1 Jonɨ 4

Gotɨyare Kuryarɨnajɨ yɨmakei kwaasɨ wɨdaderɨnajɨya'nesɨ.

1Nyɨvu'nadeihi, a'mwe kwalaalyara kwaasɨ dadɨvɨ' “Gotɨyare Kuryai sɨmunyavɨ nyɨdada yɨhɨzɨwaakɨvanɨgeinyɨ.” Sara dadɨvɨ' Kwaakevakɨ walyuna yadɨvɨ' yaasɨwa'na kwaasɨ wɨjɨwakamarivanɨgasavɨdaa'nyɨ yuyara “Kuryai kɨnɨnnakeinyɨ,” yɨhɨthadɨvɨsaraavɨ yaasɨwa'na malɨmwabɨna! Aawa. “Gotɨyai gannya Kuryarɨ wɨjaavakei dɨngaka? Kuryarɨ mujaayakei dɨngaka?” dapɨjɨ kumɨre kurya sahwaraavɨ yaamɨjɨ jawɨbwarila! 2Yawɨbwata sare' daresɨ. “Gotɨyare Kuryai kɨnɨnnakei daaka?” dapɨjɨ dara jawɨranganyide. “Jizaazai Kɨraazɨtɨyai kɨlaa'nakei yɨma'naabakelyɨ,” jalɨkurakadei yɨ sahwai Gotɨyare Kuryai kɨnɨnnakelyɨ. 3Gazaizai Jizaazai kɨlaa'nakerɨna sara majalɨkurakivanɨkei Gotɨyare Kuryai kɨnɨnnakei mɨ'. Sahwai yɨmakei kɨnɨnnakelyɨ. Kɨraazɨtɨyarɨne Yɨkamaangerelyɨ. Mi'na dara wɨ'nadɨvɨ' “Kɨraazɨtɨyarɨne Yɨkamaangei yɨma'naabathelyɨ.” Dahaa' yɨmakei kɨnɨnnakera kwaasɨ wɨjɨwaakadɨvɨtara mena mwaaleva Kɨraazɨtɨyarɨ Yɨkamaangere sɨmunya yawɨ'dɨvɨsare.

4Nɨmɨre kaimɨraaya maalɨkeihi, sarɨmɨ Gotɨyareihɨlyɨ. Kwaasɨ wɨjɨwaakadɨvɨta sahwaraavɨ sarɨmɨ mena dathɨwamwaava. Kuryai wɨlayɨhɨmwaalɨka dazai a'mwe Kwaakevakɨyabwineraavɨ Kayaa'nanyai wɨlamwaalɨkerɨ wavɨlavɨkelyɨ. Sare'na wavɨlavɨkere dɨragɨnya' maareva mena dathɨwamwaava. 5Kwaasɨ wɨjɨwaakadɨvɨta sahwara Kwaaka dazavakɨyabwineraavɨrerera. Sarevɨ kumɨre yagaalya' yune Kwaaka savakɨyabwinesɨ. A'mwe Kwaaka savakɨyabwinera yagaala sa' kadɨka wɨ'nadɨvɨsare. 6Nemɨ Gotɨyareinera. Gotɨyarɨ yawɨrangadei dazai kadɨka newɨ'nadelyɨ. Gotɨyarei mamwaalyɨkei kadɨka newɨ'nadei mɨ'. Sarevɨdaa'nyɨ dare' yawɨ'daanyɨ “Newɨ'nadei sahwai Nebulya'ne Kuryai kɨnɨnnakelyɨ. Manewɨ'nyadei sahwai Kwaasɨ Dadei Kayaa'nanyai kɨnɨnnakelyɨ.”

Gotɨyai nemɨnyɨna kale naanga wiadevwinesɨ.

