Apozelɨyara 18

Anga Koridɨ yake'nesɨ.

1Dɨvidaa'nyɨ Aathenɨzɨna ya'ma'na yaka Anga Koridɨna wɨna ya'. 2Koridɨna yɨ'mavaawɨna yaka Juyai Aakwilaa wo'nɨkerɨ wɨjɨmaa'nyɨna ya'. Aakwilaamɨ ganaange' Anga Podaazɨ maarakelyɨra. Sagaa' A'mwe Naangei Kɨlothɨyaazai wɨda' “Juyara yuyara nɨmɨre Angeba Romɨdaasɨ wɨpɨka!” Sara kuda' Kwaaka Yɨtaalidaasayoi Aakwilaajɨ gamɨre balaange' Pɨrɨzɨlasɨ Anga Koridɨ gaai mwaalɨna yagi. Gaai mwaalɨna yagɨlyayorɨ Polɨ tɨnna wanganna yaka angyɨrɨ'maata yɨna ya'. 3Sai kwaabɨyɨvɨkange yavɨkaryamaryada nɨgwia yaasadelyɨra. Sayoi avaaiwawɨnya yadisa'na Polɨ sayoryaba mwaalɨna kya' sayolyɨ gamɨjɨ kwaabɨyɨvɨkange yavɨkarina ye'. 4Yavɨkarina kye' Kwazaakegaa' yuyagaa' Juyaraavɨre lotuangevɨ pwarajɨ dɨnyɨna ye'. Sai yawɨ'na “Juyarajɨ Gɨrikɨyarajɨ Jizaazarɨ wɨ'nɨpɨka!” yawɨ'na kya' pwarajɨ dɨnyɨna ye'.

5Kwaaka Maazathonɨyadaasaraai Saailaazalyɨ Timotilyɨ bamwaaina yagɨlyagaa' gamɨre kuryarɨ yɨbwakɨnaka yuyagaa' Polɨ Juyaraavɨ Gotɨyare yagaalya' wɨjɨwaakɨna ya'. Dara wɨjalɨkurakɨna “Kɨraazɨtɨyai kɨgaakuna Gotɨyai dahɨlakakei Jizaazalyɨra.” 6Kuna wɨjalɨkurakɨna yadaa'nyɨ Juya pwara gamɨnyɨna gaidaa'na yeva Polɨmɨ bɨrala yɨna kye' yawɨ'na yaka “Gotɨyare yagaala mu'nyɨ kyɨwaa' nɨmɨjɨ pwarajɨ yosɨnaade'nanyɨra.” Sara yawɨ'na yaka gannya kwaabɨhannyavɨre tɨrya purakɨrasɨ'na yaka wɨda' “Sarɨnnya kuryarajɨ tawesɨ wasɨ'nɨvanɨgasa'na sarɨmɨ saihi sara yɨvanɨga'. Nɨmɨ sainyɨ sara myɨvanɨge. Gotɨyare yagaala nayaa yɨhɨthɨwa. Dahaa' sarɨmɨnyɨ mena yɨhya'mava'mujɨ ajɨmya yuyangɨyaraavɨ wɨjɨwaakɨdeinyɨra.” 7Sara wɨdɨna yaka ya'ma'na yaka Tɨzɨyaazai Jaazɨtazare angevɨna wɨna yaka saba wɨjɨwaakya'na mwaalɨna ya'. A'mwe sare ange' Juyaraavɨre lotuangeyaba mannɨkebanyɨ. A'mwe sai Menyai Gotɨyarɨ yɨlaaya yadelyɨra. 8Gamɨre angevɨ Polɨ mwaalɨna kya' Kɨrɨzɨpaazai lotuangevɨ maremwaaidei Polɨmɨre yagaalya' wɨ'naka gamɨjɨyarajɨ Naangerɨ lɨmwanna ye'. Wi'na lɨmwanna kye' Koridɨ mwaalya kwalaalyara gamɨnyɨ kadɨka wɨ'neva sara lɨmwanna kye' Kɨraazɨtɨyarera aalyavɨ bavɨtaazɨya yɨna ye'.

