Apozelɨyara 16

Polɨjɨ Saailaazalyɨ saraalyɨ Timotilyɨ wawesa'nesɨ.

1Angeba Devinajɨ Angeba Lɨzɨtɨraanajɨ Polɨ yɨ'mavaawɨna ya'. Saba Kɨraazɨtɨyarɨ mɨdɨdei Timoti wo'nɨkei mwaalɨna yakelyɨ. Ganaange' Naangerɨ wɨ'nade' Juya' mwaalaka kɨrɨ' ganɨmaangei Gɨrikɨyalyɨra. 2Neya'mwera Lɨzɨtɨraa mwaalyarajɨ Aaikonɨyaamɨ mwaalyarajɨ Timotirɨna jalɨkurakɨna ye' “A'mwe tewaanyalyɨra.” 3Polɨ sɨmunyavɨ da' yawɨ'na “Nɨmɨjɨ Timoti wawana!” yawɨ'na yaka Juyaraavɨrebwi Timotire kɨlaakejɨ' davɨna ya'. Sare' dare'nesɨ. Juya yuyara saba mwaalyara yawɨre' “Timotirɨ ganɨmaangei Juyai mɨka. Aawa, Gɨrikɨyalyɨ. Gawaalɨvaangere kɨlaakejɨ' mada'nyɨkelyɨ.” 4Wi'na davɨna kya' Polɨjɨ Saailaazalyɨ Timotilyɨ anga yuyangɨna wɨna yeva Kɨraazɨtɨyareraavɨ yagaalya' Jeruzaalemɨ Wɨdaasaderajɨ a'mwe naangerajɨ jamungajakesa'na wɨjɨwaakɨna ye'. Wɨjɨwaakɨna yeva wɨde' “Yagaala sa' sara jideihɨlyɨ.” 5Sarevɨdaa'nyɨ Kɨraazɨtɨyare kusɨlaanya sara yeva lɨmwangebwina dɨragɨnna mwaalesa' yɨrɨka yuyagaa' a'mwe kwalaalyara Kɨraazɨtɨyarera yɨma'nyɨna ye'.

Anga Tɨrawaazɨ Polɨ waja' wanganake'nesɨ.

6Kaanna kaanna wɨna yeva Kwaaka Pɨrɨzɨya Kwaaka Galezɨya sabanyaai yamarina yadaapɨjɨ Kuryai Tewaanyai wɨda' “Dahaa' Pɨrovijɨ Ezɨya Gotɨyare yagaalya' mujɨwaakɨpɨna!” 7Mi'na kuda' Kwaaka Mɨzɨya maangebaarɨna yɨ'mavaawɨna yeva yawɨ'na ye' “Pɨrovijɨ Bɨthinɨya wawaana!” Sara yawɨ'na kye' Jizaazare Kuryai kaanya tihɨ'na yake'na “Sawɨnna mupɨnera!” wɨdɨna ya'. 8Wɨdɨna kya' Kwaaka Mɨzɨya yuneba lota'na yeva Anga Tɨrawaazɨna walaabɨna ye'. 9Walaabɨna kye' sawɨsavɨ Polɨ a'mabaaitɨnna wanganna yake' a'mwei Pɨrovijɨ Maazathonɨya mwaalyai daavɨkei naanga yɨdaangana' “Polɨgɨ, Kwaaka Maazathonɨya ga'mava'gɨzɨ nemɨnyɨna dɨnegaimwana!” 10A'mabaaitɨnna mi'na wanganna yaka dara yawɨro' “Gotɨyai ‘Maazathonɨya mwaalyaraavɨ yagaala tewaanya' duzɨwakaawila!’ danedɨwaka!” Mi'na dona Maazathonɨya sawɨnneina gɨlyɨvɨsa yɨme'nya'bɨ' yovɨrawakɨna yo.

Anga Pilipaai A'mwe Lɨthɨya' Kɨraazɨtɨyare' yɨma'nake'nesɨ.

