Apozelɨyara 7

Sɨtivenɨ wɨdake'nesɨ.

1Gotɨyarɨna Mubɨthɨka Yɨra'de Naangei Sɨtivenɨmɨ yɨwaara'na ya' “Nedɨwaasa' gɨmɨnyɨna nebulya'na dɨngaka?” 2Yɨwaara'na kya' Sɨtivenɨ wɨda' “A'mwe naangeihi, nya'mweihi, dɨnyu'nyɨla! Gotɨya byaannakei Kɨgaakuna Ne sɨnnawɨnya Evɨraamɨ Anga Aaranɨ mamwalaawi yaakegaa' Kwaaka Mezopotemya kuna mwalyaakegaa' Evɨraamɨmɨ yɨma'naabɨna yaka 3wɨdɨna ‘Gɨnnya kwaakevɨjɨ gɨnnyaraavɨjɨ ya'mava'gɨzɨ kwaaka pɨrɨ' givwarɨdaakwɨdevɨna dɨwodeigɨnyɨra.’ 4Wɨdɨna kyaa' savɨna Kwaaka Kaalɨthɨyadaasɨ Evɨraamɨ ya'ma'na yaka Anga Aaranɨ mwaalɨna. Mwaalɨna kya' Evɨraamɨmɨ ganɨmaangei mena balyaakegaa' Gotɨyai wɨdɨna ‘Givwarɨdaakwɨdewɨnna dɨwona!’ Wɨdɨna kya' kwaaka davakɨ sarɨmɨ mwaaihasawɨnna bɨna. 5Mi'na bɨna kya' sagaa' Gotɨyai kwaaka yarai mujaayɨ yaa'. Kwaaka naangeva' mujaayɨ, kwaaka maalɨkejɨ' yarai mujaayɨ yaakesɨra. Mujaayɨ yake' kɨrɨ' yune naanga nebulya'na wɨdɨna ‘Dɨvi kwaaka davɨ kagɨzaava'mujɨ gɨmɨre' dɨviyara gɨmɨreraavɨre' waragothesɨra.’ Sagaa' Gotɨyai yune naanga nebulya'na sara wɨjaakegaa' Evɨraamɨ kaimɨraavɨmaayai mwalyaakelyɨ. 6Gotɨyai da' wɨdɨna ‘Menyaraavɨrewɨ gɨmɨrera mwaalɨna yapɨjɨ kalavuzɨwawɨnya' yɨpɨ'derera. Kalavuzɨwawɨnya' yadaapɨjɨ pwara kayaa'na yɨpɨ'derera. Kwarame naanga naanga (400) wavɨla'daawori kayaa'na mwaaibɨ'derera. 7A'mwe anga naanga pimagɨnyara gɨmɨreraavɨ dɨragɨnna maremwaaibɨ'deraavɨ maryawɨbwarɨdeinyɨra. Sara kamaryawɨbwara'mujɨ kwaaka savakɨ gɨmɨrera yagalya'ma'na yapɨjɨ dava bamwaalapɨjɨ yɨleyagaala nyɨdɨpɨ'devanyɨ.’ 8Wɨdɨna yaka yagaala pɨrɨ' wɨdɨna ‘Nɨmɨre yagaalya'na gɨmɨnyɨjɨ gɨmɨjɨyaraavɨjɨ kɨlaakejɨ' davɨna jɨla!’ Gotɨyai sara wɨdɨna kyaa' ganaange' Aazakɨmɨ maryaakegaa' yɨrɨka ati ata purɨdaasɨ daryaai darɨkɨ Evɨraamɨ gamɨre kɨlaakejɨ' davɨna. Mi'na davɨna kyaa' dɨvi Aazakɨ gamɨrei Jaikopɨmɨre kɨlaakejɨ' davɨna kyaa' dɨvi Jaikopɨ Ne sɨnnawɨnya atɨraai sɨvɨla purɨdaasɨ pwaraalyaraavɨre kɨlaakejɨ' davɨna yaakebulyɨ Juyainaavɨrebwi.

