Apozelɨyara 9

Solɨ Jizaazarɨ wɨ'nake'nesɨ.

(Apozelɨyara 22:4-16; 26:9-18)

1Sagaa' Solɨ Naangere mɨdɨdɨvɨsaraavɨna sɨnna tɨka naanga kuna wɨda'daasɨ dɨnyɨna “Jizaazarɨ mɨdɨdɨvɨsaraavɨ tamakɨma!” 2Dɨnyɨna yaka Gotɨyarɨna Mubɨthɨka Yɨra'de Naangerɨ wɨdɨna “Anga Damaazɨkazɨ Juyainaavɨre lotuangengɨ maremwaaidɨvɨsaraavɨ nɨmɨnyɨne pɨkarya jɨthaka! ‘A'mwe Solɨ Jizaazarebwi lɨmwadɨvɨsaraavɨ bɨramaaraja' asangɨ wɨla pwɨyojɨ Jeruzaalemɨ davanna a'mweraavɨjɨ a'mwengɨjɨ sangɨ ayɨna makabana!’ da'gɨzɨ pɨkarya sara kanyɨdaya'gɨzɨ kotɨya'na maraawɨdeinyɨra,” sara wɨdɨna ya' Solɨ.

3Anga Damaazɨkazɨ sawɨnnei tutaanyavɨ kaanya woda ange' aya kɨba mannadɨ'nyɨ Sɨgunyavɨdaasɨ baaka naange' gamɨnyabanna yarai yɨme'nya'bɨ' wannaabɨna ya'. 4Yarai wannaabɨna yadaa'nyɨ kwaakewɨnna Solɨ wala'na yaka maanguraaya' kadɨka wɨ'nyɨna “Solɨ, Solɨ, kayaa'na be'na nyɨvanɨgɨna?” 5“Naangeigɨ, aaihwaigɨnaka?” kyɨwaarava' wɨdɨna “Jizaazainyɨ kayaa'na nyɨvanɨgɨnyainyɨra. 6Sahwainyɨ kɨrɨ' daava'gɨzɨ anga naanga davɨna kulaawa'gɨzɨ gɨmɨ yɨnnenna pwai gɨthathe'nanyɨra.” 7A'mwera Solɨjɨ wawesara daaveva yagaala majara maanguraaya' kadɨka wɨ'neva kɨrɨ' pwarɨ tɨnna mwanganyesare. 8Naangei mena wɨdɨna kya' kwaakevɨdaasɨ Solɨ daavaka gannya tɨnnyaraai yenaka dara yawɨrake' “We', nɨmɨ tɨbaryainyɨ daaka!” Sara daka aane pɨrɨ' kɨrɨ' tɨnna mwanganyɨ kya' pwara gamɨre asɨrɨ lɨmwanna yeva Anga Damaazɨkazɨ sawɨnna jɨvwaramakuna. 9Jɨvwaramakuna kye' saba mwaalaka yɨrɨka daryaai darɨkɨ tɨnna mwanganyɨ yada sagaa' tɨka manyɨ yada aalya manyɨ ya'.

