1 Pitai 1
1
Gotɨyai yɨhɨzɨvwaramaarakeihi yɨwɨnamavesaihi,
1Pitainyɨ Jizaazai Kɨraazɨtɨyai Nyɨdaasadeinyɨ Apozelɨyainyɨ pɨkarya daza' yɨhithawasɨwaabe. Anga Naanga Podaazɨ, Galezɨya, Kapaathozɨya, Ezɨya, Bɨthinɨya, sangɨ gazabazaba angavaayaihi mwaaihasaihɨrɨna yɨhithawasɨwaabe. 2Kɨgaakuna Gotɨyai Nɨmwai sarɨmɨnyɨna mena yawɨraka yune gamɨ sahwarɨna yɨhɨthahɨlakakeihɨlyɨ. Kurya Tewaanyai Gotɨyareihi nawɨ'nyaihɨrɨ yɨhɨmwaaihakeihɨlyɨ. Jizaazai Kɨraazɨtɨyarɨ mɨdɨnya'na, nabaai gamɨre tawe' sarɨmɨnyɨ aalya yɨhya'ne'na nawɨ'nyaihi yɨma'nya'na yɨhɨthahɨlakakeihɨlyɨ. Sareihɨrɨne yange'na tewaanna wɨgaimwangebulyɨ kwaamu'nanyabulyɨ naanna yɨhɨmwaaihana!
Sɨgunyavɨ mwalaade'na dɨragɨnna yemwaalya'nesɨ.
3Nemɨre Naanga Jizaazai Kɨraazɨtɨyare Gotɨyai Ganɨmaangerɨ yɨlaaya nayaa maryaana! Nemɨnyɨ kale naange'na negaimwagake'na Kɨraazɨtɨyarɨna Gotɨyarɨdaa'nyainaavɨ gaala mena nemwaaihakelyɨ. Sahwai Jizaazai Kɨraazɨtɨyarɨ bainɨkeraayawɨ ayɨna yɨdɨkaavakevɨ mudɨkeinaavɨ gaala mena nemwaaihakelyɨ. Nabaai sahwarɨnevɨ gaalyabwineina yɨma'nona “Yuyagaa' yuyagaa' mwalaade'nanyɨ,” dɨragɨnna jemwaalya'neinaavɨ mena nemwaaihakelyɨ. 4Gamɨre kaimɨraayainaavɨ mena nemwaaihake'na Nenɨmaangere yuya maraadenna dɨragɨnna yemwaaimanɨgo. Sarenna yuna kayaaka yɨnadenna mɨ'. Bwia buradenna mɨ'. Sarenna gɨrɨkita'nanya yɨma'nadenna mɨ'. Waryaanya yɨma'nadenna mɨ'. Sarenna gwarakuradenna mɨ'. Yarai yɨwodenna mɨ'. Sarɨmɨnyɨne yemwaalya Sɨgunyavɨ Gotɨyai dame daavɨkengɨra. 5Sarenna sarɨmɨnyɨnengɨ. Gotɨyare dɨragɨnyavɨ sarɨmɨnyɨna dame daavɨkeihɨlyɨ. Sahwarɨna dɨragɨnna lɨmwabɨza'na dame daavɨkelyɨ. Yɨnahu padaihasamaarya'nevɨ dɨmwaalyide'na dame daavɨkelyɨ. Padaihasamaata sa' yemwaala yɨhivanɨke' Yɨrɨka aayagaa' ku'maayabanna yɨma'naabathesɨ. Sareburana yɨlaaya nayaa maryaana!