9Ne sɨnnawɨnyaraavɨ kumɨre kuvɨgwaalaangei Jozepɨyarɨna tɨganaarya kyaa' sɨnna tɨka kudayaa' pwaraavɨ yaasɨna kyaa' sahwara Kwaaka Yɨzɨpɨna yaasɨwa'wawɨnya'na makuna. Wi'na makuna kyaa' kɨrɨ' Gotɨyai gamɨjɨ mwaalɨna. 10Mwaalɨna yaka Jozepɨyarɨ kayaa'na yaasagaa' Gotɨyai dɨragɨnna wɨmwaaihɨna yaa'. Kwaaka Yɨzɨpɨ maremwaaidei Peroyaryaba Jozepɨyai daa'dɨ'nyɨ Gotɨyai tewaanna wina kyaa' Peroyai dara wanganyaake' ‘Ai, a'mwe dai nawɨ'nyai sɨdu'nakei daaka!’ Sara daka wɨdɨna ‘Nɨmɨnyɨna Kwaaka Yɨzɨpɨ davakɨjɨ a'mweraavɨjɨ nyɨdaayadɨvɨsara nɨmɨre angevɨ mwaaihasaraavɨjɨ dɨmaremwaala!’ 11Wɨdɨna kyaa' Jozepɨyai maremwaaidɨ'nyɨ Kwaaka Yɨzɨpɨjɨ Kwaaka Kenaanɨjɨ yuya sabanyaai mɨjɨka naange' yɨma'nyɨna. Mena yɨma'nyɨna kyaa' a'mwera mɨjɨka naanga wiadaa'nyɨ Ne sɨnnawɨnyara tɨka munne'na bɨrɨna bɨrɨna kyaa' mɨjɨka wina. 12Mɨjɨka wina kyaa' sagaa' Jozepɨyarɨ ganɨmaangei Jaikopɨ dara wɨ'nyaake' ‘O, Kwaaka Yɨzɨpɨ wapaaya witɨzɨla darɨka!’ Daka pɨgaa' gawaalɨvaangera Ne sɨnnawɨnyaraavɨ wɨdaasɨna. 13Yɨzɨpɨna wɨdaasɨna kyaa' ayɨna bɨna kyaa' pɨgasaai wɨdaasɨna kyaa' Jozepɨyai gya'mweraavɨ nayaa wɨdɨna ‘Jozepɨyainyɨ. Sarɨnnya sɨrya'mweinyɨ.’ ‘Jozepɨyainyɨ,’ wɨdɨna kyaa' Peroyai dara yawɨryaake' ‘Ai, Jozepɨyare yɨsavaakɨyara sara daaka!’ 14Mi'na dɨna kyaa' Jozepɨyai ganɨmaanga Jaikopɨmɨna yagaalya' wɨdaasɨna ‘Nɨmwai, Kwaaka Yɨzɨpɨ davanna gɨmɨjɨ gɨmɨre yuyajɨ saihi dɨvideihɨlyɨra.’ Sagaa' Jaikopɨmɨre jɨlɨkaimɨraaya 75 mwalyaasangɨra. 15Wɨdaasɨna kyaa' Kwaaka Yɨzɨpɨ saba Jaikopɨ wɨna kyaa' dɨvi saba gamɨjɨ Ne sɨnnawɨnyarajɨ balɨna. 16Balɨna kyaa' dɨvi ayaba Anga Sɨkemɨ kumɨrera kumɨre yagɨnya makuna yeva simaangevɨ wakɨna yaa'. Simaange' kɨgaakuna Evɨraamɨ Yɨsavaakɨya Emoyaraavɨ nɨgwia mubyaakesɨ.

17Gotɨyai Evɨraamɨmɨ yagaalya' wɨjaaka nebulya' yɨma'nya'na aya kɨgaa' yɨma'nyɨna kyaa' Kwaaka Yɨzɨpɨ nemɨrera kwala naanga naanga yarai yɨma'nyɨna. 18Yɨma'nyɨna kyaa' Kingɨya gei Kwaaka Yɨzɨpɨ gaai maremwalyaakegaa'nanyɨ. Kingɨyai sai Jozepɨyarɨna myawɨryaakelyɨ. 19Gaai maremwaaina yaka nemɨreraavɨ kwaasɨ yaka kayaa'na yɨna kyaa' Ne sɨnnawɨnyaraavɨ daanga naanga wina yadaasɨ Kingɨyai wɨdɨna ‘A'mwemɨlɨki, sarɨnnya a'mwe bwaranyaraavɨ kamaarapɨjɨ mwasawɨnna sahwaraavɨ dɨmarasɨ'nyɨla baibɨzaraavɨ! Yarai dɨmarasɨ'nyɨla!’ 20Mena wɨdɨna kyaa' sagaa' ganaange' Mozɨzarɨ maarɨna. Mozɨzai bwaranya nawɨ'nyalyɨ. Mozɨzarɨ maarɨna kyaa' lɨka yulyakɨna kyagi lawe dɨkaai dɨkɨ ganɨmaangere angevɨ kave mwaalɨna. 21Kave mwaalɨna kyaa' gamɨre angevɨdaasɨ pɨwɨ wakɨna kyagi Kingɨyai Peroyare garaavaange' maranganna yaka ‘Nɨnnyalyɨra,’ daka gannyarɨ maremwaaina. 22Maremwaaina yadɨsɨ Yɨzɨpɨ mwaalyaraavɨre sɨduta yuyabwi wɨjɨwaakɨna kyaa' a'mwe naangei wawɨnya dɨragɨnya' yadei yɨma'nyɨna yaka yagaala nawɨ'nya' dadei yɨma'nyɨna yaakelyɨra.

