɨ “Apozelɨyara gatha'dara dahamwaaihava!” dapɨjɨ dɨneyawɨranganyide'na. Yɨ sahwai sarɨmɨre sɨmunyangɨ dɨragɨnya yɨvaimwanga yɨhyade'nanyɨ. 9Sahwarɨjɨ Wonɨzɨmaazarɨ maryasɨvanaabɨhelyɨ. Sahwai neya'mwe nebulyalyɨ. Sarɨna nevu'nadelyɨ. Sahwai sarɨmɨnyawɨdaa'nyalyɨ. Sahwaraai adava yɨma'nɨwaka yuya sanna sarɨmɨnyɨ yɨhɨzɨkaderaalyɨ.

10Aarɨzɨtaakazai nɨmɨjɨ kalavuzavɨ nye'mwannamwaalɨkei sarɨmɨnyɨ “Nya'mweihi!” yɨhɨthɨvanɨ'. Nabaai Maakɨyai Baanavaazare gahimɨlaangei “Nya'mweihi!” yɨhɨthɨvanɨ'. Sahwarɨna yagaala yɨhɨthasaabevɨ, sarɨmɨnyawɨnna bi'mavajarɨ nayaa dɨmaaryidelyɨ. 11Jizaazai, Jaazɨtazai wo'nɨkei kwalyɨ “Nya'mweihi!” yɨhɨthɨvanɨ'. Juyaraavɨre yɨsavaakɨdaa'nyɨ dazahwarana nɨmɨjɨ Gotɨyare maremwaaide' naanga gɨriwange'na ye'mwannayadaanyarera. Sara nyadɨvɨ' nyɨvaimwadɨvɨsainyɨ. 12Epapɨraazai sarɨmɨnyawɨdaa'nyai Kɨraazɨtɨyai Jizaazarɨne yaasɨwa'wawɨnyai “Nya'mweihi!” yɨhɨthɨvanɨ'. Yuyagaa' sarɨmɨnyɨ gaimwange'na Naangerɨ yɨdaanganya'na yagɨyagɨ naanga yadelyɨ. Sai Gotɨyarɨ “Sahwara a'mwe nebulyara dɨragɨnna daaya'na wɨmwaaihana! Sarevɨ kumɨre sɨmunyabwi yuya Gotɨyare yawɨta sangɨ nayaa nebwina yawɨranganya'na wɨmwaaihana!” dada yɨdaangadelyɨra. 13Sahwarɨ mena wangadɨnyainyɨ dara jalɨkurakɨvanɨge. Sai sarɨmɨnyɨne'najɨ Layothɨzɨya mwaalyaraavɨnajɨ Yɨyaraapolɨzɨ mwaalyaraavɨnajɨ yuna dɨragɨnna yawɨ'da yagɨyagɨ yadelyɨ. 14Lukɨyai, dotarɨna tewaanya nyɨvu'nadelyɨ Dimaazalyɨ saraai “Nehɨrya'mweihi!” yɨhɨthɨvanɨgi.

15Nɨmɨnyɨna neya'mweraavɨ Layothɨzɨya mwaalyaraavɨ “Nya'mweihi!” duthaawila! Nabaai Nibaavɨjɨ gamɨre angevɨ Naangere kusɨlaanyavɨyaraavɨjɨ “Nya'mweihi!” nɨmɨnyɨna duthaawila! 16Nabaai pɨkarɨyɨkwia daza' sarɨmɨnyaba mena danganapɨjɨ Layothɨzɨya mwaalyara Naangere kusɨlaanyavɨyaraavɨna sara kwarajɨ dangabɨ'de'na jaasidesɨ. Nabaai pɨkarɨyɨkwia Layothɨzɨyaraavɨne' yaasɨvanɨge' sarɨmɨ kwaihɨlyɨ nayaa dɨthanganyɨla! 17Nabaai Aakipaazarɨ dara duzɨla! “Naangerɨ wɨlamwaaihɨnyavɨ wawɨnya' maaragɨnya' nayaa javada'gainana! ‘Yune'na nayaa nebwina yɨma!’ da'gɨzɨ sara ja!”

18Polɨnyɨ nɨmɨ sainyɨ “Nya'mweihi!” yɨda'manɨgesɨ. “Pɨkarɨyɨkwia daza' Polɨ neyasɨwaabɨka!” yawɨsa'na nɨmɨre asasɨ yɨda'manɨge. Kalavuzangevɨ kuna mwaaiheinyɨna nayaa yawɨ'dɨvɨ' Gotɨyarɨ duzɨla! Naangere yanga gaimwangebwi sarɨmɨjɨ yɨhye'mwannarana!

Polɨ

Currently Selected:

Kolozi 4: byr

Highlight

Copy

Compare