Apozelɨyara 19

Anga Epazaazɨ Polɨ mwaalake'nesɨ.

1Kwaaka Gɨriza Anga Koridɨ Aapolɨzai mwaaidɨ'nyɨyagaa' Ezɨya kwaakevakɨ mugunyaba Polɨ lo'mavamaryɨna yaka Anga Epazaazɨna yɨ'mavaawɨna ya'. Yɨ'mavaawɨna yaka Kɨraazɨtɨyarɨ mɨdɨdɨvɨta pwaraavɨ wɨjɨmaa'nyɨna yaka 2yɨwaara'na ya' “Naangerɨna lɨmwagesagaa' Gotɨyare Kuryarɨ damaarage'?” Yɨwaara'na kya' “Aawa, Gotɨyare Kuryarɨna nedɨwaanyai aaihwalaka? Kadɨka mu'nyadaanyainera,” wɨde'. 3“Sahɨrɨ'na aaihware yɨhyetavaka bavɨtaazɨya sava?” yɨwaara'na ya' Polɨ. Yɨwaara'na kya' wɨde' “Jonɨmɨre bavɨtaazɨyabwi neye'.” 4Sara kude' Polɨ wɨda' “Kɨgaa' Jonɨ wɨjɨwaakɨna yada a'mwera mudɨkebwi yawɨramaa'dɨvɨ' bavɨtaazɨya wiada Yɨzɨrelɨyareraavɨ wɨjɨwaakɨna ya' ‘Nɨmɨnyɨ dɨvidaa'nyɨ batherɨna jawɨralɨmwagyɨla!’ Jonɨ sara wɨjɨwaakakei Jizaazalyɨra.” 5A'mwera kadɨka sara wɨ'nyɨna kye' Naanga Jizaazare yaya'na bavɨtaazɨya yɨna wia'. 6Bavɨtaazɨya mena yɨna wiaka Polɨ kumɨre mɨnyagɨnyangɨ ata dathɨwanna kya' Kuryai Tewaanyai bulamwaaina kya' yagaala ge gengɨ wɨdɨna yeva, nabaai, Gotɨyarɨ wɨ'nawɨjɨwaake'. 7Wɨ'nawɨjɨwaakesara yuyara sɨvɨlyɨraai ata purɨdaasɨ pwaraalyarera yɨlaaya yesara.

8Juyaraavɨre lotuangevɨ Polɨ wɨlɨna yada lawe dɨkaai dɨkɨ dɨragɨnna wɨjɨwaakɨna yadei “Juyarajɨ Gotɨyarɨ wɨdadɨvɨsarajɨ Gotɨyai a'mweraavɨ maremwaaiderɨna wɨ'nɨpɨka!” daka wɨjɨwaakɨna ya'. 9Wɨjɨwaakɨna kya' kɨrɨ' pwara myawɨri yadɨvɨ' mu'nyɨ yeva yuyaraayaba Naangerebwina bɨrala ye'. Bɨrala yɨna kye' Polɨ saraavɨre lotuangevɨ ya'ma'na yaka Kɨraazɨtɨyarɨ mɨdɨdɨvɨsaraavɨ makuna. Makuna yaka yɨrɨka yuyagaa' Tiraanazare wɨjɨwaakɨangevɨ Jizaazare yagaalya' wɨjɨwaakɨna yakelyɨ. 10Wɨjɨwaakɨna yada naangegaa' kwarame pɨrɨwaai wavɨla'daa'nyɨ sagaa' Kwaaka Ezɨya mwaalyara yuyara Juyarajɨ Menyarajɨ sara Naangere yagaalya' kadɨka wɨ'nyɨna ye'.

A'mwe Sivaayare gawaalɨvaangeraavɨnesɨ.

