Jemɨzai 5

A'mwe gɨlyɨvɨkɨravɨnakeraavɨna dɨnɨkebwinesɨ.

1A'mwe gɨlyɨvɨkɨravɨnakeihi, dahaa' nayaa dɨnyu'nyɨla! Sarɨmɨnyɨna “Taanginya yuya yɨma'nɨma!” dada yɨhivanɨka sanna sarɨmɨ sɨmunya nayaa jawɨrila! Sarevɨ sarɨmɨ kɨnna dadɨvɨ' jakɨnna dɨthanganyɨla! 2Sarɨmɨre yuya gɨlyɨvɨkɨrayajɨ yɨwaala yuyajɨ mena bwia bu'nɨkengɨra. Nabaai yuya sarɨmɨre kwaabɨhannya yuya sa maa'nyaannyara mena dabu'dɨvɨsangɨ. 3Sarɨmɨre golɨyajɨ sɨlɨvaayajɨ mena napolɨka yɨnɨkengɨ. Napolɨka daza sarɨmɨre kayaa'na yadɨvɨsabwi sarɨmɨre nɨgwia nayaa mamaremwaalyadɨvɨsabwi ku'maayaba marima'naabathengɨ. Sara yojɨ napolɨka sa' sarɨmɨre kɨlaakejɨ' dɨke'bɨ' nadezɨkɨ. Sarɨmɨ gɨlyɨvɨsajɨ nɨgwiajɨ kwalaalya yɨ'bwarakɨpɨja' kɨrɨ' yɨrɨka aaya'negaa' yarai yɨma'nadehaakɨ. Gotɨyai a'mweraavɨ maryawɨbwaradehaakɨ. 4Kadɨka nayaa du'nyɨla! Wawɨnya yadɨvɨsara sarɨmɨre wawɨnyangɨ tɨka wapaaya yabwaryadɨvɨta sare'na sarɨmɨ sahwaraavɨ kwaasɨ wɨdadɨvɨ' kumɨre nɨgwia pɨnɨ kaanya tihɨremwaaidɨvɨsaihɨlyɨ. Nɨgwia sarɨmɨ kaanya tihɨremwaaidɨvɨta daza jaka naanga dangamanɨkengɨ. Nabaai Sɨgunyavɨya Kwalaalyaraavɨre Naangei jaka sa kadɨka mena wɨ'nɨvanɨkengɨ. 5Yuya sagaa' sarɨmɨ Kwaaka davakɨ mwaaidɨvɨ' gɨlyɨvɨta yuya nawɨ'nyanna nawɨ'nyanna maa'dɨvɨsa'na wabahɨlaaka naanga maa'dɨvɨ' yɨlaaya yadɨvɨ' mwaaidɨvɨsaihɨlyɨ. Sarɨmɨ bulɨmakaawoyara tɨka kwalaalya nadɨvɨ' sɨgunnakera yɨma'nadɨvɨsarabɨsaihi yɨma'nɨwaasaihɨlyɨ. Yɨ Gotɨyare Yɨrɨka sarɨ' sarɨmɨnyɨ tamakya ya'negaa' mena yɨma'nɨvanɨ'. 6Darevɨnyɨ. Sarɨmɨ a'mwe yɨda'maraanga kwarɨ kotɨya mena maryeva jɨdaveva mena tamakɨwaasaihɨlyɨ. Sare sa'na nabaai sarɨmɨnyɨ wanganakɨna yɨhyada mala sa'na tɨvɨkɨta mihivanɨ'. Sasareihi gɨlyɨvɨkɨravɨnakeihi Gotɨyai taanginya yɨhɨzaavade'na kɨnna dadɨvɨ' jakɨnna dɨthanganyɨla!

Taanginyagaa' kwaamu'nanyavɨ mwalaade'nesɨ.

