1 Pitai 4

Kɨraazɨtɨyareraavɨne taangebwinajɨ wɨdaaya'nebwinajɨya'nesɨ.

1Kɨraazɨtɨyai gamɨre kɨlaakejɨkɨ daanga maarakelyɨ. Sarevɨdaa'nyɨ sahwai sɨmunyabwi lɨmwagakabaaibɨ' nabaai sarɨmɨ avaaizɨmunyabwi dɨragɨnna nayaa dɨlɨmwagyɨla! Yɨ dare'na “Tewaanyabwina pwara a'mwere kɨlaakejɨkɨ daanga wɨjaavadɨvɨsa'na sahwai kayaa'nanyabwi ayɨna yadei mɨ'.” 2Sarevɨ dazagaa' sahwai kɨlaakejɨkɨna kuna mwaaidehaa' dɨka widade kayaa'nanya sangɨ ayɨna mɨdɨnadei mɨ'. Aawa. Sai Gotɨyare sɨmunyaburɨ mwaaladelyɨ. 3Sare' dare'nesɨ. A'mwe ajɨmya yuyangɨyara Naangerɨ malɨmwagyadɨvɨta saraavɨre “Kuna yaana!” dadɨvɨ' yadɨvɨ' yadɨvɨta saburɨ kɨgaa' sarɨmɨ yaata sa menanyɨra. Dahaa' ayawɨ mipɨna! Sahwara da'dare sabwi darebwina mwaaidɨvɨsare. A'mweraavɨ a'mwengɨ ata lɨmwadɨvɨ' gɨrɨkita'nanyabwi yadɨvɨsare. Dɨka widadere. Biyaaya nadɨvɨ' yɨmakaanya yamarina yadɨvɨsare. Tɨka munne naangengɨ saamɨnyagaa' mwalɨbainyɨna yadɨvɨ' biyaaya dɨragɨnya kwalaalya nadɨvɨ' kayaa'nanyabwi yadɨvɨsare. Kwaasɨ gotɨyaraavɨna yɨlaaya yadɨvɨ' kayaa'nanyabwi yaasɨwa'na yadɨvɨsare. 4Dahaa' sarɨmɨ sasare kayaa'nanya sabulyɨ yaasɨwakebulyɨ sabwina sahwarajɨ mye'mwannayɨvanɨga'. Sarevɨdaa'nyɨ “Be'neka!” dadɨvɨ' lɨka yɨwaainadɨvɨ' bɨraiyagaala yɨhɨthɨvanɨga'. 5Sahwara kumɨre yadɨvɨta aaya kaavɨla sa'na yawɨbwarya'nerɨ yagaala wɨdɨpɨ'delyɨ. Sai yawɨbwasa'na mena yemwaalɨkelyɨ. Sai a'mwe mwaaihata kwaraavɨjɨ barya kwaraavɨjɨ yawɨbwaradelyɨ. 6Sare' dare'nesɨ. Sarevɨ sɨnnawɨ yagaala tewaanya' a'mwe mena bainɨka kwaraavɨjɨ mena wɨjɨwaakesasɨ. Gotɨyai maryawɨbwasa' mena dɨnɨkesɨ. Kɨlaakejɨ' balojɨ kwaakevɨnejɨkɨ. Pɨrɨ' daresɨ. “Yagaala tewaanya' wɨ'neta sahwaraavɨre kɨlaakejɨkana maryawɨbwarɨma!” kada' wɨjɨwaakɨna. Pɨrɨ' daresɨ. “Gotɨyainyɨ kuna mwaaihebaaibɨ' kumɨre kuryarana gaalya'nera mwaaibɨka!” kada' wɨjɨwaakɨna ye'.

