1 Jonɨ 5

1Gazaizai “Jizaazai sahwai Gotɨyai dahɨlakaka maryasaabakei Kɨraazɨtɨyalyɨ,” lɨmwadei dazai Gotɨyarɨdaa'nyalyɨ. Nabaai gazaizai ganɨmaangerɨna wɨvu'nadei gamɨre kaimɨraayarɨna wɨvu'nadelyɨ. 2Nemɨ Gotɨyarɨna tewaanya nevu'najaina gamɨre kɨwɨnya dɨnɨke mɨdɨdaanya'na dare' yawɨ'daanyɨ “Sareina Gotɨyare kaimɨraayaraavɨna tewaanya nevu'nɨvanɨkeine.” 3Sare' dare'nesɨ. Gotɨyarɨna tewaanya wɨvu'nya'nebwi da'darebwinesɨ. Gamɨre kɨwɨnya dɨnɨke mɨdɨdaanya'nanyɨ. Nabaai gamɨre kɨwɨnya dɨnɨke taanginya maayangɨra. 4Sarevɨdaa'nyɨ gazamɨlɨsamɨlɨ' Gotɨyare kaimɨraayamɨlɨ' yɨma'najamɨlɨ' Kwaakevakɨya sabwi dathɨwamanɨkemɨlɨkɨra. Kwaakevakɨya sabwi dathɨwangebwi da'darebwina. Gawaalɨvaangerɨ lɨmwadaanya'nanyɨ. 5Kwaakevakɨya sabwi dathɨwamanɨkei aaihwalaka? Dazai dare' lɨmwadelyɨ “Jizaazai Gotɨyare Gawaalɨvaangelyɨ.” Sarei gavelyɨ.

Jizaazai Kɨraazɨtɨyarɨna jalɨkurakya'nebwinesɨ.

6Dazahwai Jizaazai Kɨraazɨtɨyai aalyavɨ bavɨtaazɨya yavɨnesɨ gamɨre tawe' walaabaka balakevɨnesɨ Sɨgunyavɨdaa'nyai walaabake'nanyɨ. Yune aalya wɨvaihya sabwinevɨna walaabakei mɨ'. Aawa. Aalyavɨnebwinajɨ tawevɨnebwinajɨ walaabakelyɨ. Kuryai nebulyavɨ aaya kaavɨlyarɨne'na Kurya sahwai yagaala sa'na jalɨkurakadelyɨ. 7Jalɨkurakya dawaai data warɨkennanyɨ. 8Yɨ pwai Kuryai, yɨ pɨrɨ' aalya', yɨ pɨrɨ' tawe'. Dawaai data sa yagaala gave pɨrɨ'nanya' jalɨkurakadesɨ. Jalɨkurakya sa' daresɨ. Jizaazai Gotɨyare Gawaalɨvaangelyɨ. 9A'mwera jalɨkurakɨpɨja' “Nebulyasɨ,” dadaanyɨ. Yɨthaanyi! Gotɨyai jalɨkurakya' a'mweraavɨrevɨ wavɨlavɨkesɨ. Sarevɨdaa'nyɨ Gawaalɨvaangerɨna Gotɨyai nejalɨkurakade' nebulyasɨ. Gotɨyare jalɨkurakya dare'nanyɨ. Jizaazai Nyɨbwaalɨvaangelyɨra. 10Gotɨyare Gawaalɨvaangerɨ lɨmwadei gamɨre sɨmunyavɨ jalɨkurakya sa' wɨwarɨkelyɨ. Gotɨyarɨne' malɨmwagyadei dadelyɨ “Gotɨyai kwaasɨ yagaala dadelyɨ.” Gotɨyai Gawaalɨvaangerɨna “Nɨmɨnyɨdaa'nyalyɨ,” jalɨkurakya' malɨmwagyade'na dadelyɨ “Kwaasɨ yagaala dadelyɨ.” 11Jalɨkurakya daresɨ. Gotɨyai yuyagaa' yuyagaa'ne gaalya'nebwi nejaavakesɨ. Gaalya'ne saburɨ kaavɨlya' Gawaalɨvaangerɨ wɨlawɨwarɨka. 12Sarevɨdaa'nyɨ Gawaalɨvaangei kɨnɨnnakei gaalya'ne sabwi kɨnɨnnakelyɨ. Gotɨyare Gawaalɨvaangei maayai gaalya'ne sabwi maayalyɨ.

