2 Koridɨ 9

1Sare' da'darevɨnyɨ. Yanga wɨjaaya' Gotɨyare tewaanyaraavɨ wɨdaaya'ne'na sarɨmɨ mena yawɨ'manɨga'. Savɨna yɨ nɨmɨ yagaala saamɨnya' mida'muna! Sarevɨna manyɨgainyadesɨra. 2Sare' darevɨnyɨ. Nɨmɨ sarɨmɨre sɨmunya' yɨhɨthɨkaa'manɨke' tɨvi'na yawɨ'manɨge. Yɨ Maazathonɨya mwaalyara Kɨraazɨtɨyareraavɨ sarɨmɨnne yaya' munyaba makidɨnyainyɨ. Yɨ dara wɨdɨvanɨge. Kwarame sɨnnawɨnyavɨ Pɨrovijɨ Gɨriza mwaalyara daza' aaya mudɨ'na yamaasa'na mena yovɨravalɨmwagata yesare. Yɨ sahwara sarɨmɨnyɨna kadɨka wɨ'neva wawɨnya dazahɨrɨ' ya'na dɨragɨnya yadaapi yɨ daza' sahwara kwalaalya kwaraavɨ yɨdɨkaavakesɨ. 3Sare kɨrɨ' yanga wɨjaaya'ne wawɨnya savɨna sarɨmɨnyɨna yaya' munyaba makɨlya'na sa' yaasɨwa'nanya' nyɨma'nadɨka! Sare'na sarɨmɨnyawɨnna nya'mweraavɨ maryasɨwaabe. Yɨ sɨnnawɨ nɨmɨ wɨdevaaibɨ' yɨ sarɨmɨ nayaa sara yovɨravalɨmwagata jemwaalyide'na maryasɨwaabe. 4Sarɨmɨnyawɨnna Maazathonɨya mwaalyara nɨmɨjɨ nye'mwannɨgupɨjara sarɨmɨ nayaa yemwaala myadapi tɨnna yɨhwangabɨza'na yɨ nemɨ wagɨla namaraadɨka! Yɨ nabaai sarɨmɨ kwaihɨlyɨ wagɨla yɨhye'mwannamaraadeihi dɨngaka! Nemɨ sarɨmɨnyɨna dɨragɨnna nebulya'na yawɨrakadaa sarɨmɨnyɨna dɨragɨnna sara wɨdo. 5Sarevɨdaa'nyɨ nɨmɨ dara yawɨ'mwa. Nya'mwe saraavɨ nɨmɨ nayaa dɨragɨnna wɨdɨma! Kumɨ sɨnnawɨ nɨmɨnyɨ waanapɨjɨ sarɨmɨnyawɨnna bi'mapɨ'de'nanyɨ. Yɨ sarɨmɨ tewaanya naanga yanga wia'neihi mena dahesa' nayaa tɨvi'na yovɨrawakapɨjɨ ba'mujɨyagaa' nɨgwɨmaaya saraavɨna maryasaabya'ne' mena waradesɨ. Yɨ yanga daza' tewaanya naanga yanga wia'bɨ' yɨ yemwaala yadesɨ. Nemɨ yɨhɨmwagi'nadaanya' nɨgwiabɨta' mɨ'.

6Yɨ pwaraavɨna yanga wɨjaayabwi daresɨ. A'mwei tɨka munne maalɨ'na burɨdei, nabaai sai yune tɨka munne maalɨkenna maaradelyɨ. Yɨ a'mwe tewaanya naanga yange'na burɨdei, nabaai sai kwalaalya naanga yange'na maaradelyɨ. 7Sabaaibɨ' sarɨmɨnyɨdaa'nya gazaizai gannya sɨmunyavɨ mena yawɨrakojɨ yɨ yune sahɨburɨna mɨdɨnojɨ sara wɨjaavana! Yɨ sai yanga wɨjaaya'na sɨmunya' taanga nuyadɨka! Sahwai dara yawɨ'da “A'mwera dɨragɨnna nyɨvanɨgasa'na yɨ sasare sahɨburɨ wɨjaavanɨgeinyɨ,” nujaavadɨka! Sare' darevɨnyɨ. Nɨgwɨyange'na a'mwei yɨlaaya yaderɨna yɨ Gotɨyarɨ tewaanya wɨvu'nɨvanɨke'nanyɨ. 8Yɨ Gotɨyai sahwai sarɨmɨnyɨne'na yɨnɨga wi'na yannelyɨ. Yɨ sarɨmɨnyɨna yanga gaimwanga yuya wɨjaavada yɨ sarɨmɨ nebulya' yunebanna yɨhyadeihɨlyɨ. Sahwai “Yuyagaa' yuyangɨ gɨlyɨvɨta yuyanna kɨnɨnnakeihi myɨhɨgainyadeihi yɨnɨga nebulya' wi'nanyaihi yuna mwaalɨna jɨla! Yɨ wawɨnya tewaanya yuya sa ya'neihi dɨmwaalyɨla!” dada yunebanna yɨhyadeihɨlyɨ. 9Gotɨyare bukuyavɨ yangeraavɨna dara dɨnɨkabaaibɨsasɨ.