9Sawɨta pɨgaa' Polɨ a'mabaaitɨnna wanganna ya'. Tɨnna wanganna yadaa'nyɨ Naangei wɨda' “Nɨmɨre yagaalya'na jɨkurya yɨvanɨgasaraavɨna lɨka minnera! Aawa. Kuna duthana! Maadɨnna minna! 10Gɨmɨjɨ mwaaida' kagɨhaimwaga'mujɨ a'mwera kayaa'na mi gyɨpɨ'de'nanyɨ. Anga dava nɨmɨrera kwalaalyara yɨma'nɨpɨ'de'nanyɨ. Sare'na yawɨra'gɨzɨ gɨnnya wawɨnya' dɨragɨnna kuna jɨtheigɨnyɨ.” 11Naangei sara kuda' kwarame pɨrɨ' lawe atina ata purɨdaasɨ pu'na wavɨla'daa'nyɨ anga savɨ mwaalaka a'mweraavɨ Gotɨyare yagaalya' wɨjɨwaakɨna ya'.

12Romɨ mwaalyai Gaalɨyo Kwaaka Gɨriza maremwaaidei Ga'maanɨyai yɨma'nakegaa' Juyara yɨkabɨna yeva “Sarɨ kotɨya yaana!” dɨneva Polɨmɨ kotɨangebanna makuna ye'. 13Makuna yeva Gaalɨyomɨ wɨde' “A'mwe dai a'mweraavɨ wɨdada ‘Mudɨkebwi Gotɨyarɨ yɨlaaya jɨla!’ wɨdadelyɨra. Sara yaaja' nemɨre Kɨwɨnya' kayaaka nyaadɨ'de'nanyɨ.” 14Wi'na wɨdɨna kye' Polɨ “Savɨna wɨdɨma!” daka yakelyɨ. Gaalɨyo Juyaraavɨ yarai wɨda' “Juyaihi, sai kuka yajɨ kwajɨ kayaa'nanya yajɨ kwajɨ sarɨmɨre kotɨya' nɨmɨ nayaa kajawɨbwarakɨwɨdɨka. 15Aawa, kɨrɨ' sarɨmɨre yagaalyanna, yayanna, sarɨmɨre kɨwɨnyanna sarɨmɨ saihi dɨzawɨbwarakyɨla! Nɨmɨre wawɨnya' daaka! Sare majawɨbwarakɨwɨneinyɨ.” 16Sara wɨdɨna yaka kotɨangevɨdaasɨ wɨdaasɨna ya'. 17Wɨdaasɨna kya' a'mwera Sozɨthenɨzai Juyaraavɨre lotuangevɨ maremwaaiderɨ galalɨmwanna yeva kotɨangeyaba asajɨ mala tamɨna ye'. Mala tamɨna yadaapɨjɨ Gaalɨyo Ga'maanɨyai “Kumɨresɨ,” daka navɨka mwaalɨna ya'.

Anga Aadɨyokɨ ayɨna wawake'nesɨ.

18Sawɨta kwalaalya jɨnnadaa'nyɨ Anga Koridɨ Polɨjɨ neya'mwerajɨ mwaalɨna kye' sabadaasai ya'ma'na kya' Kwaaka Sɨrɨya sawɨnna sɨpɨya' gamɨjɨ Pɨrɨzɨlavɨjɨ Aakwilaamɨjɨ makuna ya'. Gotɨyarɨ yagaalya' sara wɨdake'na Anga Segɨrɨya Polɨ gannya mɨjata da'nyɨna yakelyɨra. 19Kwaaka Ezɨya Anga Epazaazɨ sawɨnna yɨ'mavaawɨna kye' saba Pɨrɨzɨlavɨjɨ Aakwilaamɨjɨ mwaalɨna yagi. Mwaalɨna kyagi sai saba Juyaraavɨre lotuangevɨ wɨlɨna yaka Juyarajɨ Naangerɨna dɨnyɨna ye'. 20Dɨnyɨna kye' Juyara yɨdaanganna “Naangegaa' gɨmɨjɨ mwalaadeina daaka?” Sara kye' kɨrɨ' “Aala!” wɨdaka 21wɨda' “Gotɨyai kanyɨdaasojɨ sarɨmɨnyawɨnna ayɨna bɨdeinyɨra.” Wɨdaka saba ya'ma'na kya' sɨpɨya' Anga Epazaazɨdaasɨ makuna ya'.

