Apozelɨyara 14

Anga Aaikonɨyaamɨ sabannesɨ.

1Aadɨyokɨ Polɨjɨ Baanavaazalyɨ sara yagɨlya' Anga Aaikonɨyaamɨ ayɨna yagi. Juyaraavɨre Lotuangevɨ wɨlɨna yagɨla tewaanna wɨjɨwaakɨna kyagi Juya pwarajɨ Gɨrikɨya pwarajɨ kwala bwa'naanya naange' wɨ'nalɨmwanna ye'. 2Wɨ'nalɨmwanna kye' kɨrɨ' Juya pwara malɨmwagi yevera kwaasɨ kude' ajɨmya yuyangɨya pwaraavɨ nedaa'negwaaravaavɨna sɨnna tɨka davɨna wia'. 3Sɨnna tɨka wɨda'daa'nyɨ sarevɨdaa'nyɨ naangegaa' Aaikonɨyaamɨ saraai mwaalɨna yagɨla lɨka mi yagɨla Naangerɨna dɨragɨnna wɨdɨna yagi. Dɨragɨnna wɨdɨna kyagi Gotɨyai yawɨ'na “A'mwera nayaa yawɨpɨka! ‘Gotɨyareraai “Gotɨyai yange'na tewaanna yɨhɨgaimwagathe'nanyɨ,” nejalɨkurakɨvanɨgɨlya' nebulyasɨ,’ sara yawɨpɨka!” Gotɨyai daka gannya dɨragɨnya' wɨjaavɨna kya' saraai wɨjɨwaainya tewaanyajɨ atɨka maru'nasajɨ yɨna yagi. 4Sara tewaanna yɨna kyagi Angeba mwaalyara jaapaina yesa' pwara wɨdaasaderaarɨna gaidaa'na yesa' pwara Juyaraavɨ gaimwanna ye'.

5Dɨvi ajɨmya yuyangɨyarajɨ Juyarajɨ kunnya a'mwe naangerajɨ dɨnyɨna ye' “A'mwe saraarɨ kayaa'na yawaajɨ sɨlyajɨ lɨwakaana!” 6Dɨnyɨna kye' sa'na Wɨdaasaderaai kadɨka wɨ'nyɨna yagɨla Anga Lɨzɨtɨraajɨ Anga Devijɨ Kwaaka Lɨkɨyonɨya mannɨkebanyaalyɨ kwaaka avaalyavɨ angengɨjɨ lɨkaanya wɨna yagi. 7Lɨkaanya wɨna yagɨla yagaala tewaanya' wɨjɨwaakɨna yagi.

Anga Lɨzɨtɨraa sabannesɨ.

