1 Pitai 5

Gotɨyare kusɨlaanyabwinesɨ.

1Yuya sarengɨdaa'nyɨ sarɨmɨjɨya a'mwe naangeraavɨ wɨdɨhaa'bwarɨma! Nɨmɨ kwainyɨjɨ Naangereraavɨre naangeinyɨ mwaaiheinyɨ. Nabaai Kɨraazɨtɨyai daange kamaara' nɨmɨ sainyɨ tɨnnyaraalyɨ wanganerɨna jalɨkurakadɨnyainyɨ. Naangere byaanna dɨragɨnya daza' ku'maayaba yɨma'naabathe' nɨmɨ kwainyɨjɨ kwaihɨlyɨ maraadeine. Sareinyɨ naangeihɨrɨ dɨragɨnna yɨhɨthɨma! 2Sipɨzipɨyaraavɨ maremwaaidɨvɨtabaaibɨ' Gotɨyare a'mweraavɨ sarɨmɨnyabanneraavɨ nayaa dɨmaremwaalyɨla! Wawɨnya yɨvanɨgasangɨna a'mwera dɨragɨnna yɨhyadɨvɨ' saihi yaasɨwa'na nyɨpɨdɨka! Aawa. Gotɨyai sɨmunyavɨ “Sahwara nɨmɨreraavɨ maremwaaibɨka!” yawɨ'devaaibɨ' nayaa jɨla! Yune nɨgwianna maarya'nenna wawɨnya sa' mipɨnera! Aawa. Sarɨmɨre sɨmunyangɨ “Nayaa wɨgaimwagɨma!” dadɨvɨ' dɨragɨnna nebwina jɨla! 3Gotɨyai a'mweraavɨneihɨrɨ yɨhɨthahɨlakaka saraavɨ dathɨwanga mipɨnera! Aawa. Gotɨyarera sarɨmɨre mwaalyaburɨjɨ ya'neburɨjɨ tɨnna yɨhwanganapɨjɨ tewaanyabwina yɨbwarɨdaakwia'na sara mɨdɨbɨ'de'na tewaanyaihi dɨmwaalyɨla! Sareihi dɨmaremwaalyɨla! 4Sare' sipɨzipɨyaraavɨna Maremwaala Aaya Naangei ku'maayaba yɨma'naabathehaa' yɨhɨrɨvɨkɨrya'ne' byaanna dɨragɨnya' miwɨyɨ yade' dɨmaaryideihɨlyɨ.

5Sabaaibɨ' a'mwe mɨgɨnya kwaihi a'mwe naangeraavɨ nayaa dɨmɨdɨnyɨla! Sara yadɨvɨ' sarɨmɨ yuyaihi nayaa kwaamu' mwaalyabwi maa'dɨvɨ' sɨrya'mweraavɨ nayaa duthaayɨla! Dara dɨnɨke'nanyɨ

“Gotɨyai pihadɨka yɨpɨjaraavɨ tihɨradelyɨ.

Kɨrɨ' kwaamusaraavɨna yangebwi wɨjaavadelyɨ.”

Sara dɨnɨke'nanyɨ. 6Sarevɨdaa'nyɨ yune gannyagaa' Gotɨyai “Kumɨre yaya' munyaba makɨlɨma!” kadozɨ gamɨre ata dɨragɨnaangirɨ kwaamu' dɨmwaalyɨla! 7Sahwai sarɨmɨnyɨna yawɨ'da nayaa yɨhɨmaremwaaide'na yuya yawɨta kwalaalya gamɨre asɨrɨ dakyɨla!

8Nayaa dɨvada'galayawɨrila! Tɨnna nayaa jemwaalyɨla! Sarɨmɨre yɨkamaangei Kotɨya Maryadei, kavɨjɨlɨka pwai laayonɨyai pwaka dɨragɨnna dadevaaibɨsalyɨ. Sai kaanya yamaryada a'mwe pwaraavɨ tɨka nya'neraavɨna bɨragaazɨwadelyɨ. 9Naangerɨ dɨragɨnna lɨmwangevɨ dɨragɨnna mwaalapɨjɨ sahwarɨ dɨrɨvɨkɨrasɨ'nyidelyɨ. Sarɨmɨ yawɨ'manɨga' “Nemɨ daanga ma'daanyabaaibɨ' neya'mwe yuyara Kɨraazɨtɨyarera Kwaaka yuyavakɨ mwaaihasara daanga maa'dɨvɨsare.” Sare'na dɨragɨnna dɨthaayɨla! 10Gotɨyai yuya yanga gaimwangeburɨ aaya kaavɨlyalyɨ. Kɨraazɨtɨyarɨna jaka yɨhɨzɨvwaramaaraka sahware byaanna dɨragɨnya' yuyagaa' Kɨraazɨtɨyarɨ warɨbainade' yɨhɨzaavakelyɨ. Daange' maalɨkegaa'na dɨmaaryide', dɨvi gamɨ sai yavada'galayɨhɨmwaaihadelyɨ. Yɨhɨmarɨdaakwadelyɨ. Sarɨmɨre sɨmunyangɨ dɨragɨnya yɨhivaimwagathelyɨ. Dɨragɨnyaihɨrɨ yɨhɨmwaaihadelyɨ. 11Sahwai dɨragɨnya' kɨnɨnnakei yuyagaa'ne yuyagaa' nemaremwaalana! Nebulyasɨ.

Yagaala pɨnɨnnesɨ.

12Saailaazare asɨrɨ yagaala tuta damɨlɨ' yɨhidawasɨwaabe. Nɨmɨ sarɨna yawɨ'na “Neya'mwei nawɨ'nyalyɨ.” Pɨkarya dazavɨ “Sarɨmɨnyɨ dɨhaa'bwarɨma!” dena mena yawɨrangadɨ yɨhɨzalɨkurakɨvanɨge. Daza' Gotɨyare yanga gaimwanga naanga nebulyasɨra. Dazavɨ nayaa dɨragɨnna dɨthaayɨla!

13Naangerera Bavɨlonɨ mwaaihasaraavɨjɨ mena yɨhɨthahɨlakakera “Neya'mweihi!” yɨhɨthɨwaa'. Nabaai nɨmɨrei Maakɨyai sai kwalyɨ “Nya'mweihi!” yɨhɨthɨwa'. 14Sarɨmɨ yuyaihi sɨrya'mweraavɨna kale ya saburɨne maangwɨdaayɨlaaya dɨmarinyɨla!

Kɨraazɨtɨyarɨ wɨlamwaaihasaihi tewaanyaihi dɨmwaalyɨla! Gotɨyare naryavɨ dɨmwaalyɨla! Sare' nyɨvu'nɨvanɨkesɨ.

Pitai

Currently Selected:

1 Pitai 5: byr

Highlight

Copy

Compare