11Gotɨyai gannya dɨragɨnya' Polɨmɨna wɨjaavɨna kya' Polɨ nawɨ'nya kya' a'mwera atɨka maru'na'na yadɨvɨkɨ. 12Pwara aagɨzipɨyajɨ kwaabɨhannyajɨ Polɨmɨre kɨlaakevɨ yewaa'bwa'nakengɨ makuna yeva nabalɨnakeraavɨ dathɨvalakɨna kye' nabalɨnakera tewaanya mwaalɨna ye'. Nalaaya mena yɨwɨna kya' nabaai pwaraavɨre munyɨkaavɨdaasɨ yɨmakera bwalyuna ye'. 13Polɨ sara yadaa'nyɨyagaa' Juyara kaanya yamaryadɨvɨ' yɨmakeraavɨ wɨdaasadɨvɨsara pwara yawɨ'na “Naanga Jizaazare yaya'na yɨmakeraavɨ wɨdasaana!” Sara yawɨ'na yesara yɨmakeraavɨ wɨde' “Polɨ wɨjɨwaakɨvanɨkei Jizaazarɨne yaya'ne'na dɨragɨnna gɨthaasɨma! ‘Dalyona!’ ” 14Sara wɨdesara Juyai Gotɨyarɨna mubɨthɨka yɨra'de naangei Sivaayare gawaalɨvaanga ata yuyi ata purɨdaasɨ pwaraalyarera. 15Sahwara sara kude' yɨmakei wɨda' “Jizaazarɨ yawɨ'mwe' Polɨmɨna yawɨ'mwe' kɨrɨ' sarɨmɨ bewaihɨlaka?” 16Mi'na kuda' a'mwei yɨmaka widei sahwaraavɨ yarai pɨlawasɨ'naabɨna yaka dɨragɨnna tamɨna yaka kayaaka yɨgalaka dathɨwanna ya'. Dathɨwanna kya' gamɨre angevɨ yarai bwalyuna yeva wa'wenakera kannyɨmaayara lɨkaanya wɨna ye'. 17Lɨkaanya sara wɨna kye' sa'na Juyarajɨ Menyarajɨ Epazaazɨ mwaalyara yuyara kadɨka wɨ'nyɨna yeva lɨka dɨkwosɨ'na yeva “Jizaazai Naangelyɨra. Gamɨre yaya' naangesɨ. Gamɨre yaya' nayaa kavena daana!” dɨnyɨna ye'. 18Nabaai savɨne'na Jizaazarɨ lɨmwagesara kayaa'nanyabwi yesa'na a'mweraayaba kunnya kayaa'nanyabwina wɨdɨna ye'. 19Pwara bulaasangɨjɨ kwalyangɨjɨ gɨri'nyangɨjɨ yadɨvɨsara kunnya pɨkarɨyɨkwiajɨ kunnya bukuyajɨ sangɨnebwi yɨda'nɨkengɨ makabɨna makabɨna yeva a'mweraayaba dɨka marira'na ye'. Bukuya sangɨne nɨgwia ata gɨleva pwara dɨnyɨna ye' “Nɨwaava, kɨgaa' a'mwera kinaaya 50,000 mubesarera. Nɨwaava.” 20Kɨraazɨtɨyarera sara tewaanna kye' Naangere yagaalya' dɨragɨnya' yɨma'nyɨna kya' saba yunebanna a'mwe yuyara kadɨka wɨ'nyɨna yadɨvɨ' a'mwe kwalaalyara Naangerera yɨma'nyɨna ye'.

Anga Epazaazɨ a'mwera kayaa'na yesa'nesɨ.

21Sa yɨma'nakegaa' Kurya Tewaanyai Polɨmɨ nayaa kyɨwɨrya' Polɨ dɨragɨnna yawɨ'na “Pɨrovijɨ Maazathonɨya Pɨrovijɨ Gɨriza kaanya yamarya'mujɨ Anga Jeruzaalemɨna wɨdeinyɨra.” Yawɨ'na yaka da' “Savɨna wawa'mujɨ Anga Romɨna wanganaawɨdera.” 22Mi'na daka Timotilyɨ Yɨrazɨtaazalyɨ saraai Gotɨyare wawɨnya'na wɨdaayadɨvɨsarajɨyaraarɨ wɨdɨna “Maazathonɨyana bwaanyɨla!” wɨdaasɨna yaka Kwaaka Ezɨya pɨzɨ'gwa mwaalɨna ya'.

