Apozelɨyara 15

Jeruzaalemɨ yagaala naanga wɨdesa'nesɨ.

1A'mwe Juya pwara Kwaaka Juthɨyadaasara Aadɨyokɨna bɨna yeva neya'mweraavɨ dana wɨjɨwaakɨna ye' “Ne Mozɨzai kɨlaaka daya'na kɨwɨnya wɨjaakevɨ mi yɨpɨja' Gotɨyai mavadaihasamaari yɨhyannelyɨra.” 2Sara wɨjɨwaakɨna kye' Polɨjɨ Baanavaazalyɨ saraai maanga wɨdɨna kyagi maanga wɨdadaapɨjɨ Kɨraazɨtɨyarera dɨnyɨna ye' “Jeruzaalemɨna Polɨjɨ Baanavaazalyɨ nemɨre Aadɨyokɨ mwaalya pwarajɨ kwawapɨjɨ Wɨdaasaderajɨ a'mwe naangerajɨ yɨwaarata da' nayaa dɨzavada'galyideihɨlyɨra.”

3Sarevɨdaa'nyɨ Kɨraazɨtɨyare kusɨlaanyavɨyara kudaase' kaanna wɨna yeva tɨnnyaba Kwaaka Pɨnɨzɨyajɨ Kwaaka Samerɨyajɨ sabanyaai neya'mweraavɨ wɨdɨna “Pɨba pɨba ajɨmya yuyangɨyara sɨnnawɨnyaraavɨrebwi bikwalyɨna yeva Naangerɨ lɨmwamanɨga'.” Sara wɨdɨna kye' a'mwera yɨlaaya naanga yɨna ye'. 4Yɨlaaya naanga yɨna yadaapɨjɨ Jeruzaalemɨna yɨ'mavaawɨna kye' kumɨjɨ Jeruzaalemɨna mwaalya Kɨraazɨtɨyare kusɨlaanyavɨyarajɨ Apozelɨyarajɨ a'mwe naangerajɨ yɨlaaya yɨna yeva ata bwa'nyɨna kye' Aadɨyokɨdaasara “Gotɨyai wɨgaimwanna kaneya' sana sana yoinera,” wɨjɨwaakɨna ye'. 5Wi'na wɨjɨwaakɨna kye' Perɨzɨyara Naangerɨ lɨmwadɨvɨsara pwara daavɨna yeva wɨdɨna ye' “Menyara kɨlaaka da'nɨpɨjaraavɨ ‘Ne Mozɨzare Kɨwɨnya' jɨla!’ duzidesɨra.”

6Savɨne'na pɨgaa' Wɨdaasaderajɨ a'mwe naangerajɨ yagaala savɨ yawɨbwata'nera yɨkabɨna ye'. 7Yɨkabɨna yeva yɨwaara'nyɨna yɨwaara'nyɨna yeva kuna dɨdaapi Pitai daavɨna yaka wɨda' “Nya'mweihi, sɨnnawɨ nɨmɨdaasɨ ajɨmya yuyangɨyaraavɨ yagaala tewaanya' kude sahwara kadɨka wɨ'neva Naangerɨ lɨmwagesa'na Gotɨyai nyɨdahɨlakake' yawɨ'mwaava. 8Gotɨyai a'mweraavɨre sɨmunyangɨ yawɨrangadei ‘Ajɨmya yuyangɨya kwaraavɨjɨ maarɨdeinyɨ,’ daka gannya Kurya Tewaanyarɨ nejaavakabaaibɨ' Menyaraavɨna yanga wɨjaava'. 9Nemɨnyɨna ge' myake' kumɨnyɨna ge' mya'. Aawa, kumɨ sara Gotɨyarɨ ku'nalɨmwage' Gotɨyai kumɨre sɨmunyangɨ gɨrɨkita duimwagasɨ'na'. 10Sarevɨdaa'nyɨ sarɨmɨnyɨna Gotɨyarɨ kale wiwaka. Sahwarɨ yaamɨjɨ be'na yɨvanɨgava? ‘Kɨwɨnya naange jɨla!’ dadɨvɨ' taanga Menyaraavɨre egweyaba wakɨna wakɨna yadɨvɨtabaaibɨsasɨra. Kɨgaa' taanga sa' Ne sɨnnawɨnyarajɨ nemɨjɨ nayaa mamakwɨyɨ yaawoinera. Mudɨkeraavɨna be'na wakɨvanɨgava! Sa' aawa. 11Nemɨ dara yawɨralɨmwamanɨgo. Naangei Jizaazai nemɨ yuyainaavɨna yanga negaimwagakevɨ nevadaihasamaara'. Savɨne nayaa wɨ'nɨvanɨgo' Gotɨyai nemaa'mwakeine. Nabaai Menyara yanga wɨgaimwanga saburɨna Gotɨyai avaaina wɨvadaihasamaa'manɨkere.”