8Anga Lɨzɨtɨraa a'mwei sɨvɨlyɨraai bainɨkei mwaalɨna ya'. Sai mudangegaa' ganaange' sɨvɨla kayaa'nanyarɨ kamaara' yuyagaa' kaanya myamaryadei mwaalɨna ya'. 9Mwaalɨna yakei Polɨmɨre yagaalya' kadɨka wɨ'nyɨna ya'. Kadɨka wɨ'nyɨna kya' Polɨ dara wanganake' “A'mwe sai Naangerɨ mena wɨ'nalɨmwamwaka savɨne'na Gotɨyai a'mwe tewaanyarɨ wɨmwaaihathei daaka!” Daka baihana'na yaka 10naanna wɨda' “Sɨvɨlyi dɨthaaka!” Mi'na kuda' a'mwei yarai yɨladɨkwosɨ'naka saba kaanya yamarina ya'. 11Kaanya yamaryadaa'nyɨ kwala bwa'naanya Polɨ yakevɨ tɨnna wanganeva kunnya Lɨkɨyonɨyagaalyavɨ jaka dɨnyɨna ye' “Gotɨyara mwaaihasaraavɨdaasɨ daraai a'mweraaibɨsaraai nemɨnyawɨnna waimanaabɨhɨle!” 12Jaka dɨnyɨna yeva kumɨre gotɨyaraare yaya' Baanavaazarɨjɨ Polɨmɨjɨ yaya wɨde'. Baanavaazarɨna Suzai wɨdeva Polɨmɨna yagaala wɨdaderɨna Emizai wɨde' yaya'. 13Sara kude' Suzare yɨleanga angeba maangebaarɨ madakevɨdaasɨ Suzare yɨleanga maremwaaidei bulɨmakaawoyaraavɨjɨ purɨryangɨjɨ adɨkuryabanna makwalyuna ya'. Maremwaaide salyɨ kwala bwa'naanyajɨ yawɨ'na “Bulɨmakaawoyaraavɨ tamawaajɨ gotɨyaraarɨ yɨkunaabudɨke'na wɨjavaana!” 14Sara yawɨ'na kye' savɨna Baanavaazalyɨ Polɨjɨ saraai wɨ'nyɨna yagɨla “Sabwi kayaa'nanaangebulyɨ,” dahɨla kɨrɨnnya baazɨ'ma'nyawaarɨ lihɨvaina yagɨla kwala bwa'naanyavɨ tɨnnyawɨnna kaanyave'na wɨna yagɨla 15jaka wɨdahi “A'mweihi, sabwi baa'na yɨvanɨgava! Naarɨmɨ a'mweinaalyɨra. Sarɨmɨbɨsainaalyɨra. Yagaala tewaanya' yɨhɨzɨwaakya'na bɨwolyainaalyɨra. Yɨhɨthɨvanɨgoi. Waryaanya da marasɨ'napi Gotɨya nebulyai yuyagaa' yuyagaa' mwalɨbainya'nerɨ duzɨla! Gotɨya nebulyai sɨgunyasɨ Kwaakevasɨ saalaalyajɨ yuya sangɨ mwaaidɨvɨsajɨ wakyaakelyɨra Gotɨyai. 16Kɨgaa' a'mwe ajɨmya yuyangɨyara kunnyabwi yadɨvɨ' Gotɨyai wanganakɨna yaka ‘Dahaa' a'mwera kunnyabwi yagalya'mavapi nɨmɨrebwi yɨpɨka!’ da'. 17Kɨgaasɨ dahaasɨ yuna lɨka yulya'na myada yuyagaa' sarɨmɨnyɨna tewaanna yadelyɨra. Sɨgunyavɨdaasɨ burɨka yɨhɨzaavaka tɨka munne tewaanya yɨrɨya'ne wakɨvanɨ'. Wapaaya sarɨmɨre munyɨkaavɨna yɨhɨzaavanɨke'na munya yɨhyɨdaasɨ sarɨmɨre sɨduta yɨlaaya yɨvanɨgasaihɨlyɨ. Yuya daza gamɨnyɨna nayaa yɨhɨzalɨkurakadelyɨra.” 18Yagaalya' sara kudahi kuna yaamɨjɨ wɨdɨna wɨdɨna “Sahwaraaihɨrɨna yɨkunaabudɨke' yɨravaana!” wɨdɨna kye' saraai wɨdɨna wɨdɨna “Aalo! Aalo!” wɨdahi. Saamɨnyagaa' wɨdɨna wɨdɨna kyagi a'mwera navɨka mwaalɨna ye'.

19Dɨvi Juya pwara Aadɨyokɨ Kwaaka Pɨzɨthɨya mannɨkebadaasarajɨ Anga Aaikonɨyaamɨdaasarajɨ bɨna yeva Wɨdaasaderaarɨna bɨrala wɨdɨna kye' a'mweraavɨ sɨnna tɨka wɨda'daa'nyɨ a'mwera Polɨmɨ sɨlaangejɨ lɨwakɨna ye'. Lɨwakɨna yeva “Mena baimwaka,” dɨna yeva angeba mwasɨlaa mwagi'namakwalyuna yɨna yeva yagalya'ma'na yɨna ye'. 20Yagalya'ma'na yɨna kye' Naangerɨ mɨdɨdɨvɨsara kale wiadaa'nyɨ gamɨnyabanna yɨkabɨna kye' kɨrɨ' Polɨ daavɨna yaka angebanna ayɨna wɨlaawɨna ya'. Ayɨna wɨlaawɨna yaka sawɨ se wa'mwa'na yagɨla mwanyavɨ dɨkaa'na yagɨla Anga Devina kaanna wɨna yagi Baanavaazalyɨ.