10Damaazɨkazɨ saba Jizaazare pwai Ananaayazai wo'nɨkelyɨ. Sai mwaalaka a'mabaaitɨnna baihana'na yadaasɨ Naangei wɨdɨna “Ananaayazaigɨno!” Wɨdɨna kya' sai wɨdɨna “Naangeigɨ, yɨthaa, gɨmɨnyɨ gyemwaaihena.” 11Wɨdɨna kya' Naangei wɨdɨna “Daava'gɨzɨ Aduta Yɨda'nanya' wo'nɨkevɨna wawa'gɨzɨ Juthaazare angevɨ Solɨ Anga Taazazɨ mwaalyarɨna dɨvɨramaaka! Sare' dare'nesɨ. Yɨthaa, Gotɨyarɨ dada 12a'mabaaitɨnna dara wangamwake' ‘Nɨmɨre tɨnnyaraarɨna “Tewaanyaraai yɨma'nana!” dozɨ a'mwei Ananaayazai wo'nɨkei wɨlaabaka gannya asɨraai nɨmɨre mɨnyagɨnyavɨ dathathɨwamanɨka!’ ” 13Naangei sara wɨdɨna kya' Ananaayazai wɨdɨna “Ai, Naangeigɨ, a'mwe darɨna a'mwe kwalaalyara mena nyɨdɨwaa'. Anga Jeruzaalemɨ mwaalyara gɨmɨre tewaanyaraavɨ kayaa'nanya yɨna yɨna yawalyaadɨkerɨna nyɨdɨwaa'. 14Sara yada Damaazɨkazɨ dawɨnna gɨmɨnyɨ yagaala gɨthadaanyainaavɨ wɨla pwɨya'na bɨwakelyɨ. Gotɨyarɨna mubɨthɨka yɨra'dɨvɨta naangera pɨkarya kalavuza'na sara yɨdaveva kujawa'daa' bɨwakelyɨra.” 15Mi'na wɨdɨna kya' Naangei wɨdɨna “Sai nyɨdaayaderɨ dahɨlakɨweryawɨnna dɨwona! Sai nɨmɨnyɨne yaya' ajɨmya yuyangɨyaraavɨjɨ a'mwe naanga Kingɨyaraavɨjɨ Yɨzɨrelɨya yɨsavaakɨyaraavɨjɨ wɨjɨwaakade'na dahɨlakɨwana. 16Sare' dare'nesɨ. Sai nɨmɨnyɨne yaya'na naange' sara yade'na gamɨnyɨ daanga wɨvɨnaja'na wɨjɨwaainɨdelyɨra.”

17Ananaayazai kaanna wɨna yaka angevɨ wɨlɨna yaka Solɨmɨre mɨnyagɨnyavɨ ata dathɨwanna yaka wɨdɨna “Nya'mweigɨ, Solɨgɨ, gɨmɨnyawɨnna Naangei nyɨdasɨwaabɨkeinyɨ. Tusavɨ kaanya badɨ Jizaazai sahwarɨ tɨnna wangamwa'dɨnyai nyɨdasɨwaabɨ'. ‘Gannya tɨnnyaraai tewaanyaraai wanganna yana! Gamɨre munyɨkɨ yunebanna Kurya Tewaanyai wɨlamwaalana!’ daka nyɨdasɨwaabɨ'.” 18Wɨdɨna kya' sagaa' yɨme'nya'bɨ' Solɨmɨre tɨnnyaraarɨdaasɨ jawɨpadasa'bɨsa bwala'na kya' gamɨre tɨnnyaraai tewaanyaraai yenyɨna ya'. Tewaanya yenyɨna kya' Solɨ daavɨna kya' Ananaayazai bavɨtaazɨya yɨna ya'. 19Bavɨtaazɨya yɨna yaka Solɨ wapaaya nyɨna yaka gannya kɨlaaka dɨragɨnya' ayɨna maarɨna ya'.

Anga Damaazɨkazɨ Solɨ wɨjɨwaakake'nesɨ.

Yɨrɨka pɨnɨngɨ wavɨla'daa'nyɨ Anga Damaazɨkazɨ mwaalyara Jizaazarɨ mɨdɨdɨvɨsaraayaba Solɨ mwaalɨna. 20Mwaalɨna yaka yɨme'nya'bɨ' Juyaraavɨre lotuangengɨ wɨna yaka Jizaazarɨna wɨjɨwaakɨna “Sahwai Gotɨyare Gawaalɨvaangelyɨra.” 21Wɨjɨwaakɨna kya' yuyara kadɨka wɨ'nyɨna yeva nɨ'nɨka yeva dɨnyɨna “Jeruzaalemɨ saba a'mwe dai yaya davɨna yagaala wɨdadɨvɨsaraavɨ kayaa'na yakei daaka! ‘Kumɨnyɨ wɨla pwɨya'mujɨ Gotɨyarɨna mubɨthɨka yɨra'dɨvɨsaraayawɨnna makwɨma!’ daka dava davɨwaka? A'mwe dale!” sara dɨnyɨna ye'.

22Solɨ kuna wɨjɨwaakɨna yaka dɨragɨnna wɨjɨwaakɨna yada Gotɨyare bukuyavɨdaasɨ dɨragɨnaanga wɨdɨna “Kɨgaakuna Jizaazarɨ Gotɨyai dahɨlakyaakei Kɨraazɨtɨyalyɨra.” Dɨragɨnaanga sara wɨdɨna kya' yagaala nebulya'nanya Juyara Damaazɨkazɨ mwaalyara yagaala pɨnɨ murɨvɨkɨri ye'.

