Apozelɨyara 17

Anga Tezalonaaika sabannesɨ.

1Kaanna wɨna yagɨla Anga Aabɨpolɨzɨ wavɨla'na yagɨla Anga Apolonɨya wavɨla'na yagɨla Anga Tezalonaaikana yɨ'mavaawɨna yagi. Anga saba Juyaraavɨre lotuange' mannɨkeba. 2Yɨ'mavaawɨna kyagi Kwazaakegaa' lotuangengɨ Polɨ wɨdɨna yadei lotuanga savɨ sara wɨlɨna ya'. Sara wɨlɨna yaka Kwazaaka dawaai dasangɨ Gotɨyare bukuya'na wɨjɨwaakɨna ya'. 3Aangyagaalya' wɨda' “Gotɨyare yagaalya' nedɨnɨke' ‘Kɨraazɨtɨyai Juyara yemwaaidɨvɨsai daanga naanga kuvɨnojɨ mena balojɨ ayɨna dɨkaavadelyɨra.’ Sara nedɨnɨke' Jizaazai sara ya'. Sara yakei Kɨraazɨtɨyarɨna yɨhɨthɨvanɨgelyɨra Jizaazai.” 4Sa'na kuda' Juya pwara Polɨmɨre yagaalya' wɨ'nyɨna yeva Polɨjɨ Saailaazalyɨ saraarɨ ye'mwannyɨna ye'. Nabaai Gɨrikɨyara Gotɨyarɨ dadɨvɨta kwala naangerajɨ a'mwe sɨmunya nayaa yadɨvɨsajɨ sa ye'mwannyɨna ye'.

5Juyara Kɨraazɨtɨyarɨ malɨmwagyesara tɨganaarya yeva jɨkurya yeva a'mwe kayaa'nanyara adusangɨ kaanya' yaasɨwa'na yamaryadɨvɨsaraavɨ makabɨna kye' kwala bwa'naanya jaka naanga dadɨvɨ' kayaa'na yɨna ye'. Kayaa'na sara yɨna kye' angaba mwaalyaraavɨ sɨnna tɨka davɨna kya' a'mwe kayaa'nanyara Jaizonɨmɨre angevɨ kaanya' yɨpalabaasɨna yeva “Polɨmɨjɨ Saailaazarɨjɨ a'mweraayabanna kotɨya'na makwalyawaana!” deva bɨreva bɨreva yɨna ye'. 6Nyɨnna bɨrɨna yeva mabɨramaari ye'. Mabɨramaari yeva Jaizonɨmɨjɨ neya'mwe pwaraavɨjɨ angeba a'mwe naangeraayabanna dɨragɨnna mwagi'namaa'na yeva jaka wɨde' “A'mwe Kwaaka yuneva' maragɨnyɨwagakagɨleraai nemɨreba davanna byɨ'ma'mwaalyaraai. 7Dahaa' nemɨre angebanna kabahi Jaizonɨ gannya angevɨ maremwaalɨka. A'mwe saraai A'mwe Naanga Sizaare kɨwɨnya kayaaka yɨgaimanɨgi. Dara kwaasɨya' nedɨvanɨgi ‘Kwaakevakɨ maremwaaidei Sizaai mɨka. Kingɨya pwai Jizaazai wo'nɨkei maremwaaidelyɨra.’ ” 8Yagaala sa' kude' kwala bwa'naanyasɨ anga sabanya a'mwe naangerajɨ sɨnna tɨka naanga wɨda'daa'nyɨ “Kayaa'nanyasɨ,” deva jaka naanga wɨde'. 9Jaka naanga sara kude' a'mwe naangera Jaizonɨmɨjɨ pwaraavɨjɨ saraavɨ kotɨya'najɨ kwaamu'mwaalya'najɨ nɨgwia mena maareva wɨde' “Wawapɨjaihi dɨwila!”

Anga Beriya sabannesɨ.

