Kolozi 2

1Sare' dare'nesɨ. Nɨmɨ sarɨmɨnyɨna “Dara yawɨpɨka!” nyɨvu'nɨvanɨkeinyɨ. Sarɨmɨnyɨ wɨgaimwange'najɨ a'mwe anga Layothɨzɨya mwaalyaraavɨjɨ nɨmɨnyɨna wɨ'nesara nɨmɨre sɨnnyɨkɨ manyanganyadɨvɨta a'mwe yuyaraavɨjɨ saihɨrɨna nyɨdɨkaa'bwa'deinyɨ dɨragɨnna yawɨ'dɨ yagɨyagɨ naanga yadɨnyainyɨ. 2Sareihɨrɨna “Sahwara kale yaburɨ ye'mwannamwaaibɨ'devɨ kumɨre sɨmunyangɨ Gotɨyai dɨragɨnya yɨvaimwagana!” dena yɨhɨthɨvanɨge. Nabaai nebulya' yoimavajalɨkurakyavɨne tewaanya nawɨ'nyaanga yuyangɨna aaya kaavɨlyavɨna sarɨmɨre sɨmunyangɨ jawɨramarakɨnyide'nanyɨ. Yɨ Gotɨyare nebulya' yoimavajalɨkurakyavɨ yune'na jawɨranganyideihɨlyɨ. Kɨraazɨtɨyai gamɨ sai nebulya' yoimavajalɨkurakya savɨna aaya kaavɨlyalyɨ. 3Sahwarɨ yunebanna yawɨta dala yuya pɨnɨnnanyajɨ sɨmunya kɨma'nyawɨ wa'dejɨ yuya sa wɨwarɨkelyɨ. Nɨgwia wakadɨvɨta bengɨyavɨ nɨgwia yunebanna wa'devaaibɨ' wɨwarɨkelyɨ yuya sa. 4Sare' “A'mwe aane pwara kwara sarɨmɨnyɨ kwaasɨ wabwiwayagaalyabwina wɨja'na kwaasɨyavɨ namarulawakɨpɨdɨka!” dena yɨhɨthɨvanɨge. 5Sare' dare'nesɨ. Nɨmɨre kɨlaakejɨkɨ sarɨmɨjɨ mihye'mwannamwaalyɨge. Aawa. Nɨmɨre kuryai sarɨmɨjɨ yɨhye'mwannamwaalɨka. Sareinyɨ yɨlaaya yadɨ dara wangamanɨge' “Ai, avaaizɨmunya ye'mwannamwaaidɨvɨ' Kɨraazɨtɨyarɨ dɨragɨnna kuna lɨmwaga'manɨgasaihi daaka!” Sara dadɨ dɨragɨnna yawɨ'dɨ sarɨmɨnyɨna yagɨyagɨ naanga yadɨnyainyɨ.

Nemɨ Kɨraazɨtɨyalyɨ avaaimwaalya yadaa gaala nebulyabwi maraadevwinesɨ.

6Sarevɨdaa'nyɨ Kɨraazɨtɨyai Jizaazai Naangerɨ mena maaretabaai sahwarɨ nayaa kuna jamarila! 7Yɨ yɨsai kwaakevakɨ dɨragɨnna yɨnɨgɨdavadaa'devaai sahwarɨ nayaa dɨragɨnna kuna dɨthaayɨla! Yɨ ange' kutayɨta dɨragɨnyaraavɨ a'ba dɨragɨnna maredaa'devaai sahwarɨ naanga jɨvaimwannyɨla! Yɨ sɨnnawɨ Epapɨraazai yagaala yuya' yɨhɨzɨwaakakabaaibɨ' yagaala daza' dɨragɨnna kuna dana jawɨrila! “Naanga nebulyasɨ.” Gotɨyarɨ yuyagaa' “Su! Su!” kuna dɨragɨnna wɨdɨ wɨja jɨla!