23Sawɨta pɨjaakuna kwavɨlava' Juyara yɨkabɨna yeva jamungajakɨna “Solɨmɨ tamakya'na nemɨ dara yaadera.” 24Mena jamungajakɨna kye' pwai Solɨmɨ sare'na wɨdɨna kya' nayaa wanganna yada mwaalɨna. Sara mwaalɨna kya' Juyara dɨnyɨna “Solɨmɨ tamakaana!” dɨnyɨna yeva sawɨsagaasɨ yɨrɨkegaasɨ adɨkuryangɨ damera tɨnna baihanarya'neraavɨ wɨmwaaihɨna. 25Sahwara baihana'na yɨna yadɨvɨ' sawɨta pɨgaa' Solɨmɨrera gamɨnyɨ makuna yeva amaangebaarɨ sikurɨka saamɨnyavɨ daavɨna yeva soigɨlyavɨ Solɨmɨ yɨlawɨmwaaihɨna yeva sikurɨka lo'masavɨ kavena marala'mwagaasɨna kye' Solɨ kaanna wɨna ya'.

Jeruzaalemɨna Solɨ ayɨna bake'nesɨ.

26Anga Jeruzaalemɨna Solɨ yɨ'mavaawɨna yaka yawɨ'na “Naangere mɨdɨdɨvɨsarajɨ ye'mwannamwalaana!” Yawɨ'na yaka yaamɨjɨ yɨna kya', aawano. Kumɨ “Solɨ mɨdɨdelyɨ,” yawɨ'na myeva yuyara lɨka yɨna kye' Solɨjɨ mye'mwannamwaalyɨ ye'. 27Mye'mwannamwaalyɨ kye' kɨrɨ' A'mwe Baanavaazai Wɨdaasaderaayawɨnna makuna yaka wɨdɨna “Tusavɨ Solɨ Naangerɨ kwangana' Naangei gannya yagaalya' wɨda'. Sai Naangerelyɨra. Nebulyasɨra. Damaazɨkazɨ saba Solɨ Jizaazarɨ yaya'na dɨragɨnna wɨjɨwaakɨna. Dɨragɨnna wɨjɨwaakɨna yada lɨka myakelyɨ Solɨ.” 28Baanavaazai wɨdɨna kya' Solɨ nayaa mwaalɨna yaka Jeruzaalemɨ yuneba kaanya yamaryada Naangere yaya'na dɨragɨnna wɨjɨwaakɨna. 29Jizaazarɨna wɨjɨwaakɨna yada Juyara Gɨrikɨyagaala dadɨvɨsarajɨ dɨnyɨna. Dɨnyɨna yadɨvɨ' Solɨ nayaa wɨdɨna kya' Juya sahwara yawɨ'na “Solɨ kayaa'nanyabwi nedɨwakelyɨ. Sarɨ tamakaana!” 30Yawɨ'na kye' gya'mwera kadɨka dara wɨ'nesa' “O, Juyara sara dathɨmanɨgava!” Deva Anga Sizaarɨya saalaalyavɨ mannɨkebanna Solɨmɨ makwalyuna yeva gamɨre anga Taazazɨna yaasɨna ye'.

31Sarevɨdaa'nyɨ sagaa' Jizaazare kusɨlaanyangɨyara Juthɨya yuyabajɨ Galɨli yuyabajɨ Samerɨya yuyabajɨ saba kwaamu'na mwaalɨna ye'. Pwara kayaa'na myɨ kye' tewaanna mwaalɨna ye'. Naangerɨ nayaa wɨ'nadɨvɨ' Kurya Tewaanyai gannya dɨragɨnya' wɨjaavada sahwara dɨragɨnyara yɨma'nyɨna ye'. Tewaanna mwaalɨna yadɨvɨ' dɨragɨnyara yɨma'nadɨvɨ' a'mwe pwara kwala naangera ye'mwannamwaaina ye'.

Anga Litha, Anga Jopa Pitai yake'nesɨ.

