Apozelɨyara 11

Anga Jeruzaalemɨ Pitai a'mwera Kɨraazɨtɨyare kusɨlaanyavɨyaraavɨ wɨjɨwaakake'nesɨ.

1Wɨdaasaderajɨ kuya'mwera Kwaaka Juthɨya yuneba mwaalyarajɨ dara wɨ'nesa' “Ajɨmya yuyangɨyara Gotɨyare yagaala wɨ'neva dalɨmwagakava!” 2Mi'na kade' Jeruzaalemɨna Pitai yɨlaawɨna kya' kɨlaakevɨ da'dɨvɨsara Juyaraavɨrebwi dɨragɨnna yadɨvɨsara maanga wɨde' 3“A'mwera kɨlaakevɨ madayadɨvɨsaraavɨ angyɨrɨ'maata yɨwa'dɨnyaigɨnyɨ. Nabaai, sahwarajɨ wapaaya nɨwa'daasaigɨnyɨ. Be'na yɨwaana!” 4Sara kude' Pitai aayawɨdaasɨ sara yake' sara wɨjɨwaaka'. 5Dara wɨjɨwaaka' “Anga Jopa mwaalena Gotɨyarɨ wɨdena a'mabaaitɨnna wanganyawalyaade. Yɨ daresɨ. Gotɨyareba mwaalyara kwaabɨyɨvɨta naangevakɨ dawaai dawaalyangɨ lɨmwageva Sɨgunyavɨdaa'nyɨ nɨmɨnyabanna makwalaabɨna yawalyaadaasa' wanganyawalyaade. 6Makwalaabɨna kyawalyaadaa' kwaabɨyɨvɨta kusawɨ malakayaawaryarajɨ yɨkurɨyaawiarajɨ kamaalyarajɨ yuta yɨhusavɨnerajɨ gera gerajɨ wɨlamwaaidapi nayaa yɨwaryawalyaade. 7Mena wanganena maanguraaya' wɨ'nyawalyaade. Pitai, dɨthaaka! Saraavɨ tama'gɨzɨ yarai dɨnana! 8Sara wɨ'nena wɨdɨna ‘Naangeigɨ, arɨkawɨnyɨra. Mɨwɨta kɨmaaka aane pɨrɨ' gɨrɨkita'nanya aane kɨrɨ' manyadɨnyainyɨ.’ 9Wɨdɨna kyawalyaade Sɨgunyavɨdaa'nyɨ maanguraaya sa' ja'nanyɨjawalyaadɨ' ‘Yuya Gotɨyai tewaanya wakɨwake “Kayaa'nanyangɨra,” madɨnnera!’ 10Kanyɨjawalyaadɨ' pɨgasaai pɨgaa' sara kadɨnyawalyaadoi Sɨgunyavɨ ayɨna makɨlaawɨna yawalyaadaasa' wanganyawalyaade. 11Tɨnna wangadaazɨ yɨthaanyi, nɨmɨnyawɨnna a'mwe daraai dalyaraavɨ Sizaarɨya mwaalyai wɨdasawalyaadɨkera angevɨ wɨlamwalyawalyaadevɨna yɨ'mayawalyaadaa'. 12Gotɨyare Kuryai nyɨjawalyaadɨ' ‘Sɨmunya myawɨ'dɨnnera! Sarajɨ dɨwona!’ Mi'na kanyɨjawalyaadɨ' Anga Jopana neya'mwera a'mwe atina ata purɨdaasɨ pwalyara mwaaihasarajɨ wiawalyaade. Kaanna kaanna kaanna a'mwe sare angevɨ wɨlɨna yɨwa'do. 13Wɨlɨna kyɨwa'do sahwai nedɨwa'dɨ' ‘Nɨmɨ dara wangamwa'de' “Ai, nɨmɨre angevɨ Gotɨyare mamaayai davuladaavɨka!” Kadɨwa'de ejelɨyai nyɨdɨwa'dɨ' “Anga Jopana duthaasa! ‘Saaimonɨ Pitai wo'nɨkerɨna yarai dɨmaaryɨla!’ 14Davanna bozɨ yɨhɨthathera. Yagaala sa' Gotɨyai gɨmɨjɨ gɨmɨjɨyarajɨ saihɨre kayaa'nanya marasɨ'nojɨ yɨhɨvadaihasamaaradeihɨlyɨra,” nyɨdɨwa'dɨ' ejelɨyai,’ a'mwe sai sara nyɨdɨwa'dɨ'. 15Nɨmɨ Gotɨyare yagaala gaai wɨdadaari Kurya Tewaanyai walaabaka kumɨre munyɨkaavɨ bulamwaaimwa'dɨ' sɨnnawɨ nemɨre munyɨkaavɨ bulanemwaalakabaaibɨ'. 16Sara wanganena dara yawɨ'mwa'de ‘Naangei Jizaazai neda' “Jonɨ aalyavɨ bavɨtaazɨya yake' kɨrɨ' sarɨmɨnyɨ munyɨkaavɨ yunebanna Gotɨyare Kuryai wɨlayɨhɨmwaaladeihɨlyɨra.” ’ Naangei sara nedake' sara yawɨ'mwa'de. 17Sɨnnawɨ Naangei Kɨraazɨtɨyai Jizaazarɨ lɨmwagohaa' Gotɨyai gannya Kuryarɨ nejaavakabaai sara Menyaraavɨ avaainanya' wɨjaawa'dɨ'. Sa'na yawɨ'na ‘Sarevɨdaa'nyɨ Gotɨyarɨ be'na tihɨ'muneinyaka! Aawa. A'mweinyɨra.’ Sara yawɨrena kaanya' marihɨrye,” wɨda'. 18Sahwara Pitarɨ sara wɨ'neva “Yagaala wikɨra,” deva maanga aaya' wɨdesa' majara Gotɨyarɨ byaannyabwina yɨleyagaala wɨdeva dɨna “Nebulya', Gotɨyai ajɨmya yuyangɨyaraavɨna kale wiwaka. Kumɨre sɨmunyabwi mudɨkeburɨ kyawɨramaarapɨri Gotɨyai gaalyaburɨ tewaanna wɨmwaaihɨna yaderera. Tewaanna wɨmwaaihɨna neyadevaaibɨ' sahwaraavɨ tewaanna yaderera.”

