Apozelɨyara 10

Pitarɨnajɨ Konilɨyaazarɨnajɨ saraarɨnesɨra.

1Anga Sizaarɨya a'mwe pwai Konilɨyaazai mwaalɨna. Sai aawɨlata maremwaaidei Romɨya aawɨlatara Yɨtaali aamiyaraavɨ maremwaaidelyɨ Romɨyai. 2Sai Gotɨyarɨna nayaa yawɨ'na, nabaai gamɨjɨ gamɨre angevɨ mwaaidɨvɨsajɨ Gotɨyarɨ yagaala wɨdadɨvɨsangɨra. Juyara nɨgwɨmaayaraavɨ yanga wɨjaavadelyɨ. Gotɨyarɨ yagaala wɨdadelyɨ. 3Konilɨyaazai sai mwaalɨna yada pɨgaa' tɨri kɨlokɨyagaa' a'mabaaitɨnna wanganna yada Gotɨyare mamaayai bwina yaka wɨdɨna “Konilɨyaazaigɨ!” Wɨdɨna yake' tɨnna wanganna. 4A'mabaaitɨnna wanganna yada mamaayarɨ baihana'na yada lɨka yada wɨdɨna “A'mwe naangeigɨ, baa'na bahɨneka?” Wɨdɨna kya' mamaayai wɨdɨna “Gotɨyarɨ yagaala wɨdadɨnya' Gotɨyai kadɨka gu'nɨwa'. Nɨgwɨmaayaraavɨ wɨjaavadɨnya' tɨnna gwangamwa'. Sare'na Gotɨyai gɨmɨnyɨna gyawɨ'deigɨnyɨ. 5Dahaa' Anga Jopa sawɨnna a'mweraavɨ a'mwe pwai Saaimonɨ Pitai wo'nɨkerɨna duthaasa! 6Sai saalaalyayaba pware angevɨ angyɨrɨ'maata yɨvanɨ'. A'mwe pwai Saaimonɨ gɨryawo'nyai bulɨmakaawoyangɨre kɨlaakengɨ yavɨkaryadei. Yɨ sare angevɨ mwaalɨ'.” 7Sara wɨdɨna yaka mamaayai wɨna kya' Konilɨyaazai gannya angevɨ wɨdaayadisaraarɨjɨ aawɨlata pwarɨjɨ jaka wɨdɨna. Aawɨlata sai Konilɨyaazaryaba mwaaida Gotɨyarɨ yawɨ'dei. 8Jaka wɨdɨna yaka kumɨnyɨ yuya yɨma'nake' wɨdaka Anga Jopana a'mwe saraavɨ wɨdaasɨna ya'.

9Yɨrɨka pɨrɨkɨ tusavɨ kaanna wɨna yadɨvɨ' Anga Jopa aya kɨbanna yɨ'ma'na yadaapɨjɨ Pitai yawɨ'na “Gotɨyarɨ wɨdɨma!” Daka sɨrɨgwajahaa' anga munyawɨ kwavɨta waraasavɨ yɨlamwaaina. 10Yɨlamwaaina kya' sagaa' Pitarɨ mɨjɨka wiadaasɨ wapaaya yovɨra'na yadaapɨjɨ tɨka munnenna yawɨ'da a'mabaalyavɨ tɨnna wanganna. 11Tɨnna wanganna yada Sɨgunya' basɨnadaa'na yadaa'nyɨ kwaabɨyɨvɨta dɨvanɨgɨnya'bɨsajɨkɨ makwalaabɨna. Kwaakewɨ Pitaryawɨ mamaayara kwaabɨyɨvɨsa'bɨ' kwaraka dawaai dawaalyangɨ lɨmwageva makwalaabɨna. 12Mena makwalaabɨna kye' Pitai dara wanganake' “Ai, yɨkurɨyaawia ge gejɨ malakayaawarya ge gejɨ kamaala ge gejɨ yuta ge gejɨ daminarɨka!” 13Sara kada' maanguraaya' wɨdɨna “Pitai, daava'gɨzɨ sa dɨramanana!” 14Wɨdɨna kya' kɨrɨ' Pitai wɨdɨna “Naangeigɨ, arɨkewɨnyɨra. Juyainaavɨre kɨwɨnya' dɨnɨke' ‘Kɨmaakengɨ manɨnnera!’ Sara dɨnɨke'na gɨrɨka kɨnɨnnaka aane pɨrɨ' kɨrɨ' manyɨ yadɨnyainyɨra.” 15Sagaa' pɨgasaai maanguraaya' wɨdɨna “Gotɨyai ‘Sa tewaanyangɨra,’ dɨnɨkengɨna gɨmɨ ‘Sa gɨrɨkita'nanyangɨra,’ madɨnnera!” 16Tɨnna wangadaa'nyɨ dahasaai dahaa' kwaabɨyɨvɨsa'bɨ' makwalaabɨna yeva yagaala mena wɨdakegaa' munyaba Sɨgunyavɨna ayɨna makɨlaawɨna ye'.