12Sagaa' kwala bwa'naanya' kave mwaaidapɨjɨ Baanavaazalyɨ Polɨjɨ saraai wɨjɨwaakɨna, Gotɨyai gannya dɨragɨnya' kujaava' wɨjɨwaainya'nejɨ atɨka maru'nasajɨ ajɨmya yuyangɨyaraavɨreba yagɨlya'na wɨjɨwaakɨna yagi. Wɨjɨwaakɨna yadaakɨlyɨ yuyara kadɨka nayaa wɨ'nyɨna ye'. 13Kadɨka wɨ'nyɨna kye' dɨvidaa'nyɨ Jemɨzai yuyaraavɨ wɨda' “Nya'mweihi, nɨmɨre dɨwɨja' dɨnyu'nyɨla! 14Sɨnnawɨ sagaa' Gotɨyai ajɨmya yuyangɨyaraavɨna kale kwia' sahwaraavɨ gamɨre yaya' kɨnɨnnakera yɨma'nya'neraavɨ gamɨnyɨneraavɨ maarake'na Saaimonɨ Pitai mena nejɨwaakɨwa'. 15Sara nejɨwaakɨwake' pɨropetɨyara Gotɨyarɨ wɨ'nawɨjɨwakyaasara sara yɨdayaa'. Savɨna Gotɨyare bukuya' dara dɨnɨkabaaibɨsasɨ.

16Naangei nedɨwa' ‘Dɨvi yagalaawɨna ya'mujɨ

Ne Devitɨmɨre selɨ angevɨyaraavɨna dɨragɨnya wɨjaavɨdeinyɨra.

Sahwara bwalaraawesara yɨma'nyɨna kye'

Sahwainyɨ nawɨ'nyaraavɨ nayaa wɨmwaaihɨdeinyɨra.

17“Dahaa' a'mwe yɨvainera Naangeinyɨ nyɨbɨramaapɨka!

Ajɨmya yuyangɨya pwaraavɨna nɨmɨre yaya' dahɨlakɨwera!

Sahwara nyɨbɨramaapɨka!” dena nayaa wɨmwaaihɨdeinyɨ.

Nɨmɨnyɨnera ajɨmya yuyangɨyara pwara nyɨbɨramaapɨ'deinyɨra.’

18Sara nedɨwa' Naangei kɨgaakuna danejɨwaainakela.”

19Jemɨzai yagaala pɨrɨ' wɨda' “Sa' dɨnɨkevɨna da' yawɨ'manɨgesɨra. Ajɨmya yuyangɨyara Ne sɨnnawɨnyaraavɨrebwi mipɨjara Gotɨyarebwi lɨmwagapɨjɨ sahwara navɨka mwaaibɨka! ‘Juyainaavɨne Ne Mozɨzare Kɨwɨnya jɨla!’ madaannera! 20Aawa. Pɨkarɨyɨkwiavɨ dara yavɨkaryaana! Sarɨmɨ tewaanna yɨvanɨgasaihɨlyɨ. Yagaala maalɨke' yɨhɨthaana! A'mwera yɨkunaabudɨke'na jɨlɨkyaawaryaraavɨ karamapɨjɨ mɨwɨta kɨmaaka sa manɨnna! Nabaai, Nyɨlyarɨjɨ Lawerɨjɨ yɨsaraavɨjɨ sazangɨne mɨwɨta manɨnnera! Ata maralɨmwanna minna! Jɨlɨkyaawaryaraavɨ gɨraa'dɨwannɨke tawanake manɨnna! Tawe manɨnnera! Gave'na sara yavɨkaryaana! 21Sare' dare'nesɨ. Kɨgaakuna Juyaraavɨre Kwazaakegaa' yuyagaa' Lotuangengɨ Ne Mozɨzare Kɨwɨnya wɨjɨwaakɨna wɨjɨwaakɨna yadɨvɨ' dahaasagaa' anga yuyangɨ gamɨre yagaalya' wɨdadɨvɨsa'ne'na yavɨkaryaana!” wɨda' Jemɨzai.