23Kwarame a'mweraare ata sɨvɨlɨraai Mozɨzarɨ wavɨla'na kya' sai sɨmunyavɨ yawɨ'na ‘Peroyare angevɨ yuyagaa' namwaaimudɨka! Nɨnnyara Yɨzɨrelɨyaraavɨ angyɨrɨ'maata yɨma!’ dɨna yaka kaanna wɨna. 24Kaanna wɨna yaka dara wanganake' ‘O, Yɨzɨpɨ mwaalyai nɨmɨrerɨ kayaa'na jɨvanɨka!’ Sara daka ‘Padaihasamaasa'nana,’ daka mɨnya maaraka Yɨzɨpɨ mwaalyarɨ tamakɨna. 25Wi'na tamakɨna yaka yawɨ'na ‘Nɨnnya nya'mwera dara yawɨ'na “Gotɨyai Mozɨzarɨ yasaabɨna kyɨwa' Mozɨzai nevadaihasamaaradelyɨra,’ ” Sara yawɨ'na kyaa' kɨrɨ' kumɨ gamɨnyɨna sara myawɨrina. 26Sara myawɨri kyaa' mwanyavɨ Yɨzɨrelɨyaraai tannyɨna yadaakɨlyɨ Mozɨzai tɨnna wanganaka. ‘Munya yɨrɨla dɨwagɨma!’ daka wɨdɨna ‘A'mweraaihi, dɨnyu'nyi! Kɨrɨmɨdaraaihi mwaaihɨlya'na be'na tannɨvanɨgɨlyaraaihɨlaka?’ 27Wɨdɨna kyaa' pwai gya'mwerɨ kayaa'na yakei Mozɨzarɨ yɨtavaka yɨwaara'na ‘Nemaremwaaidɨnyaigɨ, kotɨya' neyawɨbwarya'neigɨ aai gɨthahɨlakakeigɨnaka! 28Wona Yɨzɨpɨ mwaalyarɨ tamakyawaaihɨnyabaaibɨ' dɨnyɨramakɨjɨwaana?’ 29Yɨwaara'na kyaa' Mozɨzai kadɨka sara wɨ'nyɨna yaka ‘Yuyara sara wɨ'nɨwaasara daaka!’ daka Kwaaka Yɨzɨpɨdaasɨ lɨkaanya wɨna yaka maavewɨ Kwaaka Mɨthɨyanɨ mwaalɨna. Saba mwaalɨna yada kaimɨraayaraarɨ yawakɨnyɨna yaa'.

30Dɨvi kwarame a'mweraare ata sɨvɨlɨraai wavɨla'na kya' a'mwe maayaba Mugunya Saainaaya sɨmagɨ Mozɨzai mwaalɨna. Saba mwaalɨna yadɨ'nyɨ Gotɨyare mamaayai ejelɨyai walaabaka yɨsɨkɨ wɨlɨna kyaa' yɨsɨ' dɨka yɨdɨna yada dɨtaalɨta wanyɨna. 31Dɨtaalɨta wanyɨna yadaa'nyɨ Mozɨzai tɨnna wanganaka nɨ'nɨka yaka dɨna ‘Sa' berɨ' dɨngaka? Tɨnna nayaa wanganɨma!’ dɨna yaka yɨsɨkyabanna kaanna wɨna. Kaanna wɨna yaka kɨrɨ' Naangere maanguraaya' kadɨka wɨ'nyɨna 32‘Gɨmɨre Ne sɨnnawɨnyaraavɨre Gotɨyainyɨra. Evɨraamɨjɨ Aazakɨjɨ Jaikopɨjɨ saraavɨre Gotɨyainyɨra.’ Kadɨka sara wɨ'nyɨna yaka lɨka dɨkwosɨ'nya'nei bɨ'bɨta yɨna yaka yɨsɨkɨ tɨnna mwanganyɨna. 33Tɨnna mwanganyɨ kyaa' sagaa' Naangei wɨdɨna ‘Mwaaiheinyɨna kwaaka da' gɨrɨkita maaya' warɨke'na kwaabɨzɨvɨlyawaarɨ dɨlabwa'mwagakya! 34Kwaaka Yɨzɨpɨ nɨmɨre a'mweraavɨ daanga naanga wɨvɨdaa'nyɨ wangamwa. “Aakai, aakai,” jaka kadɨwaa' kadɨka wɨ'nɨwa. Kadɨka wɨ'nena padaihasamaasa'na waimwaabe. Yarala! Sare'na Kwaaka Yɨzɨpɨna gɨthaasɨdeinyɨra.’ Sara wɨdɨna yaa' Gotɨyai.

