1 Pitai 2
2
1Gotɨyarɨdaa'nyaihi mwaaihasavɨdaa'nyɨ kayaa'nanya yuya sabura dɨmarasɨ'nyɨla! Kwaasɨ yagaala yuya sabulyɨ kwaasɨya sabulyɨ gɨlyɨvɨta kwalaalyajɨyaraavɨna sɨmunya kayaa'na yawɨta sabulyɨ bulayagaala yuya sajɨ sasare sa dɨmarasɨ'nyɨla! 2Bwaranyamɨlɨka aamunya'na mɨjɨka wiadevaaibɨ' Naangere yagaalyavɨna mɨjɨka yɨhyana! Sarevɨ “Yune'na nevadaihasamaarana!” kadapɨjɨ sarɨnnya kuryara dɨragɨnyara yɨma'nɨpɨ'de'nanyɨ. 3Sare' dɨnɨ' “ ‘Naangei negaimwadelyɨ,’ yawɨ'manɨgasa' waburya naange'na yɨhyakesɨ.” Sara nebulya'na yɨhyanneihi gamɨre yagaalyavɨna yɨhɨvu'nana!
Naangei sɨla gaala'ne tewaanyarɨnesɨ.
4Kɨraazɨtɨyaryawɨnna dɨvideihɨlyɨ. Sɨlaanga gaala gamɨ sahwalyɨ. Nemɨnyɨna gaalyabwi nejaavadelyɨ. Pɨrɨ' daresɨ. Sahwarɨna a'mwera “Waryaanyalyɨ,” deva marasɨ'nesalyɨ. Pɨrɨ' daresɨ. Kwarɨna Gotɨyai “Nawɨ'nya nebulyalyɨ,” daka wɨdahɨlakakelyɨ. 5Nabaai sarɨmɨ saihi gamɨre gaalyabwi maareva sɨlaanga gaalyai kɨnɨnnakeihɨlyɨ. A'mwera siange' maja'nera sɨlya wakadɨvɨtabaaibɨ' Gotɨyai gamɨreihɨrɨ yɨhɨmwaaihaka angevɨyaihɨrɨna gannya Kurya Tewaanyarɨ wɨlayɨhɨmwaaihɨvanɨkelyɨ. Nabaai sarɨmɨ pɨrizɨyara Gotɨyarɨna mubɨthɨka yɨra'dɨvɨta tewaanyaihi gamɨnyɨna wɨdaayadɨvɨsaihɨrɨ yɨhɨmwaaihɨvanɨkelyɨ. Sareihi pɨrizɨyara Gotɨyarɨna sipɨzipɨyaraavɨ yɨravetabaaibɨ' sarɨnnya kuryara Gotɨyarɨna duzaayideihɨlyɨ. Sara nayaa yɨpɨja' Gotɨyai Jizaazai Kɨraazɨtɨyarɨna yawɨ'da yɨhɨmaaradelyɨ. 6Kɨraazɨtɨyai sɨlaanga gaala'nerɨna Gotɨyare bukuyavɨ dara dɨnɨkesɨ.
Yɨthaanyi! Saayonɨ Sɨlaangerɨ wɨmwaaihɨvanɨge.
Maja'ne simɨjamaangei yɨvaimwagya'nerɨna wɨdahɨlakɨwelyɨ.
“Nawɨ'nya nebulyalyɨ,” dena wɨdahɨlakɨwelyɨ.
Sarevɨdaa'nyɨ sahwarɨ dɨragɨnna lɨmwagazai
Wagɨla kɨnɨ maaradei mɨka! Arɨkewɨ.
7Sarevɨdaa'nyɨ Naangerɨ lɨmwadɨvɨsaihɨrɨna Kɨraazɨtɨyai wana nawɨ'nyalyɨ. A'mwe malɨmwagi yɨpɨjaraavɨna dara dɨnɨkesɨ.
Anga madɨvɨsara sɨlaangerɨ marasɨ'nesalyɨ.
Dazai Aaya Ke'banyai yɨma'nɨwakelyɨ.
8Nabaai a'mwe malɨmwagi yɨpɨjaraavɨna dara dɨnɨkesɨ.
Sɨla dazarɨ mudaya'nelyɨ.
Sɨlaangerɨ mudavamaarojɨ walaraawadelyɨ.
Sara dɨnɨkesɨ. Gotɨyare yagaalya' galazekɨvaidaapiya'na Kɨraazɨtɨyarɨ muda'manɨgasare. Kɨraazɨtɨyarɨ malɨmwagyadɨvɨ' kayaaka yɨgainɨvanɨgasare. Sɨnnawɨ kɨgaa' Gotɨyai sara dakakesɨ. Galazekɨvalyara mudapɨ'derera.
