2 Tezalonaaika 2
2
Kayaa'nanaangerɨnesɨ.
1Neya'mweihi, nemɨre Naanga Jizaazai Kɨraazɨtɨyai walaabazagaa' Naangelyɨ yuyaina yɨ'bwa'nawaajɨ yɨrakuraade'na nayaa yɨhɨthaana! 2Pwai kwaasɨ yɨhɨthɨvanɨ' “Naangere yɨrɨke' marajawɨbwarya'ne' mena yɨma'nɨwakegaakɨ.” Sara kwaasɨ yɨhɨthɨvanɨkere yagaalya'na sarɨmɨ yarai lɨka myɨpɨna! Sɨmunya kwalaalya yarai myawɨpɨna! Sai wɨdɨna “Kuryai sara kanyɨdɨwakɨra,” yɨhɨthɨvanɨka. Sai yawɨraka yɨhɨthɨvanɨka. Sai wɨdɨna “Pɨkarɨyɨkwiavɨ Polɨ sara kanedɨwakɨra,” yɨhɨthɨvanɨka yuya sa kadɨka mwɨ'nɨpɨna! 3Sasarebwi kwaasɨyabwi myɨhɨzɨwaakanna! Arɨkewɨ. Naangei walaabya'negaa' yarai yɨma'nadehaa' mɨ'. Aawa. Sɨnnawɨ sagaa' a'mwera Gotɨyarɨna maa'na wiada Gotɨyare yawɨsabwi marasɨ'nɨpɨ'dehaa'na yɨma'nadesɨ. Nabaai, kayaa'nanaangei a'mweraayaba yɨma'naabɨna yadesɨ. Dɨvidaa'nyɨ Naangei walaabyahaakɨ. Kayaa'nanaangei kɨwɨnya kayaaka yɨgaidelyɨ. Dɨvi sai Dɨkevɨ Kayaa'nanyaba yuyagaa' mwaaladelyɨ. 4Sai dozɨ “Gaveinyɨ naangeinyɨ,” dozɨ dɨna “Nyɨlyarɨ yɨsaraavɨ sɨlyaraavɨ yɨlaaya yadɨvɨsabwi kayaaka yɨgalɨma! Marasɨ'nɨdevulyɨ. Kwaiyɨma'nyajɨ sɨvuyajɨ kula'gɨlyajɨ saza marasɨ'nɨdengɨra. A'mwera naangeinyɨ yɨlaaya nyɨpɨka!” Dɨna yojɨ sara yojɨ nabaai Gotɨyare Angevɨ wɨlɨna yojɨ wɨlamwaaina yojɨ “Nɨmɨ Gotɨyainyɨ,” wɨdathelyɨ. 5Sarɨmɨnyaba kuna mwaaidɨ sare' wɨdɨwɨja yɨhye'na myawɨrijɨwaava! 6Kayaa'nanaangerɨ timwaaimanɨke' yawɨ'manɨgasaihɨlyɨ. Dahaa' nyɨma'naabathɨka! Gotɨyai yawɨ'na “Sagaa' yɨma'naabathehaakɨ,” kyawɨrojɨ sagaa' yɨma'naabathelyɨ. 7Sare' dare'nesɨ. Dahaasagaa' kayaa'nanaangebwi kave lɨka yulyasa'na yɨvanɨkebulyɨ. Pwai timwaaimanɨkei dɨvi kaanna kwawojɨ 8kayaa'nanaangei a'mweraayaba yɨma'naabathelyɨ. Sai mwaaidozɨ Naanga Jizaazai kayaa'nanaangerɨ maamudɨnya' tamakadelyɨ. Naangei dɨragɨnna kyɨma'naabozɨ kayaa'nanaangei dara wanganaja' “Aka, dɨragɨnaangei daaka!” Sara kadozɨ Naangei kayaaka yuna yɨgaladelyɨra. 9Kayaa'nanaangei gaai yɨma'naabyahaa' sai Saataanɨmɨre dɨragɨnya' maaradei kwaasɨ dɨragɨnya yuya yadengɨra. A'mwera sɨmunya yawɨsa'ne yadengɨra. A'mwera atɨka maru'narya'ne kwaasɨ kyojɨ a'mwera “Naangelyɨ,” yawɨpɨ'dengɨra. 