Apozelɨyara 24

Juyara Polɨmɨ kotɨya yesa'nesɨ.

1Sawɨta atina kajɨnna' Anga Sizaarɨya Gotɨyarɨna Mubɨthɨka Yɨra'de Naangei Ananaayazalyɨ a'mwe naanga pwarajɨ pwai kotɨyagaala dadei Tetalaazalyɨ walaawɨna ye'. Walaawɨna yeva Pilɨkɨzai Ga'maanɨya naangeryaba daavɨna yeva Polɨmɨna wɨde'. 2Sara kude' Ga'maanɨyai gamɨnyɨna jaka kuda' sai wɨlaabɨna kya' Tetalaazai Polɨmɨna kotɨya' wɨda'

“A'mwe naangeigɨ Pilɨkɨzaigɨ, gɨmɨ nemaremwaaidɨnyagaa' narya tewaanyagaa' dahaakɨra. Gɨmɨre sɨduta sara yawɨragɨna sara yadaa'gi nemɨre anga naanga dimagɨnya' tewaanya yɨma'nɨvanɨ'. 3Yuyagaa' yunebanna sangɨne'na yɨlaaya yona yɨvanɨgɨnyanna ‘Su! Su!’ dɨragɨnna dɨvanɨgoinera. 4Naangegaa' nadɨnaadɨka! Dahaa' kave mwaala'gɨzɨ nemɨre yagaala maalɨka kadɨka wɨ'nya'na dɨragɨnna githanganaana! 5Sare' dare'nesɨ. A'mwe dai Juyainaavɨna kayaa'na yadelyɨra. Kwaaka yuyavakɨ Juyara mwaaihasabanna dai kwawa' maanga dɨneva mala tannyɨna yesalyɨra. Naazaretɨ mwaalyarerajɨya naangelyɨ, a'mwe dala. 6Nemɨre Yɨleange'na ‘Gɨrɨka yɨma'nana!’ kada' saba nayaa galalɨmwanna yo. ‘Sarɨ nemɨre Kɨwɨnyabwina kotɨya' yaana!’ yawɨ'na kyo 7aawɨlasaraavɨ maremwaaide naangei Lɨzɨyaazai bɨna yaka nemɨnyabadaasɨ a'mwe darɨ dɨragɨnna yɨpalamakuna ya'. 8Yɨpalamakuna yaka naanga neda' ‘Yagaainakeihi Ga'maanɨya naangeryabanna kotɨya' jɨla!’ neda'. A'mwe darɨ yɨwaarava'gɨzɨ gɨmɨ saigɨ dara yawɨ'na jɨthesɨ ‘Juyara sara nyɨdɨvanɨgasa yune nebulyangɨra.’ ” 9Tetalaazai mi'na kuda' Juyara avaaina yawɨreva wɨde' “Gɨthɨwake yuya sasarengɨra.”

Pilɨkɨzaryaba Polɨ wɨdake'nesɨ.

10Sagaa' Ga'maanɨya naangei Polɨ yagaala wɨja'na ata yɨda'na kya' sai wɨda'

“ ‘Kwarame pɨjaakuna yawɨbwa'dɨnyaigɨ nemɨre anga naanga dimagɨnyainaavɨ yagaala jawɨbwarakɨna yadɨnyaigɨnyɨ,’ yawɨ'mwe'na yagaala gɨthɨde'na yɨlaaya yɨvanɨge. 11Jeruzaalemɨ Gotɨyarɨ yɨlaaya'na gaai kyɨlaawe sagaa'daasɨ sawɨta atɨraai sɨvɨla purɨdaasɨ pɨrɨwaalya nejɨnna'. Sare'na gɨmɨ saigɨ dara wangadɨza' ‘O, Polɨ sara nyɨdɨwake' nebulya'na daaka!’ 12Gotɨyare Angevɨ pwarajɨ maanga madɨnyɨ yadaawojɨ Juyara nyangane'. Nabaai, Juyaraavɨre lotuangengɨjɨ Jeruzaalemɨ adusangɨjɨ kwala bwa'naanya mumwaaihye. 13Tewaanya gavebwi yeinyɨ Juyara nyangane'. Nɨmɨ myeinyɨna kwaasɨ yagaalya' gɨthɨwaasa' nebulya'na magɨzɨwaa'. Aawa. 14Yagaala pɨrɨ' gɨthɨwaasa' nebulyasɨ. Gotɨyarɨ nemɨre Ne sɨnnawɨnyaraavɨrerɨ yɨlaaya yadɨ kumɨ mudɨkebwi kwaasɨyaburɨ dɨmanɨgasabwi mɨdɨdɨnyainyɨra. Sara yadɨnya' kɨrɨ' Ne Mozɨzare kɨwɨnya yuya yɨda'nɨkejɨ Gotɨyarɨ wɨ'nawɨjɨwakyaasaraavɨre yagaala yɨda'nɨkejɨ lɨmwadɨnyainyɨra. 15Gotɨyarɨna kumɨ sahwara sara yawɨ'manɨgasa' yemwaalyabwi sara yawɨ'manɨge. A'mwe yuyara a'mwe yɨda'maraangerajɨ a'mwe yɨda'na myadɨvɨsarajɨ sara baryara dɨkaapɨ'de'na sara yawɨ'daa yemwaaimanɨgo. 16Sare'na Gotɨyalyɨ a'mwerajɨ tɨnna nyangadɨvɨ' yuyagaa' tewaanna mwaaidɨnya'na ‘Nɨmɨre sɨmunya padaihɨrakya' tewaanyabwi daaka?’ sɨduta sara yawɨ'dɨ yɨvanɨgeinyɨra.

