Kolozi 3

Nemɨ a'mwe mudɨkeina yɨma'nona yaannebwinesɨ.

1Sarevɨdaa'nyɨ Gotɨyai Kɨraazɨtɨyarɨjɨ mena kihye'mwannayɨdɨkaava' sarɨmɨ gaala mwaaihasavɨ munya ke'banyanna dɨvɨrila! Munya dazaba Kɨraazɨtɨyai mwaalɨkelyɨ. Yɨ Gotɨyare aangasɨryaba nawɨ'nyaba dɨragɨnnakeba mwaalɨkelyɨ. 2Yuyagaa' munya ke'banyanna kuna jawɨrila! Kwaaka davakɨya gavengɨna sɨmunya kuna myawɨpɨna! 3Sare' darevɨnyɨ. Sarɨmɨ mena bainɨkeihi, yawakebwi yagalya'mavesaihɨlyɨ. Sarɨmɨre gaalyabwi Kɨraazɨtɨyalyɨ Gotɨyaryaba kɨma'nyawɨ ye'mwannarɨkesɨ. 4Kɨraazɨtɨyai sarɨmɨre gaalyabwina aaya kaavɨlyalyɨ. Dɨvi sagaa' ku'maayaba yɨma'naabathehaa' sarɨmɨ sahwalyɨ Gotɨyare byaanna naangevɨna je'mwannayɨma'naabyideihɨlyɨ.

5Sarevɨdaa'nyɨ sarɨmɨre kɨlaakejɨkɨya sɨmunyavɨ Kwaaka davakɨyaburɨne yuya yɨhwarɨka sabwi yɨnahu dɨramakyɨla! Nɨmɨ dare sabwina dɨvanɨge. Kayaa'nanya gɨrɨkita'nanya yabulyɨ, jɨlɨkera yabulyɨ, sɨmunya' dɨkaa'da kayaa'nanyannebulyɨ, kayaa'nanyangɨna wɨvu'nya'nebulyɨ gɨlyɨvɨsajɨ nɨgwiajɨ sangɨ tɨganaarya dɨragɨnna yabulyɨ, sarengɨra. Tɨganaarya dɨragɨnya sa' kwaasɨgotɨyaraavɨ yɨlaaya maryabulyɨ. 6Yuya sarenna yadɨvɨsaraavɨna Gotɨyai gamɨre sɨnna tɨkebwi tɨvɨkɨsa'ne daanga wɨjaavadelyɨ. Sarevɨ sasare sabwi mipɨna! 7Nabaai sɨnnawɨ kɨgaa' sarɨmɨ kwaihi a'mwe sasare dazarajɨ ye'mwannamwaaidɨvɨsagaa' sasare saburɨ yamaryesaihɨlyɨ. 8Kɨrɨ' dahaa' sarɨmɨ yuya darebwi nayaa dɨmarakyɨla! Sɨnna tɨkebulyɨ mayagaala yarai javulyɨ sɨmunya' kayaa'na yabulyɨ bɨraiyagaala javulyɨ sarɨmɨre maangevɨ maa'maayagaala javulyɨ. 9Sarɨmɨre sɨrya'mweraavɨ kwaasɨ yagaala mudɨpɨnera! A'mwe yawakeburɨyaihɨre yawɨsabulyɨ nabaai sasare yabulyɨ 10mena yɨraipurakeva a'mwe mudɨkeburɨyaihɨre yawɨsabwi mena baazɨ'ma'nesavɨ yuya sabwi mipɨnera! Gotɨyai a'mwe mudɨka dazarɨ wɨmwaaidelyɨ. Sahware sɨmunya mudɨke' wakada mudɨkerɨ kuna wɨmwaaidelyɨ. Gotɨyarɨ nebulya'na yawɨranganya'nerɨ Gotɨyare kɨma'bwa'nya ke'ba'nanyaibɨ' avaaina wɨmwaaihadelyɨ. 11Sareyaba yuyara mudɨkera yɨma'nyɨna. Gɨrikɨyai (Anga Pimagɨnyai) dɨngaka? Juyai dɨngaka? Yɨ kɨlaaka gurya da'nyabulyɨyai dɨngaka? Kɨlaaka gurya mada'nyabulyɨyai dɨngaka? Yɨ sɨkulɨya miwɨrinyakei dɨngaka? Yaalasabwi yadei dɨngaka? Yɨ yaasɨwa'wawɨnya yadei dɨngaka? A'mwe tewaanna mwaaidei dɨngaka? Yuya sare saraavɨ Gotɨyai maa'derera. Naange'na daaka! Aawa. Kɨraazɨtɨyai yuya maremwaaida yuyaraavɨna sabwi avaainanyabwi wiakelyɨ. Sarevɨne'na a'mwe dala nabinya yuya sareraavɨ wɨlamwaalɨkelyɨ Kɨraazɨtɨyai.

12Sarevɨdaa'nyɨ Gotɨyai sarɨmɨnyɨ mena yɨhɨthahɨlakakeihi, gamɨnne tewaanyaihi sarɨmɨnyɨna tewaanya wɨvu'nɨvanɨkevɨ darebura dɨvaazɨ'ma'nyɨla! Sarɨmɨnyɨdaa'nya pwaraavɨna kale nayaa yɨhyana! Nayaa bwiwanna jɨla! Sarɨmɨre sɨmunyabwi kwaakeba walamarakɨna jɨla! Kave yadɨvɨ' sarɨnnya yaya mamakinyɨ jɨla! Sarɨmɨjɨya pwaraavɨ kwaamu'nanyabwi jɨla! 13Kumɨre yagaala nayaa wɨ'nadɨvɨ' kave jɨla! Sarɨmɨnyɨdaa'nya pwai kwai gannya gya'mwerɨ kayaa'nanya yaja pɨrɨ'na yagaala kɨnɨnnakei yɨwetawakya daza' wɨmarasɨ'nana! Yuyaihi sara jɨla! Naangei Kɨraazɨtɨyai sarɨmɨre yɨwetawakya mena yɨhɨmarasɨ'nakabaaibɨ' sarɨmɨ kwaihi nayaa sara jɨla! 14Yuya saburaavɨ wɨvu'nya'nebwi wavɨla'devulyɨ. Wɨvu'nya'ne sabwi sarɨmɨnyɨ yɨhɨvaazɨ'makwana! Sara yɨhyade'na nawɨ'nya sabwi yuneba yɨ'mwannada avaaizɨmunya yuyaihɨrɨ goya marirakurakya yɨhyathesɨ.

