Apozelɨyara 12

Erotɨyai pwai kayaa'na yake'nesɨ.

1Sagaa' Kingɨya Erotɨyai Kɨraazɨtɨyare kusɨlaanyavɨya pwaraavɨ kayaa'na yɨna ya'. 2Erotɨyai gannya aawɨlasaraavɨ wɨdaasɨna kya' Jemɨzai Jonɨmɨ gya'mwerɨ kwaari'masɨramɨnyasɨ dawakɨna ye'. 3Erotɨyai sara yaka dara wanganake' “Ai, savɨne' Juyara yɨlaaya jɨvanɨga'!” 4Sara daka nabaai Munne Gɨrɨkula lɨwɨnya pamidakɨna myadehaa' Pitarɨ wɨla pwɨyɨna ya'. Mi'na pwɨyɨna yaka kalavuzangevɨ wɨmwaaihɨna yaka dameraavɨ wɨda' “Lɨka nawodɨka! Sɨnnawɨ a'mwe daraai daraalyaihi dɨvaihanaryɨla! Dɨvi daraai daraalyaihi dɨvaihanaryɨla! Dɨvi pwaihi sara jɨla! Dɨvi pwaihi sara jɨla! Yuyagaa' sana sana jideihɨlyɨra.” Erotɨyai dara yawɨra' “Pari'ma'munne' mena kyawaajɨ balya'na Juyaraayaba wɨmwaaihɨma Pitarɨ!” 5Sarevɨdaa'nyɨ kalavuzangevɨ Pitai mwaaidɨ'nyɨ Kɨraazɨtɨyare kusɨlaanyavɨyara Gotɨyarɨ yagaala dɨragɨnna wɨde' Pitarɨna.

Kalavuzangevɨdaasai Pitai wawake'nesɨ.

6Munne aaya' yɨma'nadaa'nyɨ Erotɨyai yawɨ'na “Mwanyagaa' Pitarɨ kotɨya' yɨdera.” Sara yawɨ'na kya' sagaa' sawɨsavɨ Pitarɨ senɨyabaraalyɨ wɨla pwɨyɨna yagɨla se warɨna yadɨsɨ dameraai kwaryaba mwaalɨna. Kwaryaba mwaalɨna yadakɨlyɨ kalavuzangevɨre kaanyavɨ dame pwaraai daavɨna yagi. 7Daavɨna kyagi, yɨthaa, angevɨ Naangere mamaayai buladaa'na yakegaa' baake' wannyɨna ya'. Wannyɨna kya' ejelɨyai “Dɨkaavana!” daka Pitare egwevɨ tamɨna yaka wɨda' “Yarai, dɨthɨkaaka!” Sara kuda' senɨyabaraai Pitare asɨraarɨdaasɨ bwalaraawɨna ya'. 8Bwalaraawɨna kya' mamaayai wɨda' “Munnaanya' padathɨvaina'gɨzɨ kwaabɨzɨvɨla dɨvaazɨ'makuna!” Sara kuda' Pitai sara yɨna kya' wɨda' “Gɨnnya yɨvɨsa' marabwaaya'gɨzɨ dɨnyɨmɨdɨnaama!” 9Kuda' kalavuzangevɨdaasɨ Pitai mɨdɨnaabɨna ya'. Mɨdɨnaabɨna yakegaa' Pitai dɨna ya' “Nebwina mɨka. Mamaayai yɨvanɨke'na waja ya'nɨvanɨge.” 10Sara dadaa'nyɨ kalavuzɨkurɨta gavinyawaarɨ wavɨla'na yagɨla kwaari'makaanyavɨna yɨ'ma'na kyagi kaanya' gamɨ sa' kabaasɨna' mwasawɨnna walyuna yagi. Mwasawɨnna walyuna yagɨla tuta pɨrɨvɨ wodisagaa' yɨthaa, mamaayai Pitaryawɨdaa'nyɨ yɨmaanyɨna ya'.

11Sagaa' Pitai yawɨraka dɨna “Nebulya'nanyasɨra. Naangei gannya ejelɨyarɨ kudasɨwaabɨ' Erotɨyare kalavuzangevɨdaa'nyɨ nyɨmaa'mwaka. Juyarajɨ Erotɨyalyɨ saraavɨre kayaa'nanya' nɨmɨnyɨna myɨma'nyɨ yadesɨ.”