17Pitai yawɨ'na “A'mabaaitɨnna sa' wangamwe' berɨvɨ wangamwana?” Yawɨ'na yaka sɨmunya ayahi ayahi yawɨ'na yadaa'nyɨ Konilɨyaazai wɨdaasakeraavɨ Saaimonɨmɨre angevɨna jɨvwarɨdaakuna yesara tɨkuryaba daavɨna. 18Tɨkuryaba daavɨna yeva jaka wɨdɨna “Angyɨrɨ'maasa'nei Saaimonɨ Pitai damwaalɨka?” 19Jaka wɨdɨna yadaapɨjɨ Pitai kuna yawɨ'na “Berɨvɨ wangamwana?” yawɨ'na yadaa'nyɨ Kuryai wɨdɨna “Kadɨka dɨnyu'nana! Dava gwangabɨ'de'na a'mwe daraai dalyara mwaaihava. 20Daava'gɨzɨ walaawa'gɨzɨ lɨka myadɨ nɨmɨ wɨdasɨwaabe'na kumɨjɨ dɨwodeigɨnyɨ.” 21Sara wɨdɨna kya' Pitai walaawɨna yaka a'mweraavɨ wɨdɨna “A'mwerɨna jaka wɨdɨvanɨgasai nɨmɨnyɨra. Be'na bɨwaataihɨlaka?” 22Wɨdɨna kya' sahwara wɨdɨna “Aawɨlata maremwaaidei Konilɨyaazai nedasɨwaabɨkeinera. Sai a'mwe tewaanyai Gotɨyarɨna yɨlaaya yadelyɨ. Anga naangengɨya Juya yuyara dara jalɨkurakadɨvɨkɨ ‘A'mwe tewaanyalyɨ.’ Gotɨyare ejelɨya tewaanya pwai wɨdɨna ‘Pitai yagaala gɨthathe'na gɨnnya angevɨna wɨlaabathe'na Pitarɨna duthaasa!’ Wɨdɨna yɨwa'dɨkerɨna bɨwoinera.” 23Sarevɨdaa'nyɨ Pitai wɨdɨna “Dava se wa'mwaraana!” Wɨdɨna kya' se wa'mwa'na ye'.