7Nya'mweihi, sarevɨdaa'nyɨ sarɨmɨre sɨmunyaburɨ nayaa dɨragɨnya yɨvaimwadɨvɨ' yuya taanginya sangɨ dɨmaredaayɨla! Sara yapɨjɨ Naangei ayɨna bathegaa'na jemwaalyɨla! Yɨthaanyi, wawɨnyavɨ gyakwalaanga kwai tɨka munne tewaanya kima'nojɨna dada yemwaaidevaaibɨsaihɨlyɨ. Wawɨnyavɨya sai gamɨre sɨmunyaburɨ dɨragɨnya yɨvaimwada burɨkevɨnajɨ nyɨlyavɨnajɨ burɨka dɨviyavɨnajɨ yemwaaidelyɨ. Burɨka sawaai wawɨnya' yunebanna mena kyakɨlyɨ, sagaa' tɨka munne yabwaryadelyɨ. 8Nabaai sarɨmɨ kwaihɨlyɨ sɨmunyabwi dɨragɨnya yɨvaimwadɨvɨ' taanginya yuyangɨ dɨmaredaayɨla! Naangere ayɨna bathehaa' ayahɨba menanyɨra. Sare'na sarɨmɨre sɨmunya' dɨragɨnna nayaa warana! 9Nya'mweihi, sarɨmɨ sɨrya'mwe pwaraavɨna mayagaala madɨpɨnera! Bulayagaala madɨpɨnera! “Sare sa'na Yawɨbwasai kayaa'nanya nanyɨrɨvɨkɨradɨka!” dapi myɨpɨna! Yɨthaanyi! Yawɨbwata sai kaadihɨsavɨ mwasɨlaa daavɨkei yemwaaimanɨ'. 10Nya'mweihi, yɨkamaangera a'mwe pwaraavɨ kayaa'na wigaidaapi kɨrɨ' sahwara kumɨre sɨmunya' dɨragɨnya yɨvaimwadɨvɨ' taanginya daza maredaaveta ke'ba'nanyaraavɨna nayaa jawɨrila! Yɨ sahwara Gotɨyarɨ wɨ'neva pwaraavɨ wɨjɨwaakesara Naangerɨne yayavɨna wɨdesare. Sarɨmɨ sasare sabwi maarapɨjɨ nabaai sahɨrɨvɨ mɨdɨdɨvɨ' jamarideihɨlyɨ. 11Yɨthaanyi! Nemɨ dara dadaanyaine. A'mwera kumɨre sɨmunyangɨ dɨragɨnya yɨvaimwannadɨvɨ' taanginya maa'dɨvɨsara yɨlaaya yadɨvɨ' tewaanaanga yɨnɨkere. Sarɨmɨ Ne Jopɨ kɨgaakuna mwalyaakerɨna yagaaikɨwɨnya dɨnɨke kadɨka mena wɨ'nadɨvɨsaihɨlyɨ. Sai gamɨre sɨmunyarɨ dɨragɨnya yɨvaimwada gamɨnyɨ taanginya yuya sa wima'nakelyɨ. Nabaai dɨvidaa'nyɨ aayagaa' Naangei sahwarɨ tewaanyabwina wiakelyɨ. Sara yawɨrangamanɨga'. Sahwarɨ sara wiake'na nemɨ dara yawɨ'manɨgo. Naangei nemɨnyɨna kale naanga wiada nabaai yuyagaa' kale'na gaimwanga neyadelyɨ.

12Kɨrɨ' nɨmɨre nya'mweihi, aaya mudɨ'nanya sarɨmɨ jide darengɨ. Sarɨmɨ Sɨgunyavɨne yayasɨ Kwaakevakɨne yayasɨ pɨnɨngɨne yayajɨ dadɨvɨ' nebwina yagaala dɨragɨnya' yɨma'nya'ne' madɨpɨnera! Yɨ sarɨmɨ dɨna “Yayo,” nabaai “Yayo daaza sa' wi'nanyɨ.” Yɨ sarɨmɨ dɨna “Aawa,” nabaai “Aawana daaza sa' wi'nanyɨ.” Sarɨmɨ “Nebwina yagaala dɨragɨnya' yɨma'nya'ne' yaasɨwa'na mudɨwɨna! Gotɨyai nanyɨjɨdavadɨka!” dapi sara madɨpɨna!

