Apozelɨyara 20

Kwaaka Maazathonɨyana Kwaaka Gɨrizana wawake'nesɨ.

1A'mwera kayaa'na yesagaa' wavɨla'na kya' mɨdɨdɨvɨsara yɨkabya'na Polɨ pwaraavɨ wɨdaasɨna ya'. Wɨdaasɨna kya' mɨdɨdɨvɨsara yɨkabɨna kye' yɨvaimwagya'najɨ dɨhaa'bwasa'najɨ yagaala wɨdaka wɨda' “Kaanya wɨdera. Tewaanya dɨmwaalyɨla!” Mi'na wɨdaka Maazathonɨya sawɨnnei ya'ma'na ya'. 2Ya'ma'na yaka kwaaka sangɨ yagaala naanga a'mweraavɨ dɨragɨnya' dɨhaa'bwasa'na wɨjɨwaakada kaanya yamarina ya'. Kaanya yamarina yaka Kwaaka Gɨrizana yɨ'mavaawɨna yaka 3saba lawe dɨkaai dɨsa wavɨla'daasɨ mwaalɨna ya'. Mwaalɨna yaka “Sɨpɨya' Kwaaka Sɨrɨyana nyɨmakwodera,” yawɨraka dara wɨ'nake' “O, Juyara Polɨnyɨ nyɨramakɨpɨ'dera daaka!” Sara daka “Maazathonɨyana ayɨna wɨlaawɨdeinyɨra.” 4Yawɨ'na kya' gamɨjɨ Sopaatai Pɨraazare gawaalɨ' Beriya mwaalyalyɨ Tezalonaaika mwaalyaraai Arɨzɨtaakazalyɨ Sekaadazalyɨ saraalyɨ Devi mwaalyai Gaayaazalyɨ Timotilyɨ Kwaaka Ezɨya mwaalyaraai Tɨkikaazalyɨ Tɨropimaazalyɨ saraalyɨ wɨna ye'. 5A'mwe ati ata purɨdaasɨ pwaraalyara sɨnnawɨ waanyɨna yeva Anga Tɨrawaazɨ nemɨnyɨna yemwaaina neye'. 6Yemwaaina neyadaapɨjɨ Munne Gɨrɨkula lɨwɨnya pamidakɨna myadehaa' mena wavɨla'na kya' sagaa' Anga Pilipaai sɨpɨyavɨ yɨlamwaaina kyo sawɨta atina wavɨla'daa'nyɨ sɨpɨya' nemakwawa'. Mi'na kanemakwawa' Anga Tɨrawaazɨ yemwaalesaraavɨ wɨjɨma'naawɨna yona yɨrɨka ati ata purɨdaasɨ pɨrɨkaai kanevɨlava' mwaalɨna yo.

Aayagaa' Anga Tɨrawaazɨ Polɨ angyɨrɨ'maata yake'nesɨ.

7Sagaa' wikɨya mudɨke' yɨma'nyɨna kya' Naangerɨ dɨnya'nerajɨ yɨkabɨna yona gɨrɨkula gunyɨna, nyɨna yo. Wapaaya tɨvɨ nyɨna kyo Polɨ a'mweinaavɨ wɨjɨwaakɨna neya'. “Mwanyavɨ kaanya wɨdera,” daka wɨjɨwaakɨna wɨjɨwaakɨna kya' kalawawe' yɨma'nyɨna ya'. 8Anga sa' mɨnye dawaai dasa' laannɨkevɨ ku'dɨka munyabanyavɨ wɨlamwaaloba dɨ'baaka naanga warakeba. 9Dɨ'baaka naanga warake'najɨ Polɨ yagaala naanga kuna wɨdake'najɨ Mɨgɨnya Yutɨkaazai widɨwaayaba yɨlamwaaina yaka se'na naanga winyɨna kya' amamaze waraka munya ke'bevadaasɨ kwaakevɨna bwalabaihɨ'nyɨna ya'. Bwalabaihɨ'nyɨna kya' pwara yarai walaawɨna yeva dara wanganesa' “O, baryai daaka!” 10Sara kade' kɨrɨ' Polɨ walaawɨna yɨna yaka gamɨnyɨ maramujɨre'na yaka pwaraavɨ wɨda' “Kɨnna madɨpɨnera! Sare' dare'nesɨ. Kwaihwaainakei mwaalɨ'. Mabaihɨ'nyɨwa'.” 11Wɨdaka anga munyabanyavɨna ayɨna yɨlaawaka wapaaya gunyɨna yaka nyɨna ya'. Mi'na nyɨna yaka yagaala pɨnɨ wɨdɨna yaka yɨrɨka mi'na purakegaa'na ya'ma'na ya'. 12Ya'ma'na kya' pwara mɨgɨnyai balaka ayɨna dɨkaavakerɨ gamɨre angevɨ mare'na yeva yɨlaaya yɨna yeva mwaalɨna ye'.

Anga Tɨrawaazɨdaasɨ Anga Maalitaazɨ sawɨnnesɨ.