7Yuya yɨwawodehaa' aya kɨgaa' menanyɨra. Sarevɨdaa'nyɨ sɨmunya nayaa jawɨrila! Sarɨmɨ nayaa pada'galayawɨ'na yadɨvɨsa'na yuyagaa' Naangerɨ nayaa duzideihɨlyɨ. 8Yuyangɨ sɨnnawɨnya' da'daresɨ. Sɨrya'mweraavɨna yɨhɨvu'nana! Sabwi dɨragɨnna dɨlɨmwagarila! Kihɨvu'nojɨ pwaraavɨre kayaa'nanya kwalaalya sarɨmɨnyɨne dɨmarasɨ'nyideihɨlyɨ. 9Sarɨmɨjɨ bye'mwannamwaaibɨneraavɨ sɨrya'mweraavɨ sarɨnnya angengɨ nayaa dɨmaremwaalyɨla! Sara yapɨjɨ maajɨmunya myawɨpɨna! 10Sarɨmɨjɨya gazaigɨzaigɨ Gotɨyare yangebwi maaragɨneigɨ pwaina pwainanyarɨ dɨhaimwana! Gaimwanga sasare wawɨnya yadɨnya nawɨ'nyaigɨjɨ Gotɨyare yanga pɨnɨnna pɨnɨnnanya wɨjaapalya'na sara jɨnyɨla! 11Gotɨyai yangenna dɨragɨnyanna yɨhɨzaavake'na dara jɨla! Yɨ sarɨmɨjɨya pwai yagaalya' wɨjɨwaakajai nabaai yange'na sai Gotɨyare yagaalya wɨjɨwaakana! Pwai a'mwe pwarɨ wɨdaayajai yange'na Gotɨyai wɨjaavade dɨragɨnya sasɨ sara yana! Sana sana jɨla! Sarevɨdaa'nyɨ a'mwera yuya wawɨnya sa tɨnna wanganapɨjɨ “Jizaazai Kɨraazɨtɨyarɨna a'mwera ‘Gotɨyai byaannakelyɨ,’ dɨpɨka!” dapɨjɨ sana sana jɨla! Sahwai byaannyasɨ yɨlaaya naangesɨ kɨnɨnnakei yaka dɨragɨnaangei yuyagaa' yuyagaa'nelyɨ. Nebulyasɨ.

12Nyɨvu'nadeihi, sarɨmɨre lɨmwangebwi yaamɨjɨ ya'ne'na dɨke' a'mweraavɨ nadevaaibɨ' taanga kihyojɨ lɨka nyɨwaainɨpɨka! Sanna dara nyawɨpɨdɨ'! “Dala nabinya neyɨma'nɨvanɨka!” 13Aawa. Daanga dazavɨna “Kɨraazɨtɨyarɨ daanga wɨvɨnakabaaibɨ' nevɨmanɨke'nanyɨ,” dapɨjɨ yɨlaaya jɨla! “Dɨvi gamɨnne byaanna dɨragɨnya' ku'maayaba yɨma'naabathevɨ yɨ yɨlaaya naanga kuna yadaa munyɨ' nayaa gaimakunna yaana!” dapi daangenna yɨlaaya jɨla! 14Kɨraazɨtɨyarɨna bɨraiyagaala yɨpɨja'na yɨlaaya yadɨvɨ' tewaanaanga yɨhyɨnanneihɨlyɨ. Gotɨyare Kuryai byaanna dɨragɨnya' kɨnɨnnakei yɨhɨmwaalɨke'na yɨlaaya jɨla! 15Sare' dare'nesɨ. Sarɨmɨjɨyarɨ daanga wɨvɨnajai a'mwerɨ tamakya'nei namwaaladɨka! Yɨ kuka maarya'nei, yɨ kayaa'nanya ya'nei, yɨ pwaraavɨre yaasɨwa'na maremwaalya'nei, yɨ dazarerɨ daanga wɨjaavɨpɨ'devaaibɨ' tɨvɨkɨsa'na sarɨmɨjɨyarɨ daanga nujaavɨpɨka! 16Pwai tewaanyabwi yadei Kɨraazɨtɨyarei mwaalɨke'na taanga wɨjaavɨpɨja' wagɨla mamaarannera! Yaya nawɨ'nya sa' Kɨraazɨtɨyarerɨne'na Gotɨyarɨna “Byaannakelyɨ,” dana! 17Gotɨyai yawɨbwarya'negaa' yarai yɨma'nadehaakɨ. Gotɨyai gannya angevɨyainaavɨdaa'nyɨ neyawɨbwaradelyɨ. Sɨnnawɨ dɨragɨnna sara kaneyojɨ Gotɨyare yagaala tewaanya' galazekɨvaidɨvɨsaraavɨ gatha'dara yannevaka! Maalɨke' mɨ'! 18Dara dɨnɨke'nanyɨ

“A'mwe yɨda'maraangerɨ taanga naanga kujaavapɨjɨ

Kɨrɨ' Gotɨyai gamɨre kayaa'nanyabwi padaihasamaaraja'

Gotɨyarɨ gɨnyɨra'derɨna gatha'darevaka!

Kayaa'nanyarɨ gatha'dara ya'nelaka!

Kayaa'nanyaraavɨ yɨnɨga wi'na mavadaihasamaari yaderera.”

19Sarevɨdaa'nyɨ Gotɨyai sɨmunya yawɨranne daange maa'manɨgatabaaibɨ' Kɨraazɨtɨyarera nayaa yɨda'na yadɨvɨ' kunnya kuryaraavɨ Gotɨyarɨna wɨjaavɨnɨpɨka! Sahwai newakyaakelyɨ. Yuyagaa' gannya yagaala wɨdadengɨna sara yadelyɨ.

Currently Selected:

1 Pitai 4: byr

Highlight

Copy

Compare