9Sare' kɨrɨ' Gotɨyai mena kihɨthahɨlaka' gamɨnyɨdaa'nyaihi gamɨreihi yɨma'nesaihi sɨmya yɨsavaakɨ dahɨlakɨnɨkeihɨlyɨ. Gotɨyarɨna mubɨthɨka yɨra'dɨvɨsavaakɨyaihi Gotɨyai Maremwaaiderɨ wɨdaayadɨvɨsaihɨlyɨ. Sarɨmɨ anga naanga pimagɨnya tewaanyaihi gɨrɨkita'nanya maayaihɨlyɨ. Gotɨyare a'mweihi, Gotɨyare gɨlyɨvɨsaihɨlyɨ. Sareihɨrɨ yɨhɨthahɨlakake'na Gotɨyai yake yuya nawɨ'nya ya sabwi duzɨwaakyide'nanyɨ. Sahwai jaka kihɨzɨvwara' jɨhɨnya' mena yagalya'ma'na kye' gamɨre baaka nawɨ'nyavɨ wɨlayɨhɨmwaaihake'nanyɨ. 10Kɨgaa' a'mweihi mwaaletaihi mɨ'. Aawa. Dahaa' Gotɨyare a'mweihɨlyɨ. Kɨgaa' kale wɨgaimwangebwi maaresaihi mɨ'. Aawa. Dahaa' Gotɨyarɨ sarɨmɨnyɨna kale wɨgaimwanga sabwi maakasaihɨlyɨ.
Kɨraazɨtɨyareina yadaanyaburaavɨnesɨ.
11Nya'mweihi, tewaanya nyɨvu'nadeihi yɨhɨthɨhaa'bwarɨma! Kwaaka davakɨ angavaayaihi yɨwɨnamavesaihi mwaaihasa'na sɨmunya ayabwi “Wabahɨlaake'na kayaa'na yɨwɨneinyɨ. Maa'mujainyɨ,” yawɨresabwi mamɨdɨbɨna! Sasare sabura sarɨmɨre kuryarajɨ mala bwa'nadɨvɨsa'nanyɨ. Sarɨmɨre kuryara dɨragɨnna mwaaibɨka! 12Ajɨmya yuyangɨyaraayaba nayaa yɨda'na jɨla! Sasarebwina sarɨmɨ yadaapɨri sahwara kwaasɨ dɨnɨpɨja' “Kɨraazɨtɨyarera kayaa'na yadɨvɨsare.” Kɨrɨvɨ sarɨmɨre tewaanyabwi dara yawɨrangabɨ'de' “O, sahwai nayaa yɨvanɨke' daaka!” Gotɨyai yawɨbwarya'nei mu'nyadɨvɨsaraayawɨnna bozɨyagaa' sarɨmɨ “Malɨmwagyadɨvɨsara Gotɨyarɨna ‘Byaannakelyɨ,’ dɨpɨka!” dapɨjɨ nayaa yɨda'na jɨla!
13Naangerɨna sɨmunya nayaa yawɨ'dɨ a'mwe naangera yuyara gɨmaremwaaidɨvɨsaraavɨ kwaakewɨ dɨmwaala! Kingɨya naanga Sizaai mwaalɨkerɨna sahwarɨ kwaakewɨ dɨmwaala! 14Nabaai ga'maanɨya kwaraavɨjɨ kwaakewɨ dɨmwaala! Sahwaraavɨ kingɨya naangei Sizaai maryasaabakere. A'mwe kayaa'na yadɨvɨsaraavɨ kayaa'nanya tɨvɨkɨrya'ne'na kɨrɨ' nayaa yadɨvɨsaraavɨ yaya wɨmakɨlya'ne'najɨ maryasaabakere. 15Sasare gɨmɨ yadaa'gɨzɨya'na Gotɨyarɨ tewaanya wɨvu'nɨvanɨkelyɨ. Nayaa yadaa'gi sɨdu'maayara yawɨ'dɨvɨ' “Kumɨrebwi kayaa'nanyabwi tɨnna wanganawaajɨ bɨrala wɨdaatheinera,” dara wangabɨ'de' “O, tewaanna jɨvanɨga'!” Sara gɨmɨ yadɨ gɨmɨnyɨnebwina kayaa'nanya yɨnɨga wi'na majɨ yɨpɨnerera. 16Nayaa dɨmwaala! Pwaraavɨ yaasɨwa'wawɨnyaigɨ wɨdaaya'neigɨ mamwaaidɨnneigɨnyɨ. Gotɨyai neyaarakeinera. Dɨragɨnyaigɨ gɨnnya dɨragɨnyabwina kayaa'nanyabwi mabwakakɨnna! Sarevɨ dara myawɨ'dɨnna! “Dɨragɨnyaina mwaaiho'na kayaa'nanya yaaja' sara yaana!” Sara myawɨ'dɨnna! Aawa. Gotɨyare yaasɨwa'wawɨnyaigɨ dɨmwaala! 17A'mwe yuyaraavɨre yayangɨ munyaba dɨmakɨla! Kɨraazɨtɨyare ja'mweraavɨna gɨvu'nana! Gotɨyarɨna yawɨ'dɨ “Naangelyɨ. Dɨragɨnaangelyɨ,” lɨka nayaa jɨ! Kwaaka yuyavakɨya Kingɨya Sizaarɨne yaya' munyaba dɨmakɨla!