11Anga Tɨrawaazɨ sɨpɨyavɨ yɨlamwaaina kyo sɨpɨya' Ahu'manna Saamothɨrezɨna yɨda'na makuna neyaka yɨrɨka pɨrɨvɨ Anga Nɨyapolɨzɨ sabanna makuna neya'. 12Makuna kaneya' kaanna wɨlaawɨna yona Anga Pilipaaina yɨ'mavaawɨna yo. Anga sa' Kwaaka Maazathonɨya mwaalyaraavɨre anga naangebanyɨra. Anga Romɨdaasara kwala naange' mwaaihasabanyɨ. Sabanna yɨ'mavaawɨna yona yɨrɨka pɨjaa' mwaalɨna yo. 13Mwaalɨna yona Juyaraavɨre Kwazaakegaa' “Aalɨmaangebaarɨ Juyara Gotɨyarɨ yagaala wɨdadɨvɨsaba dɨngaka?” dɨna yona aalɨmaangebaarɨna wɨna yo. Wɨna yona dara wangano' “A'mwe damwaaihava!” Sara dona walamwaaina yɨna yona a'mwe yɨ'bwa'nemwaalesangɨ wɨdɨna yo. 14Wɨdɨna yo' a'mwe pɨrɨ' Lɨthɨya' Anga Taayataairadaasasɨra. A'mwe sa' gɨlyajɨ baazɨ'ma'nyajɨ kwaabɨhannyajɨ saza wangwaija'bɨsa' wanya'ne' dɨvaina yada yaasadesɨra. Lɨthɨya' Gotɨyarɨ yagaala wɨdadesɨ. Polɨ yagaala tewaanya' wɨdadaa'nyɨ Gotɨyai sɨduta tewaanya wɨjaavɨna kya' Lɨthɨya' nayaa wɨ'nyɨna ya'. 15Nayaa wɨ'nyɨna yaka Naangerɨ lɨmwanna kya' gamɨnyɨjɨ gamɨjɨyaraavɨjɨ bavɨtaazɨya yɨna yo. Bavɨtaazɨya yɨna kyo neda' “Nɨmɨnyɨna ‘Naangere' sahwarɨ nebulya'na wɨlɨmwaga'manɨkesɨ,’ dɨnapɨjɨ nɨmɨre angevɨ dɨmwaalyɨla!” Sara naanga kaneda' gamɨre angevɨ wɨlamwaaina yo.

Pilipaai kalavuzangevɨnesɨ.