8Mala nayaa jɨwannyɨla! A'mwe aane pwai kwai gamɨnyɨ mɨdɨnya'neihɨrɨ wɨla nyɨhiramwaaihadɨka! Sarɨmɨnyɨ yɨhusɨnna yagaala yawɨsabwi yɨhɨzɨwaakade' kwaasɨ nayɨhɨthathɨka! Yawɨta sabwi kunebulyɨ. Kwaasɨyabulyɨ. Kune sare' darevɨnyɨ. Aanga'mwe gaveraavɨrebulyɨ. Kwaakevakɨya dala pɨbwina pɨbwinanyajɨ kɨmaakɨyaburajɨ sabwi wɨjɨwaakyabulyɨ. Kwaasɨya sare' darevɨnyɨ. Kɨraazɨtɨyarɨne majadɨvɨsabulyɨ. 9Kɨraazɨtɨyarɨ Gotɨyai yunebanna wɨmwaalake'na kwaasɨya sa wɨla nayɨhiramwaaihadɨka! 10Sahwarɨ wɨlamwaaihasa'na sarɨmɨre sɨmunyavɨ yunebanna yɨhɨmwaalɨke'nanyɨ. Kɨraazɨtɨyai maremwaaidɨvɨta yuyarajɨ dɨragɨnya yuyarajɨ saraavɨ munyaba mwaalɨkelyɨ. 11Sahwarɨ wɨlamwaaihasavɨ sarɨmɨre kɨlaaka gurya da'nɨkerabɨsaihi yɨma'ne'. Sa aagɨlaakajɨkɨne mɨka! Asasɨ gurya yɨhɨthavetaihi mɨka! Aawa. Kɨraazɨtɨyai sarɨmɨre kɨlaakejɨkɨya yawɨta yuyabwi sɨmunya yawakevɨne sabwi mena yuna dawasɨ'nakelyɨ. Yɨ sɨmunya dazabwi kuna mihɨmaremwaalyɨkeihɨlyɨ. Yɨ daza' kɨlaaka gurya daya nebulyabulyɨ. 12Sarɨmɨre bavɨtaazɨyavɨ Kɨraazɨtɨyalyɨ ye'mwannabaleva sahwalyɨ ye'mwannayɨhilɨkyɨrakaka sahwalyɨ ye'mwannayɨdɨkavɨmwaaihya yɨhyakeihɨlyɨ. Gotɨyai dɨragɨnna yake' lɨmwagaresavɨ sara yɨhya'. Yɨ sahwai Kɨraazɨtɨyarɨ bainɨkeraayawɨ ayɨna yɨdɨkaavake' lɨmwagaresavɨnyɨ. 13Sarɨmɨ sɨnnawɨ yɨwetawakya yesavɨjɨ sarɨmɨre kɨlaaka gurya da'nɨkeihi mamwaalyadɨvɨ' sarɨmɨre kɨlaakejɨkɨya yawɨsabwi yɨhɨmaremwaalakevɨjɨ sarɨmɨre kuryara bainɨkeihɨlyɨ. Sare' kɨrɨ' Gotɨyai Kɨraazɨtɨyalyɨ gaala ye'mwannamwaalya'neihɨrɨ yɨhɨmwaaihakeihɨlyɨ. Yɨ Gotɨyai nemɨre yɨwetawakya yuya nemarasɨ'nadelyɨ. 14Kɨwɨnya yuya dɨnɨkengɨya nemɨnyɨ “Walamarakɨma!” dada pɨkarɨyɨkwia nemɨnyɨne tɨvɨkɨsa' kotɨyavɨ wɨlagalapwelɨmwagata sa' neduimwagasɨ'nakesɨ. Pɨkarɨyɨkwia sa' nemɨnyɨjɨ gamɨnyɨjɨ tɨnnyaba wa'dɨsɨya' makwokesɨ. Sahɨrɨ' yɨsavɨri maratamarɨmwia neyakesɨ. Kɨraazɨtɨyai yɨsavɨ balakevɨ yunebanna yɨ'mwannakesɨ. 15Dɨragɨnya maremwaaidɨvɨta kayaa'nanyaraavɨrejɨ ejelɨya naangera kayaa'nanyaraavɨrejɨ marasɨ'nakelyɨ. Nabaai yɨta yovihɨrarannɨkevɨ Kɨraazɨtɨyai sahwaraavɨ wavɨlavaka yuyaraayaba maalɨkeraavɨ wɨmwaaihakere.

