Apozelɨyara 8

1Sɨtivenɨmɨ tamakɨna kye' Solɨ yawɨra' “Yo. Tewaanyasɨra.”

Solɨ Jizaazareraavɨ kayaa'na yake'nesɨ.

Sɨtivenɨmɨ tamakesagaa' yɨrɨka sagaa' Anga Jeruzaalemɨ Kɨraazɨtɨyare kusɨlaanyavɨyara mwaalesaraavɨ pwara kayaa'na kayaa'na yɨna. Kayaa'na kayaa'na yɨna yadaapɨjɨ Jeruzaalemɨ Wɨdaasadera gavera kuna mwaaidapi Jizaazare pwara yuyara Kwaaka Juthɨyajɨ Kwaaka Samerɨyajɨ pɨwɨnna pɨwɨnna yɨwɨnama'na ye'. 2A'mwera Sɨtivenɨmɨ karamake' Gotɨyarɨ yɨlaaya yadɨvɨsara kale kwia' Sɨtivenɨmɨ makuna yeva lɨkyɨrakɨna yeva yɨkwaraamaya yadɨvɨ' kɨnna naanga dɨna ye'.

3Solɨ dɨna “Jizaazarebwi kayaaka yɨgalɨma!” dɨna yaka kayaa'na yɨna. Angengɨ wɨlɨna yaka Jizaazare kusɨlaanyavɨya a'mweraavɨjɨ a'mwengɨjɨ wɨlamwagi'nyɨna yaka kalavuzangevɨ marɨmwaaihɨna yaka sara kayaa'na yɨna ya'.

Kwaaka Samerɨya yagaala tewaanya' wɨjɨwaakake'nesɨ.

4Jizaazarɨ wɨ'nadɨvɨsara yɨwɨnama'na yevevɨdaa'nyɨ gazabazaba mwaalɨna yadɨvɨ' Gotɨyare yagaala tewaanya' wɨjɨwakamarina ye'. 5Anga Samerɨya sawɨnna Pilipɨ wɨna yaka Kɨraazɨtɨyarɨ Gotɨyai dahɨlakakerɨna a'mweraavɨ wɨdɨna. 6Wɨdɨna yadaa'nyɨ kwala bwa'naanya kadɨka nayaa wɨ'nyɨna. Nayaa wɨ'nyɨna yadɨvɨ' Pilipɨ dɨragɨnya wɨjɨwaainya'nejɨ yada yuyara wanganna. 7Sare' dare'nesɨ. Wanganna yadaapɨjɨ a'mwe kwalaalyara yɨmakera kɨnɨnnakeraavɨre munyɨkaavɨ yɨmakera bwalyuna yadɨvɨ' jaka naange' wɨdɨna yeva kaanna wɨna. A'mwera kunnya kɨlaakejɨka kwaayakwaaya myadɨvɨsaraavɨjɨ yagɨnya bainɨkeraavɨjɨ sara a'mwe kwalaalyaraavɨ yavada'gaina kya' tewaanyara mwaalɨna. 8Tewaanyara mwaalɨna yesa' Samerɨya mwaalyara yɨlaaya naanga yadɨvɨ' mwaalɨna ye'.

9Anga saba a'mwe pwai Saaimonɨ wo'nɨkei mwaalɨna. Sai kulakei gannya kwalya yaderɨna anga naanga sɨmagɨnya Samerɨya mwaalyara atɨka maru'na'na yesalyɨ. Saaimonɨ wɨdɨna “A'mwe naangeinyɨ. Sɨdu'nakeinyɨ,” wɨdɨna yada 10anga saba mwaalyara yuyara a'mwe naangerajɨ a'mwe maalɨkerajɨ sa kadɨka nayaa wɨ'nyɨna yeva wɨdɨna “Gotɨyare dɨragɨnyasɨyalyɨra. ‘Yɨ dɨragɨnya sa' naangesɨ,’ dadaanyasɨ,” sara wɨdesalyɨ. 11Naangegaa' kwalyajɨ gɨri'nyajɨ yada atɨka maru'na'na yadɨvɨsangɨna yuyara kadɨka nayaa wɨ'nyɨna yesalyɨra. 12Saaimonɨ sai mwaalɨna yada sara yada kɨrɨ' Pilipɨ Kɨraazɨtɨyai Jizaazarɨnajɨ Gotɨyai nemaremwaalya'najɨ sawaarɨna yagaala tewaanya' wɨdɨna kya' kumɨ wɨ'nyɨna yeva “Sabwi nemɨ mɨdɨnaana!” dɨnyɨna yadɨvɨ' Kɨraazɨtɨyarɨ lɨmwanna kye' Pilipɨ aalyavɨ bavɨtaazɨya yɨna a'mweraavɨjɨ a'mwengɨjɨ sangɨ. 13Bavɨtaazɨya yɨna kya' Saaimonɨ sahwai lɨmwanna kya' Pilipɨ bavɨtaazɨya' kya' Pilipɨmyaba mwaaida Pilipɨ wɨjɨwaainya naangejɨ dɨragɨnyajɨ yɨna yadaa'nyɨ Saaimonɨ atɨka maru'na'na ya'.