16Pɨgaa' Gotɨyarɨ yagaala wɨdadɨvɨsawɨnna wodaawojɨ tusavɨ sɨdɨraaya' yaasɨwa'wawɨnya yade' jɨmaata'na neya'. Sɨdɨraaya sa' kamaala naanga pwai kɨnɨnnake' dɨvi yɨma'nadengɨna dadesɨra. Sara dada gamɨre maremwaaidɨvɨsara nɨgwia naanga maarɨna yesasɨra. 17Jɨmaata'na neyaka Polɨjɨ sainaavɨ mɨdɨda jaka wɨdadesɨ. “A'mwe sara Gotɨya Mena Ke'mwewɨnyare yaasɨwa'wawɨnyare. Gotɨyai sarɨmɨre kayaa'nanyanna yɨhɨvadaihasamaaradevwina yɨhɨthɨvanɨgasarera.” 18A'mwe' dada yɨrɨka pɨjaakuna jaka dada Polɨ maa'na kwina' gɨnyɨma'nyɨna yaka yɨmakerɨ wɨda' “Kɨraazɨtɨyai Jizaazarɨne yayavɨna naanga gɨthɨma! A'mwevɨre munyɨkɨdaasɨ dalyona!” Sara kuda' sagaasagaa' yɨmakei yarai bwalyuna ya'. 19Yarai bwalyuna kya' sɨdɨraayavɨre maremwaaidɨvɨsara dara wanganesa' “Nɨwaava, dɨvi yɨma'nya'nenna yagaala majɨ kyojɨ nɨgwia mamaari yaadeina daaka!” Deva Polɨmɨjɨ Saailaazarɨjɨ galalɨmwanna yeva a'mwe naangeraayaba yɨkabadɨvɨsabanna mwagi'namaa'na ye'. 20Sara yeva saba naangera kotɨya' yawɨbwa'dɨvɨsaraayabanna makuna yeva wɨde' “A'mwe daraai Juyaraalyɨ. Nemɨre anga davɨ kayaa'na yɨvanɨgɨlyaraalyɨ. 21Daraai nemɨrebwi kayaaka neyɨgaimwaalya' mudɨkebwi yaasɨwa'na nejɨwaakɨvanɨgi. Romɨyaina sabwi myaanneinera!” 22Sara kude' kwala bwa'naanya' maanga jaka kude' naangera Polɨjɨ Saailaazalyɨ saraare baazɨ'ma'nyangɨ maralihɨvalasɨ'na yeva pɨlɨzɨmaanɨyaraavɨ wɨde' “Bajɨngɨsajɨ dɨramyɨla!” 23Sara kude' tamɨna tamɨna yeva kalavuzangevɨ wɨmwaaihɨna yeva kalavuzangevɨ maremwaaiderɨ naanga wɨde' “Nayaa dangana! Lɨkaanya nabwalyuikadɨka!” 24Naanga mi'na kude' kalavuzangevɨ maremwaaidei yagaala naanga sa' maaraka ku'dɨka tɨnnyabanyavɨ wɨmwaaihɨna yaka kɨrɨmɨre sɨvɨlyɨraarɨ yɨsavakaarɨ tɨnnyawɨ dɨragɨnna yagɨlakurakɨna ya'.

25Sawɨsavɨ kalawawegaa' Polɨjɨ Saailaazalyɨ saraai Gotɨyarɨna yagaalyasɨ yɨledaatasɨ wɨdadaakɨlyɨ kalavuzara pwara kadɨka wɨ'nyɨna ye'. 26Wɨ'nyɨna yadaapɨjɨ sagaa' wɨnɨnya naange' yɨna kya' kurɨkejɨ sidɨhɨbyajɨ yonyɨ yonyɨ naanna yɨnyɨna ya'. Yonyɨ yonyɨ naanna yɨnyɨna kya' kaanya yuya baasɨnyɨna yake kalavuzaraavɨre senɨyabara pwinɨkebara bwalaraawɨna ya'. 27Bwalaraawɨna kya' kalavuzangevɨ maremwaaidei dɨkaa'na yaka kaanya yuya baasɨnɨke tɨnna wanganna yaka dara yawɨrake' “Aakai, kalavuzara lɨka mena duwaava!” Sara daka “Sare'na wagɨla namaa'mudɨka! Nɨmɨ sainyɨ dabɨra'nɨma,” daka gannya kwaari'masɨramɨnya' maralɨmwanna ya'. 28Maralɨmwanna kya' kɨrɨ' Polɨ jaka naanga wɨda' “Maramakɨnɨnnera! Sare' dare'nesɨ. Nemɨ yuyaina tɨhu'na mwaaihona.” 29Jaka naanga kuda' kalavuzangevɨ maremwaaidei yɨ'baake'na jaka wɨdɨna yaka kaanyave'na bwina yaka lɨka naanga yɨna yaka bɨ'bɨta yada “A'mwe naangeraai nyɨgaimwagikajɨ dahayɨwaai?” daka Polɨjɨ Saailaazalyɨ saraaryabanna bula'na ya'. 30Bula'na yakei daavɨna yaka mwasawɨnna saraarɨ makuna yaka yɨwaara'na “A'mwe naangeraaihi, nɨmɨ gara kya'mujɨ nyɨvadaihasamaaradeinyaka?” 31Sara yɨwaara'na kya' saraai wɨdahi “Naanga Jizaazarɨ kalɨmwaga'gɨzɨ tewaanya dɨmwaaideigɨnyɨ. Nabaai, Naangei gɨmɨre angevɨyaraavɨjɨ wɨvadaihasamaaradeihɨlyɨ.” 32Wɨdahɨla Naangere yagaalya' gamɨnyɨjɨ gamɨre angevɨ mwaalesaraavɨjɨ wɨjɨwaakɨna yagi. 33Wɨjɨwaakɨna kyagi sawɨsavɨ sagaa' kalavuzangevɨ maremwaaidei bajɨngɨsajɨ tameta ga'bwaralyangɨ aalya yɨna ya'. Aalya yɨna kya' sagaasagaa' gamɨnyɨjɨ gamɨreraavɨjɨ aalyavɨ bavɨtaazɨya yarai yɨna yagi. 34Bavɨtaazɨya yɨna kyagi a'mwei Polɨmɨjɨ Saailaazarɨjɨ gannya angevɨna makwina yaka wapaaya wɨjaavɨna ya'. Salyɨ gamɨrerajɨ Gotɨyarɨ lɨmwagesa'na yɨlaaya yeva tewaanna mwaaidɨvɨ' mwaalɨna ye'.