32Gazabazaba Pitai kaanya yamaryada Anga Litha mwaalesara Gotɨyare tewaanyaraavɨ angyɨrɨ'maata yɨna. 33Saba a'mwe pwai Anɨyaazai wo'nɨkei mwaalakelyɨ. Sai yagɨnya bainɨkei nalabwaryavɨ mwaaidɨ'nyɨ kwarame pɨjaakuna (8) wavɨla'na yakelyɨ. 34Pitai angyɨrɨ'maata yada Anɨyaazarɨ wanganaka wɨdɨna ya' “Anɨyaazaigɨ, Kɨraazɨtɨya Jizaazai gɨmɨnyɨ gyavada'gaimanɨka! Dɨkaava'gɨzɨ gɨnnya nalabwarya' nayaa javada'galakya?” Sara wɨdɨna kya' Anɨyaazai dɨkaa'na. 35Wi'na dɨkaa'na yaka tewaanyai mwaaida Anga Litha mwaalyarajɨ Waraata Seronɨ mwaalyarajɨ yuyara gamɨnyɨ wanganeva Naangerɨ lɨmwageva gamɨrera yɨma'nyɨna ye'.

36Anga Jopa saba a'mwe' Taavita' wo'nɨke' Naangerɨ mɨdɨnaka mwaalɨna. Gannya yaya' Gɨrikɨyagaala Dokaaza' dɨnɨkesɨ. A'mwe sa' tewaanyanna yada nɨgwɨmaayaraavɨna wɨgaimwadesɨ. 37A'mwe' mwaalɨna yaka sagaa' nabalɨnake' yɨma'naka balɨna. Mena balɨna kya' gɨlaayavɨ aalya' yeva ku'dɨke' munyabanna gɨlaaya' makilaawɨna yeva kave wakɨna. 38Anga Litha sabadaasɨ Anga Jopa etabera. Maalɨkeba warɨke'na Jopa mwaalyara mɨdɨdɨvɨsara kale wiadaa'nyɨ dara wɨ'nesa' “O, Anga Litha Pitai damwaalɨka!” Sara deva a'mweraarɨ wɨdɨna “Pitarɨ duzɨla! ‘Myemwaaidɨnnera! Yarai, nemɨnyawɨnna dɨvama!’ ” Wɨdɨna yeva wɨdaasɨna. 39Mi'na wɨdaasɨna kye' savɨ Pitai kadɨka wɨ'nyɨna yaka yovɨrawakɨna yaka saraalyɨ kaanna wɨna. Kaanna wɨna yaka sabanna yɨ'ma'na kye' munyaba ku'dɨkevɨna jɨvwaramakuna yɨna. Jɨvwaramakuna yɨna kye' yaanyɨwaaka yuya mwaaleva kale wiadaa'nyɨ kɨnna dadɨvɨ' Dokaaza' baazɨ'ma'nyangɨjɨ kwaabɨyɨvɨsangɨjɨ sazangɨ yavɨkaryakengɨ Pitarɨ wɨjɨwaainyɨna yeva “A'mwe tewaanyasɨ,” wɨdɨna. 40Sara wɨdɨna kye' ku'dɨkevɨ mwasawɨnna Pitai maryaasɨna yaka kwadaai gɨlaka Gotɨyarɨ wɨdaka gɨlaayayabanna gɨnyɨwanna yaka wɨdɨna “Taavita', dɨthɨkaaka!” Sara wɨdɨna kya' a'mwe' gannya tɨnnyaraai yenyɨna yaka Pitarɨ tɨnna wanganaka dɨkavamwaaina. 41Wi'na dɨkavamwaaina kya' sai gamɨre asa' maarɨna yaka yɨdɨkaa'na yaka yaanyɨwaakengɨjɨ Naangere tewaanyaraavɨjɨ jaka wɨdɨna yaka a'mwe' kwaihwaainakevɨ wɨjɨwaainyɨna. 42Savɨna Jopa yuneba yagaala dɨwɨna yadɨvɨ' a'mwe kwala naangera Naangerɨ lɨmwanna yesarera. 43Pitai mena yaka Anga Jopa saba a'mwe pwai Saaimonɨmɨre angevɨ mwaaidɨ'nyɨ yɨrɨka pɨjaakuna wavɨla'na ya'. Saaimonɨ sai bulɨmakaawoyangɨre kɨlaake yadelyɨra.

Currently Selected:

Apozelɨyara 9: byr

Highlight

Compare

Copy