A'mwera wia burɨja'ne pɨraihɨrayɨwɨnasɨ'namaryadɨvɨtabaaibɨ'

A'mwei gɨlyɨvɨ'maayaraavɨna naanga yanga wɨjaavakelyɨ.

Yuyagaa' yuyagaa' sahware yɨda'maraangebwi waragothelyɨ.

10Gotɨyai wia burɨja'ne a'mweraavɨna yanga wɨjaavadei yɨ sahwai wapaaya dala pɨnɨnna pɨnɨnna nya'ne yɨhɨzavadaawori sareihi yuyaihi tɨka nayaa dɨnyideihɨlyɨ. Yɨ Gotɨyai gɨlyɨvɨsangɨ (wiangɨ) sarɨmɨ yɨnɨga wi'nanya pwaraavɨna wɨjaaya'neihɨrɨna yɨhɨzaavadelyɨ. Yɨ a'mwera tɨka wapaaya wia burɨdɨvɨsa yɨ sare naanga yɨma'nadevaaibɨ' sarɨmɨre gɨlyɨvɨsa naanga (sɨla naanga, wapaaya naanga) yɨma'nadaa'nyɨ yanga nawɨ'nyabwi yɨda'maraangebwi naanna kuna jideihɨlyɨ. 11Yɨ gazazangɨ sarɨmɨ gɨlyɨvɨta kwalaalya yunebanna yɨhwakadeihɨlyɨ. Gɨlyɨvɨta kwalaalyangɨdaa'nya pwaraavɨ yanga yɨnɨga wi'na wɨjaaya'ne yɨhwakadeihɨlyɨ. Yɨ nemɨre wawɨnya savɨ sɨhumale sarɨmɨre daza' neya'mweraavɨ gaimwagathe'na Gotɨyarɨ “Su! Su!” wɨdɨpɨ'dere. 12Sare' dare'nanyɨ. Gotɨyare a'mwe tewaanyaraavɨ gaimwanga ya'ne' jide wawɨnya', sasare saburɨ sahwaraavɨre gɨlyɨvɨsanna mudaasaderaavɨ yunebanna yɨvanɨ'. Nabaai yune sasare' mɨ'. Aawa. Sasare dazaburɨ kwalaalyara yadaapiya'na yɨlaayasɨ Gotɨyarɨ “Su! Su!” wɨjasɨ maanga yuneba wɨresɨ'nawɨdihɨta yade'nanyɨ. 13Yɨ sarɨmɨ wawɨnya yɨvanɨgata daza' sarɨmɨre yadɨvɨta sabwi ku'maayaba marima'naabathesɨ. Yɨ sarɨmɨ Kɨraazɨtɨyare yagaala tewaanya' nayaa jalɨkurakadɨvɨsaburɨ kwaakewɨ mwaaihasa'najɨ yɨ nabaai Juthɨya mwaalyaraavɨna yanga naange' nayaa wɨjavadaapi sahwarajɨ a'mwe yuya pwara kwarajɨ sarɨmɨre ye'mwannayɨvanɨgasa' wangabɨ'de'najɨ yɨ sahwara Gotɨyarɨne yaya' byaannake' munyaba makibɨ'dere. 14Nabaai sahwara yawɨpɨ'de'na “Gotɨyare yanga gaimwange' wavɨla'nɨke' yɨhwaradesɨ.” Sarevɨ yɨ nabaai sahwara sarɨmɨnyɨ wanganya'nera sarɨmɨnyɨna tewaanya wɨvu'naderera. Yɨ sara yadɨvɨ' Gotɨyarɨ “Su! Su!” wɨdadɨvɨ' yɨdaanganna kyapɨjɨ sahwai tewaanya yɨhyatheihɨlyɨ. 15Gotɨyai gannya Gawaalɨkɨ yanga nejaavakelyɨ. Yanga sa' naangaangesɨ. Nemɨ daza' yɨnɨga wi'na yunebanna yawɨ'daa daathe' mɨ'. Yɨ yanga daza'na nemɨ Gotɨyarɨ “Su! Su!” dɨragɨnna wɨdaana!

Currently Selected:

2 Koridɨ 9: byr

Highlight

Copy

Compare