1 Pitai 3

A'mweyuraavɨnesɨ.

1Sasarebaaibɨ' kwala maa'nɨke'gɨ gɨnnya a'mwerɨ kwaakewɨ dula'naka! Sarevɨdaa'nyɨ kwalaangei Kɨraazɨtɨyare yagaalya' galazekɨvaina yajai kwai gɨmɨre nawɨ'nyaburɨ gwanganojɨ Naangerei yɨma'nannelyɨ. Yagaala duthathe'na mɨ'. 2Gɨmɨ “Nɨnnya a'mwei naangelyɨ,” da'gɨzɨ nayaa wɨmɨdɨdɨnya'gɨreburɨ tɨnna gwanganade'nanyɨ. 3“Nɨnnya a'mwei nawɨ'nya'nyɨ nyawɨranganana!” da'gi gɨmɨre kɨlaakejɨkɨ mwasɨmagɨnna yɨwaala miwannɨnnera! Mɨjasangɨ yɨwaala yɨwannadɨnyajɨ nɨgwɨlalaaka paidapaide yɨ'dejɨ baazɨ'ma'nya dala nabinabinyajɨ miwannɨnnera! 4Aawa. Kusɨmagɨnna gɨnnya sɨmunya lɨka yulyarɨkevɨ yɨwaala yɨwannɨnne'gɨnyɨ. Yɨwaala daza kayaaka yɨnadenna mɨ'. Yɨwaala sa darebulyɨ. Kuryara kwaamu'nanyara kave mwaaidɨvɨsabulyɨ. Kwaamu'na yadɨvɨ' nayaa dadɨvɨsabulyɨ. Sasare sabwi Gotɨyai tɨnna wangada “Wana nawɨ'nyaangebulyɨ,” dadevulyɨ. 5Sare' dare'nesɨ. Kɨgaakuna a'mwe Gotɨyarɨ yemwaaidɨvɨ' nawɨ'nya mwaaleva sabwi sara yaasangɨra. A'mwe daza yɨwaala sasare sabwi kave mwaalya'nebwi maa'dɨvɨ' kunnya a'mweraavɨ kwaakewɨ nayaa wɨla'naryaasangɨra. 6Seraa' sasare sabwi yaakesɨ. Evɨraamɨmɨre yagaalya' mɨdɨnna yaka sahwarɨna “A'mwe naangeigɨ,” wɨdakesɨ. Nabaai gɨmɨ nawɨ'nyabwina sara yɨja' aane pɨrɨ' kɨrɨvɨna lɨka yarai mi jɨthevurɨdaa'nyɨ Seraa' nawɨ'nyabwi yaakebwi ya'gɨzɨ Seraavɨre kaimɨraaya'gɨ jɨma'nade'gɨnyɨ.

7Sasarebaaibɨ' kwala maakɨnyaigɨ sɨmunya nawɨ'nya yawɨ'dɨ gɨnnya a'mwesɨ nayaa dɨmwaala! Dara yawɨ'na “A'mwevɨre kɨlaakejɨ' dɨragɨnyajɨ' mɨka! Sarevɨdaa'nyɨ nayaa yɨdeinyɨ.” Nabaai dare'na yawɨ'dɨ “Gaalyaburɨne Gotɨyare yanga wɨgaimwangevɨ a'mwesɨ yuna maarakade'naalyɨ. Sarevɨdaa'nyɨ nɨnnya a'mwevɨre yaya' makɨlɨma!” Sara jawɨka! Sara mi yɨja'na Gotɨyarɨ kuda'gɨzɨ magu'nyɨ nagyathɨka!

Kɨraazɨtɨyarera nayaa yɨpɨnesɨ.

8Dahaa' yagaala da' dara jɨ'mwannɨde'nanyɨ “Sarɨmɨ yuyaihi avaaizɨmunya jɨla! Pwai pwarɨna pwai pwarɨna yawɨ'dɨvɨ' dɨmwaalyɨla! Kɨraazɨtɨyare sɨrya'mweraavɨna yɨhɨvu'nana! Kale yɨhyana! Pwaraavɨre yaya mamakwalaawi yapɨjɨ sarɨnnya yaya mamakɨlaapɨna!” 9Nabaai a'mwera kayaa'na kihyapɨjɨ kumɨre sabwina murɨvɨkɨpɨnera! Nabaai bɨraiyagaala kihɨthapɨjɨ bɨraiyagaala sanna murɨvɨkɨpɨnera! Aawa. Kumɨre yadɨvɨta sabwi darebwi dɨrɨvɨkɨryideihɨlyɨ “Gotɨyai tewaanya nejaavade'na Gotɨyarɨ wɨdaana! ‘Sahwaraavɨna tewaanya duzaama!’ ” Sasare sabwi kyapɨjɨ Gotɨyai “Nɨmɨrera yɨma'napɨjɨ tewaanya naanga maapɨka!” daka jaka yɨhɨzɨvwaramaara'. 10Sare' dare'nesɨ. Dara dɨnɨkesɨ.

A'mwei dara yawɨraja'

“Mwaalyabwina tewaanya nyɨvu'nana!

Yɨrɨka tewaanyangɨ wanganɨma!”

Yagaala kayaa'nanya bɨpalana!

Kwaasɨ yagaala madanna!

11Kayaa'nanya' gɨnyɨra'na yana!

Tewaanyavɨ nayaa yana!

Munya yɨrɨla dɨwannana!

Sasarebwi dɨragɨnna mɨdɨnana!

12Naangei yɨda'maraangeraavɨ wangamanɨke'nanyɨ.

Tɨnna wanganaka maremwaaidelyɨ.

Naangei yɨdaanganya wɨ'nɨvanɨke'nanyɨ.