13Yagaala daza yɨhithawasɨwaabe. Gotɨyare Gawaalɨvaangerɨ lɨmwadɨvɨsaihi “ ‘Yuyagaa' yuyagaa'ne gaalya'ne sabwi kɨnɨnnakeine,’ dɨpɨka!” dena yɨhithawasɨwaabe.

Yagaala aayannesɨ.

14Gotɨyaryaba dɨragɨnna da'daa wɨdadaanya da'daresɨ. Gotɨyai sɨmunya yawɨ'devɨna yɨdanganawaajɨya pɨrɨ' kɨrɨ' kadɨka newɨ'nada sara yaderɨnera. 15“Yɨdanganaanne kadɨka newɨ'nadelyɨ,” yawɨ'manɨgovɨ kɨrɨvɨnajɨ yawɨ'manɨgo. Sahwarɨ yɨdangadaanya mena maa'mwona. Dɨragɨnna yawɨ'mwona. Sare' nebwina nejaavadelyɨ. 16A'mwe pwai kwai dara wanganaja' “O, nya'mwei Kɨraazɨtɨyarei kayaa'nanya' jɨvanɨka! Kayaa'nanya sa' sahwarɨ Dɨkevɨ marasɨ'nya'ne' daaka!” Sara wanganaja' Gotɨyarɨ kidaanganojɨ marasɨ'nojɨ gaalya'ne' tewaanna wɨjaavadelyɨ. A'mwe kayaa'nanyanna Dɨkevɨ mamarasɨ'nya'ne yɨpɨjaraavɨna yɨhɨthɨwa. Sare' kɨrɨ' kayaa'nanya pɨbwi Dɨkevɨ marasɨ'nya'nebwi warɨ'. Dazahɨrɨ'na jɨthaanganyide'na mihɨzɨvanɨge. 17Yuya yɨda'maraangebwi kayaaka yɨgaide sabura sa kayaa'nanyabulyɨ. Kɨrɨ' kayaa'nanya pɨnɨ a'mweraavɨ Dɨkevɨ yuna mamarasɨ'nya'ne warɨ'.

18Nemɨ yawɨ'manɨgo. Gazaizai Gotɨyare kaimɨraayai mwaalajai kayaa'nanyabwi mɨdɨdei mɨ'. Aawa. Sahwarɨ Gotɨyarɨdaa'nyai nayaa maremwaalɨkelyɨ. Sarevɨdaa'nyɨ Kayaa'nanyai sahwarɨ lɨmwagathei mɨ'.

19Nemɨ yawɨ'manɨgo. Gotɨyareina mwaaiho. A'mwe Kwaaka yuyavakɨyabwinera Kayaa'nanyarɨ wɨlakasarera. Sahwai maremwaalɨkere.

20Kɨrɨ' nemɨ yawɨ'manɨgo. Gotɨyare Gawaalɨvaangei bakei sɨmunya tewaanya' nejaavɨkelyɨ. “Gotɨyai Nebulyarɨ yawɨralɨmwabɨka!” daka sɨmunya' nejaavɨkelyɨ. Nebula Sahwarɨ wɨlamwaaihoine. Gawaalɨvaanga Jizaazai Kɨraazɨtɨyarɨ wɨlawɨmwaaiho'nanyɨ. Sahwai Gotɨya nebulyalyɨ. Sahwai yuyagaa' yuyagaa'ne gaalya'neburɨ aaya kaavɨlyalyɨ.

21Nɨmɨre kaimɨraaya maalɨkeihi, a'mwa'mwe kwaasɨgotɨyaraavɨna dameihi dɨthaayɨla! Sahwaraavɨ yɨlaaya mipɨnera!

Jonɨ

Currently Selected:

1 Jonɨ 5: byr

Highlight

Copy

Compare