Apozelɨyara 13

Baanavaazalyɨ Solɨjɨ saraarɨ dahɨlakeva yaasesa'nesɨ.

1Aadɨyokɨ mwaalyara Kɨraazɨtɨyare kusɨlaanyavɨya pwara Gotɨyarɨ wɨ'nawɨjɨwaakadɨvɨsara. Pwara Gotɨyare yagaala wɨjɨwaakadɨvɨsarera. Sahwara pwai Baanavaazai, pwai Sɨmɨyonɨ Dɨkwaagɨlyai, pwai Luzɨyaazai Anga Saairini mwaalyai, pwai Maanayanɨ maalɨkelyɨyagaa' Naanga Erotɨyalyɨ mwaalagɨlyai, pwai Solɨ. 2Sahwara kamwaale' Kɨraazɨtɨyarera yɨkabeva wapaaya manyara Gotɨyarɨ yagaala wɨdadaapɨjɨ Kuryai Tewaanyai wɨda' “ ‘Wawɨnya mudɨke' saraai yɨka!’ dena yɨhɨthɨvanɨge. Nɨmɨnyɨne Baanavaazalyɨ Solɨjɨ saraarɨ kadahɨlakapɨjɨ yɨkaderaalyɨ.” 3Sara kuda' wapaaya kuna manyeva Gotɨyarɨ wɨdeva “Sahwaraai yɨkadesɨra,” deva saraare mɨnyagɨnyawaarɨ ata dathɨwanna yeva wɨdaasɨna ye'.

Ahu'manna Saaipɨraazɨ sawɨnnesɨ.

4Sarevɨdaa'nyɨ Gotɨyare Kuryai wɨdaasɨna kya' Baanavaazalyɨ Solɨjɨ saraai Anga Seluzɨyana kaanna walyuna yagɨla sɨpɨyavɨ yɨlamwaaina kyagi Ahu'manna Saaipɨraazɨna sɨpɨya' makuna ya'. 5Makuna kya' Anga Saalamɨzɨna yɨ'mavaawɨna yagɨla Juyaraavɨre lotuangengɨ Gotɨyare yagaala wɨjɨwaakɨna yagi. Saraare wɨdaayadei Maakɨyai Jonɨ wɨgaimwagakelyɨ saraalyɨ kaanya yamarye'.

6Ahu'manna savɨ yuneba wɨjalotaveva Anga Paipozɨna yɨ'mavaawɨna ye'. Saba Juyai mwaalɨna. Baajizaazai wo'nɨkei mwaalɨna yakelyɨ. A'mwe sai gɨri'nyajɨ kwalyajɨ yunebanna lɨmwagarɨkelyɨra. “Nɨmɨ Gotɨyarɨ wɨ'na'mujɨ yagaala tewaanna yɨhɨzɨwaakadɨnyainyɨ,” kwaasɨ dadei mwaalɨna yakelyɨra. 7Ahu'manna savɨ maremwaaidei Ga'maanɨyaryaba Baajizaazai mwaalɨna. Maremwaaidei Sezɨyaazai Polaazai wo'nɨkei sɨdu'nakelyɨra. Sɨdu'nakei “Gotɨyare yagaalya' kadɨka wɨ'nɨma!” daka Baanavaazalyɨ Solɨjɨ saraarɨna wɨdasaabɨna ya'. 8Wɨdasaabɨna kya' saraai wɨlamwaaina kyagi Kulakei Baajizaazai saraarɨ bɨrala yɨna yaka a'mwe naangerɨ wɨda' “Jizaazareburɨne yagaalya' mu'nɨnna!” Kulaka sai Gɨrikɨyagaala yaya' Elimaazai wo'nɨkelyɨ. 9Gɨrikɨyagaala Solɨmɨna yaya' Polɨ wo'nɨkelyɨ. Elimaazai kayaa'na kuda' Kurya Tewaanyai Polɨmɨ yunebanna wɨlamwaaida gannya dɨragɨnyasɨ yawɨta tewaanyasɨ sahwarɨ wɨjaavɨna kya' Polɨ kulakerɨ baihana'na yaka 10wɨda' “Kotɨya Maryadere kaimɨraayaigɨ, yuya yɨda'maraangebwina yɨkamaangeigɨnyɨ. Kwaasɨ yagaalyasɨ kayaa'nanaangebulyɨ sazangɨ gyakwalaangeigɨnyɨ. ‘Naangere yagaala tewaanyavɨna kwaasɨ yagaala yɨma'nana!’ dadɨ kayaa'nanyabwina mamarasɨ'nyɨ be'na jɨtheigɨnaka? 11Yɨthaa, dahaasagaa' Gotɨyare asa' dɨragɨnna gɨramana! Tɨbɨnyaigɨ yɨma'na'gɨzɨ nyɨlyarɨ tɨnna mwanganyɨ jɨtheigɨnyɨ. Dɨvidaasɨ dangadeigɨnyɨ.” Sara wɨdɨna kya' Elimaazare tɨnnyaraarɨ yɨraayasɨ jɨhɨnyasɨ jaahwasa'bɨ' bwalaraawɨna kya' tɨnna mwanganyɨ ya'. Tɨnna mwanganyɨ yaka “Pwai nɨmɨre asɨrɨ nyɨlɨmwagozɨ nyɨbwaramakwona!” daka kaanna kaanna yamarina ya'. 12Kaanna kaanna yamaryɨna yadaa'nyɨ maremwaaidei dɨragɨnya' tɨnna wanganna yaka Polɨ Naangere yagaala wɨjɨwaakake'na nɨ'nɨka yaka Kɨraazɨtɨyarɨ lɨmwanna ya'.