Mwanyavɨ yovɨrawakɨna yɨna yaka kumɨjɨ wɨna ya'. Nabaai Jopa mwaalyara Naangere pwara gamɨjɨ kaanna wɨna. 24Kaanna kaanna wɨna yaka yɨrɨka pɨrɨkɨ Anga Sizaarɨyana yɨ'mavaawɨna. Konilɨyaazai gamɨreraavɨjɨ gya'mwe pwaraavɨjɨ jaka wɨjɨvwaramaa'na kya' gamɨre angevɨ yuyara Pitarɨna yemwaaina. 25Yemwaaina yadaapɨjɨ Pitai yɨ'mavaawɨna yaka yawɨ'na “Angevɨ wɨlaawɨma!” Yawɨ'na kya' Konilɨyaazai wɨjɨmaa'nyɨna yaka “Naangelyɨra,” yawɨ'na yaka gamɨre sɨvɨlyaraaryaba walaraka kwadaai gɨlɨna. 26Kwadaai gɨlɨna kya' kɨrɨ' Pitai gamɨnyɨ yɨrɨ'bwa'na yaka wɨdɨna “Aawa, sarebwi minna! Nɨmɨ sahwainyɨ a'mwe gaveinyɨra.” 27Wɨdɨna yaka angevɨ wɨlɨna yaka Konilɨyaazarɨ kuna wɨdaka dara wanganake' “O, a'mwe kwalaalya damwaaihava!” 28Sara daka wɨdɨna “Juyainyɨ. Sarɨmɨ Menyaihɨlyɨra. Sahwaihi nayaa dara yawɨ'mwaava ‘Juyaraavɨrebwi dɨnyɨna “Menyaraavɨ angyɨrɨ'maata minnera! Sahwaraayaba tɨka munne manɨnnera!” ’ Dɨnɨke'na kɨrɨ' Gotɨyai dara nyɨjɨwaainɨwa'dɨ' ‘Menyara Juyaraavɨrebwi myadɨvɨsaraavɨna “Gerera!” madɨnna! A'mwe yuyara kumɨ avaalyarera.’ 29Sara kanyɨjɨwaainɨwa'dɨ' nɨmɨnyɨna kudasɨwa'daavadɨ yarai bɨweinyɨ. Sarevɨdaa'nyɨ yarai bena yɨwaara'manɨge. Nɨmɨnyɨna be'na wɨdasɨwa'daavadɨna?”

30Konilɨyaazai wɨdɨna “Mwa'nɨga tɨri kɨlokɨyagaa' Gotɨyarɨ wɨjahaa' dahaa'bɨsagaa' nɨnnya angevɨ Gotɨyarɨ wɨdɨwa'de. Wɨdadaazɨ, yɨthaa, a'mwei baazɨ'ma'nya wɨvɨtɨratabɨsa' baazɨ'ma'nɨkei nɨmɨnyaba daavaka 31nyɨdɨwa'dɨ' ‘Konilɨyaazaigɨ, gɨmɨ Gotɨyarɨ yagaala wɨdadɨnya' Gotɨyai kadɨka gu'nɨwaka. Nɨgwɨmaayaraavɨna yanga wɨjaavadɨnya' mena gyawɨ'deigɨnyɨ. 32Sarevɨdaa'nyɨ Anga Jopana a'mwe pwai Saaimonɨ Pitai wo'nɨkerɨna duthaasa! Saalaalya maangebaarɨ Saaimonɨ pwai bulɨmakaawoyangɨre kɨlaaka yavɨkaryadere angevɨ angyɨrɨ'maata mwalaawaka sai.’ 33Sara wɨdɨna kanyɨwa'dɨ' yarai wɨdasɨwa'daavade'na gɨmɨ bɨwaa. Tewaanyasɨ. Kaimala! Su! Sarevɨdaa'nyɨ dava nemɨnyaba Gotɨyai mwaaidɨ'nyɨ Naangei gɨthɨwaka yagaalya' kadɨka gu'naade'na yemwaaimanɨgo.”

Pitare yagaalya'nesɨ.

