2 Koridɨ 4

1Sarevɨ Gotɨyai kale'na negaimwagakabaaibɨ' wawɨnya nawɨ'nya daza' wɨdayadaanyainaavɨna nejaavakesɨ. Savɨ yɨ nemɨ wawɨnya daza'na dɨragɨnna dadaa maa'na neyɨdeina mɨ'. 2Aawa. Nemɨ wagɨla kɨnɨnnakebwi lɨka yulyarɨkeburɨ bule'nanya' mena wɨjavadaanyaine. Nemɨ kwaasɨya saburɨ yamaryadaanyaina mɨ'. Sara myadaa yɨ nemɨ Gotɨyare yagaalya' maravɨla'nya yadaanyaina mɨ'. Aawa. Nemɨ Gotɨyarɨ tɨnnyarɨ yagaala nebulya'nanya' ku'maayabanna marima'naabya yadaanya' yɨ a'mweraavɨre sɨmunya gazarɨzarɨ dara yɨbwakɨdɨvɨsasɨ. Yɨ apozelɨyara sareraavɨne yaya' munyaba makɨlaana! 3Kɨrɨ' nemɨ yagaala tewaanya daza' wɨjɨwakadaanya savɨ kawaaka yɨrakɨnaja' yɨ sa' a'mwe saba sana yɨwɨna ya'neraavɨna kawaaka yɨrakɨvanɨkesɨ. 4Yɨ dathahaasaraavɨre gotɨyai Saataanɨ a'mwe sahwara Kɨraazɨtɨyarɨ malɨmwagyadɨvɨta dazaraavɨre sɨmunyangɨ gidɨravalɨmwagata yadelyɨ. Yɨ yagaala tewaanyavɨne' Kɨraazɨtɨyare byaanna dɨragɨnyavɨre baake' kumɨre sɨmunyangɨ yɨnɨga wi'na wannade' mɨ'. Yɨ sarevɨ tihɨralɨmwagata yadelyɨ. Yɨ sahwara Kɨraazɨtɨyarɨ tɨnna mwanganyadɨvɨsalyɨ. Yɨ sai Gotɨyare a'mabaala nebulya'nanyalyɨ. 5Sare' darevɨnyɨ. Nemɨ yagaalya' yune nemɨnyɨne' wɨjɨwakadaanyaina mɨ'. Aawa. Nemɨ yagaalya' dara jalɨkurakadaanyaine. Kɨraazɨtɨyai Jizaazai sai Naangelyɨ. Yɨ Jizaazarɨna nemɨ sarɨmɨre yɨhɨthayadaanyainera. 6Sare' dare'nanyɨ. Sɨnnawɨ Gotɨyai mena jaakelyɨ “Jɨhɨnyavɨdaasɨ baake' mwadana!” Yɨ Gotɨyai sarei gamɨre baake' nemɨnyɨne sɨmunyangɨ banemwadakesɨ. Gotɨyare byaanna dɨragɨnya' Kɨraazɨtɨyare sɨnnyɨkɨ warɨke' nemɨ yawɨranganya'neinaavɨna baaka sa' banemwadakesɨ.

7Nabaai kɨrɨ' nawɨ'nya daza' kɨnɨnnakeina, kwadɨka yaasɨwa'nanyaraavɨ Gotɨyai nawɨ'nya daza' maradɨngikakabaaibɨsaine. Gotɨyai “A'mwe yuyara dɨragɨnya nawɨ'nyaange' yawɨrangabɨka!” kada' dara yɨma'nakesɨ. Dɨragɨnya naanga daza' yune nawɨ'nya' yɨ sa' Gotɨyare dɨragɨnyasɨ. Sa' yɨ nemɨre' mɨ'. 8Yɨ nemɨre wawɨnya' yadaa yuyanna nemɨnyɨ taange' neyɨma'nadeine. Sare kɨrɨ' sa' kayaaka nebulya'na neyɨgalakadeina mɨ'. Yawɨta kwalaalya nemɨre sɨmunyangɨ nerihɨralɨmwaga'dengɨ. Sare kɨrɨ' nemɨre sɨmunya yunebanna yɨwɨya yada mɨ'. 9A'mwera “Sahwaraavɨ kayaaka yɨgalaana!” dadɨvɨ' nega'mɨjamakwodɨvɨsaine. Sara neyadaapɨri kɨrɨ' Gotɨyai nemɨnyɨ neyagalya'ma'dei mɨ'. Sahwara nemɨnyɨ mala neradaapɨri wala'daanyaine. Sare kɨrɨ' Gotɨyai negaimwadaa'nyɨ nemɨ kayaaka nebulya'na yɨdaanyaina mɨ'. 10Yuyagaa' nennya kɨlaakejɨkaavɨ Jizaazare baryabwi ma'daanyaine. Yadaa kaanya yamaryadaanyaine. Gotɨyai nemɨnyɨna “Jizaazare gaala sabwi kɨbulyɨ kumɨre kɨlaakejɨkaavɨ ku'maayabanna yɨma'naabana!” kada' sareina kaanya yamaryadaanyaine. 11Sare' darevɨnyɨ. Yuyagaa' gaala mwaidaanyainaavɨ Jizaazarɨna a'mwera a'mwatamakya saza baryaburɨ nemarɨmwangadɨvɨsaine. Gotɨyai nemɨnyɨna “Jizaazare gaala kɨbwi yɨ kumɨre kɨlaakejɨ' balya'nejɨkɨ ku'maayaba marima'naabana!” kada' nemarɨmwangadɨvɨsaine. 12Sarevɨ barya sabwi nemɨnyɨ neyadesɨ. Kɨrɨ' Gotɨyai gaalyabwina sarɨmɨnyɨ yɨhyadevulyɨ.