Kwaaka Pɨzɨthɨya Anga Aadɨyokɨ sawɨnnesɨ.

13Polɨjɨ gamɨjɨyaraalyɨ Anga Paipozɨ ya'ma'na yeva sɨpɨyavɨ kaanna waweva kwaaka pɨva' Paabɨlɨya Anga Pehaana yɨ'mavaawɨna ye'. Yɨ'mavaawɨna kye' Maakɨyai Jonɨ kɨrɨmɨnyɨ yagalya'mavaka Jeruzaalemɨna ayɨna wɨna ya'. 14Ayɨna wɨna kya' pwaraai Pehaadaasɨ Anga Aadɨyokɨ Kwaaka Pɨzɨthɨya mannɨkebanna kaanna wɨna yagɨla Kwazaakegaa' Juyaraavɨre lotuangevɨ wɨlɨna yagɨla walamwaaina yagi. 15Walamwaaina kyagi Kɨwɨnya Ne Mozɨzai yavɨkarinɨkevɨjɨ Pɨropetɨyara Gotɨyarɨ wɨ'nawɨjɨwakyaasara yavɨkarinɨkevɨjɨ tɨnna wanganna yadɨvɨ' yagaala sa wɨdɨna ye'. Wɨdɨna kye' lotuangevɨ maremwaaidɨvɨta naangera Polɨmɨjɨ yagaala wɨdaase' “Neya'mweraaihi nemɨnyɨne yagaala yɨvaimwagya'ne' waraja' a'mweraavɨ dujɨwaakyɨla!” 16Sara kudaase' Polɨ daavaka asa' makɨlaka wɨda' “Nya'mweihi, Yɨzɨrelɨyaihɨlyɨ Menyaihi Gotɨyarɨ yɨlaaya maryadɨvɨsaihɨlyɨ saihi dɨnyu'nyɨla! Gotɨyai Yɨzɨrelɨyainaavɨre Gotɨyalyɨra. 17Gotɨyai nemɨre Ne sɨnnawɨnyaraavɨ dahɨlaka Kwaaka Yɨzɨpɨ Mwaalyaraavɨreba Menyaraavɨreba mwalyaata Yɨzɨrelɨyara kwala naanga wɨmwaihyaa' Gotɨyai. Dɨragɨnna yaka Yɨzɨpɨdaasɨ Gotɨyai Ne sɨnnawɨnyaraavɨ makabɨna kya' 18a'mwamaayaba kwarame a'mweraare atɨzɨvɨlɨraalya wavɨla'daa'nyɨ kumɨ sara kayaa'na yadaapɨjɨ Gotɨyarɨ kale wia'. 19Kale kwia' Kwaaka Kenaanɨ anga naanga pimagɨnya atina ata purɨdaasɨ pwaraalya yɨrawaasɨna yaka kumɨre kwaaka yanga wɨjaavɨna kya' kwaakevɨ kwɨyakwara kwarame naanga naanga 450 mwaale'. 20Sagaa' a'mweraavɨna sɨdu'nakera yagaala yawɨbwa'dɨvɨsaraavɨ dahɨlakaka dahɨlakaka kadahɨlaka' Gotɨyarɨ wɨ'nawɨjɨwaakadei Saamyɨwelɨ mwaalɨna ya'. 21Mwaalɨna yadɨ'nyɨ a'mwera Gotɨyarɨ wɨde' ‘Nemɨnyɨne Kingɨyai nemaremwaaladerɨ dɨnejaama!’ Sara kude' Gotɨyai Kɨzɨyare gawaalɨvaangei, Ne sɨnnawɨnya Bejaminɨmɨrei, Solɨmɨ wɨjaavɨna kya' kwarame 40 wavɨla'daa'nyɨ Solɨ kingɨyai maremwaaina. 