14Anga Jeruzaalemɨ apozelɨyara Jizaazai Wɨdaasadera dara wɨ'nesa' “Samerɨya mwaalyara Gotɨyare yagaalya' dama'mwaava!” Deva kumɨnyawɨnna wɨgaimwange'na Pitarɨjɨ Jonɨmɨjɨ saraarɨ yaasɨna. 15Yaasɨna yesaraai Samerɨya sabanna yɨ'mavaawɨna yagɨla Jizaazarɨ wɨ'nadɨvɨsaraavɨna Gotɨyarɨ wɨdɨna “Gotɨyaigɨ, a'mwe yuya dara gɨnnya Kurya Tewaanyarɨ maapɨka!” 16Sare' dare'nesɨ. Sagaa' Pilipɨ Naanga Jizaazarɨ yayavɨna bavɨtaazɨya' yakegaa' Kurya Tewaanyai yuyaraavɨna mabwalawɨminaawi yakerera. 17Pitalyɨ Jonɨjɨ saraai Gotɨyarɨ wɨdɨna yagɨla kumɨre mɨnyagɨnyangɨ ata dathɨwanna kyagi Kurya Tewaanyarɨ maarɨna ye'.

18Saaimonɨ dara wanganake' “Nɨwaava, wɨdaasadisaraai ata kadathɨwamwaai Kurya Tewaanyarɨ kumɨ maarɨna jɨwaava!” Sara daka gannya nɨgwia maaraka Pitarɨjɨ Jonɨmɨjɨ wɨdɨna “Nɨmɨre nɨgwia yɨhɨmubɨma! 19Nɨmɨnyɨna ‘Sai a'mwe pwai kwarɨ ata kadathɨwagozɨ sahwai Kurya Tewaanyarɨ maarana!’ dakɨri sare dɨragɨnya' dɨnyɨjaayɨla!” 20Wɨdɨna kya' kɨrɨ' Pitai wɨdɨna “ ‘Nɨnnya nɨgwianna Gotɨyare yange' mubɨma!’ yawɨ'mwaanya'na gɨmɨjɨ gɨnnya nɨgwiajɨ Dɨkebanna dɨwodeigɨnyɨra. Yawɨta sa' kayaa'nanaangesɨra. 21Yɨwolya'na nemɨre wawɨnya' gɨmɨre' daaka! Sare' dare'nesɨ. Gotɨyai gɨmɨre sɨmunya yawɨsavɨ gwangamwa'. Sɨmunya kayaa'nanyavɨ gwangamwakeigɨnyɨ. 22Sarevɨdaa'nyɨ gɨnnyabwi kayaa'nanyabwi dasɨka! Mudɨkebwi jawɨramaaka! Wasɨ'na'gɨzɨ Naangerɨ duthana! ‘Nɨmɨ sɨmunya yawɨ'mwe'na nɨmɨre kayaa'nanya' dɨmarasɨ'na! Nayaa mwaalɨma!’ 23Sare' dare'nesɨ. Gɨmɨnyɨna dara wangamwe' ‘O, a'mwe dai wabarɨnna dɨragɨnna yadei daaka! A'mwe sɨmunya kayaa'na yawɨ'dei daaka!’ Dena gɨthɨwa,” wɨdɨna. 24Pitai wɨdɨna kya' Saaimonɨ saraarɨ wɨdɨna “ ‘Nyɨdɨwaala aane pɨrɨ' kɨrɨ' nɨmɨnyɨna nanyɨma'nadɨka!’ dena yɨhɨthɨwe'na dakɨlyɨ Naangerɨ duzɨla!” wɨdɨna ya' Saaimonɨ.

25Jizaazai yake'na tɨnna wanganagɨlya'na Pitalyɨ Jonɨjɨ saraai yuyaraavɨ wɨjalɨkurakɨna, yɨ, Naangere yagaalya' wɨdɨna yagɨla dɨnyɨna “Jeruzaalemɨ sawɨnna ayɨna wawakadera,” dɨnyɨna yagɨla kaanna wɨna. Kaanna wɨna yadi' Kwaaka Samerɨya anga mannɨkeba yagaala tewaanya' damarina yagɨla Jeruzaalemɨna wawagi.

Pilipɨ Murɨja naangerɨ wɨda' Kwaaka Yɨthɨyopɨya mwaalyarɨ.