34Pitai yarai wɨdɨna “Mena nayaa yawɨ'mwa. Gotɨyai yuyaraavɨ avaaina wiadelyɨ Juyaraavɨjɨ pwaraavɨjɨ. Nebulyasɨ. 35Gotɨyai ajɨmya yuyangɨya gazavasavakɨyarɨ nayaa yawɨ'delyɨra. A'mwe sai Gotɨyarɨna ‘Tewaanyalyɨ. Naangelyɨ,’ dada yɨda'maraangebwi yade'na Gotɨyai maarɨna yɨvanɨkelyɨ. 36Gotɨyai Yɨzɨrelɨyainaavɨ nedasaabaka yagaalya yawɨ'mwaava. Yagaala tewaanya sa' dɨnɨ' ‘Kɨraazɨtɨyai Jizaazai tewaanna yaka Gotɨyarɨnajɨ a'mweraavɨnajɨ kwaamu'nanyabwi waka'.’ Sahwai a'mwe yuyaraavɨre Naangelyɨra. 37Jonɨ Bavɨtaazɨya Yadei wɨdakegaa'daasɨ Kwaaka Galɨlidaasɨ Kwaaka Juthɨya yunebanne yagaala sa' dɨnesa'na yawɨ'mwaava. 38Jizaazai Naazaretɨ mwaalyarɨna yawɨ'mwaava. Gamɨnyɨ Gotɨyai dahɨlakaka Kurya Tewaanyarɨjɨ gannya dɨragɨnyavɨjɨ wɨjaava'. Wɨjaavaka gamɨjɨ Gotɨyai mwaalake'na gazabazaba sahwai tewaanna yada Kayaa'nanyai Saataanɨ kayaa'na wiadera tewaanyaraavɨ wɨmwaaiha'. 39Sara yada Kwaaka Juthɨya Anga Jeruzaalemɨ yuya Jizaazai yake tɨnna wanganona yuyaraavɨ wɨjalɨkurakadaanyaine. Yɨsavɨri nilɨya wɨrameva karamake' balɨna. 40Mena balɨna kya' kɨrɨ' yɨrɨka daryaai darɨkɨ Gotɨyai baryarɨ yɨdɨkaavaka gamɨreinaayaba wɨjɨwaaina'. 41Yuyara gamɨnyɨ mwanganyɨ ye'. Aawa. Gotɨyai nedahɨlakakeina wɨjalɨkurakya'ne gaveinaavɨ nejɨwaaina'. Bainɨkeraayawɨ Naangei kadɨkaava' gamɨjɨ aalya nona gamɨjɨ wapaaya noinera.

42Dɨragɨnna wɨdɨna neya' ‘Nɨmɨre yagaala tewaanya' a'mweraavɨ duzɨla! Dara nebwina duzalɨkurakyɨla! “Gotɨyai Jizaazarɨ dahɨlaka'. A'mwera mwaaihasaraavɨnajɨ a'mwera mena bainɨkeraavɨnajɨ kotɨya' yawɨbwarya'nerɨ wɨmwaaiha' Gotɨyai.” ’ Sara neda'. 43Nabaai, Gotɨyarɨ wɨ'nawɨjɨwakyaasara gamɨnyɨna jalɨkurakɨnɨkelyɨ. Sahwarɨna dara yɨda'nɨkesɨ. Gazaizai sahwarɨ ku'nojɨ Gotɨyai gamɨre kayaa'nanyangɨ marasɨ'nadelyɨ. Sahwarɨne yayavɨna marasɨ'nya'nebwi maaradelyɨra.”

Menyara Kurya Tewaanyarɨ maaresa'nesɨ.

44Pitai kuna wɨdadaasɨ Kurya Tewaanyai yuyara yagaala sa' kadɨka wɨ'nesaraavɨ walaabɨna yaka kumɨre munyɨkaavɨ wɨlamwaaina. 45Wi'na wɨlamwaaina kya' Anga Jopadaasara Juyara Jizaazarɨ lɨmwadɨvɨsara dara wanganesa' “O, Gotɨyai gannya Kurya Tewaanyarɨ ajɨmya yuyangɨyaraavɨna yanga mena duzaawaka!” Sara deva nɨ'nɨka yɨna ye'. 46Sare' dare'nesɨ. Menyara yagaala ge ge wɨdeva Gotɨyarɨ yɨlaaya yɨna yadɨvɨ' wɨdɨna “Gotɨyai dɨragɨnaangelyɨ.” Wɨdɨna kye' nɨ'nɨka yɨna ye'. 47Nɨ'nɨka yɨna kye' Pitai wɨdɨna “Kurya Tewaanyai nemɨnyɨ wɨlanemwaalakabaaibɨ' dahwaraavɨ Kuryai wɨlamwaaimwa'. Sare'na pwara ‘Aalyavɨ bavɨtaazɨya myaannera!’ dɨnɨpɨnera daaka! 48Aawa, kumɨnyɨ Jizaazarɨ yaya'na bavɨtaazɨya jɨla!” Wɨdɨna kya' sara kye' sahwara Pitarɨ wɨdɨna “Yɨrɨka pɨnɨjɨ nemɨnyaba angyɨrɨ'maata ja!” Menyara sara wɨdɨna kye' saba angyɨrɨ'maata ya'.

Currently Selected:

Apozelɨyara 10: byr

Highlight

Compare

Copy