13Polɨ neda' “Sɨpɨyavɨ kwawapɨjɨ kwaakaanya wawa'mujɨ Anga Aazozɨna yɨhɨzɨma'naabɨdeinyɨ.” Nedakei wɨna kya' sɨpɨyavɨ yɨlamwaaina kyo Anga Aazozɨna sɨpɨya' makuna neya'. 14Makuna kaneya' Anga Aazozɨ Polɨ newɨra'nɨjɨmaa'naka sɨpɨyavɨ yɨlamwaaina kya' Anga Mitɨlinina nemakwawa'. 15Sabadaa'nyɨ nemakwawaka yɨrɨka pɨrɨvɨ Ahu'manna Kaayozɨ wavɨlavaka yɨrɨka pɨrɨvɨ Ahu'manna Semozɨna nemakwawaka yɨrɨka pɨrɨvɨ Anga Maalitaazɨna yɨ'mavaawɨna ya'. 16Sare' dare'nesɨ. Polɨ neda' “Jeruzaalemɨ yarai wawa'mujɨ Munne Pedikozɨyagaa' saba mwaalɨdeinyɨ dɨngaka? Pɨrovijɨ Ezɨya naangegaa' mwaalɨna mwaalɨna myɨwɨjainyɨ Anga Epazaazɨ wavɨlavaadera.” Nedakei Maalitaazɨna yɨ'mavaawɨna yo.

Epazaazɨ mwaalyara Kɨraazɨtɨyareraavɨre naangeraavɨ wɨdake'nesɨ Polɨ.

17Maalitaazɨdaasɨ Epazaazɨna yagaalya' wɨdaasɨna ya' “Naangeihi, Kɨraazɨtɨyare kusɨlaanyavɨyara Epazaazɨ mwaaihasaraavɨ maremwaaidɨvɨsaihi jɨkabyɨla!” 18Sarɨ wɨdaasɨna kya' a'mwe sara bɨna kye' wɨda' “Yɨrɨka aayagaa' Pɨrovijɨ Ezɨyana gaai bena yuyagaa' saba mwaaideriyagaa' sarɨmɨjɨ mwaalena yuya sabwi yeinyɨna yawɨ'mwaava. 19Nabaai, Naangere wawɨnya' wɨdaayadɨnyainyɨ dɨragɨnna yena ‘Nɨmɨ maalɨkeinyɨ,’ dadɨ a'mwera kayaa'na kanye' nɨmɨ kɨnna daheinyɨra taanga nyadaasɨna. Juyara yawɨ'na ‘Polɨmɨ tamakaana!’ yawɨ'na yeva kayaa'na kanye' taanga naanga nyake'na yawɨ'mwaava. 20Yuya kadɨka wɨ'nɨpɨja'na sarɨmɨnyɨ yɨhɨgaimwanga yuya sara yɨhɨzɨwaake. Yagaala pɨnɨ mwarika. A'mweraayaba yɨhɨzɨwaakadɨ sarɨnnya angengɨ yɨhɨzɨwaake'na yawɨ'mwaava. 21Juyaraavɨjɨ Menyaraavɨjɨ avaaina nayaa wɨjalɨkurake. Sarɨnnya kayaa'nanyabwi marasɨ'napɨjɨ Gotɨyarebwi yawɨramaarapɨjɨ Naanga Jizaazarɨ dɨlɨmwagyɨla! Sara myɨ yapɨjɨ Dɨkevɨ namwaaibɨthɨka! 22Sara kude dahaa' Kuryai Tewaanyai sara kanyɨdɨwa'dɨ' ‘Jeruzaalemɨna dɨwona!’ yɨthaanyi, wɨla nyɨvwɨyɨnɨkeinyɨ sara yɨvanɨge saba nɨmɨnyɨna pwara nyɨpɨ'de'na myawɨryɨvanɨgeinyɨra. 23Gave pɨrɨ'na yawɨ'mwa. Anga yuyangɨ wa'mwa'dezɨ Kuryai Tewaanyai dɨragɨnna nyɨda' ‘Kalavuzangevɨ gɨmwaaihɨpɨ'de'nanyɨ. Gɨmɨnyɨna kayaa'na yɨpɨ'de'nanyɨ,’ sara yawɨ'mwa. 24Dara wangamanɨge' ‘Mwaaihe'na maalɨke' daaka!’ Nɨmɨre kɨlaakejɨ'na myawɨrivanɨge. Naanga Jizaazai nyɨdaasake'najɨ Naangei gannya wawɨnya' kanyɨjaava' sa' yuya yɨde'najɨ yawɨ'manɨge. Wawɨnya sa' yagaala tewaanya' jalɨkurakya'ne' ‘Gotɨyai a'mweraavɨ yange'na wɨgaimwagathelyɨ,’ wɨdadɨnya'ne' nɨmɨre wawɨnya sasaresɨra.