10Sawɨta kajɨnna' Anga Beriya neya'mwera Polɨmɨjɨ Saailaazarɨjɨ saraarɨ lɨka marulyakaasɨna ye'. Lɨka marulyakaasɨna kye' pɨgaa' anga sabanna yɨ'mavaawɨna yagɨla Juyaraavɨre lotuangevɨ wɨlɨna yagi. 11Anga Beriya mwaalyara sɨdu'nakera pwaraavɨre yagaalya' kadɨka wɨ'nadɨvɨsarera. Anga Tezalonaaika mwaalyarabɨsara mɨka. A'mwe sara Naangere yagaalya' kadɨka nayaa wɨ'nadɨvɨ' “Polɨmɨre yagaalya' nebulya'na dɨngaka?” deva Gotɨyare bukuyavɨ tɨnna wangadɨvɨ' nayaa yawɨresare. 12Gotɨyare bukuyavɨ tɨnna wangadɨvɨsavɨdaa'nyɨ Naangerɨ lɨmwagesa', nabaai a'mwe Gɨrikɨya naangejɨ a'mwe Gɨrikɨyarajɨ lɨmwanna ye'. 13Nayaa lɨmwanna kye' Anga Tezalonaaika mwaalyara Juyara dara wɨ'nesa' “O, Anga Beriya Polɨ Gotɨyare yagaalya' duthɨwaka!” Sara deva sabanna bɨna yeva kwaasɨ yagaalya wɨdadaapi kwala bwa'naanya' yɨkabɨna yeva Polɨmɨvaavɨna sɨnna tɨka wɨda'daa'nyɨyara jaka naanga wɨde'. 14Sara kye' sagaa' yɨme'nya'bɨ' saalaalyavɨ maangebaarɨna neya'mwera Polɨmɨ waasɨna ye'. Waasɨna kye' kɨrɨ' Anga Beriya Saailaazalyɨ Timotilyɨ mwaalɨna yagi. 15Saba mwaalɨna kyagi a'mwera Polɨmɨ makwalyuna yadaapi Anga Aathenɨzɨna wɨna yeva yɨ'mavaawɨna ye'. Yɨ'mavaawɨna kye' Polɨ wɨdɨna “ ‘Saailaazai, Timoti saraaihi yɨhɨthɨwa'de' mena yakɨlyɨ yarai dɨvila!’ duzideihɨlyɨra.” Sara wɨdaasɨna yɨna kya' a'mwera Anga Beriya kunnya angebanna ayɨna wɨna yeva yagaala sa' wɨde'.

Anga Aathenɨzɨ yake'nesɨ.

16Anga Aathenɨzɨ Polɨ Saailaazarɨjɨ Timotirɨjɨ yemwaaida dara wanganake' “O, anga dava yuneba a'mwa'mwe a'mwera yɨlaaya yɨvanɨgasa daaka!” Sara kada' kale naanga naanga wia'. 17Sarevɨdaa'nyɨ Kwazaakegaa' Juyaraavɨre lotuangevɨ wɨlɨna kya' Juyarajɨ Menyara Gotɨyarɨ dadɨvɨsarajɨ Polɨjɨ dɨnyɨna ye'. Dɨnyɨna yesa' yɨrɨka yuyagaa' a'mwera yɨkabadɨvɨsabanna a'mwe pwara bɨna kye' Polɨjɨ dɨnyɨna ye'. 18Nabaai Epikuriyaazarebwi dadɨvɨsarajɨ Sɨtoyɨkɨyagaala dadɨvɨsarajɨ sɨdu'nakerajɨ Polɨjɨ dɨnyɨna ye'. Dɨnyɨna yeva pwara maanga wɨde' “Sɨdu'maayai yagaala pɨjaakuna dadei be yagaala nedɨvanɨka?” Polɨ Jizaazarɨnajɨ dɨkaasavɨnajɨ wɨjɨwaakake'na a'mwe pwara wɨde' “Menyaraavɨre kulakejɨ a'mwa'mwewaalyɨ wɨdɨvanɨkei dɨngaka?” 19Sara yawɨ'na yeva Aarɨyopahaazɨ sawɨ kaajolɨyara mwaaihasabanna Polɨmɨ makuna yeva Polɨmɨ wɨde' “Yagaala mudɨka da' nedɨvanɨgɨnya'na yawɨraana! 20Sare' dare'nesɨ. Gɨmɨre yawɨta mudɨka pɨnɨ kadɨka wɨ'nona myawɨrivanɨgona. Sarevɨdaa'nyɨ sabwine dɨnejɨwaakya!” wɨde'. 21Yuyagaa' Anga Aathenɨzɨ mwaalyarajɨ Menyara saba mwaaidɨvɨsarajɨ sara yagaala ge ge kadɨka wɨ'nyɨna yadɨvɨ' yagaala mudɨka sa dɨnyɨna yadɨvɨsare. Sarera yadɨvɨ' yɨlaaya yadɨvɨkɨ.