22Maremwaaina kya' dɨvi Gotɨyai sarɨ wasɨ'nyɨna yaka Kingɨyai Devitɨmɨ wɨmwaaihɨna ya'. Sahwarɨna Gotɨyai wɨda' ‘Devitɨ, nɨmɨre sɨmunyavɨnei Jeziyare gawaalɨvɨ yɨlaaya wɨmariwelyɨra. Nɨmɨ sɨmunyavɨ wɨdadaari gamɨzai yadelyɨra.’ 23Sara wɨdaka pɨgaa' Devitɨmɨ wɨda' ‘Dɨvi Dɨragɨnyai Yɨzɨrelɨyaihɨre kayaa'nanya marasɨ'nadelyɨra.’ Yune naanga nebulya'na wɨdaka savɨne'na Naanga Devitɨmɨrei Jizaazai nevadaihasamaa'derɨ Yɨzɨrelɨyainaavɨna dɨragɨnna wɨmwaaihɨna ya' Gotɨyai. 24Sɨnnawɨ Jizaazai mabyahaa' Jonɨ Bavɨtaazɨya Yadei Yɨzɨrelɨyaraavɨ wɨjɨwaaka' ‘Gɨnnya kayaa'nanya minnera! Gotɨyarɨnajɨ gamɨreburɨnajɨ sɨmunya mudɨkebwi nayaa kyawɨramaara'gɨzɨ bavɨtaazɨya gyɨdeigɨnyɨra.’ 25Jonɨ gannya wawɨnya' aaya yakegaa' a'mweraavɨ wɨda' ‘Sarɨmɨre yawɨsa'na bewainyaka? Yemwaaihata sainyɨ sahwainyɨ mɨka! Aawa. Yɨthaanyi, sahwai yarai bathelyɨ. Nɨmɨ a'mwe maalɨkeinyɨna gamɨre kwaabɨzɨvɨlyawaarɨ myaari yɨdeinyɨ. Savɨna maalɨkeinyɨ balɨdeinyɨ dɨngaka?’ wɨda' Jonɨ.

26Nɨmɨreihi, Evɨraamɨjɨyaihɨlyɨ Menyaihi Gotɨyarɨ yɨlaaya maryadɨvɨsaihɨlyɨ saihi, nemɨnyɨna Gotɨyai wɨjaake', a'mwe pwai nevadaihasamaaraderɨne yagaalya' nemɨnyɨnesɨ. 27Sare dare'nesɨ. A'mwe sarɨna Jeruzaalemɨ mwaalyarajɨ kumɨre naangerajɨ myawɨri ye'. ‘Sahwai pwainaavɨre kayaa'nanyanna nevadaihasamaaradelyɨ,’ myawɨri yeva, nabaai, Kwazaakegaa' yuyagaa' Gotɨyarɨ wɨ'nawɨjɨwaakadɨvɨsaraavɨre yagaaipɨkarya tɨnna wanganeva kɨrɨ' myawɨri ye'. Yagaala sa' yɨda'nɨke'na myawɨryesara sahwarɨ jɨda'na kye' yunebanna nebulya'na yɨma'naka Pɨropetɨyaraavɨre yagaala sa'. 28Kumɨre yawɨta ‘Gamɨre kayaa'nanyabwi bɨramarawaajɨ tamakaana!’ yawɨreva bɨrɨna bɨrɨna yeva aawa. Mabɨramaari yeva Paailatɨmɨ yaasɨwa'na wɨde' ‘Yɨsavɨri tamakya'na sahwarɨ nilɨya dɨrama!’