Gotɨyarɨ lɨmwaga'daa sahwarɨ wɨdadaanya'nesɨ.

13Sarɨmɨnyɨdaa'nyɨ sɨrya'mwe pwai kwai taanginya' kɨnɨnnakei dahamwaalɨka? Sai Gotɨyarɨ nayaa wɨdana! Sɨrya'mwe pwai kware sɨmunya' yɨlaaya dahayɨvanɨka? Sare'na sai Gotɨyarɨ yɨledaasa' dana! 14Nabaai sarɨmɨnyɨdaa'nyɨ sɨrya'mwe pwai nabalɨnakei dahamwaalɨka? Sare sai Naangere kusɨlaanyavɨyaraavɨre naangeraavɨ jaka wɨdathelyɨ. Naangerɨne yayavɨ gamɨre kɨlaakejɨkɨ welivananya' purapɨjɨ gamɨnyaba sahwarɨ tewaanya yavada'galade'na Gotɨyarɨ wɨdɨpɨka! 15Nabaai sahwarɨna Gotɨyarɨ dɨragɨnna lɨmwadɨvɨ' yɨdaangabɨza' Naangei nalaavɨnakerɨ tewaanna wiada ayɨna yɨdɨkaavadelyɨ. Nabaai sai kayaa'nanya pɨnɨ yajanna Naangei kayaa'nanya yuya daza duimwagasɨ'nadelyɨ. 16Sarevɨdaa'nyɨ sarɨmɨ sɨrya'mweraavɨ sarɨnnya kayaa'nanyanna dɨzalɨkurakyɨla! Sara yadɨvɨ' sarɨmɨ sɨrya'mweraavɨ nayaa yavada'galade'na Gotɨyarɨ nayaa jɨthaanganyɨla! A'mwe yɨda'maraangeraavɨre Naangerɨ yɨdaanganyabwi sa' dɨragɨnya yɨma'naabathesɨ. Yɨ sa' a'mwerɨ yɨnɨga wi'na gaimwagathesɨ. 17Yɨlaajai Gotɨyare wɨ'nawɨjɨwaakakei sai a'mwe nemɨbɨ' avaainanyalyɨ. Sai Gotɨyarɨ dɨragɨnna kidaangana' “Burɨke' nalaabathɨka!” daka sagaa' Kwaakevakɨ kwarame dawaai da' yaka lawe ata purɨdaa'nyɨ pu'na burɨke' mwalaabyakesɨ. 18Nabaai sai ayɨna kidaangana' sagaa' sɨgunya' burɨkevɨ maryasaabɨna kya' yɨthaanyi, sagaa' Kwaakevakɨ tɨka munne ayɨna warɨna.

19Nɨnnya nya'mweihi, sarɨmɨnyɨdaa'nyɨ a'mwe pwai kwai Gotɨyare yagaala nebulya' yagalya'mavojɨ gya'mwei pwai kwai wɨdozɨ ayɨna makabozɨ 20nabaai neya'mwe dazai dara yawɨradelyɨ. A'mwe pwai a'mwe kayaa'nanyabwi yaderɨ gaimwagozɨ sarevɨ a'mwe kayaa'nanya yadei tuta kayaa'nanya' yagalya'mavojɨ Gotɨyaryawɨnna ayɨna kabozɨ sarevɨ a'mwe dazai gannya kuryai ayɨna maaradelyɨ. Gamɨre kuryai kayaaka yuyagaa'na yɨnadei mɨ'. Sasare dazaburɨ Gotɨyai kayaa'nanya kwalaalya marasɨ'nadelyɨ.

Jemɨzai

Currently Selected:

Jemɨzai 5: byr

Highlight

Copy

Compare