35Mozɨzai darɨ Yɨzɨrelɨyara bɨrala wɨjaasalyɨ. ‘Nemaremwaaidɨnyaigɨ kotɨya' neyawɨbwarya'neigɨ aai gɨthahɨlakakeigɨnaka!’ yɨwarayaasalyɨ. Sahwarɨ Gotɨyai wɨdahɨlakaka wɨdaasɨna ya'. Yɨzɨrelɨyaraavɨ maremwaaidei padaihasamaa'derɨ wɨdaasɨna yaakelyɨ. Yɨsɨkɨ dɨka yɨdadaasɨ yɨsɨkɨ mamaayai wɨlamwalyaakei Mozɨzarɨ wɨgaimwagyaakelyɨ. 36Gotɨyai wɨdaasɨna kyaa' Kwaaka Yɨzɨpɨdaasɨ Mozɨzai a'mweraavɨ jɨvwaramakabɨna. Kwarame a'mweraare sɨvɨlatɨraalyagaa' Mozɨzai a'mweraavɨ wɨgaimwange'na atɨka maru'narya'nejɨ wɨjɨwaainyajɨ sa yɨna yaakelyɨ. Kwaaka Yɨzɨpɨ sabajɨ Saalaalya Wayaake' wo'nɨkebajɨ a'mwera maayaba kayaa'nanyabajɨ saba sara yɨna yaakelyɨ. 37Nabaai sai Yɨzɨrelɨyaraavɨ wɨdɨna ‘Gotɨyai nyɨdasaabakabaaibɨ' sarɨnnyai sɨrya'mwei pɨropetɨyai Gotɨyarɨ wɨ'nawɨjɨwaakaderɨ sarɨmɨnyɨna wɨdasaabathelyɨ Gotɨyai,’ wɨdɨna yaakelyɨ Mozɨzai. 38Wawɨnya maayaba sai Gotɨyare kusɨlaanyasɨ mwalyaakelyɨ. Saba Mugunya Saainaayavɨ ejelɨyai wɨdɨna kyaa' Mozɨzai Ne sɨnnawɨnyaraavɨ sara wɨdɨna yaakelyɨ. Gotɨyai yagaala gaalyabwine nejaaya'ne Mozɨzai wɨjaake nemɨnyɨna dɨnɨkengɨra.

39Ne sɨnnawɨnyara Mozɨzai wɨjaake' kadɨka mu'nyɨ, mamɨdɨnyɨ yaa'. Aawa. Gamɨnyɨ galazekɨvaina yevera kumɨre sɨmunyangɨ yawɨ'na ye' ‘Kwaaka Yɨzɨpɨ tewaanyabanna ayɨna wawaanneinera! We'!’ 40Yawɨ'na yɨna yeva Mozɨzai mugunyavɨ mwaalakegaa' A'mwe Eronɨmɨ wɨdɨna ‘Nemɨnyɨne Naangei a'mwa'mwerɨ kyavɨkarya'gɨzɨ A'mwa'mwei nejɨvwaramakwona! Sare' dare'nesɨ. Kwaaka Yɨzɨpɨdaasɨ Mozɨzai sai nejɨvwaramakabakei gawɨ mwaalɨka? Nemɨ myawɨryɨwona.’ 41Sara wɨdɨna yeva a'mwa'mwei bulɨmakaawoya dɨwɨnyarɨ yavɨkaryeva yɨkunaabɨthɨka wɨjaaya'ne'na kwaasɨ naangerɨ wɨdɨna ‘Naangeigɨ, yɨkunaabɨthɨka da' gɨmɨnyɨne' tamwona.’ Wɨdɨna yeva sahwara yavɨkaryaasarɨ yɨlaaya yɨna yadɨvɨ' tɨka munne nyɨna. 42Tɨka munne nyɨna kyaa' Gotɨyai kumɨnyɨ gɨnyɨwanna yaka tewaanna myɨ yaka dɨna ‘Kayaa'nanyara kwaasɨya'na nyɨlyarɨjɨ lawerɨjɨ sɨlɨngaamɨnyaraavɨjɨ yɨlaaya yɨpɨka! Sara yɨlaaya yapɨjɨ waryaanyara yɨma'nɨpɨ'dere.’ Gotɨyai dɨna yaakabaaibɨ' dɨvidaasɨ Gotɨyarɨ wɨ'nawɨjɨwaakyara pɨkarya yɨda'na

