2 Koridɨ 5

1Sare' darevɨnyɨ. Nemɨ Apozelɨyaina mena dara yawɨ'manɨgo. Kwaaka davakɨya kɨlaakejɨ' sɨmɨnangebɨta savɨ wɨlamwaaiho. Nabaai sa' wo'dalasɨ'na yɨnaja' yɨ nemɨ ange' pɨrɨ' kɨnɨnnakeine. Yɨ sa' Gotɨyai nejaavadesɨ. Anga daza' a'mwera asajɨ mannɨka'na mɨ'. Sa' Sɨgunyavɨ warɨke'na yada yuyagaa' yuyagaa' waragwothe'na. 2Sare' darevɨnyɨ. Dahaa' nemɨ anga davɨ sɨmuyɨwaala yawɨ'mwaainɨvanɨgo. Nemɨ tewaanya dɨragɨnna dara nevu'nɨvanɨke'nanyɨ. Nemɨre anga daza' Sɨgunyavɨ warɨka daza'na sara wa'da nemɨre kɨlaakejɨkɨ baazɨ'ma'nya'bɨ' bwakalɨmwagata neya'ne'na sɨmuyɨwaala yawɨ'mwaainɨvanɨgo. 3Nebulyasɨ. Dɨvi anga daza' Gotɨyai tɨvi'na bwakalɨmwagata neyaja' nemɨre kuryara kunera yaasɨwa'na mwaaibɨnera mɨ'. 4Sare' dare'nanyɨ. Nebulyasɨ. Nemɨ sɨmɨnanga dazavɨ kuna mwaaihoina Sɨgunyavɨyavɨna taanginya yɨbwakɨdaa sɨmuyɨwaala yawɨ'mwaainɨvanɨgo. “Nemɨ kɨlaaka sɨnnawɨnyajɨ' yagalya'mavaana!” myawɨrivanɨgo. Aawa. Sa' maalɨkesɨ. Nemɨ “Kɨlaaka gaala nebulya'nanya dazajɨ' kɨlaaka barya ya'ne dazajɨkɨ naanga naanga galawɨlawakana!” dawaajɨ baazɨ'ma'nya mudɨke'bɨ' baazɨ'ma'naade'nanyɨ. Yɨ sare' naangesɨ. 5Gotɨyai gamɨ sai nemɨnyɨ gaala dazahɨrɨ' maarya'neinaavɨ mena neyovɨravamwaaihakelyɨ. Yɨ sahwai Kurya Tewaanyarɨ mena nejaavakelyɨ. Kurya Tewaanya sai dɨvi Gotɨyai yuya nejaaya'ne pimagɨnya aaya mudɨ'nanya sa'bɨsalyɨ. Yɨ Gotɨyai sahwarɨ mena nejaavake'na nemɨ dara yawɨ'manɨgo. Naanga nebulyasɨ. Sahwai gamɨre yuya nayaa nejaavadelyɨ.

6Sarevɨdaa'nyɨ yɨ nemɨre kɨlaaka mudɨkejɨ' nejaavade daza' yuyagaa' nemɨre sɨmunya' dɨragɨnya neyɨvaimwadesɨ. Nemɨ dara yawɨ'manɨgo. Dahaa' nemɨre kɨlaakejɨ' ange'bɨsavɨ mwaaiho'na Naangerɨ yɨbwa'nona sahwalyɨ gamɨre angeba mye'mwannamwaalyɨgo. 7Sare' darevɨnyɨ. Dahaa' nemɨ gamɨnyɨ lɨmwaga'daa yamarivanɨgo. Nemɨ sahwarɨ tɨnna mwanganyadaa yamarivanɨgo. 8Yɨ nemɨ dɨragɨnya neyɨvaimwannɨkeine. Sara tɨvi'na dɨwo. Nabaai nemɨnyɨ tewaanya dara nevu'nɨvanɨ' “Kɨlaaka dathazɨkɨdaasɨ yɨbwa'nawaajɨ Naangeryawɨnna gamɨre angebanna sahwalyɨ tewaanna ye'mwannamwalaade'nanyɨ. Yɨ sa' tewaanyasɨ.” 9Sarevɨ nemɨ sɨmunya dɨragɨnna yawɨ'daanyaine. Yɨ nabaai nemɨ sahwalyɨ ye'mwannemwalaaja' yɨ nemɨre anga nebulya'nanyavɨ yɨbwa'naaja' Naangerɨna yuya sabura ya'na sahwarɨ yɨlaaya wigalaade' naangesɨra. 10Sare' darevɨnyɨ. Kɨraazɨtɨyai yawɨbwarya'ne namwaalyɨsavɨ nemɨ yuyaina ku'maayabanna nayaa yɨma'nabaatheine. Yɨ nabaai nemɨjɨya gazaizarɨna Gotɨyai “Tewaanyabwina yadei yɨ sai kɨlaakejɨkɨ wɨlamwaaida yakebwina tɨvɨkɨta nawɨ'nya maarana! Nabaai pwai sagaa' kayaa'nanyabwi yadei yɨ gannyabwina tɨvɨkɨta kayaa'nanya maarana!” kadozɨ sahɨba davaadeine.