10Sarei “Nɨmɨ kayaa'na yɨma!” dozɨ kwaasɨ yagaala naanga naanga kudozɨ a'mweraavɨ kayaaka yɨgalade sahwara “Nebulyasɨ,” dɨbɨ'de'nanyɨ. Sahwara “Gotɨyare nebulya' nemɨre sɨmunyangɨ mwarannera! Gotɨyai baa'na nevadaihasamaaradeinaavaka!” yawɨpɨ'derera. 11Sahwara kayaa'na yawɨrapɨjɨyavɨna Gotɨyai yawɨ'na “Nɨmɨnyɨna a'mwe sara ‘Aala,’ dɨdɨvɨ' kwaasɨyabwi dɨragɨnyabwi lɨmwabɨka!” kyawɨrojɨ kayaa'nanaangere kwaasɨ yagaala wɨ'nɨpɨ'desɨ. 12Sara yɨna yapɨjɨ Gotɨyai “Sahwaraavɨ kotɨya' maryawɨbwarɨma!” dozɨ “Kwaasɨyabwi lɨmwabɨka!” yawɨradere. Yɨ sahwara nebulyabwina malɨmwagaryadɨvɨsare. Aawa. Yɨda'maraanga maayabwi yɨlaaya yadɨvɨsare.
Gotɨyai Tezalonaaika mwaalyaraavɨ padaihasamaasa'na dahɨlakake'nesɨ.
13Neya'mweihi, yuyagaa' sarɨmɨnyɨna Gotɨyarɨ yɨlaaya yɨvanɨgoihɨlyɨ. Tewaanyasɨ. Naangerɨ sarɨmɨnyɨna kale wiadeihɨlyɨ. Aayawɨdaa'nyɨ Gotɨyai dahɨlakyaa' “Tezalonaaika mwaalya sahwaraavɨ yɨsɨla mudɨ'nanyaraavɨ padaihasamaarɨdeinyɨ. Kuryai nɨmɨrera tewaanyaraavɨ wɨmwaaihade'nanyɨ. Sahwara nɨmɨre nebulya' lɨmwagapɨjɨ tewaanna mwaaibɨ'de'nanyɨ.” Sara dahɨlakyaake'na yɨlaaya yɨvanɨgoinera. “Su! Su!” wɨdɨvanɨgo. 14Nemɨ yagaala tewaanya' kyɨhɨtho Gotɨyai yɨhɨvadaihasamaarya'nei jaka yɨhɨzɨvwaramaara'. Nemɨre Naanga Jizaazai Kɨraazɨtɨyare byaannya' dɨragɨnya' yɨhɨzaavade'na jaka yɨhɨzɨvwaramaarakelyɨ. 15Neya'mweihi, sarevɨdaa'nyɨ dɨragɨnna dɨthaayɨla! Dɨragɨnna mwaaidɨvɨ' nemɨre yagaala yuya nayaa dɨlɨmwagyɨla! Yagaala sa pɨnɨ yɨhɨzɨwaako, pɨnɨ pɨkarɨyɨkwiavɨ yɨhɨzɨwaakɨwa'do nayaa dɨlɨmwagyɨla!
16Nenɨmaanga Gotɨyarɨ nemɨnyɨna kale wiada yange'na tewaanna neyake'nanyɨ. Sarei yuyagaa' yuyagaa'ne dɨragɨnyainaavɨ nemwaaihada yanga negaimwada sara yake'na nemɨ dara yemwaaimanɨgo' “O, Gotɨyai tewaanaanga nejaavadeina daaka!” Gotɨya sarelyɨ nemɨre Naanga Jizaazai Kɨraazɨtɨyai sahwalyɨ 17sarɨmɨre sɨmunya dɨragɨnya wakyɨka! Yuyagaa' wawɨnya tewaanya gazaza jide'najɨ yagaala tewaanya gazaza duzide'najɨ dɨragɨnyaihɨrɨ yɨhɨmwaaihyɨka!
Currently Selected:
2 Tezalonaaika 2: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