13Nemɨnyɨna Kuryai dɨragɨnna lɨmwangebwi nejaavakeine. Yɨ sasare dazabwi Gotɨyare bukuya' yɨda'nɨkabaaibɨsarɨ avaaina wɨjayaakesɨ. Yɨ dara dɨnɨ' “Nɨmɨ Gotɨyarɨ dɨragɨnna mena lɨmwagevɨ yɨ yagaalya' wɨdeinyɨ.” Lɨmwanga avaalyabwi maaroina kwainajɨ dɨragɨnna lɨmwadaanyavɨ yagaalya' wɨdadaanyaine. 14Yɨ nemɨ mena dɨragɨnna yawɨ'manɨgo. Gotɨyai Naanga Jizaazarɨ yɨdɨkaavakei yɨ sahwai nemɨ Jizaazalyɨya kwainaavɨ neyɨdɨkaavadelyɨ. Yɨ nemɨnyɨjɨ sarɨmɨnyɨjɨ sainaavɨ nemakwawojɨ gamɨnyaba gidɨhusaba nemwaaihadelyɨ. 15Sare' darevɨnyɨ. Yuya daza sarɨmɨnyɨ gaimwagya'ne neyɨma'nɨvanɨkengɨ. Gotɨyai “Nɨmɨre yanga gaimwangebwi a'mwe kwalaalya naanga naangeraavɨ yunebanna wɨwarana!” kada' sara neyɨma'nɨvanɨkengɨ. Yɨ yuya sahwara Gotɨyarɨ suya naanga naange yɨpɨ'de'nanyɨ. Sara yadɨvɨ' gamɨnyɨne yaya' munyabanna makibɨ'dere.

16Dazahɨrɨvɨ yɨ nemɨ Gotɨyare yagaalya' dɨragɨnna dadaa maa'na neyɨdeina mɨ'. Aawa. Nemɨre kɨlaakejɨ' kayaaka kuna yade kɨrɨ' yuya yɨrɨka sarɨkɨ yuyagaa' nemɨre kuryai mudɨkei dɨragɨnyai yɨma'nadelyɨ. 17Yɨ daresɨ. Gotɨyarɨna nemɨ dara yawɨ'daanyɨ. Taanga nemɨnyɨ neyɨma'nade daza' wana maalɨkesɨ. Yɨ sa' wana kɨbawe maalɨkegaa' waradesɨ. Nabaai taanga wana maalɨka sa' dɨvi sagaa' nemɨnyɨne wana nawɨ'nya' byaanna dɨragɨnya naange' kɨnɨnnake' marima'naabathesɨ. Nabaai wana nawɨ'nya' taanginya maalɨtaaya savɨ yuna wavɨla'de' yɨ yuyagaa' yuyagaa'nesɨ. 18Yɨ nemɨ Kwaaka davakɨyangɨ taanginyangɨjɨ tɨnnyalyɨ wangadaanyangɨ dɨragɨnna myawɨranganyadaanyaine. Aawa. Sɨgunyavɨyangɨ tɨnnyalyɨ mwanganyadaanyangɨ dɨragɨnna yawɨrangadaanyaine. Sare' darevɨnyɨ. Yuya nemɨ tɨnnyalyɨ wangadaanya sa yune maalɨkegaa'na waradengɨ. Yɨ daza tɨnnyalyɨ mwanganyadaanya sa, sa yuyagaa' yuyagaa' waradengɨ. Sara yawɨ'daa dɨragɨnna dadaa maa'na neyɨdeina mɨ'.

Currently Selected:

2 Koridɨ 4: byr

Highlight

Copy

Compare