6Yuya sahɨnɨngɨna yɨlaaya naanga yɨvanɨgasaihɨlyɨ. Dahaa'ne' maalɨkegaa'nesɨ dala pɨnɨnna pɨnɨnnanya taanginyanna yɨjɨwaalyanna taanga yɨhɨzaavanɨgata kɨrɨ' yɨlaaya yɨvanɨgasaihɨlyɨ. 7Taanga yɨhɨzaavanɨgata sare'na yawɨta kwalaalya mipɨnera! Taanga sasare sabwi dara yɨbwarɨdaakuvanɨ' “Taanga wiada kɨrɨ' Naangerɨ dɨragɨnna kuna lɨmwamanɨgasare. Sare'na kumɨre lɨmwangebwi nebulyasɨ.” Nemɨ “Golɨya tewaanya nevu'nadesɨ,” yawɨ'daa kɨrɨ' dɨkevɨ yaamɨjɨya'na marapɨraayadɨvɨ' kwaake' nade golɨya dɨragɨnya' maa'dɨvɨtabaaibɨ' sarɨmɨre lɨmwangebwina dɨragɨnyabwi yɨma'nade'na taanga yɨhivanɨkebulyɨ. Golɨya kayaaka yɨwode kɨrɨ' Naangerɨ lɨmwangebwi golɨya sahɨrɨ'bɨta mɨ'. Aawa. Sa' golɨyavɨ wavɨlavaka yɨ tewaanya nawɨ'nyaangesɨ. Yuyagaa' warɨbainagwodesɨ. Sarɨmɨre dɨragɨnyabwi yɨvaimwagathe'na taanga yɨhivanɨke'nanyɨ. Dɨvi Jizaazai Kɨraazɨtɨyai ku'maayaba yɨma'naabathehaa' Gotɨyai “Lɨmwagesaraavɨ yɨlaaya naanga wima! Byaannakeraavɨ wɨmwaaihɨma! Sahwaraavɨre yaya makɨlɨma!” kada' taanga yɨhivanɨ'. 8Jizaazai Kɨraazɨtɨyarɨ tɨnna mwanganyeta kwaihi kɨrɨ' sahwarɨna yɨhɨvu'nɨvanɨkelyɨ. Dahaa' tɨnna kuna mwanganyadɨvɨta kwaihi kɨrɨ' sahwarɨ lɨmwadɨvɨsalyɨ. Sarevɨdaa'nyɨ yɨlaaya naanga nebwina yɨvanɨgasaihɨlyɨ. Yɨlaaya daza' naange' tewaanaange' byaannake' warɨkesɨ. Sahɨrɨ' nemɨre maangejɨ yɨnɨga wi'na wɨjɨwakaade' mɨ'. (Aawa. Naangaangesɨ.) 9Sarɨmɨ Naangerɨ lɨmwanga yunevɨna dara yawɨ'mwaasaihɨlyɨ “Aayagaa' Gotɨyai nemɨre kuryaraavɨ yɨnahu nevadaihasamaaradelyɨra.” Sare'na yɨlaaya naanga daza' yɨvanɨgasaihɨlyɨ.
10Padaihasamaata saburɨne' Gotɨyarɨ wɨ'nawɨjɨwakyaasara pɨropetɨyara bɨrɨna bɨrɨna yeva yawɨyawɨta yaasasɨ. Sɨnnawɨ sahwara yaata sarɨmɨnyɨne yanga wɨgaimwanga naangevɨ yɨhɨzaaya'nevɨna nemɨnyɨna dɨnɨkesɨ. 11Sɨnnawɨ Kɨraazɨtɨyare Kuryai pɨropetɨyaraavɨ sɨmunyangɨ wɨlaraka yɨbwarɨdaakuna, Kɨraazɨtɨyarɨ daanga wɨvɨnya'nesɨ dɨvidaa'nyɨ byaanna dɨragɨnyajɨ maarya'nesɨ sɨnnawɨ jalɨkurakyaakelyɨ. Sahwara yawɨyawɨta “Gathɨngaa' yɨma'nadehaakaka?” Nabaai “Benɨnna yɨma'nadengaka dazagaa'?” 12Sahwaraavɨ Gotɨyai mena yɨbwarɨdaakuna “Bɨrama'mwaata daza sarɨmɨnyɨnenna mɨ'. Aawa. Dɨvidaa'nyaraavɨnengɨra.” Sara yɨbwarɨdaakuna wiada pɨropetɨyara sa wɨdeve dɨnɨkengɨ. Sa sarɨmɨnyɨnengɨra. Yagaala tewaanya' Kɨraazɨtɨyai Wɨdaasakera yɨhɨzɨwaakesara daza yɨhɨthe'. Gotɨyai Sɨgunyavɨdaa'nya Kurya Tewaanyarɨ maryasaabɨna kya' sahware dɨragɨnyavɨ yagaala tewaanya' wɨjɨwaakɨna yɨhye'. Nabaai tewaanya daza ejelɨyara kwarajɨ yawɨramaasavɨna wɨvu'najarera.
Gɨrɨkita'nanya maayaina nawɨ'nya mwalaadevwinesɨ.
13Gotɨyai yuya sa yakeburɨdaa'nyɨ sarɨnnya sɨmunyabwi nayaa yavada'gainapi nayaa dadɨvɨ' nayaa jemwaalyɨla! Jizaazai Kɨraazɨtɨyai ku'maayabanna yɨma'naabathevɨ sahwai yanga wɨgaimwangebwi naanga daza' yɨhɨzavaabathesɨ. Sarevɨ sarɨnnya sɨmunya yunebanna yawɨ'dɨvɨ' yuna jemwaalyɨla! 14“Nemɨ Gotɨyare kaimɨraayainera!” dapɨjɨ nayaa dɨmɨdɨnyɨla! Kɨgaa' sarɨmɨ yagaala tewaanyavɨna sɨmunya kuneihɨrɨ yɨhɨvu'nake'na kayaa'nanya yesaihɨlyɨ. Dahaa' sasare sabwi ayɨna namɨdɨbɨthɨka! 15Aawa. Nawɨ'nya dɨmwaalyɨla! Gotɨyai jaka mena yɨhɨzɨvwaramaarakei sahwai nawɨ'nyaangelyɨ. Gɨrɨkita'nanyai mɨka! Sahwai nawɨ'nyaangei mwaalɨkabaaibɨ' nawɨ'nya jide'na nawɨ'nyaihi jɨma'nyɨla! 16Sarevɨ Gotɨyare bukuya' dara dɨnɨkesɨ. Nɨmɨ gɨrɨkita'nanya maayainyɨ nawɨ'nyainyɨ. Sareburɨdaa'nyɨ nawɨ'nyaihi dɨmwaalyɨla! Sara dɨnɨke'nanyɨ.