‘Yɨzɨrelɨyaihi, nɨmɨnyɨne mɨka!

A'mwamaayaba kwarame potiyagaa'

Bulɨmakaawoyaraavɨ tameva manyɨjayaa'.

43Kwaasɨ naangei Molokɨmɨne yɨvɨkanga' yɨkwa'dɨvɨ'

Pwai Repaanɨmɨne sɨlɨngaamɨnya a'mwa'mwe' yɨkwa'dɨvɨ'

A'mwa'mwe sa yavɨkaryeva yɨleyagaala wɨdɨna yadɨvɨsaihɨlyɨ.

Sabwine'na Anga Bavɨlonɨ aagimagɨ menyabanna yɨhɨmakudeihɨlyɨra.’

Sara dɨnɨkesɨ.

44Dɨvidaa'nyɨ a'mwamaayaba Ne sɨnnawɨnyara Gotɨyai saraayaba mwaalake'ne jalɨkurakya'ne kwaabɨyɨvɨkange' yavɨkarina. Gotɨyai Mozɨzarɨ sara wɨjaakabaaibɨ' sara yavɨkaryaasasɨ. Gotɨyai pikɨzaaya'bɨsa' wɨjɨwaainyɨna yaake' Mozɨzai tɨnna wanganyaakabaaibɨ' yavɨkaryaasasɨ. 45Yavɨkarina kyaa' dɨviyara Ne sɨnnawɨnyara kwaabɨyɨvɨkange' yɨkwavaabɨna. Sagaa' Gotɨyai ajɨmya pɨnɨngɨyaraavɨ yɨrawaasɨna kyaa' dɨviyarajɨ Jozuwaasɨ sara Maaveraavɨre kwaaka maarɨna yaasara davanna Gotɨyare kwaabɨyɨvɨkange' yɨkwavaabɨna ye'. Yɨkwavaabɨna kyaa' kwaaka dava kuna wa'dɨ'nyɨ Ne Devitɨ mwalyaakegaa'na. 46Devitɨ mwaaidɨ'nyɨ Gotɨyai wanganaka dɨna ‘Devitɨ a'mwe tewaanyalyɨra.’ Dɨna kyaa' Devitɨ Gotɨyarɨ yɨwaara'na ‘Jaikopɨmɨre Gotɨyaigɨ, gɨmɨnyɨna ange' madɨma! “Yo,” kanyɨda'gɨzɨ madɨdeinyɨra.’ 47Yɨwaara'na kyaa' Gotɨyai gevwi kyawɨryaa' Gawaalɨvaanga Solomonɨ ange' gamɨnyɨna madɨna yaakelyɨ.

48Sa'na kɨrɨ' a'mwera angengɨ madɨvɨsangɨ Gotɨyai Munya Ke'mwewɨnyai yuyaraavɨjɨ yuyangɨjɨ wavɨla'dei mamwaalyadelyɨ. Angengɨ mamwaalyade'na pɨropetɨyai Gotɨyarɨ wɨ'nawɨjɨwaakadei dɨnɨkabaaibɨsasɨ.

49Naangei dɨnɨkesɨ. Sɨgunya naangeba maremwaaidɨnyainyɨ.

Kingɨyare namwaalyɨsa'bɨsavɨ Sɨgunyavɨ walamwaaina yadɨnyainyɨ.

Paihɨsa'bɨta Kwaaka maalɨka davakɨ maremwaaidɨnyainyɨ.

Nɨmɨre sɨvɨla Kwaaka yuyavakɨ paihɨremwaaidɨnyainyɨ.

Nɨmɨ Naangeinyɨne ange' gara madɨvɨtaihɨlaka?