22Kwaaka Juthɨya Anga Sizaarɨyana yɨ'mavaawɨna yaka Anga Jeruzaalemɨna yɨlaawɨna yaka Kɨraazɨtɨyare kusɨlaanyavɨyaraavɨ wɨdɨna yaka Anga Aadɨyokɨna kaanna wɨna ya'. 23Kaanna wɨna yaka saba saamɨnyagaa' mwaalɨna yaka pɨgaa' ya'ma'na yaka Kwaaka Galezɨya Kwaaka Pɨrɨzɨya kaanya yamarina yada Kɨraazɨtɨyarɨ mɨdɨdɨvɨsaraavɨ yagaala dɨragɨnna yɨvaimwanna kya' sahwara tewaanna mwaalɨna ye'.

Anga Epazaazɨ Anga Koridɨ a'mwe Aapolɨzai mwaalake'nesɨ.

24Juya pwai Aapolɨzai wo'nɨkelyɨ. Anga Alekɨzaadɨrɨya ganaange' mudanga maarakelyɨra. Gotɨyare bukuyavɨ nayaa yawɨ'dei Gotɨyarɨna yagaala nawɨ'nya' wɨdadelyɨ. 25Pwara Naangereburɨ wɨjɨwaakɨna yesai yɨlaaya naanga yada Jizaazarɨne sara yawɨ'da sara nayaa wɨjɨwaakɨna ya'. Nabaai Jonɨ a'mweraavɨ bavɨtaazɨya yakebwi yawɨ'da Jizaazarɨna yuyabwi myawɨri yadei wɨjɨwaakɨna ya'. 26A'mwe sai Anga Epazaazɨna bɨna yaka Juyaraavɨre lotuangevɨ yagaala sa' dɨragɨnna wɨdɨna ya'. Wɨdɨna kya' Pɨrɨzɨlasɨ Aakwilaajɨ kadɨka wɨ'nagɨla kɨrɨnnya angevɨna a'mwe sarɨ yɨbwaramakuna yagɨla Gotɨyarebwi yuyabwi wɨjɨwaainyɨna yagi.

27Dɨvi sagaa' “Kwaaka Gɨrizana wɨdera,” dɨna kya' neya'mwera Epazaazɨ mwaalyara “Aapolɨzai nayaa yamaryade'nanyɨ,” deva Kwaaka Gɨriza mwaalyara mɨdɨdɨvɨsaraavɨ paazɨya' yavɨkarina ye'. Ada' yavɨkarina yesa' “A'mwe dai Aapolɨzarɨ duzɨla ‘Nɨmɨre angevɨ angyɨrɨ'maata ja!’ ” Sara yavɨkarina kye' Aapolɨzai kaanna wɨna yaka yɨ'mavaawɨna yaka a'mwe saraavɨna Gotɨyai yanga wɨgaimwagakevɨna Naangerɨ lɨmwagesaraavɨ dɨragɨnna gaimwanna ya'. 28Sare' dare'nesɨ. Dɨragɨnna gaimwanna yakelyɨ Juyara malɨmwagyesarajɨ a'mweraayaba dɨnyɨna ye'. Sara dɨnyɨna yadaapɨjɨ Aapolɨzai dɨragɨnna yawɨraka kumɨre yawɨta sangɨ wavɨla'na ya'. Gotɨyare bukuya' wɨjɨwaainyɨna yaka wɨda' “Bukuya' yɨda'nɨke'na Gotɨyai dahɨlakakei Kɨraazɨtɨyai Jizaazalyɨra,” sara dɨragɨnna wɨda'.

Currently Selected:

Apozelɨyara 18: byr

Highlight

Compare

Copy