Menyaraavɨ pɨkarɨyɨkwia' yavɨkaryesa'nesɨ.

22Sagaa' Wɨdaasaderajɨ naangerajɨ Kɨraazɨtɨyare kusɨlaanyavɨya yuyarajɨ dɨnyɨna “Tewaanyasɨ. Aadɨyokɨna nemɨjɨyaraarɨ dahɨlakawaajɨ Polɨjɨ Baanavaazalyɨ wɨdasaana!” Dɨnyɨna yeva Juthaazai yaya pɨrɨ' Baazavaazai wo'nɨkelyɨ Saailaazalyɨ saraarɨ dahɨlakɨna ye'. Dahɨlakɨna yesaraarɨna neya'mwera wɨdadɨvɨ' “A'mwe nemaremwaaidisaraai tewaanyaraalyɨra.” Dahɨlakɨna yeva pɨkarɨyɨkwiavɨ yavɨkarina yɨna yeva wɨdaasɨna ye'. 23Yɨkwia sa' yɨda'nɨ'

“Nedaasadeinajɨ a'mwe naangeinajɨ sɨrya'mweina pɨkarɨyɨkwia davɨ sarɨmɨnyɨna yavɨkarivanɨgona. Ajɨmya yuyangɨyaihi neya'mweihi Aadɨyokɨ mwaalyaihɨlyɨ Kwaaka Sɨrɨya mwaalyaihɨlyɨ Kwaaka Sɨlɨzɨya mwaalyaihɨlyɨ yɨhɨthɨvanɨgo ‘Neya'mweihi!’ 24Dara wɨ'nɨvanɨgo. Nemɨrera pwara kaanna waweva Menyaihɨrɨ yɨhɨtheta yagaala sanna Menyaihi sɨmunya kwalaalya yawɨ'na kye' kale yɨhya'. Sara wɨ'nona yɨhɨthɨvanɨgo. Yagaala sa' yɨhɨthɨwa'daasaraavɨ mudaasɨwa'do. 25Dahaasagaa' yɨkabɨna yona yagaala da' jawɨbwarakɨwo, yuyaina. ‘Tewaanyasɨ,’ dona a'mwe sɨdu'nakeraarɨ dahɨlakona sarɨmɨnyawɨnna saraarɨ wɨdasaade. Saraalyɨ Baanavaazalyɨ Polɨjɨ saraavɨ wɨdasaadera. Baanavaazalyɨ Polɨjɨ saraarɨna yɨlaaya nevu'nɨvanɨkeraalyɨra. 26Anga yuyangɨ Baanavaazalyɨ Polɨjɨ saraai Kɨraazɨtɨyai Jizaazai Naangere yagaala wɨjɨwaakagɨlyaraai balya'na lɨka myadisaraalyɨ. Saraarɨ wɨdasaadera. 27Sarevɨdaa'nyɨ nabaai, sarɨmɨnyawɨnna Juthaazalyɨ Saailaazalyɨ saraarɨ, sɨdu'nakeraarɨna yɨhɨthɨworaarɨ wɨdasaadera. Saraai yagaala avaalya' jɨthawakɨwo' yɨhɨzɨwaakikaderaalyɨ.

28Sare' dare'nesɨ. Kurya Tewaanyalyɨ nemɨjɨ mena yawɨ'na yobwi taangayabwi mɨ'. Aawa. Daazabwi davwi dɨmɨdɨnyɨla!