22Aarɨyopahaazɨ kaajolɨyara mwaaidapiyaba Polɨ daavɨna yaka wɨda' “Aathenɨzɨ mwaalyaihi, a'mwa'mwe kwalaalyangɨ yɨlaaya yadɨvɨsaihɨrɨ yɨhwangamwa. 23Sare' dare'nesɨ. Sarɨmɨre angeba kaanya yamaryena a'mwa'mwengɨ yɨlaaya yadɨvɨsabannengɨ tɨnna wanganena dara bɨ'mwa'de' ‘O, kwaraanyaba pɨkarya “Naangerɨ myawɨrivanɨgo'nesɨra,” yɨda'nɨke' daaka!’ Sara dena Naangerɨ myawɨrivanɨgasarɨ yaasɨwa'na yɨlaaya yɨvanɨgasa'na yɨhɨzɨwaakɨma! 24Naangei Gotɨyai Kwaaka davakɨjɨ yunebanna mwaaihasarajɨ kwaakevɨ yuya yɨ'naanya kurɨvaarɨya yuya wakakelyɨra. Sɨgunyasɨ Kwaakesɨ yuyangɨ maremwaaidelyɨ Naangei. A'mwera yɨleange madɨna yadɨvɨsangɨ mamwaalyɨka. Aawa. 25Naangei sahwai a'mwe yuyaraavɨne mwaalya'nebulyɨ sɨmudɨnyasɨ yuyajɨ sangɨ wɨjaavade'na a'mwera gamɨnyɨne gara yapɨjɨ wɨjaavɨpɨ'delaka! Aawa, Naangei yuyangɨ wakakengɨra. 26Yuyangɨ wakaka sɨnnawɨnyarɨ yavɨkaryaakerɨdaa'nyɨ anga naanga pimagɨnya gazavasava' Kwaaka yunebanna wɨmwaaihɨna ya'. A'mwera maayagaa' Naangei a'mwe yuyainaavɨna yawɨ'na ‘A'mwe gabinyaraavɨre kumɨre bwaibwalyajɨ kwaakejɨ kumɨregaasɨ wakɨma!’ yawɨ'na yaka dɨvi wɨmwaaihɨna ya'. 27‘A'mwera nɨmɨnyɨ yawɨrapɨjɨ yaamɨjɨ nyanganapɨri nyɨbɨramaapɨ'deinyɨ daaka?’ sara daka sara wɨmwaaihɨna yaa'. Sara yaake' kɨrɨ' Gotɨyai nemɨnyɨ maavewɨ mamwaalyɨka. Aawa, a'mwe yuyainaayaba mwaaidelyɨ. 28Savɨne'na pwai pɨkarya yɨdava'

‘Sahwarɨna kwaihwaainakeina kurɨnakeina mwaaiho nemɨre kaavɨlyai.

Sai mamwaalyɨ yadori kwajɨ nemɨ mamwaalyɨ kyaadɨ'.’

Sarɨmɨre sɨdu'nakera sara kyɨhɨzaa' yɨda'nɨkesɨ

‘Nemɨjɨ gamɨre kaimɨraayainera.’

29Sarevɨdaa'nyɨ, gamɨre kaimɨraayaina mwaaiho'na dara myawɨraanna! ‘Gotɨyai a'mwa'mwe golɨya'bɨsalyɨ. A'mwa'mwe sɨlɨvaaya'bɨsalyɨ. A'mwa'mwe sɨlaange'bɨsalyɨ. A'mwa'mwengɨ a'mwera nayaa yawɨreva yavɨkarigasangɨra. Sara myawɨraannera!’ 30Kɨgaa' a'mwera Gotɨyarɨna navɨka mwaalesara kayaa'na kye' sagaa' Gotɨyai yagaala yarai majai mwaala'. Yagaala majai mwaalake' kɨrɨ' dahaasagaa' yunebanna yuyaina mwaaihoinaavɨ nedɨvanɨ' ‘Sarɨmɨre sɨmunyabwi mudɨkebwi jawɨramaaryɨla! (Nayaa dɨnyɨmɨdɨnyɨla!)’ 31Gotɨyai sara nedɨvanɨke' a'mwe yuyainaavɨna kotɨya naange' yɨda'maraangebwina nayaa yade yɨrɨka sagaa' wakɨkelyɨra. Nabaai, a'mwe yawɨbwa'derɨ dahɨlakakei kotɨya'na mena wɨmwaaiha'. A'mwe sai mena kabala' Gotɨyai ayɨna yɨdɨkaavakelyɨ. Sare' nemɨ tɨnna wanganona yawɨ'na ‘Ai, nebulyasɨ. Sai kotɨya' neyawɨbwaradelyɨ,’ yawɨ'na yɨvanɨgo,” Polɨ sara wɨda' Jizaazarɨna.

32Sagaa' baryaraavɨ yɨdɨkaasabwine yagaalya'na pwara kadɨka wɨ'neva “Kwaasɨya'nesɨ,” deva bɨrala wɨdesa' kɨrɨ' pwara “Nebulya' dɨngaka?” deva wɨde' “Pɨgaa' sa'na ayawɨ kaneda'gɨzɨ kadɨka gu'naadeinera.” 33Sara kude' pwara Polɨmɨre yagaalya' ku'ne' Polɨ yɨkabesaraavɨ ya'ma'na ya'. 34Polɨmɨ wɨ'nesara ye'mwannamwaaina yeva Naangerɨ lɨmwagevera yɨma'nyɨna ye'. A'mwe pwai Daayonɨzɨyaazai kaajolɨyai Aarɨyopahaazɨ saba yadelyɨ a'mwe pɨrɨ' Damaarɨza' wo'nɨkesɨ pwarajɨ Naangerera yɨma'nyɨna yesarera.

Currently Selected:

Apozelɨyara 17: byr

Highlight

Compare

Copy