35Mwanyavɨ Romɨyaraavɨ naangera pɨlɨzɨmaanɨyaraavɨ wɨdaasɨna kye' sahwara wɨna yeva kalavuzangevɨ maremwaaiderɨ wɨde' “A'mwe saraarɨ yɨ'daala'gɨzɨ duthaasa!” 36Kude' kalavuzangevɨ maremwaaidei Polɨmɨ wɨda' “Naangera gɨmɨnyɨnajɨ Saailaazarɨnajɨ wɨdasɨwaa' ‘Saraarɨ duthaaso!’ Sara kudasɨwaa' kalavuzangevɨdaasɨ yagalya'mavakɨlyɨ kave dɨwila!” 37Kuda' Polɨ pɨlɨzɨmaanɨyaraavɨ wɨda' “Aawa, nedɨwaata sabwi kayaa'nanyabulyɨ. Naarɨmɨ Romɨyainaalyɨ. Wona kayaa'na mi kyawaaihoi yuyara tɨnna nehwangadaapɨjɨyaba nehɨramyawaaiha'. Yagaala majɨdayɨ yeva kalavuzangevɨ yaasɨwa'na wɨmwaaihɨna nehyawaaiha'. Dahaasagaa' nehɨthɨwaa' ‘Lɨka yulya'na kave dɨwila!’ Be'nana! Romɨyaraavɨ naangera sahwara bɨpɨjara mwasawɨnna kanehɨmakwalyopɨjɨ wawakadeinaalyɨ.” 38Naanga kuda' pɨlɨzɨmaanɨyara ayɨna wɨna yeva Polɨ wɨdake'na Romɨyaraavɨ maremwaaidɨvɨsaraavɨ wɨjɨwaakɨna ye'. Polɨmɨnajɨ Saailaazarɨnajɨ “Saraai Romɨyaraalyɨ,” wɨ'nyɨna yeva “ ‘A'mwe naangeraai mɨka!’ dona tamyawaaihoraalyɨ,” deva lɨka naanga ye'. 39Lɨka naanga yesara bɨna yeva wɨde' “Kayaa'na yɨhyawaaiho'na kale neyɨwaka.” Wɨdeva kalavuzangevɨdaasɨ kave makwalyuna yeva yɨwaara'na ye' “A'mweraaihi, nemɨre angeba yagalya'mavakɨlyɨ dɨwijɨwaala?” 40Yɨwaara'na kye' Polɨjɨ Saailaazalyɨ saraai kalavuzangevɨdaasɨ yagalya'ma'na yagɨla Lɨthɨyavɨre angevɨ wɨlɨna yagi. Wɨlɨna yagɨla neya'mwera yɨkabɨna yesagaa' kumɨnyɨ dɨhaa'bwasabwi yɨvaimwanna yagɨla kaanna wɨna yagi.

Currently Selected:

Apozelɨyara 16: byr

Highlight

Compare

Copy