2 Jonɨ 1
1
1Kɨraazɨtɨyareraavɨ a'mwe naangeinyɨ (Jonɨnnyɨ) pɨkarɨyɨkwia daza' yɨda'mwesɨ. A'mwe'gɨnyɨ Gotɨyai gɨthahɨlakake'gɨnyɨnajɨ gɨmɨre kaimɨraayangɨnajɨ yɨda'mwesɨ. Nebulyavɨ kɨnakaavihɨrɨna nyɨvu'nadeinyɨ. Nabaai gaveinyɨ mɨ'. Aawa. Nebulya' yawɨrangadɨvɨta yuyara sarɨmɨnyɨna tewaanya wɨvu'nɨvanɨkerera. 2Nemɨnyɨ Kɨraazɨtɨyarɨne nebula sa' wɨlanewa'da nabaai yuyagaa' yuyagaa' nemɨnyɨjɨ kuna wɨlanewa'devɨna sarɨmɨnyɨna tewaanya nevu'nɨvanɨkeine. 3Gotɨyai Nɨmwalyɨ Jizaazai Kɨraazɨtɨyai Nɨmware Gawaalɨsɨ yanga gaimwangebulyɨ kale'na gaimwangebulyɨ kwaamu'nanyabulyɨ kuna nejaayɨka! Nebulyavɨjɨ tewaanya wɨvu'nya'nevɨjɨ sara neyɨka!
Nebulya'nebwinajɨ wɨvu'nya'nebwinajɨya'nesɨ.
4Nɨmɨ yɨlaaya naanga yɨweinyɨ. Nɨmwai kɨwɨnya dɨnɨke' maakobaaibɨ' gɨmɨre kaimɨraaya pɨmɨlɨka tewaanya nebulyabwi sara mɨdɨmanɨgasa'nanyɨ. Sara wɨ'nadɨ yɨlaaya naanga yɨweinyɨ. 5A'mwe'gɨ pɨrɨ' dɨragɨnna gɨthɨma! Kɨwɨnya mudɨke' magithawasɨvanaabɨhe. Aawa. Sɨnnawɨ aayawɨdaa'nyɨ daza' maarosɨ. Kɨwɨnya' dare' gɨthɨma! Nemɨnyɨ pwaina pwainaavɨna nevu'nana! 6Kale ya sabwi darebulyɨ. Nemɨre Gotɨyare kɨwɨnya dɨnɨkengɨna mɨdɨnaanneine! Sɨnnawɨ aayawɨdaa'nyɨ kɨwɨnya daza' sarɨmɨ kadɨka wɨ'netabaaibɨ' kɨwɨnya daresɨ. Kale ya saburɨ nayaa dɨmwaalyɨla! 7Sare' a'mwe kwalaalyara kwaasɨ yagaala wɨdadɨvɨsara Kwaakevakɨna walyuna yeva jamarivanɨgava. Sahwara dara majalɨkurakivanɨgasare “Jizaazai Kɨraazɨtɨyai kɨlaa'nakei yɨma'naabɨkelyɨ.” Sara majadɨvɨsare. A'mwe sasara dazai kwaasɨ dadelyɨ. Sai Kɨraazɨtɨyarɨne yɨkamaangelyɨ. 8Sare'na nayaa yawɨ'dɨvɨ' mala nayaa jɨwannyɨla! Sarɨmɨ mena nayaa yesavɨne tɨvɨkɨta mamaari nyɨpɨdɨka! Aawa. Dɨvi sarɨmɨ tewaanyanna tɨvɨkɨta yuya dɨmaaryide'na mala nayaa jɨwannyɨla! 9Gazaizai Kɨraazɨtɨyare wɨjɨwaakya' wavɨla'na yada wɨjɨwaakya savɨ kuna mulamwaalyɨkei sahwai Gotɨyai kɨnɨnnakei mɨka! Wɨjɨwaakya savɨ kuna wɨlamwaalɨkei sahwai Nɨmwalyɨ Gawaalɨsɨ saraai kɨnɨnnakelyɨ. 10Pwai sarɨmɨnyawɨnna bi'mavajai wɨjɨwaakya sa' mamakabi yajarɨ sarɨnnya angengɨ “Dulaama! Dava dɨmwaaideigɨnyɨ,” mudɨpɨna! “Yɨlaaya ja!” mudɨpɨna! 11“Yɨlaaya ja!” wɨdazai gamɨre wawɨnya kayaa'nanyangɨ nye'mwannamwaaladɨka!
Yagaala aaya'nesɨ.
12“Sarɨmɨnyɨna yagaala kwalaalya wɨdɨma!” dena kɨrɨ' “Pɨkarɨyɨkwiajɨ pɨkarɨyɨsarɨsɨ yɨhithavɨma!” majɨwa. Aawa. Sarɨmɨnyawɨnna yɨhwanganɨde'na wawa'mujɨ sarɨmɨjɨ yagaala yuya dɨnaademɨlɨkane. “Yɨlaaya naanga yune'na yaana!” dadɨ dɨnaadesɨ.
13Ja'mwevɨ Gotɨyai dahɨlakakevɨre kaimɨraayamɨlɨka gɨthɨvanɨga' “A'mwe naange'gɨ!”
Jonɨ
Currently Selected:
2 Jonɨ 1: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