29‘A'mwera yɨkunaabudɨke'na jɨlɨkyaawaryaraavɨ karamapɨjɨ mɨwɨta sa manɨnna! Nyɨlyarɨjɨ Lawerɨjɨ yɨsaraavɨjɨ dazangɨne wapaaya manɨnna! Tawe manɨnna! Jɨlɨkyaawarya gɨraa'dɨwanna yɨpɨja manɨnna! Ata malɨmwadɨnna! Kayaa'nanya sangɨ mya'gɨzɨ tewaanya jɨtheigɨnyɨ.’ Mi'na yɨhɨthɨwo.” Pɨkarɨyɨkwia' sara yavɨkarinɨkesɨ.

30Sarevɨdaa'nyɨ wɨdaasesara kaanna wɨna yeva Anga Aadɨyokɨna yɨ'mavaawɨna kye' Naangerera kwala bwa'naanya yuyarajɨ yɨkabɨna kye' pɨkarɨyɨkwia' wɨjaavɨna ye'. 31Wi'na wɨjaavɨna kye' a'mwera paazɨya' tɨnna maranganna yeva yagaala nawɨ'nya'na yɨlaaya yɨna ye'. 32Yɨlaaya yɨna kye' Juthaazalyɨ Saailaazalyɨ saraai Gotɨyarɨ wɨ'nawɨjɨwaakadisaraai kuna wɨjɨwaakɨna yagɨla kɨrya'mweraavɨ sɨmunya dɨragɨnya' wivaimwanna yagi. 33Wivaimwanna yagɨla mwaalɨna mwaalɨna kyagi kɨrya'mwera kɨrɨmɨnyɨna yɨlaaya yeva wɨde' “Ayahi kwaamu'nanyaburɨ yɨhɨthaasesaraayawɨnna dɨwideihɨlyɨra.” 34Sara wɨdɨna kye' Saailaazai yawɨraka “Dava mwaalɨdeinyɨ,” mwaalɨna kya' Juthaazai gavei ayɨna wɨna ya'.

35Anga Aadɨyokɨ Polɨjɨ Baanavaazalyɨ mwaaidakɨlyɨ saraalyɨ pwara kwalaalyarajɨ Naangere yagaala wɨdeva wɨjɨwaakɨna ye'.

Polɨjɨ Baanavaazalyɨ yosɨnagɨlya'nesɨ.

36Dɨvi yɨrɨka pɨnɨngɨ Polɨ Baanavaazarɨ wɨda' “Anga yuya gazabazaba Naangere yagaalya' wɨdolyabanna Neya'mweraavɨ angyɨrɨ'maata yakadera. Tewaanna dahamwaaihava? Wanganakadera.” 37Sara kuda' Baanavaazai wɨda' “Maakɨyai Jonɨjɨ wawaadera.” 38Polɨ wɨda' “Aawa, kɨgaa' Maakɨyai Jonɨjɨ kwawo yunewɨnna wawɨnya yuya myada Kwaaka Paabɨlɨya saba naarɨmɨnyɨ nehyagalya'mava'. Nehyagalya'mavake'na dahaa' sahwai kaanya mwawannelyɨra.” 39Sara kuda' sa'na maanga dɨnyɨna yagɨla yosɨnna yagi. Baanavaazai Maakɨyai Jonɨmɨ maaraka sɨpɨyavɨ Ahu'manna Saaipɨraazɨna wɨna ya'. 40Wɨna yadaasɨ Polɨ Saailaazarɨ dakɨlakɨna kya' kɨrya'mwera wɨde' “Gotɨyai kɨrɨmɨjɨ wawojɨ yanga yɨhɨgaimwagori kave maremwaaina yɨhyathelyɨra.” 41Mi'na kude' Kwaaka Sɨrɨyanajɨ Kwaaka Sɨlɨzɨyanajɨ wawaka Kɨraazɨtɨyare kusɨlaanyangɨ wɨjɨwaakɨna yada sɨmunya dɨragɨnya wɨjɨwakadaasɨ dɨragɨnya maaresare.

Currently Selected:

Apozelɨyara 15: byr

Highlight

Compare

Copy