Apozelɨyara Kɨraazɨtɨyai Gotɨyarɨjɨ avaaizɨmunya'na neye'mwagakeburɨ wɨdaayadɨvɨsavɨnesɨ.

11Sarevɨdaa'nyɨ Naangere dɨragɨnyavɨna lɨka yabwi yawɨ'daa a'mweraavɨre sɨmunya dɨhaa'bwata yadaanyaine. Yɨ Kɨraazɨtɨyarɨ dɨragɨnna lɨmwabɨ'de'na wɨdadaanyaine. Kɨrɨ' Gotɨyare tɨnnyarɨ nemɨre tewaanyabwi ku'maayabanna mena yɨma'naaba'. Yɨ nabaai nɨmɨ dara lɨmwamanɨge. Sarɨmɨ kwaihɨre sɨmunyara padaihɨrakyaraavɨ sabwi ku'maayabanna yɨma'naabake' dɨngaka? 12Yagaala dazavɨ sarɨmɨ nemɨnyɨna “A'mwe nawɨ'nyarera,” dɨneyawɨryide'na mihɨzɨvanɨgo. Aawa. Yɨ daza' sarɨmɨ nemɨnne yaya' munyaba makɨlya'neihɨre tusa' baasɨvanɨgo. Kɨrɨ' sarɨmɨ saihɨrɨna mɨ'. A'mwe pwaraavɨnanyɨ. Yɨ sahwara yune kunnya sɨnna mwasɨmagɨnyavɨna kumɨre yaya' munyaba yaasɨwa' makinadɨvɨsare. Sahwara sɨmunyavɨna yaya' munyaba nayaa mamakinyadɨvɨsaraavɨnanyɨ. Yɨ sahwaraavɨ yɨnɨga wi'na wɨrɨvɨkɨpɨne'nanyɨ. 13Sare' darevɨnyɨ. Pwara nemɨnyɨna dara yawɨpɨja' “Sahwara sɨduta maaya navɨ'navɨkera sara yɨvanɨga',” kɨrɨ' nemɨ Gotɨyarɨne'na yadaanyaine. Kɨrɨ' nemɨ sɨmunya yɨda'na yawɨ'daa nemɨ sarɨmɨnyɨ gaimwange'na yɨvanɨgo. 14Sare' darevɨnyɨ. Kale Kɨraazɨtɨyare yune sa'na wawɨnyavɨ neyɨdɨkaa'bwa'desɨ. Yɨ nemɨ mena dara yawɨbwa'manɨgo. Pwai kumɨnyɨneba yunebanna wɨvadaihasamaarya'nei mena balɨna yakevɨdaa'nyɨ yɨ dazavɨ kumɨ yuyara mena bainɨkerabɨsare. 15Gotɨyai “A'mwe gaala mwaaihata sara yune kumɨ saraavɨna yawɨ'dɨvɨ' mamwaaibɨna! Aawa. Yune sahwai kumɨnyɨne'na mena balakerɨ ayɨna yɨdɨkaavei yune sahwarɨna yawɨ'dɨvɨ' gamɨnyɨ yadɨvɨsa'na mwaaibɨka!” kada' yuyaraavɨne'na mena balɨna yakelyɨ.

