2 Koridɨ 8

Kɨraazɨtɨyarɨ lɨmwadɨvɨsara kwɨya'mweraavɨna yanga wɨjaavesa'nesɨ.

1Nya'mweihi, dahaa' nemɨ dara yɨhɨzɨwɨryaana! Pɨrovijɨ Maazathonɨya Kɨraazɨtɨyare kusɨlaanyangɨyaraavɨ Gotɨyai yanga wɨgaimwadaa'nyɨ sahwara nawɨ'nyɨna yɨwaasare. 2Kɨraazɨtɨyarɨna sahwaraavɨ taanga naange' kima'na' yɨ sahwaraavɨre sɨmunyavɨ taanginya sabwi yaamɨjɨ yɨjɨwaala yakebulyɨ. Yɨjɨwaala dazaburɨ sahwara kayaa'na nebulya'na mwaalesare. Kɨrɨ' sahwara yune yɨlaaya naanga nebulya'nanya' kɨnɨnnakere. Nabaai sahwara yune kewewɨnɨ gɨlyɨvɨta maayare. Yɨ sarevɨ dazahwara pɨwɨnya kwɨya'mweraavɨ gaimwagya'ne sɨmunya dɨragɨnna nayaa yawɨramaa'dɨvɨsare. 3Sare' dare'nanyɨ. Nɨmɨ nayaa wangadɨ jalɨkurakɨvanɨge. Kumɨre nɨgwia maalɨkengɨ nɨgwia yanga wɨjaaya'ne kɨnɨnnakera yune sara wɨjaavadɨvɨsare. Yo, sahɨburɨ wavɨla'dɨvɨ' nɨgwia pɨnɨjɨ wɨjaavadɨvɨsare. Kunnya sɨmunyaburɨ mɨdɨdɨvɨ' nɨgwia daza wakadɨvɨsangɨ. 4Yɨ sahwara nemɨnyɨ dɨragɨnna nedadɨvɨ' yɨdaanganna “Wawɨnya Gotɨyare tewaanyara Juthɨya mwaalyaraavɨne yanga gaimwange' nemɨ wɨjaaya'neinaavɨ dɨnejɨla! ‘Naanga sabwi mi nyaadɨka!’ dona yɨhɨthɨvanɨgo. Kave mwaaihasa' aawa! Kusɨlaanyangɨya pwarajɨ sara yɨrakurayaana!” 5Sɨnnawɨ nemɨ dara lɨmwagaro. Sahwara nɨgwia pɨnɨ pwaraavɨna wɨjaavɨpɨ'derera. Sare kɨrɨ' yune sasare yɨpɨne'na mɨ'. Aawa. Aayagaa' Naangerɨna kumɨnyɨdaasɨ wɨjaavɨneva Gotɨyare sɨmunyavɨ mɨdɨdɨvɨ' yɨ sara ya'nera nemɨ kwainaavɨnajɨ kumɨnyɨ wɨjaavɨnɨwaa'. 6Maazathonɨya mwaalyaraavɨne sare' nemɨ Taaitazarɨ yaamɨjɨ wɨdɨwo. “Yɨ sɨnnawɨ sagaa' sahwai pwaraavɨ nɨgwianna wawɨnya wɨgaimwanga daza' Koridɨ mwaalyara ya'neraavɨ gaai wɨdakabaaibɨ' wɨdɨhaa'bwarana! Sarevɨ sahwaraayaba yanga gaimwanga nawɨ'nya sa' nayaa yɨ'mwannana!” yawɨrona sara yaamɨjɨ wɨdɨwo. 7Yuyaburaavɨ sarɨmɨ yunebanna tewaanna yadɨvɨsaihɨlyɨ. Yɨ Kɨraazɨtɨyarɨ dɨragɨnna yunebanna lɨmwadɨvɨ', yɨ Kɨraazɨtɨyarɨne yagaala yuna dɨragɨnna wɨjɨwaakadɨvɨ' yɨ yune sɨmunya nawɨ'nya kɨnɨnnakeihɨlyɨ. Yɨ sarevɨ sarɨmɨ Gotɨyare wawɨnya ya sabwina yunebanna nebulya'na dɨkaa'dɨvɨ' yɨ nemɨnyɨna yunebanna nebulya'na yɨhɨvu'nadeihɨlyɨ. Yɨ sasare saihi yunebanna tewaanna yadɨvɨtabaaibɨ' dahaa' “Yanga gaimwanga nawɨ'nya dazabwi yɨ, yunebanna wɨjaayabwi yaana!” dapɨjɨ sara jɨla!