17Sarɨmɨ Gotɨyarɨ wɨdadɨvɨkɨ “Nɨmwai.” Gotɨya dazai a'mwe naangeraavɨna tewaanyabwina marayawɨbwa'dei mɨ'. A'mwe maalɨkeraavɨna kayaa'nanyabwina marayawɨbwa'dei mɨ'. Gazaizai sara yade sabwina nayaa marayawɨbwa'delyɨ. Sarevɨdaa'nyɨ sarɨmɨ “Nɨmwai,” wɨdɨpɨja' “Naangelyɨ. Dɨragɨnaangelyɨ,” yawɨ'dɨvɨ' Sɨgunyavɨneihi kwaaka dathavakɨ angavaayaihi mwaaidɨvɨsagaa' nayaa yɨda'na jɨla! 18Kɨgaakuna Ne sɨnnawɨnyaraavɨrebwi yɨhɨzaaveta waryaanyabwina yesaihɨlyɨ. Sareihi yaasɨwa'na mwaaidɨvɨ' Gotɨyai yɨhɨmubaka kayaa'nanyaburɨ wɨla yɨhyaarakeihɨlyɨ. Sarɨmɨ mena yawɨ'manɨga' “Kayaaka yɨnade nɨgwia pɨnɨjɨ golɨya kɨnɨjɨ manemubyakengɨ. 19Aawa. Kɨraazɨtɨyare tawesɨ nemubamaarakesɨ. Tawe daza' mubya naangesɨ.” A'mwera kumɨre kayaa'nanyabwina Gotɨyarɨna sipɨzipɨya dɨwɨnya yɨwihwaarya saza muwarikerɨ tadɨvɨtabaaibɨ' Kɨraazɨtɨyai nawɨ'nyaangei gɨrɨka maayai nemɨnyɨne'na balakelyɨ. 20Gotɨyai Kwaakeva' mwakyagaa' wawɨnya daza' ya'nerɨ Kɨraazɨtɨyarɨ sɨnnawɨ dahɨlakyaakelyɨ. Sare' kɨrɨ' aaya'ne dahasa sarɨmɨnyɨne'na gaimwanga yɨhya'nei ku'maayabanna yɨma'naabakegaakɨra. 21Sahwai gamɨreihɨrɨ yɨhɨmwaihadaa'nyɨ sarɨmɨ Gotɨyarɨ lɨmwadɨvɨsaihɨlyɨ. Gotɨya sahwai Kɨraazɨtɨyarɨ baryarɨ yɨdɨkaavaka byaanna dɨragɨnya' wɨjaavakelyɨ. Kɨraazɨtɨyai yɨhɨmwaaihaka sarevɨdaa'nyɨ Gotɨyarɨ lɨmwadɨvɨ' Gotɨyarɨna yemwaaihasalyɨ.
22Sarɨmɨ yagaala nebula daza' mɨdɨdɨvɨsavɨ sarɨnnya kuryaraavɨ gɨrɨkita'nanya duimwagasɨ'nɨgasaihɨlyɨ. Sareihi sɨrya'mweraavɨna nebulya'na yɨma'nya'neihi sɨrya'mwe pwaihɨrɨ sɨmunya yuyangɨ dɨragɨnna yɨhɨvu'nana! 23Mudɨkeihi mena yɨma'nesa'na sara jɨla! Dɨvidaa'nyɨ kayaaka yɨnya'neyuraavɨdaa'nyɨ mudɨkeihi mima'nye'. Aawa. Yuyagaa' yuyagaa' kayaaka minyaderɨdaa'nyɨ mudɨkeihi yɨma'nesaihɨlyɨ. Gotɨyare yagaala yawɨralɨmwanna yeva mudɨkeihi yɨma'nesasɨ. Yagaala sa' gaalyabwi kɨnɨnnake' yuyagaa' warɨbainadesɨ. 24Dara dɨnɨke'nanyɨ
“A'mwe yuyara kurɨvaarɨyarera.
Kumɨre nɨgwɨlalaaka yuya kurɨvaarɨyangɨre pwasangɨra.
Kurɨvaarɨya sa yawaka baidengɨ.
Pwasa sa bwalaraawɨna yadengɨ.
25Kɨrɨ' Naangere yagaalya' baide' mɨ'.
Sa' yuyagaa' yuyagaa' warɨbainadesɨ.”
Yagaala sa' sara dɨnɨke'na “Yuyagaa' warɨbainadesɨ,” yawɨ'mwo. Yagaala daza' yɨhɨzɨwaakesa' yagaala tewaanya dazasɨ.
Currently Selected:
1 Pitai 1: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