Kadɨka wɨ'naka wɨgaimwadelyɨ.

Kɨrɨ' kayaa'na yadaapiyaraavɨ

Jɨkurɨtɨnna dɨragɨnna yɨvanɨke'nanyɨ.

Sara dɨnɨke'nanyɨ.

13Nabaai sarɨmɨ dɨragɨnna nayaa yɨpɨja' tewaanya sabwi mɨdɨnya'na kayaa'na yɨhya'nei bewalaka! 14Aawa. Kɨrɨ' yɨda'maraangebwina yɨpɨja' sahɨrɨvɨne'na Gotɨyarɨna taangesɨ daangesɨ damaa'manɨga'! Sare'na yɨlaaya yadɨvɨ' tewaanaanga yɨhyɨnanneihɨlyɨ. Nabaai lɨka ya'ne pɨnɨ kihizɨwaalapɨjɨ sahɨnɨnna sarɨmɨ lɨka mipɨnera! Yawɨta kwalaalya mipɨnera! 15Sarɨnnya sɨmunyangɨ Kɨraazɨtɨyarɨna jawɨranganyɨla! “Nemɨre Naangelyɨ. Tewaanyalyɨ!” Nabaai gazagaasagaa' ayɨna wɨja'na dɨragɨnna dɨmwaalyɨla! Gazaizai kihithaanganojɨ “Sarɨmɨ yemwaaimanɨgata saburɨ aaya kaavɨlya' berɨvaka?” Sarevɨ ayɨna wɨja'na nayaa jemwaalyɨla! Kɨrɨ' nayaa ja'nawɨdadɨvɨ' kwaamu'nanyaihi yagaala kaveyajɨ jideihɨlyɨ. 16Sarɨmɨre sɨmunyai tewaanyai padaihɨrakya' nayaa yɨda'na warana! Sarevɨdaa'nyɨ bɨraiyagaala yɨhɨthɨpɨjahaa' kayaa'nanya daza' dɨvanɨgasara dara wangabɨ'de' “O, Kɨraazɨtɨyarɨ mɨdɨdɨvɨsara tewaanyabwi jɨvanɨgava!” Nabaai “Sahwara kunnya yagaalya'na wagɨla maapɨka!” dapi kave duzideihɨlyɨ. 17Sare' dare'nesɨ. Gotɨyai sɨmunya yawɨraja' “Tewaanna yadaapi nɨmɨreraavɨ taanga wiana!” sarɨmɨ tewaanyabwi yadɨvɨsa'na taanga wia sa' tewaanyasɨ. Kɨrɨ' sarɨmɨ taangebwi maapɨja' kayaa'na yɨpɨja sabwina sa' wana kayaa'nanyasɨ. 18Kɨraazɨtɨyai tewaanna yada taanga wina yesa'na sarɨmɨ avaaina yɨpɨneihɨlyɨ. Yɨ yune gave pɨgaa'na sarɨmɨre kayaa'nanyanna Kɨraazɨtɨyai balake'nanyɨ. Sahwai a'mwe yɨda'maraangei sarɨmɨ a'mwe kayaa'nanyaihɨrɨneba bala'. “Gotɨyaryawɨnna sahwaraavɨ makuma!” daka balakelyɨ. Pɨrɨ' daresɨ. Sahwai kɨlaakevɨ a'mwei mwaaidɨ'nyɨ tamarɨmwesalyɨ. Pɨrɨ' daresɨ. Kuryarɨ ayɨna yɨdɨkaavaka gaalyai mwaalɨkelyɨ. 19Nabaai kuryarɨ kuryara kalavuzangevɨ mwaaidapiyaraavɨ wɨdaawakelyɨ. 20Kɨgaakuna Nowaaregaa' Gotɨyare yagaalya' galazekɨvaina yaasaraavɨ wɨdaawakerera. Sahɨrɨ'na nabaai Gotɨyai yarai murɨvɨkɨryaka sahwaraavɨ yemwaaina ya'. Sagaa' Nowaai sɨpɨya' yavɨkarina kya' kwala maalɨkera nayaa wɨlamwaaina yɨna ye'. Sɨpɨya savɨ kusawɨ a'mwe ata purɨdaa'nyɨ daraai dalyara aalyavɨ yɨvainyaakere. 21Daza' bavɨtaazɨya'na ke'ba'nanya' yakesɨ. Sarɨmɨnyɨ bavɨtaazɨya' yɨhyada kayaa'nanyabwi marasɨ'nada yɨhɨvadaihasamaarakesɨ. Jizaazai Kɨraazɨtɨyai ayɨna mena dɨkaavakevɨdaa'nyɨ yɨhɨvadaihasamaarake'nanyɨ. Mudɨkeihi mwaaihasaihɨlyɨ. Bavɨtaazɨya' kɨlaakejɨkɨ gɨrɨka marasɨta'ne' mɨ'. Aawa. Bavɨtaazɨyagaa' Gotɨyai sarɨmɨre yɨdaanganya wɨ'naka sarɨmɨnyɨne sɨmunyara tewaanyara padaihɨrakya'neihɨrɨ tewaanyaihɨrɨ yɨhɨmwaaihakesɨ. 22Kɨraazɨtɨyai dɨkaavakei Sɨgunyavɨna mena yɨlaawaka dɨragɨnyaba Gotɨyare aangasɨrɨ yɨlamwalaawɨ'. Ejelɨyarajɨ naanga nabinabinyarajɨ dɨragɨnnakerajɨ yuyara sahwarɨ kwaakewɨ wɨla'narya'nelyɨ.

Currently Selected:

1 Pitai 3: byr

Highlight

Copy

Compare