8Savɨna nɨmɨ kɨwɨnya dakya'ne' mihɨzɨvanɨge. Aawa. Maazathonɨya mwaalyara a'mwe pwaraavɨna nebulya'na dɨkaa'dɨvɨ' tewaanya yadɨvɨsanna jalɨkurakena sarɨmɨre kale saburɨ yaamɨjɨ yɨhivanɨge. Sa' nemɨ yawɨraade'na sarɨmɨre kale sabwi sa' naanga nebulya'nanya' sahwaraavɨre'bɨsasɨra. 9Sare' darevɨnyɨ. Sarɨmɨ mena dara yawɨ'manɨga'. Nemɨre Naangei Jizaazai Kɨraazɨtɨyare yanga gaimwanga nawɨ'nyaange'na yake'nanyɨ. Yɨ sahwai nawɨ'nya naangengɨ aaya kaavɨlyalyɨ. Kɨrɨ' sarɨmɨnyɨ gaimwanga yɨhya'nei gɨlyɨvɨta maayai yɨma'nakelyɨ. Yɨ sarɨmɨnyɨna “Waryaanya sabwi lɨmwadɨnyavɨ nawɨ'nya naange kɨnɨnnakera yɨma'nɨpɨka!” daka sarei yɨma'nakelyɨra. Sara mena yawɨ'manɨga'. 10Yɨ yɨhɨthɨvanɨge' kɨwɨnya'na mɨ'. Dahaa' daza' nɨmɨre sɨmunya' yɨhɨzɨwaakɨvanɨge. Sare' darevɨnyɨ. Yɨ dare' sarɨmɨnyɨne tewaanyasɨra. Kwarame menanyarɨkɨ sarɨmɨ wawɨnya daza' mena dɨhaa'bwareta gave'na mɨ'. Aawa. Sareihi sɨnnawɨ sarɨmɨre sɨmunyavɨ wawɨnya ya'na tewaanya kuna yɨhɨvu'nakeihɨlyɨ. 11Yɨ nabaai dahaa' wawɨnya daza' ya'ne' sarɨmɨ nayaa yɨ'mwannyɨna jideihɨlyɨ. Kɨgaa' daza'na sɨmunyavɨ yɨme'nya'bɨ' dɨhaa'bwaretabaaibɨ' sarɨnnya gɨlyɨvɨsangɨna yɨnɨgevanna wi'nanya'na sarɨmɨ yunebanna yɨme'nya'bɨ' jɨwagyɨla! 12Sare' darevɨnyɨ. A'mwei nɨgwia wɨjaaya'na tewaanna wɨvu'najai yɨ Gotɨyai dazare sabwina tewaanya wima'nadelyɨ. Gotɨyai yuya a'mwe dazarɨ wɨwarajanna kunya yawɨ'da yɨ sahware wɨjaavade sanna maryawɨbwa'delyɨ. Sahwarɨ nɨgwia naanga muwarikenna marayawɨbwa'dei mɨ'. 13Sare' darevɨnyɨ. “Sarɨmɨnyɨ taanginya yɨhyana! Pwaraavɨ wɨvwa'bwarakana!” dena yɨhɨthɨvanɨge' mɨ'. Aawa. Sarɨmɨnyɨjɨ pwaraavɨjɨ avaaina yɨma'nya'ne'nanyɨ. 14Yɨ dathahaasagaa' sarɨmɨre gɨlyɨvɨta kwalaalya yɨ a'mwe gɨlyɨvɨsanna yɨnahune yɨma'nadɨvɨsaraavɨ yunebanna wiadengɨ. “Yɨ sarevɨdaa'nyɨ dɨvi sarɨmɨ gɨlyɨvɨsanna kune yɨma'nɨpɨja' yɨ sahwaraavɨ kwalaalya naanga wɨwaradera sarɨmɨnyɨ gɨlyɨvɨsa yunebanna yɨhipɨka!” dena yɨhɨthɨvanɨge. Yɨ sasare dazabwina sarɨmɨnyɨjɨ sahwaraavɨjɨ avaaina yɨma'nade'nanyɨ. 15Sara yapɨjɨ yɨ dare' Gotɨyare bukuyavɨ dɨnɨkabaaibɨsasɨ. A'mwei wapaaya manaaya kwalaalya maaraka sai kwalaalya naange kɨnɨnnakai mɨ'. Nabaai a'mwei maalɨ'na maaraka sai wɨgainadei mɨ'. Yɨ sasarebaaibɨ' naange kɨnɨnnakeihi mwaaibɨzaihi wɨgainaderaavɨna yanga duzaayɨla!

Taaitazalyɨ pwaraalyɨ yange'ne wawɨnya'na Koridɨna wawesa'nesɨ.