16Sarevɨdaa'nyɨ a'mwe pwai kwai yaasɨwa'na kuna yɨhɨzɨdavaja' sahwarɨ kadɨka mu'nɨpɨna! Kɨwɨnya dɨnɨka wapaaya tɨka nyabwinajɨ aalya pɨnɨjɨ nyabwinajɨ kwarame munnegaa'najɨ lawe mudɨkikɨnajɨ kwazaakegaa'najɨ dɨhɨnyɨrayɨla! 17Yuya daza Kɨraazɨtɨyarɨne dɨviya'ne nawɨ'nya yɨma'nya'nenna a'mabaalyangɨ. A'mwere kɨlaakejɨ' widavadaa'nyɨ gamɨre a'mabaala saamɨnya' sɨnnawɨ waamanɨke'bɨsasɨ. Yɨ Kɨraazɨtɨyai kɨlaakejɨkɨra. Sahwai nawɨ'nya nebulya'nanya aaya kaavɨlyalyɨ. 18Nabaai pwai kwai yaasɨwa'na kuna yɨhɨzɨdavaja' dɨhɨnyɨrayɨla! Gamɨre sɨmunyavɨ yawɨ'da sarɨmɨnyɨ marulawakya'na “Ejelɨyaraavɨ yɨlaaya jɨla!” yɨhɨthazarɨ dɨhɨnyɨrayɨla! Sare sai wajavɨ tɨnna bangana'de pɨnɨnna dazavɨjɨ gamɨre kɨlaakejɨkɨya sɨmunya yawakeburɨ sara yawɨ'de'na yaasɨwa'na pihadɨka yajavɨjɨ sahwarɨ dɨhɨnyɨrayɨla! 19Sahwai sara yada Kɨraazɨtɨyai nemɨre Mɨnyagɨnya nebulyarɨ dɨragɨnna lɨmwaga'derɨ yagalya'mavakelyɨ. Mɨnyagɨnya kumɨre kɨlaaka yuyajɨkaavɨna wɨgaimwada dahaalyajɨ wɨrɨlyajɨ kɨlaakejɨkaavɨya yunebanna yɨ'nɨkengɨ yunebanna nayaa yadevaaibɨ' Gotɨyare sɨmunyavɨ nemɨre Mɨnyagɨnyai gamɨre kɨlaakejɨ'na gamɨnyɨ kusɨlaanyainaavɨ kuryara naanga yɨma'nɨpɨ'de'na sara nemwaaihadelyɨ. Kɨrɨ' Mɨnyagɨnya sarɨ yagalya'mavakelyɨ.

20Sarɨmɨ Kɨraazɨtɨyalyɨ mena ye'mwannabalesavɨdaa'nyɨ Kwaaka davakɨya kɨmaakɨyabwi mɨdɨnya'neihi mamwaalyɨgasaihɨlyɨ. A'mwe bainɨkei gamɨre tɨvɨkɨta yuyanna yagalya'mavakabaaibɨ' mamwaalyɨgasaihɨlyɨ. Sarevɨdaa'nyɨ a'mwe Kwaaka davakɨyara mwaaihatabaaibɨ' mamwaaibɨnera! Kɨwɨnya sasara dɨnɨkengɨ dalaangewɨ dula'naride' be'nanaka! 21Pwai dara kwaasɨ yɨhɨthɨvanɨ' “Sare malɨmwadɨnna! Sare aalya' sare tɨka wapaaya managaangadɨnna! Asi mime'nɨnna!” Sasara yɨhɨthɨvanɨka kɨmaakɨya ya'neihi mamwaaibɨnera! 22Yuya daza nemɨ nadaawori mena yɨmaanyɨna yadengɨra. Sɨwalɨkevɨnengɨ. Kuryaraavɨne mɨka! Yuya kɨwɨnya dɨnɨka daza yune a'mwerana yadɨvɨ' yune a'mweraavɨre wɨjɨwaakyangɨra. Gotɨyare mɨka! 23“Kɨwɨnya sasara dɨnɨka sa wawɨnya dɨragɨnna yade, yɨ yune a'mweraavɨre sɨmunyaburɨ lotuyavɨna nemɨnyɨ yɨdɨkavɨmwaaihya'najɨ yɨ nemɨ saina kwaakewɨ mwaalya'najɨ yɨ nemɨnyɨ marulawakya'neina nemɨre kɨlaakejɨ' mala tannya'najɨ sare'na a'mwera ‘Sabwi sɨmunya tewaanya kɨnɨnnakesɨ,’ ” yawɨpɨkajɨnyɨra. Sare' kɨrɨ' sɨmunya yawakeburɨya saburɨ walamarakya'na sabwi nemɨnyɨ yɨnɨga wi'na negaimwagathevwi mɨ'. Aawa. Sabwi kɨlaakejɨkɨya sɨmunya yawakeburɨ yɨdɨkavɨmwaaida pihadɨkebwi yɨma'naabadevulyɨ. Sare'na kadɨka mu'nɨpɨnera!

Currently Selected:

Kolozi 2: byr

Highlight

Copy

Compare