16Sarevɨ sagaa'daasɨ nemɨ kɨlaakebulyɨya sɨmunya savɨre saburɨna a'mwe aane pwarɨ kwarɨ mamaryawɨbwarivanɨgo. Nebulyasɨ. Sɨnnawɨ nemɨ sɨmunya savɨre saburɨna Kɨraazɨtɨyarɨ sara maryawɨbwaroina dɨngaka? Kɨrɨ' dahaa' sahwarɨ nemɨ sasara kuna mamarayawɨbwarivanɨgo. Aawa. Gamɨre nawɨ'nyabwina nayaa yawɨrangamanɨgo. 17Sarevɨ yɨ nabaai a'mwe kwai Kɨraazɨtɨyarɨ wɨlamwaalajai yɨ Gotɨyai a'mwe sahwarɨ yuna mudɨka tewaanyarɨ mena wɨmwaaihadelyɨ. Gamɨnyɨna sɨnnawɨnya ayabwi yuya yɨwɨya yadengɨ. Yɨthaanyi! Gamɨnyɨna yuya mudɨkebwi mena yɨma'naabadengɨ. 18Yuya dazangɨ aaya kaavɨlyai Gotɨyalyɨ. Yɨ sahwai Kɨraazɨtɨyarɨna kɨgaa' yɨkamaangeina mwaaloinajɨ gamɨjɨ avaaizɨmunya'na neye'mwannamwaaihakelyɨ. Yɨ nabaai sahwarɨ gaimwagya'ne' gamɨre yɨkamaangeraavɨ sahwarɨjɨ avaaizɨmunya'na ye'mwannayɨma'nya'ne wawɨnya' mena nejaavakelyɨ. 19Nemɨre yagaalya' daresɨ. Gotɨyai a'mwe Kwaaka davakɨyara yɨkamaangeraavɨne yuya yɨwetawakya yɨkamaangerajɨ avaaizɨmunya'na ye'mwannayɨma'nakesɨ. Yɨ Kɨraazɨtɨyarɨ sahwai yuya yɨwetawakya sahwara yeta sanna sɨmunya ayahi yawɨrakai mɨ'. Yaka sai nemɨnyɨ gamɨre yagaala daza' wɨjɨwaakya'ne', yɨkamaanga sara gamɨjɨ avaaizɨmunya'na ye'mwannayɨma'nya'ne' newakakesɨ. 20Sarevɨdaa'nyɨ yɨ nemɨ Kɨraazɨtɨyare maangi' ma'daa sahwarɨneba a'mweraavɨ wɨjɨwakawadaanyaine. Yɨ dare'. Gotɨyai gamɨ sai a'mwe yuyaraavɨ nemɨre maangisɨ wɨjɨvwaramaa'manɨ'. Kɨraazɨtɨyai gamɨ sarɨne'na sahwaraavɨ dara yɨdangadaanyɨ. Akai, sarɨmɨ Gotɨyarɨna yɨkamaanga sabwi yagalya'mavapi Gotɨyalyɨ avaaizɨmunya'na yɨma'napɨjɨ je'mwannamwaalyɨla! 21Sare' darevɨnyɨ. Kɨraazɨtɨyai kayaa'nanyabwi maayai kɨrɨ' Gotɨyai yuya kayaa'nanya nemɨre sa mari'bwaraka yune sarɨna munyaba yɨlakaka yɨ sahwarɨ kayaa'a'mwe nebulya'nanyarɨ wɨmwaaihakelyɨ. Nemɨnyɨna Gotɨyai “Kɨraazɨtɨyarɨ wɨlamwaalya'nera nɨmɨre yɨda'maraangebwi kɨnɨnnakera yɨma'nɨpɨka!” daka nemɨnyɨneba sara wɨmwaaihakelyɨ.

Currently Selected:

2 Koridɨ 5: byr

Highlight

Copy

Compare