29Sahwarɨna Gotɨyare bukuya' yuya yɨda'nɨke sara wina kye' sai balɨna kya' yɨsavɨdaasɨ makwalaabeva simaangevɨ wakɨna ye'. 30Sara wakɨna kye' bainɨkeraayabadaa'nyɨ Gotɨyai ayɨna yɨdɨkaava' baryarɨ. 31Yɨdɨkaa'na kya' yɨrɨka kwalaalya Galɨlidaasara sahwalyɨ Jeruzaalemɨna yɨlaawɨna yesara sahwarɨ nayaa tɨnna wanganna ye'. Nayaa tɨnna wanganna yesara dahaa' sarɨna a'mweraavɨ wɨjalɨkurakadɨvɨsare. 32-33Nabaai, naarɨmɨ yagaala tewaanya' yɨhɨthɨvanɨgoi. Gotɨyai Ne sɨnnawɨnyaraavɨ yune naanga nebulya'na wɨjaake' Jizaazarɨ yɨdɨkaavake' dahaasagaa' nemɨnyɨna, sɨnnawɨnyaraavɨreinaavɨna ya' Gotɨyai. Savɨne'na Gotɨyare bukuyavɨ Saamɨya daraarɨ Gotɨyai yɨda'nɨkabaaibɨsasɨ.

Gɨmɨ nyɨbwaalɨvaangeigɨ

Dahaa' dɨragɨnya' gɨzaaweigɨ

A'mwera yawɨ'na gyɨpɨ'deigɨ

Gotɨyainyɨ gɨmaamaangeinyɨ.

34Bainɨkeraayawɨ sahwarɨ yɨdɨkaavake'na yuyagaa' ayɨna mabalyɨ yojɨ bwia maburi yaderɨna Gotɨyai wɨda'

‘Devitɨ lɨmwaga'derɨ dɨragɨnna wɨdahe

Yuya tewaanya gɨrɨ'maaya gɨzaavɨma!’

35Sarevɨ nabaai, Saamɨya pɨrɨvɨ yɨda'nɨ' ‘Wɨdaayade nawɨ'nyarɨ gɨrɨ'maayarɨ tewaanna kamaremwaala'gɨzɨ sai bwia maburi yadelyɨra.’ 36Sare' dare'nesɨ. Devitɨmɨna yawɨ'mwo. Mwalyaakegaa' Gotɨyare sɨmunya yawɨsaburɨ mɨdɨnaka kabala' sɨnnawɨnyaraavɨre wakyaba kwake' gamɨre kɨlaakejɨ' bwia burake' sara yawɨ'mwo. 37Devitɨ bwia kabura' kɨrɨ' Gotɨyai yɨdɨkaavakei dɨkaavaka Naangei bwia maburya'. 38Sarevɨdaa'nyɨ nya'mweihi, dara jawɨryide' ‘ “O, a'mwe dai nemɨre kayaa'nanyabwi marasɨ'nakelyɨ,” saraai danedɨvanɨgɨla! Jizaazai dɨragɨnyai wɨdasɨwaabɨkei daaka!’ 39Ne Mozɨzare kɨwɨnya gɨmɨre kayaa'nanya mamarasɨ'nyɨ yɨnɨke' kɨrɨ' gazaigɨzaigɨ a'mwe darɨ ku'nalɨmwaga'gɨzɨ yuya marasɨ'nadelyɨra. A'mwe yɨda'maraangeigɨnyɨ gɨmwaaihadelyɨra. 40Sarevɨdaa'nyɨ mala nayaa jɨwannana! Gotɨyare bukuyavɨ wɨ'nawɨjɨwakyaasa' gɨmɨnyɨna nyɨma'nadɨka! Dara wɨjaa'

41‘Yɨthaanyi, bɨrala yadɨvɨsaihi wanganapi dɨvalyide

Mwaaidapɨjɨyagaa' nɨmɨre wawɨnya naange' yɨvanɨge'nanyɨ.

Kwai nayaa yɨhɨzɨwaakaja' kɨrɨ' mu'nalɨmwagi jideihɨlyɨ.’ ”

Polɨ sara wɨdɨna ya'.