16Nɨmɨ Gotɨyarɨ suya wɨdɨvanɨge. Sahwai Taaitazare sɨmunyavɨ yɨdɨkaa'manɨkelyɨ. Sara yadaa'nyɨ Taaitazai nemɨbɨ' avaaina yawɨ'manɨ'. Yɨ sai kwalyɨ sarɨmɨnyɨne'na tewaanya wɨvu'nɨvanɨ'. 17Sare' dare'nanyɨ. Sai nemɨre yɨvaimwange' maa'mwa'. Nabaai sai kwalyɨ wawɨnya savɨna tewaanya yagɨnna wɨvu'nɨvanɨ'. Sarevɨdaa'nyɨ yune gannya saburɨnanya' sarɨmɨnyawɨnna wɨwaka. 18Yɨ nemɨ neya'mwe pwai maryaasɨwoyai salyɨ ye'mwannɨguwaai. Yuya kusɨlaanya sangɨ neya'mwe dazai yagaala tewaanya' wɨjɨwaakyarɨne yaya' munyaba makimanɨgasalyɨ. 19Nabaai yune sasare'nanya' mɨ'. Aawa. Kusɨlaanyangɨne a'mwera wɨdahɨlakɨwa'daata sai dɨvi nemɨjɨ ye'mwannayamarya'nelyɨ yanga gaimwanga daza' Jeruzaalemɨne Kɨraazɨtɨyaraavɨna makwawaade'nanyɨ. Yɨ nemɨ wawɨnya wɨdayadaanya daza' yɨ Naangerɨne byaanna dɨragɨnya' a'mweraavɨ yɨbwarɨdaakwia'nesɨ. Nabaai nemɨre sɨmunya' gɨlyɨvɨ'maayaraavɨ wɨgaimwagya'ne daza' ya'na neyɨwɨrivanɨke' yɨbwarɨdaakwia'nesɨ. 20Nemɨ yanga naanga maremwaala'na yɨvanɨgo savɨne yɨwetawakya'na nyɨma'nadɨka! Sare' a'mwe aane pwai kwai yagaala kayaa'nanya' nadathɨka! Sarevɨdaa'nyɨ yɨ nemɨ neya'mwe dazai ye'mwannɨgwikade'na maryaasɨwo. 21Sare' darevɨnyɨ. Tewaanya nawɨ'nya yade sabwina nemɨ yawɨrona yune Naangere tɨnna sarɨnanna mɨ'. Aawa. A'mwe kwaraavɨre tɨnna kwarɨjɨ nayaa yɨvanɨgo. 22Nabaai nemɨ neya'mwe pwai maryaasɨwoyai sarei saraalyɨ ye'mwannɨguwa'. Kwalaalya saamɨnyagaa' nemɨ sarɨ wawɨnya dala pɨnɨnna pɨnɨnnanyangɨ yɨdakwasangadaanyalyɨ. Yɨ nemɨ sarɨ tɨnna wangadaawojɨ Naangere wawɨnya ya'na dɨragɨnna yadelyɨ. Dahaa' sai “Sarɨmɨ Koridɨ mwaalyaihi yune nawɨ'nyaangebwina jide'na,” dɨragɨnna lɨmwaga'manɨkei wawɨnya daza' ya'na dɨkaa'da dɨragɨnya yagɨnna yɨvanɨkelyɨ. 23Taaitazarɨna sarɨmɨ dara jawɨranganyidelyɨ. Sai nɨmɨjɨ ye'mwannayadasalyɨ. Sarɨmɨnyɨne'na nɨmɨjɨ avaaiwawɨnyalyɨ. Yɨ neya'mwe pwaraai saraarɨna sarɨmɨ dara jawɨranganyide. Kɨraazɨtɨyare kusɨlaanyangɨne yawɨsanna yadisaraalyɨ. Yɨ saraai kɨrɨnnya wawɨnya savɨna pwara Kɨraazɨtɨyarɨne yaya' byaannake' munyaba makidɨvɨsaraalyɨ. 24Sarevɨdaa'nyɨ sarɨmɨre kale' saraavɨ nayaa jɨvwarɨdaakwila! Nabaai sarɨmɨ nawɨ'nya ya'ne' sarɨmɨnyɨne yaya' munyaba makimwo sa' nebulya'nanya' jɨvwarɨdaakwila! Yɨ sahwarajɨ kusɨlaanya anga geva gevanya a'mwerajɨ naanga nebulya'na yɨhyawɨrangabɨ'de'na sara jɨla!

Currently Selected:

2 Koridɨ 8: byr

Highlight

Copy

Compare