Nawɨ'nyaba kwaamu' mwaalɨdeva gava warɨka?

50Yuyangɨ kaavɨlyai aaihwalaka? Nɨmɨ sahwainyɨra!

Sara dɨnɨkesɨ.

51Ne sɨnnawɨnyarabɨsaihi Kurya Tewaanyai yɨhɨthada yuyagaa' wanganakɨna yadɨvɨsaihɨlyɨ. Sarɨnnyabwi dɨragɨnna yawɨ'dɨvɨ' Gotɨyarebwi navɨka yadɨvɨsaihɨlyɨ. Sarɨnnya yawɨta Maaveraavɨre yawɨ'dɨvɨsaihɨlyɨ. Sɨryakwalaangera Gotɨyare yagaala yuya pihadɨka yɨna yaatabaaibɨ' sarɨmɨ sara yadɨvɨsaihɨlyɨ. 52Sarɨmɨre Ne sɨnnawɨnyara Gotɨyarɨ wɨ'nawɨjɨwaakade aane pwai kwarɨ yuyagaa' kayaa'na yaasara midaa'! Sara kayaa'na yaasara Gotɨyai wɨdaasaderaavɨ tamakɨna ye'. Kɨgaakuna Gotɨyarera wɨdɨna ‘Dɨvi yɨda'maraangei Gotɨyarɨ wɨdaayadei bathelyɨ.’ Sara wɨdɨna yaasaraavɨ sarɨmɨrera tamakɨna. Tamakɨna kyaa' Gotɨyarɨ wɨdaayadei mena bɨna kya' sarɨmɨ kotɨyavɨna makuna yeva sahwarɨ kayaa'na tamakɨna yɨwa'daa'. 53Gotɨyare Kɨwɨnya ejelɨyara Gotɨyai wɨdaasadera kyɨhɨzaave' kɨrɨ' sabwi myɨvanɨgasaihɨlyɨra,” sara wɨda' Sɨtivenɨ.

Sɨtivenɨmɨ sɨlyajɨ lɨvaramakesa'nesɨ.

54Kaajolɨyara Sɨtivenɨ wɨdadaasɨ kadɨka wɨ'nadaapɨjɨ kumɨre sɨnna tɨka wɨda'daasɨ dɨragɨnna maadɨthɨwɨ'nya ye'. 55Dɨragɨnna maadɨthɨwɨ'nya kye' kɨrɨ' Sɨtivenɨ Kurya Tewaanyai yunebanna wɨlamwaaidɨ'nyɨyai Sɨgunyavɨ maranganaka dara wanganake' “Gotɨyare byaannyabwi tɨnna wangamanɨge. Gotɨyare aangasɨmagɨ Jizaazai dathaavɨka!” 56Mi'na daka wɨdɨna “Yɨthaanyi, Sɨgunya' baasɨnɨkevɨ wangamwa. Gotɨyare aangasɨmagɨ A'mweraavɨne Kaimɨraayai daavɨkerɨ wangamwa.” 57Wɨdɨna kya' sɨnna tɨka wɨda'daasɨ jaka naanga deva kadɨka mu'nya'na asa kadɨkengɨ tɨlavalɨmwaga'nyɨna yeva gamɨnyawɨnna avaaizɨmunyasɨya yuyara yarai kaanyave'na bɨna. 58Kaanyave'na bɨna yeva Sɨtivenɨmɨ galalɨmwanna yɨna yeva makuna yɨna yeva anga naangeba mwasɨlaa wasɨ'na yɨna yeva sɨlyajɨ gamɨnyɨ lɨwakɨna. Kotɨyavɨ kwaasɨ yagaala wɨjalɨkurakesara kunnya yɨvɨta taapainyɨna yeva Mɨgɨnya Solɨ wo'nɨkeryaba yarai wakɨna yeva sɨlyajɨ gamɨnyɨ lɨwakɨna. 59Yarai lɨwakɨna yadaapɨjɨ Sɨtivenɨ Naangerɨ jaka wɨdɨna “Naanga Jizaazaigɨ, nɨmɨre kuryarɨ dɨmaaka!” 60Wɨdɨna yaka kwadaai gɨlɨna yaka jaka naanga wɨdɨna “Naangeigɨ, kumɨnyɨne kayaa'na nyɨvanɨgasa'na myawɨ'dɨnnera!” Wɨdɨna yaka se balɨna ya'.

Currently Selected:

Apozelɨyara 7: byr

Highlight

Compare

Copy