23Sagaa' Epazaazɨ mwaalya pwara Naangerebwina gamɨreraavɨ kayaa'na ye'. 24Sare' dare'nesɨ. A'mwe pwai Dɨmitɨrɨyaazai sɨlɨvaaya yavɨkarina yadelyɨ gamɨjɨyarajɨ sara Kwaasɨ Naanga Aatemizavɨre ange'bɨta maalɨkengɨ yavɨkaryadɨvɨsarera. Pwara dara wanganesa' “Ai, sɨlɨvaaya anga nawɨ'nya darɨka!” Deva nɨgwia naangejɨ mubɨna ye'. 25Nɨgwia naangejɨ mubadaapɨjɨ Dɨmitɨrɨyaazai gamɨjɨyaraavɨjɨ avaaiwawɨnya yadɨvɨsaraavɨjɨ wɨda' “Jɨkabyɨla!” Wi'na kuda' yɨkabɨna kye' wɨda' “A'mweihi, nemɨre wawɨnyavɨna nɨgwia naanga ma'daanyasɨra. 26Nayaa yawɨ'manɨgasaihɨlyɨ. Polɨ yɨvanɨke' tɨnna wangadɨvɨ' kadɨka wɨ'nadɨvɨsaihɨlyɨ. Dara wɨjɨwaakɨvanɨ' ‘Naangeraavɨ sarɨnnya asajɨ yavɨkaryesara gotɨyara mɨka. Sabwi kwaasɨyasɨ.’ Wɨjɨwaakada anga davɨjɨ Kwaaka Ezɨya yunebajɨ a'mwe kwala bwa'naanya naange' kadɨka wɨ'neva nemɨrebwi yagalya'maveva sabwi mɨdɨmanɨga'. 27Kwalaalyara sara yadaapɨjɨ Polɨ ayɨna wɨdɨna wɨdɨna kyojɨ a'mwe pwara nemɨre wawɨnya'na dɨnyɨna ‘A'mwera sa yavɨkaryadɨvɨ' kayaa'nanaangesɨ,’ dɨnɨpɨ'desɨ. Nabaai sa' gave' mɨka. Nemɨre Naanga Aatemizavɨre yɨleanga' yaasɨwakanga' yɨma'nade' dɨngaka? Naangevɨre dɨragɨnya' waryaanya yɨma'nade' daaka? Naange' Kwaaka Ezɨya mwaalyarajɨ Kwaaka yuyavakɨ mwaalyarajɨ yɨlaaya yɨvanɨgasa' waryaanya' yɨma'nade' midaaka Aatemiza'!”

