3 Jonɨ 1
1
1Kɨraazɨtɨyareraavɨ a'mwe naangeinyɨ pɨkarɨyɨkwia daza' yɨda'mwesɨ. A'mwe Gaayaazaigɨnyɨna nyɨvu'nadeigɨ nɨmɨ nebulyavɨna nyɨvu'nadeinyɨ yɨda'mwesɨ.
2Nyɨvu'nadeigɨ, Gotɨyai yuyangɨne tewaanya gɨmɨnyɨ nayaa yana! Maamɨdarya kuna dɨmwaala! Gɨnnya kuryarɨ tewaanya nayaa wivanɨkabaaibɨ' sara kuna dɨvada'galamwaala! 3Sare' dare'nesɨ. Yɨlaaya naanga yɨweinyɨ. Nya'mwera pwara bi'maveva nebula savɨ mwaaidɨnyaigɨnyɨna jalɨkurakadɨvɨsaigɨnyɨ. Gɨmɨ nebulyavɨ pada'galamwaaihɨnyabaaibɨ' sara jalɨkurakadɨvɨsasɨ. 4Yɨlaaya naanga nyade naange'ne' da'dare' wɨ'nadɨnyasɨ. Gɨmɨre kaimɨraayamɨlɨka nebulyavɨ mwaaihasamɨlɨke.
Gaayaazarɨ yaya' makɨlya'nesɨ.
5Nyɨvu'nadeigɨ, Kɨraazɨtɨyarɨna wɨjɨwakamaryadɨvɨsaraavɨ ja'mweraavɨ gaimwanga yadɨnya yuya sa dɨragɨnna lɨmwadɨnyangɨ. Nabaai a'mwe Menyara Kɨraazɨtɨyareraavɨjɨ avaala sara yadɨnyaigɨnyɨ. 6Sahwara Kɨraazɨtɨyare kusɨlaanyavɨyainaayaba kumɨnyɨna gɨvu'nadevurɨ jalɨkurakɨwaava. Nabaai Gotɨyare wawɨnya'na nayaa yawɨ'dɨ neya'mweraavɨ tusavɨne gɨlyɨvɨsanna kuna dɨhaimwana! Sasare sa' tewaanyasɨ. 7Sare' dare'nesɨ. Sahwara Jizaazare yaya sa' makɨlya'ne sa'ne'na walyuna yeverera. Ajɨmya yuyangɨyara malɨmwagyadɨvɨsaraavɨ nɨgwia maarya'nera mɨka. 8Sarevɨdaa'nyɨ sa' tewaanyasɨ. Sare'na nemɨ a'mwe sasare saraavɨ nayaa gaimwagaanneine. “Sasare sabwina nebula saburɨ avaaiwawɨnya ye'mwannayaana!” dawaajɨ sara yaadeine.
Daayotɨrepɨzalyɨ Demitɨrɨyaazalyɨ saraarɨnesɨ.
9Yagaala pɨnɨ pɨkarya maalɨkevɨ kusɨlaanyavɨyaihɨrɨna yɨda'mwesɨ. Sare' kɨrɨ' Daayotɨrepɨzai “Kumɨre naangeinyɨ mwaalɨma!” dade'na gamɨnyɨna wabahɨlaaka wiadei nemɨre yagaalya kadɨka mu'nyalyɨ. 10Sarevɨ sarɨmɨnyawɨnna bi'ma'mujainyɨ gamɨre kayaa'na yade sabwina ku'maayaba jalɨkurakɨdelyɨ. Nemɨnyɨna yagaala kayaa'nanya dala pɨnɨnna pɨnɨnnanyanna yaasɨwa'na dɨvanɨke'na. Nabaai yune sa'na yɨvanɨka'na mɨ'. Aawa. Neya'mweraavɨ sahwai gamɨre angevɨna makwodei mɨ'. Nabaai pwara kunnya angengɨna “Makwawaana!” dadɨvɨ' yadaapi sara kwaraavɨjɨ dahalalɨmwanna yadelyɨ. Sara yada sahwaraavɨ kusɨlaanyavɨyaraayabadaa'nyɨ yunakaanna wɨdaasɨna yadelyɨ. Sare'na jalɨkurakɨdelyɨ.
11Nyɨvu'nadeigɨ, sasarebwi mamɨdɨdɨnnera! Aawa. Tewaanyaburɨna dɨmɨdɨna! A'mwe tewaanyabwina yajai sai Gotɨyarelyɨ. A'mwe kayaa'nanyabwina yajai sai Gotɨyarɨ yawɨrangadei mɨka. 12A'mwe yuyara Demitɨrɨyaazarɨna nayaa jalɨkurakadɨvɨsalyɨ. Nabaai gannya mwaalya'nebwi dara jalɨkurakɨvanɨ' “Sahwai nebulyabwi mɨdɨdelyɨ.” Nabaai nemɨ kwainajɨ nayaa jalɨkurakadaanyalyɨ. Sare' “Nemɨre jalɨkurakya nebulyasɨ,” yadaanya'na yawɨ'manɨgɨ.
Yagaala pɨnɨnnesɨ.
13“Gɨmɨnyɨna yagaala kwalaalya gɨthɨma!” dena yɨwe kɨrɨ' pɨkarɨyɨsarɨsɨ yagaala sa' yɨdasa'na “Aala,” dɨwa. 14Gɨmɨnyawɨnna gwanganɨde'na yɨme'nya'bɨ' wawa'mujɨ naarɨmɨ yagaala ye'mwannadakade'nana. Sara jemwaaimanɨge.
15Kwaamu'nanyaburɨ kuna gɨmwaaihade tewaanya mwaalya'neigɨ! Neya'mwera gɨthɨvanɨga' “Neya'mweigɨ!” Nɨmɨnyɨna saba mwaalya neya'mwera gazarazaraavɨ “Nya'mweihi!” duthana!
Jonɨ
Currently Selected:
3 Jonɨ 1: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.