12Nayaa yawɨ'na yakegaa' Maakɨyai Jonɨmɨre ganaange' Maarɨyaavɨre angewɨnna wɨna ya'. Anga savɨ a'mwe kwalaalya mwaaleva Pitarɨna Gotɨyarɨ yagaala wɨdesangɨra. 13Pitai wɨna yaka kaanyavɨ mala tamɨna kya' wɨdaayade' Rotha' wo'nɨke' wɨ'naka “Kaanya baasɨma!” daka walyuna ya'. 14Mi'na walyuna yaka Pitare maanguraaya' wɨ'naka yɨlaaya naanga yɨna yaka navɨka yada kaanya' mabaasɨ yaka ayɨna kaanyave'na wɨlaabɨna yaka wɨda' “Mwasawɨ Pitai daavɨka.” 15Pwara wɨde' “Gɨmɨre sɨmunya kayaa'nanaangesɨra,” Taaya' wɨda' “A'a. Nebulya'na mena bɨwaka.” Pwara wɨde' “Pitai mamwaalyɨ'. Gamɨre ejelɨyai mwaalɨ'.” 16Dɨdaapi Pitai kaanyavɨ mala kuna tamɨna ya'. Tadaa'nyɨ kaanyavɨ baasɨna yeva Pitarɨ wanganeva atɨka maru'na'na ye'. 17Atɨka maru'na'na kye' Pitai daka “Kadɨka nyu'nɨpɨka!” gannya asa' bamakilaawɨna kya' yagaala mi'na kude' Pitai wɨjɨwaakɨna “Naangei kalavuzangevɨ nyɨmaa'mwa'.” Sana sana wɨjɨwaakɨna yɨna yaka wɨda' “Yagaala da' Jemɨzarɨjɨ neya'mwe pwaraavɨjɨ duzɨla!” Mi'na wɨdaka mwasawɨ walyuna yaka pɨwɨnna wɨna ya'.

18Mwanyagaa' nyɨla bilyɨrɨ'daa'nyɨ damera dara wanganesa' “Akai, Pitai mamwaalyɨjɨka!” Sara deva lɨka yeva atɨka maru'na'na yeva dɨnyɨna ye' “Pitai gawɨ mwaalɨka?” 19Sara dɨnyɨna kye' Erotɨyai wɨda' “Yarai dɨvɨramaarila!” Wi'na kuda' bɨrɨna bɨrɨna yeva aawa. Mamaari kye' Erotɨyai dameraavɨ kotɨya' yaka saraavɨna wɨda' “Kayaa'na yɨwaasara baibɨ'derera.” Sara kuda' yuyaraavɨ tamakɨna ye'.

Sagaa' Erotɨyai Kwaaka Juthɨya ya'ma'na yaka Anga Sizaarɨyana walaawɨna yaka mwaalɨna ya'.

Erotɨyai balake'nesɨ

20Anga Taayaa mwaalyaraavɨnajɨ Saaithonɨ mwaalyaraavɨnajɨ pɨbwina Erotɨyare sɨnna tɨka naanga wɨda'daa'nyɨ sahwara dɨnyɨna ye' “Nemɨnyɨna Erotɨyarɨ sɨnna tɨka wɨda'manɨke'na gamɨrebadaasa tɨka wapaaya gara mubaatheinaavaka? Erotɨyaryawɨnna wawaajɨ narya' wakaana!” Dɨnyɨna yeva kaanna waweva a'mwe Bɨlaazɨtazai Erotɨyare angevɨ maremwaaiderɨ wɨdɨna kye' Bɨlaazɨtazai ye'mwanna ya'. Ye'mwanna kya' yuyara Erotɨyaryawɨnna wɨna yeva wɨde'. Kude' Erotɨyai wɨdɨna ya' “Pɨgaa' yɨnagaavaihagaa' yɨhɨthɨdeinyɨ.”

21Sagaa' Erotɨyai wɨdakegaa' kyɨma'na' kingɨyaraavɨre baazɨ'ma'nya nawɨ'nyasɨ yɨvɨta nawɨ'nyasɨ bwaayaka namwaalyɨta tewaanyavɨ walamwaalaka a'mweraavɨ kɨwɨnya naanga wɨdɨna ya'. 22Mi'na wɨdɨna kya' a'mwera jaka wɨde' “Nedɨvanɨkei a'mwei mɨka! Gotɨya pwalyɨra.” 23Sara jaka kude' jaahwasa'bɨ' Erotɨyai yɨlaaya yaka yawɨ'na “Nɨmɨ Gotɨyaibɨsainyɨ,” yawɨ'na ya'. “Sabwi mipɨnera! A'mweihi Gotɨyai gaverɨ byaannakerɨ yɨlaaya dumaryɨla!” sara majarɨna Naangere mamaayai yarai walaabɨna yaka Erotɨyarɨ tamɨna ya'. Tamɨna kya' gumɨlɨkera Erotɨyare kɨlaakejɨkɨ nyɨna kye' Erotɨyai balɨna ya'.

24Kɨrɨ' Naangere yagaala pɨwɨnna pɨwnna kujɨwaake' a'mwe kwalaalyarajɨ a'mwe kwalaalyajɨ sahwarɨ lɨmwanna ye'.

25Baanavaazalyɨ Solɨjɨ saraai nɨgwia mena wɨjaavagɨla Jeruzaalemɨdaasɨ Maakɨyai Jonɨmɨ ayɨna makabɨna yagi Anga Aadɨyokɨna.

Currently Selected:

Apozelɨyara 12: byr

Highlight

Compare

Copy