25Sarɨmɨnyaba kaanya yamaryegaa' Gotɨyai nemaremwaaide'na tewaanyabwina yɨhɨzɨwaakage. Yɨthaanyi, dahaa' dara yawɨ'mwa. Dɨvidaasɨ aane pwaigɨ kwaigɨ tɨnna manyanganyɨ jɨtheigɨnyɨ. 26Sarevɨ dahaasagaa' nebulya'na yɨhɨzalɨkurakɨma! Gɨnnya kuryarɨ marasɨ'naja' gɨmɨre tawevɨna nɨmɨre' mɨ'. Aawa. Gɨmɨresɨ. 27Sare' dare'nesɨ. Gotɨyai yade yuyangɨnajɨ gamɨre sɨmunyavɨnajɨ yɨhɨtheinyɨ. Yagaala pɨrɨ' lɨka myulyakye. 28Mala nayaa jɨwannyɨla! Sarɨnnya kuryaraavɨ nayaa maremwaaina jɨla! Nabaai, Kuryai Tewaanyai sarɨmɨre wawɨnya' kyɨhɨzaava' sare'na Naangereraavɨ sipɨzipɨyaraavɨ nayaa dɨmaremwaalyɨla! Sipɨzipɨyaraavɨ maremwaaidɨvɨsara maremwaaidɨvɨtabaaibɨ' Gotɨyare kusɨlaanyavɨyaraavɨ nayaa dɨmaremwaalyɨla! Jizaazai gannya gawaalɨ' kabala' Gotɨyai Kɨraazɨtɨyareraavɨ mubɨna ya'. Naangere tawesɨ mubɨna ya'. 29Dara yawɨ'mwa. Kaanya kwawa'mujɨ sarɨmɨnyabanna a'mwera kavɨjɨlɨkerabɨsara bapɨjɨ sipɨzipɨyaraavɨ kayaa'na wipɨ'derera. 30Dɨvi sarɨmɨjɨya pwara yawɨ'na ‘Jizaazarɨ mɨdɨdɨvɨsara gevwina nyɨmɨdɨbɨka! Mwagi'namaarɨma!’ Yawɨ'na yapɨjɨ daavɨna yapɨjɨ kwaasɨ yagaala wɨdɨpɨ'de'nanyɨ. 31Savɨne'na nyɨpɨdɨka! Mala nayaa jɨwannyɨla! Dara jawɨrila! ‘Kwarame dawaai dasa wavɨla'daasɨ yɨrɨkejɨ sawɨsajɨ Polɨ nɨmɨre kuryarɨna kɨnna daka nemɨjɨya pwarɨ kwarɨ nayaa nejɨwaaka'.’

32Dahaa' Gotɨyare asɨrɨna yɨhɨmwaaihɨvanɨge. Gotɨyai a'mweraavɨna yange'na wɨgaimwadere yagaalya'na tewaanya yɨhɨmwaaihɨvanɨge. Sɨgunyavɨ Gotɨyai dɨragɨnyaihɨrɨ yɨhɨmwaaihade'na sarɨmɨjɨ pwaraavɨ Gotɨyai dahɨlakakeraavɨ kayaa'nanyanna duimwagasɨ'nakerajɨ gannya yuya tewaanaanga yɨhɨzaavadengɨra. 33Aane pware kware nɨgwiajɨ kwaabɨhannya baazɨ'ma'nya sazajɨ wabarɨnna mwanganyeinyɨra. 34Arɨkewɨ, sarɨmɨ saihi mi'na nyawɨ'mwaava. Nɨnnya asɨlyɨ yɨna yɨna yena nɨgwia maarena nɨmɨnyɨnejɨ Gotɨyare wawɨnya yadaanyaraavɨnejɨ mube'na nyawɨ'mwaava. 35Yuyagaa' sara ye'na yɨhɨzɨwainyawaaiheinyɨ. Nɨmɨ sara yebwina jɨla! Dɨragɨnna yapɨjɨ nɨgwiajɨ asɨlyɨ a'mwe waryaanyaraavɨ duhaimwagyideihɨlyɨ. Savɨna sɨnnawɨ Naanga Jizaazai neda' ‘Pwara daapɨna yɨpɨ'de'na yɨlaaya maalɨka yadɨvɨ' tewaanya winadere. Pwara yanga wɨjaavɨpɨ'de'na yɨlaaya naanga yadɨvɨ' tewaanaanga winade'nanyɨ.’ Sara nedake'na nayaa jawɨrila!”

36Polɨ mena wɨdakegaa' kumɨjɨ gamɨjɨ kwadaai gɨlɨna kye' Gotɨyarɨ yagaala wɨda'. 37Mi'na kuda' kɨnna deva galamujɨ'na yeva yɨlaaya marina ye'. 38Gannya yagaalya' “Dɨvidaasɨ tɨnna mwanganyɨ dɨnyideihɨlyɨ,” wɨdake'na kale wia'. Kale wiadaa'nyɨ sɨpɨyavɨna gamɨnyɨ yenaasɨna yesare.

Currently Selected:

Apozelɨyara 20: byr

Highlight

Compare

Copy