Yaasɨwa'wawɨnyaraavɨnesɨ.
18Angevɨ wɨdaayadɨnyaigɨ gɨnnya maremwaaiderɨna “A'mwe naangelyɨ,” nayaa yawɨ'dɨ lɨka yadɨ kwaakewɨ nayaa dɨmarulawakɨnna! Pwara tewaanna gɨmaremwaaidɨvɨsarajɨ nayaa kave gyadɨvɨsarajɨ gaveraavɨna mɨ'. Aawa. Kayaa'na gɨmaremwaaidɨvɨta kwaraavɨjɨ nayaa dɨmɨdɨna! 19Sare' dare'nesɨ. Yaasɨwa'wawɨnya gazaizai tewaanya yaderɨna daange yaasɨwa'na wɨjavadaapi Gotɨyarɨna sɨmunyai tewaanyai wɨvadaihɨrakade'na sahwai murɨvɨkɨryada Gotɨyarɨ kuna mɨdɨnajavwina Gotɨyarɨ tewaanya wɨvu'nadelyɨ. 20Sare' dare'nesɨ. Gɨmɨ kayaa'na yɨja'na asɨlyɨ mala kagɨramapi murɨvɨkɨri yɨja saburɨdaa'nyɨ Gotɨyai be yɨlaaya gɨmaryadelaka! Aawa. Gɨmɨ tewaanyabwi yɨja' kɨrɨ' asɨlyɨ mala yaasɨwa'na kagɨramapi daanga maara'gɨzɨ murɨvɨkɨri yɨja dazahɨburɨdaa'nyɨ Gotɨyarɨ tewaanya wɨvu'nadelyɨ.
21Sare' dare'nesɨ. Sasare sabwi mɨdɨnya'neigɨnyɨ Gotɨyai jaka mena gɨzɨvwaramaarake'nanyɨ. Kɨraazɨtɨyai gɨmɨnyɨna gaimwange'na daanga maaraka murɨvɨkɨrya'. “Nɨmɨ sara yebaaibɨ' nɨmɨre sɨvɨla yɨbwarɨmakupɨka!” daka givwarɨdaakwa'. 22Sahwai kayaa'nanyabwi yakai mɨ'. Gamɨre maangikɨ kwaasɨ yagaala wɨ'netai mɨ'. 23Sahwarɨ bɨraiyagaalyajɨ wɨdɨna kye' bɨraiyagaala ayɨna mujakelyɨ. Sarɨ daanga wɨvɨnaka kɨrɨ' maiyagaala mujakelyɨ. Aawa. Gotɨyai yuyangɨne yɨdasava'na yawɨbwa'dei sahwaraavɨ wɨrɨvɨkɨrya'ne'na Gotɨyare asɨrɨ wɨmwangɨnakelyɨ. 24Gamɨ sai gannya kɨlaakejɨkɨ nemɨre kayaa'nanya maaraka yɨsavɨ tɨmunadaavakelyɨ. Nemɨnyɨna “Sahwara kayaa'nanyanna balapɨjɨ yɨda'maraangebwina gaala mwaaibɨka!” daka balakelyɨ. Gamɨre kɨlaakejɨkɨ ga'bwaralyajɨ kayaaka kigale' daanga maarakelyɨ. Sasara gamɨnyɨ yɨma'nake'na ayɨna tewaanya yavada'gala gyakelyɨ. 25Sare' dare'nesɨ. Kɨgaa' sipɨzipɨyara tusa' yagalya'mavesarabɨsaigɨ tewaanya mamwaalyagɨ. Aawa. Kɨraazɨtɨyai ayɨna mena kagɨmakaba' dahaa' gɨmɨre kuryarɨ maremwaalyai sipɨzipɨyaraavɨ maremwaaideryaba tewaanya mwaalagɨ.
Currently Selected:
1 Pitai 2: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