28Kwala bwa'naanya' kadɨka wɨ'nadɨvɨ' “Aala!” dɨdɨvɨ' sɨnna tɨka davɨna kwia' jaka naanga wɨde' “Aawa! Epazaazɨ mwaalyainaavɨre Aatemiza' dɨragɨnyasɨra.” 29Jaka naanga sara dɨwɨna kye' pwara anga yuneba jaka sara wɨde'. Jaka wɨdadɨvɨ' Gaayaazalyɨ Aarɨzɨtaakazalyɨ saraarɨ galalɨmwanna ye'. A'mwe saraai Kwaaka Maazathonɨya mwaalyaraalyɨ. Polɨjɨ kaanya yamaryadisaraalyɨ. Saraarɨ galalɨmwanna yeva yɨkabadɨvɨsabanna yarai makuna ye'. 30Makuna kye' Polɨ yawɨ'na “Kaanna wawa'mujɨ kwala bwa'naanyavɨ wɨdaawɨma!” Yawɨ'na kya' mɨdɨdɨvɨsara lɨmwanna yeva wɨde' “Arɨkawɨnyɨ. Nagɨrabɨthɨka! Dava mwaaidɨnneigɨ kave dɨmwaala!” 31Nabaai, kwaaka savɨ maremwaaidɨvɨta pwara Polɨmɨ gya'mwera gamɨnyɨ yagaalya' wɨdaase' “Polɨ, naange' gɨthɨvanɨgo. Yɨkabadɨvɨsabanna mwidɨnnera!” 32Kudaase' sagaa' kwala bwa'naanya sɨdu'maayara jaka kuna wɨdɨna ye'. A'mwe kwalaalyara “Sasare'na mwaaihosɨra,” majara yaasɨwa'na mwaalɨna kye' pwara jaka ge' wɨdadaapɨjɨ pwara jaka ge' dɨna dɨna ye'. 33Jaka dɨna dɨna kye' Juyara Alekɨzaadarɨ yagaala wɨjɨwaakya'na wɨrɨvɨta'na kye' pwara kwaasɨ yawɨ'na ye' “Sarɨna jaka naanga dɨvanɨgo.” Yawɨ'na yadaapɨjɨ Alekɨzaadai yawɨ'na “A'mweraavɨ Juyainaavɨna ‘Nemɨ kayaa'na myadaanyainera,’ wɨjɨwaakɨma!” Yawɨ'na yaka a'mweraavɨ ata wɨdathɨwaga'. 34Ata dathɨwanna yadaa'nyɨ dara wanganesa' “Ai, a'mwe sai Juyai daaka! Saibɨsara nemɨre Naangevɨ kayaa'na dadɨvɨsara daaka!” Sara deva yuyara jaka naanga dɨna “Epazaazɨ mwaalyainaavɨre Aatemiza' Naangesɨra,” dɨna yadaapɨjɨ jaka naanga bazɨwawesara naangegaa' (tu aawaaya) wavɨla'na ya'.

35Dɨvi a'mwe naangei Anga Epazaazɨ pɨkarɨyɨkwia yavɨkaryadei kwala bwa'naanyavɨ kuda' “Yagaala madɨpɨna!” a'mwera kave mwaaidapɨjɨ wɨda' “Epazaazɨ mwaalyaihi, a'mwe yuyara yawɨ'manɨgasa' ‘Epazaazɨ mwaalyara Naanga Aatemizavɨre yɨleangesɨ sɨgunyavɨdaasɨ sɨlaanga dɨragɨnya' bwalaryaakesɨ maremwaaidɨvɨsarera,’ sara yawɨ'manɨga' yuyara. 36‘Savɨ nebulya'na mɨka,’ majɨvanɨgasare. Arɨkewɨ. Sarevɨdaa'nyɨ kave dɨmwaalyɨla! Sɨdu'nakeihi kayaa'na mipɨnera! 37Sare' dare'nesɨ. A'mwe daraarɨ makabɨwaasaraai Aatemizavɨre yɨleangevɨ kuka mipalamaryɨwaala. Nemɨre Naangevɨna bɨrala myɨwaala! 38Sarevɨdaa'nyɨ Dɨmitɨrɨyaazalyɨ gamɨjɨyarajɨ dɨnyɨna ‘A'mwe pwarɨ kotɨya'na wɨdaana!’ dɨnyɨna yɨpɨja' kotɨyagaa' a'mwe naangeraayawɨnna kwawapɨjɨ yagaainaka salyɨ sahwarajɨ kamwaalapɨjɨ jawɨbwarakɨpɨ'dera. 39Yagaala pɨrɨ' warɨke' daakajɨ a'mwera nayaa kyɨkabapɨjɨ, sagaa' dɨzɨla! 40Sare' dare'nesɨ. Dahaa' sara yɨvanɨgasa'na ga'maanɨyara ‘A'mwera kayaa'na yɨvanɨgasara daaka!’ dɨnɨpɨ'jɨwaava? Jaka naange' wɨdɨvanɨgasaihɨrɨna naangera kanedapɨjɨ ‘Baa'na dɨvanɨgasaihɨlaka?’ nemɨ gara wɨdaazɨwona! Aawano, nemɨ yagaala mujɨ yaadeinera.” 41Sara wɨdaka wɨda' “A'mweihi sarɨnnya angengɨ dɨwila!” Kuda' kaanna wɨna ye'.

Currently Selected:

Apozelɨyara 19: byr

Highlight

Compare

Copy