26Naangere mamaayai ejelɨyai Pilipɨmɨ wɨdɨna “Yovɨrava'gɨzɨ tusa' Jeruzaalemɨdaasɨ Anga Gaazanevɨ dalaawa!” Tuta sa' a'mwe maayaba makwalaawɨnɨkesɨra. Sara wɨdɨna kya' Pilipɨ sara yɨna. 27Sara yɨna yadaasɨ, yɨthaa, Kwaaka Yɨthɨyopɨya mwaalyai a'mwe naangei gannya angewɨnna wɨna. Kwaaka Yɨthɨyopɨya a'mwe naange' Kaadeziya' maremwaaidesɨ Kwinɨya'. A'mwe sai Kaadeziya' kwinɨya savɨre nɨgwiajɨ nɨgwɨlalaakajɨ yuya sa maremwaaidelyɨ a'mwe naangei. Anga Jeruzaalemɨ Gotɨyarɨ yɨlaaya'na wiakei gannya kaarɨzɨyavɨ ayɨna wɨna. 28Ayɨna wɨna yada Gotɨyarɨ wɨ'nawɨjɨwakyaakei Pɨropetɨya Aazaayai pɨkarya yɨda'nɨke' tɨnna wanganna. 29Tɨnna wanganna yadaasɨ Kurya Tewaanyai Pilipɨmɨ wɨdɨna “Kaarɨzɨya savɨna wɨrata'na'gɨzɨ avaaina dɨwila!” 30Wɨdɨna kya' sawɨnna Pilipɨ kaanyave'na wɨna yaka dara dɨna “Pɨropetɨya Aazaayai yɨda'nɨke' bukuya' wanganaka dɨvanɨka.” Sara dɨna yaka yɨwaara'na “A'mweigɨ, yagaala sa' dangamanɨgɨnya' jawɨ'mwaana?” 31Yɨwaara'na kya' “Aawa, pwai mujɨwaainyɨ nyaja' gara yawɨrɨjɨwana?” A'mwe naangei sara wɨdaka Pilipɨmɨ wɨdɨna “Davɨna yɨlaaba'gɨzɨ nɨmɨnyaba mwaala'gɨzɨ sarevɨna dɨnyɨjɨwaakya!” Wɨdɨna kya' kaarɨzɨyavɨ wɨlamwaaina. 32Gotɨyare bukuya' wanganake' dare' dɨnɨkesɨ.

Sipɨzipɨya pwarɨ tamya'na makwodɨvɨtabaaibɨ'

A'mwera tamakya'na makuna yesalyɨ.

Dɨwɨnyare arɨla wɨrɨ'deryaba jaka majadevaaibɨ'

Kayaa'na kye' sai yagaala majake'nanyɨra.

33Bɨrala wɨdeva kotɨyavɨ sarɨna kwaasɨ wɨdesalyɨ.

Karame' Kwaaka davakɨ gamɨre gaalyabwi maaresa'

Gamɨreba sara yesaraavɨre kayaa'nanyabwi aai wɨ'nadelaka?

Pɨropetɨya Aazaayai sara dɨnɨkesɨ. 34Dɨnɨke'na a'mwe naangei Pilipɨmɨ wɨdɨna “Pɨropetɨyai dɨnɨke' aarɨna dɨnɨkavaka? Gamɨ sahwarɨna dɨngaka? A'mwe pwarɨna dɨngaka? Dɨnyɨdana!” 35Sara wɨdɨna kya' Pilipɨ Aazaayare yagaala savɨdaa'nyɨ nayaa wɨdaka Jizaazarɨna yuya yagaala tewaanya' nayaa wɨdɨna. 36Wɨdɨna kya' tuta pɨba wɨna yadi' aalɨbunya maalɨke' dɨ'nɨkewɨnna yɨ'mavaawɨna kyagi a'mwe naangei wɨdɨna ya' “Yɨthaa, dava aalya' dɨ'nɨ'. Aalyavɨ bavɨtaazɨya dɨnyajɨwaana? Nɨmɨ wi'na daaka?” 37Pilipɨ wɨdɨna “Gɨnnya sɨmunya yuya' Jizaazarɨna kalɨmwaga'gɨzɨ bavɨtaazɨya gyɨdeigɨnyɨ.” Wɨdɨna kya' wɨda' “Sara lɨmwamanɨge. ‘Kɨraazɨtɨyai Jizaazai Gotɨyare Gawaalɨvaangelyɨra,’ sara yawɨ'mweinyɨ.” 38Wɨdɨna yaka a'mwe naangei gannya wɨdaayaderɨ wɨdɨna “Kaarɨzɨya' muda'na yana!” Wɨdɨna kya' aalyavɨ a'mwe naangelyɨ Pilipɨjɨ saraai bwalaawɨna kyagi Pilipɨ bavɨtaazɨya wina. 39Bavɨtaazɨya wina kya' aalyavɨdaasɨ wɨlaabɨna kyagi Kurya Tewaanyai Pilipɨmɨ yarai galamakuna. A'mwe naangei Pilipɨmɨ tɨnna ayɨna mwanganyɨ yada yɨlaaya naanga yada gannya angewɨnna wɨna yakelyɨ. 40Kurya Tewaanyai Pilipɨmɨ makuna kya' Pilipɨ dara wanganake' “O, Anga Aazɨthothɨ damwaaihena!” Daka anga yuyangɨ kaanya yamaryada yagaala tewaanya' Jizaazarɨna wɨdada kaanna wɨna yada anga Sizaarɨyana yɨ'mavaawɨna yakegaa'nanyɨ.

Currently Selected:

Apozelɨyara 8: byr

Highlight

Compare

Copy