15Kɨraazɨtɨyai sarɨmɨnyɨna narya wakakevɨ kwaamu'nanyabwi sarɨmɨre sɨmunyangɨ nayaa nebwina mareyɨhɨmwaalana! Sarɨmɨ Kɨraazɨtɨyare kusɨlaanyaihi kɨlaaka avaala pɨjɨ'na yɨma'nya'neihɨrɨ Gotɨyai kwaamu'nanyabwi maarya'neihɨrɨ jaka yɨhɨzɨvwaramaarake'nanyɨ. Sare'na yuyagaa' Gotɨyarɨ “Su! Su!” duzideihɨlyɨ. 16Kɨraazɨtɨyare yagaalya' sarɨmɨnyɨ nayaa nebwina yuna wɨlayɨhwarana! Sarɨmɨ yawɨta pɨnɨnna pɨnɨnnanya tewaanya yawɨ'dɨvɨ' sarɨnnya sɨrya'mweraavɨ nayaa wɨjɨwaakadɨvɨsavɨjɨ “Nayaa kave jɨla!” javada'gaidɨvɨsavɨjɨ yuna wɨlayɨhwarana! Sarɨmɨre sɨmunyangɨ daata Gotɨyarɨ “Su! Su!” yange'na nayaa wɨdadɨvɨ' daata Saamɨjɨ yɨledaasajɨ kuryaraavɨ dɨragɨnya yɨvaimwagya'ne daasajɨ sajɨ dɨzavada'galyɨla!

17Gazasa' daazajɨ gazasa' yaajajɨ sa Naanga Jizaazarɨnevɨ nayaa jɨla! Gamɨnyɨ, Gotɨyai Nenɨmaangerɨ “Su! Su!” nayaa wɨdadɨvɨ' sara nayaa jɨla!

Kɨraazɨtɨyarerajɨ kumɨnyɨ angevɨ mwaaihasarajɨ yɨnyabwinesɨ.

18Balaangengihi, sarɨmɨ Naangerɨ wɨlamwaaihasavɨ Gotɨyare yɨda'maraangebwi yɨpɨnevɨ sarɨnnya a'mweraayawɨ dalaangewɨ nayaa dula'narila! 19Kwalaangeihi, sarɨnnya a'mwengɨna kale yɨhyana! Yɨ sahɨnɨngɨ kayaa'na yadɨvɨ' kumɨre sɨmunyangɨ kayaa'na nyuigaibɨthɨka!

20Kaimɨraayamɨlɨki, sɨrɨnɨmaanga sɨrɨnaangengɨre yagaalyangɨ yuya sangɨna nayaa dɨmɨdɨnyɨla! Sare' darevɨnyɨ. Sarɨmɨ Naangerɨ wɨlamwaaihasavɨ sare' Gotɨyarɨ wigaidevɨnyɨ. 21Kuvɨnɨmaangeihi, maiyagaala mudɨpɨna! Sara kyapɨjɨ nayaa mamɨdɨnyɨ nyɨpɨka! Nyagalya'mapɨdɨka!

22Yaasɨwa'wawɨnyaihi wawɨnya wɨdaayadɨvɨsaihi, sarɨmɨre kɨlaakejɨkɨya maremwaalyaraavɨre yagaalya yuya sangɨna nayaa dɨmɨdɨnyɨla! “Wawɨnya nawɨ'nya yɨvanɨkelyɨra,” yawɨranganya'nenna kumɨre tɨnnyarɨna kwaasɨkuna nyɨpɨka! Aawa. Naangerɨna lɨka nayaa yadɨvɨsavɨ sarɨmɨre sɨmunyabwi wawɨnya'na nayaa yɨda'na warana! Sareihi nayaa dɨmɨdɨnyɨla! 23Wawɨnya gazasa' yaaja sahɨnɨ wawɨnya ya'na sarɨmɨre kuryarajɨ dɨragɨnna jɨla! A'mweraavɨ wɨdaaya'nebaaibɨ'na mɨ'. Aawa. Sarɨmɨ Naangerɨ wɨdaaya'neihi jɨla! 24Sarɨmɨ yawɨ'manɨga' “Dɨvi sagaa' Naangei nemɨnyɨ tɨvɨkɨta nejaavadelyɨ.” Tɨvɨkɨta sarɨmɨ maarya'ne daza' Gotɨyai mena dahɨlakakesɨ. Sare' darevɨnyɨ. Kɨraazɨtɨyai, sarɨmɨre Naangerɨ wɨdaayadɨvɨsaihɨlyɨ. 25Sare' darevɨnyɨ. Wɨdaayadei yɨwetawakya yadei, sai gamɨre kayaa'nanya yade dazabwine tɨvɨkɨta maaradelyɨ. A'mwe sara yadɨvɨta sabwina avaaina maryawɨbwa'delyɨ. Pwaraavɨ gevwi maryawɨbwa'dei mɨ'.

Currently Selected:

Kolozi 3: byr

Highlight

Copy

Compare