Angaba Aadɨyokɨ Gotɨyarera mwaalesa'nesɨra.

19Sɨtivenɨmɨ tamakesagaa' Jizaazare yagaala wɨ'nadɨvɨsaraavɨ kayaa'na yadɨvɨ' pɨwɨnna pɨwɨnna yɨwɨnama'na. Pɨwɨnna pɨwɨnna yɨwɨnama'na yadɨvɨ' pwara Kwaaka Pɨnɨzɨya menyabanna yɨ'mavaawɨna, pwara Ahu'manna Saaipɨraazɨ menyabanna yɨ'mavaawɨna, pwara Angeba Aadɨyokɨ menyabanna yɨ'mavaawɨna yeva Juya gaveraavɨ Gotɨyare yagaala wɨdeva a'mwe kwara pwaraavɨ mujɨna. 20Sara mujɨ kye' pwara Saaipɨraazɨ mwaalyarajɨ Saairini mwaalyarajɨ sara Aadɨyokɨna waweva Menyaraavɨjɨ yagaala tewaanya' Naanga Jizaazarɨna wɨjɨwaake'. 21Sara wɨjɨwakadaapɨjɨ Naangei gannya dɨragɨnya' kujaava' a'mwe kwalaalyara a'mwe kwalaalya sahwarɨ lɨmwanna, gamɨnyɨ gɨnyɨma'nyɨna, mɨdɨnna ye'.

22Jeruzaalemɨ Jizaazare kusɨlaanyavɨyara kadɨka dara wɨ'nesa' “Ai, Menyara Jizaazarɨ wɨ'nadɨvɨsara daaka!” Sara deva Aadɨyokɨna Baanavaazarɨ wɨdaasɨna ye'. 23Wɨdaasɨna kye' Baanavaazai Aadɨyokɨna yɨ'mavaawɨna yaka dara wanganake' “Su! Su! Gotɨyai a'mwe tewaanyaraavɨ damwaaihɨvanɨka!” Sara daka yɨlaaya ya'. Yɨlaaya yaka yɨvaimwange'na wɨda' “Gotɨyare yagaalya' nayaa jawɨka! Gamɨrebwi nayaa dɨlɨmwana! Yuyagaa' Naangeryawɨ dɨmwaala!” 24Sara wɨdakei a'mwe tewaanyalyɨ. Gotɨyare Kuryai gamɨre sɨmunyavɨ dɨragɨnna wɨlamwaalakelyɨ. Naangerɨ dɨragɨnna lɨmwadei wɨjɨwaakada a'mwe kwala naangera Naangerɨ mɨdɨne'.

25Sagaa' “Solɨmɨ bɨramaarɨma!” daka Baanavaazai Angeba Taazazɨna wɨna ya'. 26Mi'na wɨna yaka bɨramaa'na yaka Aadɨyokɨna ayahi makabɨna ya'. Makabɨna kya' kwarame pɨrɨ' kwavɨlava' saraai kusɨlaanyavɨyarajɨ mwaalagɨla a'mwe kwalaalyaraavɨ wɨjɨwaakɨna yagi. Wɨjɨwaakɨna yadaakɨlyɨ Aadɨyokɨ saba pwara Jizaazarɨ mɨdɨdɨvɨsaraavɨna “Kɨraazɨtɨyarera,” gaai wɨdɨna ye'. Dɨvidaasɨ pwara nemɨnyɨna “Kɨraazɨtɨyarera,” dadɨvɨkɨ.

27Yɨrɨka sarɨkaavɨ Aadɨyokɨ sawɨnna Jeruzaalemɨdaasara Gotɨyarɨ wɨ'nawɨjɨwaakadɨvɨsara bɨna ye'. 28Wi'na bɨna kye' pwai Aahavaazai wo'nɨkei daavɨna yaka Gotɨyare Kuryai dɨragɨnya wɨjaavakei wɨda' “Dɨvi Kwaaka yuyavakɨ mɨjɨka naange' yɨma'nadesɨra.” Sara wɨdake' dɨvi A'mwe Kɨlothɨyaazai Romɨyaraavɨ maremwaalakegaa' mɨjɨka yɨma'nyɨna yakesɨ. 29Mɨdɨdɨvɨsara Aadɨyokɨ mwaalyara yagaala sa' wɨ'neva dɨnyɨna ye' “Nemɨreba wikɨra. Pwaraavɨ wɨgaimwagaana! Kwaaka Juthɨya mwaalyara neya'mwera mɨjɨka nuyadɨka! Nemɨ gɨlyɨvɨkɨravɨnakeina nɨgwia naanga wɨjavaana! Gɨlyɨvɨta maalɨkajɨyaina nɨgwia maalɨka wɨjavaana!” 30Sara dɨnyɨna yeva nɨgwia wakɨna yeva Baanavaazalyɨ Solɨjɨ saraarɨ wɨde' “Nɨgwia da mɨjɨke'na Kɨraazɨtɨyareraavɨre naangeraayawɨnna dɨmakwila Jeruzaalemɨna!” wɨde'.

Currently Selected:

Apozelɨyara 11: byr

Highlight

Compare

Copy