42Lotuangevɨdaasɨ Polɨjɨ Baanavaazalyɨ walyuna yadaakɨlyɨ a'mwera wɨde' “Kwazaakegaa' pɨgaa' yagalaawakɨlyɨ nedɨwaala yagaala pɨnɨjɨ dɨnejideihɨlyɨra.” 43Wɨdɨna kye' mwasawɨnna a'mwera walyaabɨna kye' Juya pwarajɨ Menyara Juyaraavɨrebwi yadɨvɨta pwarajɨ sara “Polɨmɨre yagaalya' tewaanyasɨ,” deva Polɨmɨjɨ Baanavaazarɨjɨ kaanna mɨdɨnna ye'. Apozelɨyaraai “Dɨragɨnna mwaaibɨka!” dahɨla dɨragɨnya yɨvaimwange'na wɨdɨna yagi “Gotɨyarɨ lɨmwamanɨgasaihi dara jawɨrila ‘Gotɨyai gannya yanga gaimwangeburɨ tewaanna kuna nemaremwaaladelyɨra.’ ”

44Dɨvi Kwazaaka pɨrɨvɨ angeba mwaalyara kwala bwa'naanya naangevaakɨyara “Polɨ Gotɨyare yagaala nedadaawori kadɨka wɨ'naana!” deva Lotuangevɨ yɨkabɨna yɨna ye'. 45Yɨkabɨna yɨna kye' Juyara pwara kwala bwa'naanyangɨ tɨnna wanganna kye' jɨkurya yɨna yeva wɨde' “Polɨ nedɨvanɨke' kayaa'nanaangesɨ.” Wɨdeva Polɨmɨ bɨrala yɨna ye'. 46Bɨrala yɨna kye' Polɨjɨ Baanavaazalyɨ lɨka myagɨla dɨragɨnna wɨdahi “Juyaihi, Gotɨyai nehɨtha' ‘Sɨnnawɨ Juyaraavɨ yagaala da' duzɨwaakyi!’ Sara kanehɨtha' sɨnnawɨ Gotɨyare yagaalya' kyɨhɨthɨwa'doi ‘Aalo,’ dɨneva ‘Yuyagaa' nemɨre kuryara tewaanna mamwaaibɨnera!’ navɨka kyawɨ'mwaa' sarɨmɨnyɨ yagalya'ma'na yakwoihɨjɨ ajɨmya yuyangɨyaraavɨ wɨdakadeinaalyɨra. 47Sare' dare'nesɨ. Gotɨyai kɨwɨnya nejaa'

‘Ajɨmya yuyangɨyaraavɨne baakeigɨ gɨmwaaihɨwa.

Kwaaka yunewɨnyaraavɨne padaihasamaasabwi dɨmakwona!’

Yuyara gɨmɨnyɨna tewaanna mwaaibɨ'dera.’ ”

48Sara wɨdɨna kya' ajɨmya yuyangɨyara yɨlaaya yeva “Naangere yagaala sa' tewaanyasɨ,” dɨnyɨna kye' Gotɨyai “Sahwara tewaanyara yɨma'nɨpɨka!” dahɨlakyaakera Naangerɨ lɨmwanna ye'.

49Kwaaka saba yunebanna Naangere yagaalya' dɨwɨna ye'. 50Dɨwɨna kye' kɨrɨ' Juyara Menya naange Lotuangevɨ wodɨvɨsangɨjɨ Anga mwaalyara naangeraavɨjɨ wɨjɨwaakɨna kye' Polɨmɨjɨ Baanavaazarɨjɨ kayaa'na yeva kunnya kwaakevɨdaasɨ wɨdaasɨna ye'. 51Wɨdaasɨna kye' Apozelɨyaraai a'mweraavɨ kumɨre kayaa'nanyabwi wɨjɨwaainya'na tɨrya sɨvɨlyangɨ wa'dɨ'nyɨya purakɨrasɨ'nagɨla Anga Aadɨyokɨdaasɨ Anga Aaikonɨyaamɨna wɨna yagi. 52Aadɨyokɨ mwaalyara Naangerɨ mɨdɨdɨvɨsara Gotɨyare yagaala nayaa lɨmwanna yadɨvɨ' yɨlaaya yadɨvɨ' kumɨre munyɨkaavɨ Kuryai Tewaanyai wɨlamwaaidera dɨragɨnna mwaalɨna ye'.

Currently Selected:

Apozelɨyara 13: byr

Highlight

Compare

Copy