Kwaaka Sɨrɨya Anga Aadɨyokɨna ayɨna wawagɨlya'nesɨ.

21Anga Devi saraai yagaala tewaanya' wɨjɨwaakɨna kyagi a'mwe kwalaalyara mɨdɨdɨvɨsara yɨma'nyɨna ye'. Yɨma'nyɨna kye' Anga Lɨzɨtɨraana ayɨna wɨna yagɨla Anga Aaikonɨyaamɨna wɨna yagɨla, Kwaaka Pɨzɨthɨya Anga Aadɨyokɨ mannɨkewɨnna ayɨna wɨna yagi. 22“Yuyaba mɨdɨdɨvɨsaraavɨ nayaa mwaaibɨka!” dahɨla kumɨre sɨmunyangɨ dɨragɨnna wɨjɨwaakɨna yagi “Gotɨyare yagaalya' nayaa dɨlɨmwana! Naangerɨ kuna dɨlɨmwagaka! Gamɨre dɨragɨnya' nayaa dɨlɨmwagaka! Kwaaka davakɨ mwaaida'gɨzɨ daanga pɨnya'nejɨ kale ya'nejɨ kagyozɨ sare'na kɨrɨ' dɨvi Gotɨyai maremwaaidevɨ nawɨ'nyabanna dɨmwalaawɨdeigɨnyɨra,” sara yɨvaimwanna yagi. 23Yɨvaimwanna yagɨla anga yuyangɨ a'mwe sɨdu'nakeraavɨ Kɨraazɨtɨyare kusɨlaanya gazasavɨne a'mwe naangeraavɨ wɨmwaaihɨna. Mi'na wɨmwaaihɨna yagɨla “Gotɨyai yuyaraavɨ dɨragɨnyaraavɨ wɨmwaaihana!” dahɨla tɨka munne manyɨ yagɨla a'mweraavɨna Gotɨyarɨ yagaala wɨdɨna yagi “Naangeigɨ, a'mwe dara gɨlɨmwamanɨgasaigɨ, nayaa dɨmaremwaala!” sara wɨdɨna yagi.

24Kwaaka Pɨzɨthɨya kaanna yamaryadi' Kwaaka Paabɨlɨyana yɨ'mavaawɨna yagɨla 25Anga Pehaana yɨ'mavagɨlegaa' saba mwaalyaraavɨ Gotɨyare yagaalya' wɨdɨna yagi. Wi'na wɨdɨna yagɨla Anga Atelɨyana walaawɨna yagi. 26Walaawɨna yagɨla sɨpɨyavɨ yɨlamwaaina yagɨla Aadɨyokɨna kaanna wɨna yagi. Kɨgaa' Anga Aadɨyokɨ sawɨdaa'nyɨ Naangerera saraarɨ dara wɨdaase' “Neya'mweraaihi Gotɨyare yagaalya' wɨdadaakɨlyɨ Gotɨyai yɨlaaya yadei yanga nayaa yɨhɨgaimwagana!” Sara wɨdaasesa' sara yagi.

27Aadɨyokɨna yɨ'ma'na kyagi Kɨraazɨtɨyare kusɨlaanyavɨyara yɨkabɨna kye' Gotɨyai kɨrɨmɨnyɨna sara wiake' sara wɨjɨwaakɨna yagi. “Gotɨyai kaanya' tihɨ'nɨke' kabaasa' ajɨmya yuyangɨyara Naangerɨ wɨ'nalɨmwagesa'nesɨra,” sara wɨjɨwaakɨna yagi. 28Wɨjɨwaakɨna yagɨla Aadɨyokɨ saba naangegaa' mɨdɨdɨvɨsarajɨ mwaalɨna ye'.

Currently Selected:

Apozelɨyara 14: byr

Highlight

Compare

Copy