17Jeruzaalemɨ ya'ma'na yena pɨba pɨba kaanya yamaryadaazɨ kwarame kwalaalya kanyavɨlava' nɨnnya anga naanga dimagɨnyaraavɨne nɨgwia makwɨya'najɨ Gotɨyarɨ sipɨzipɨya wɨjaaya'najɨ Jeruzaalemɨna ayɨna yimwa'daawade. 18Yɨlaawena gɨrɨkita'nanya wasɨ'nya'ne mena yena Gotɨyarɨ wɨjavadaazɨ Gotɨyare Yɨleangevɨ nyangamwa'daa'. Nyangamwa'daasagaa' kwala bwa'naanya' mamwaalyɨwa'daa'. Jakejɨ malyasɨ sa myɨwa'do. Nɨmɨ sa myadaazɨ Juya pwara Kwaaka Ezɨya mwaalyara mwaimwa'daa'. 19Sahwara nɨmɨnyɨna ‘Yagaainakeina daaka!’ yawɨpɨjɨ kwajɨ davanna mulaabi be'na yeva gɨmɨnyaba madaayeva yagaala sa' manyɨjɨvanɨga'? 20Davanna mulaabi kyɨwaa' Kaajolɨyaraayaba daa'dezɨ Kaajolɨyara nɨmɨnyɨna ‘Sai kayaa'nanya sara ya',’ berɨva dɨmwa'daava? A'mwe dara nyɨdɨpɨka! Nɨmɨ kayaa'na yeinyɨ daaka? 21Yagaala gave da' dɨngaka? Kumɨnyaba daa'dɨ jaka dara wɨdɨwa'de. ‘A'mwera balyaasara dɨkaapɨ'derera,’ lɨmwamanɨge'na dahaa' kotɨya' nyɨjɨvanɨgasaihɨlyɨra. Sara wɨdɨwa'de'na maanga dahanyɨdɨvanɨgava?”

22Sagaa' Pilɨkɨzai Kɨraazɨtɨyareraavɨrebwi sɨduta yawɨrakei Juyaraavɨ wɨda' “Wikɨra. Jemwaalyideihɨlyɨ. Aawɨlasaraavɨ maremwaaide naangei Lɨzɨyaazai kwalyaabozɨ sarɨmɨre yagaala jawɨbwarakɨna yɨdeinyɨra.” 23Sara wɨdaka aawɨlasaraavɨ maremwaaiderɨ Polɨmɨna wɨda' “Polɨmɨ damera wangabɨka! Kalavuza' dɨragɨnna nujaavɨpɨdɨka! Gamɨre gya'mwera angyɨrɨ'maata yapɨjɨ wɨjaavɨpɨka! Sare'na tewaanyasɨra.”

Polɨ Pilɨkɨzalyɨ Dɨruzɨlasɨ sayorɨ wɨdake'nesɨ.

24Sawɨta pɨnɨ kajɨnna' Pilɨkɨzai gannya balaange' Dɨruzɨlasɨ bɨna ya'. A'mwe Dɨruzɨla' sa' Juyasɨra. Mi'na bɨna yaka Polɨmɨna kudaasa' a'mwera Kɨraazɨtɨyai Jizaazarɨ lɨmwangebwina Polɨ wɨdadaasɨ Pilɨkɨzai kadɨka wɨ'nyɨna ya'. 25Kadɨka wɨ'nyɨna kya' kɨrɨ' yɨda'maraangeburɨnajɨ nayaa maremwaainyaburɨnajɨ Gotɨyai kotɨya nejɨdavade' yɨma'nadevurɨnajɨ kuda' Pilɨkɨzai lɨka yaka ja'nawɨdɨna “Wikɨra. Dahaa' ja'mavadera. Pɨgaa' navɨka kamwaala'mujɨ yagaala pɨnɨ dakadera.” 26Wɨdaka yawɨ'na ya' “Polɨ dɨna ‘Pilɨkɨzai nɨmɨnyɨna tewaanna yana!’ dɨna yojɨ nɨgwia yanga nyɨjaavadei dɨngaka?” Sara yawɨ'da kwalaalyagaa' Polɨmɨna wɨdaasaka saraai dɨnyɨna yagi.

27Kwarame pɨrɨwaai kwavɨlava' Ga'maanɨya naanga mudɨkei Pezɨtaazai Pozɨyaazai bɨna yaka a'mwe Pilɨkɨzare kwaakevɨ maremwaaideryaba maremwaaina ya'. Pilɨkɨzai wawakegaa' sai yawɨ'na ya' “Juyara nɨmɨnyɨna yɨlaaya yɨpɨka!” Yawɨ'na yaka kalavuzangevɨ Polɨmɨ kuna wɨmwaihɨwɨna ya'.

Currently Selected:

Apozelɨyara 24: byr

Highlight

Compare

Copy