7Nyɨvu'nadeihi, kale wia'nebwi Gotɨyarɨdaa'nya'na nemɨnyɨ pwaraavɨna kale neyana! Gazaizai gya'mweraavɨna kale wiadei sai Gotɨyarei mwaalɨkelyɨ. Gotɨyarɨ nebulyava'na yawɨrangadelyɨ. 8Kale mwia'nei Gotɨyarɨ myawɨranganyɨkelyɨ. Gotɨyai, kale wia'neburɨ aaya kaavɨlyalyɨ. Sare'na sai Gotɨyarɨ myawɨranganyɨkelyɨ. 9Gotɨyai yawɨ'na “Nyɨbwaalɨkɨna a'mwera gaalyabwina mwaaibɨka!” daka gannya Gawaalɨvaangei gave pwainanyarɨ Kwaakevakɨna maryasaabɨna yakelyɨ. Sarevɨ dare' yawɨ'daanyɨ “Ai, Gotɨyai nemɨnyɨna kale naanga wike' ku'maayabanna yɨma'naabakesɨ.” 10Kale naanga wia'nebwi da'darebwinanyɨ. Nemɨnyɨ Gotɨyarɨna tewaanya nevu'nadevwi mɨ'. Aawa. Sahwai nemɨnyɨna kale naanga kwia' nemɨre kayaa'nanyanna Gawaalɨ' Gotɨyarɨ sɨnna tɨka wɨda'devwi mubamarasɨ'nya'nei balya'nerɨ maryasaabakebulyɨ. 11Nyɨvu'nadeihi, Gotɨyai nemɨnyɨna kale naanga sara wiakevɨdaa'nyɨ nabaai saina neya'mweraavɨna pwai pwarɨna kale neyanneine. 12Gotɨyarɨ tɨnna wangadei a'mwei aane pwai kwai mɨ'. Sare' kɨrɨ' saina neya'mweraavɨna pwai pwarɨna kale neyajainaavɨ Gotɨyai kuna wɨlanemwaalɨkelyɨ. Nemɨre sɨmunyavɨ yunebanna gamɨre kale naanga wia'nebwi naanga yune nebulya'nanyabwi wɨlanewa'devulyɨ.

13Gannya Kuryarɨ nejaavɨke'na dare' yawɨ'daanyɨ “Sahwarɨ kuna wɨlamwaaiho. Nemɨnyɨ kuna wɨlanemwaalɨ'.” Yɨ sasarevɨnyɨ. 14Nemɨ sahwaina tɨnna wanganɨbainona jalɨkurakɨvanɨgo. Nɨmwai Gawaalɨvaangerɨ maryasaabakelyɨ Kwaakevakɨyaraavɨne padaihasamaa'derɨ. 15Gazaizai jalɨkurakɨna “Jizaazai Gotɨyare Gawaalɨvaangelyɨ,” yɨ sara jalɨkurakɨna yajarɨ Gotɨyai kuna wɨlamwaalɨ'. Nabaai Gotɨyarɨ sahwai kuna wɨlamwaalɨ'. 16Sare'na yawɨralɨmwadaanyɨ “Gotɨyai kale naanga nemɨnyɨna dɨragɨnna wiadelyɨ.”

Gotɨyai kale wia'neburɨ aaya kaavɨlyalyɨ. Kale wia'neburɨ wɨlamwaalɨkei Gotɨyarɨ wɨlamwaalɨkelyɨ. Nabaai sahwarɨ Gotɨyai wɨlamwaalɨkelyɨ. 17Nemɨnyɨna “Wɨrɨvɨkɨrya'ne naangegaa' yɨrɨka sarɨkɨ kumɨ lɨka myadɨvɨ' dɨragɨnna daapɨka!” daka nemɨre sɨmunyavɨ yunebanna Gotɨyare kale naanga wia'nebwi naanga yune nebulya'na wɨlanewa'de'nanyɨ. Kɨraazɨtɨyai Gotɨyarɨ wɨlamwaalɨkabaaibɨ' Kwaaka davakɨ Gotɨyarɨ wɨlamwaaiho'na lɨka myadaa dɨragɨnna davaadeinera. 18Gotɨyarɨ kale wia'neburɨ lɨka myadaanyɨ. Aawa. Kale mena wia'nebwi nemɨre sɨmunyavɨ naanga yune nebulya'na wɨlanewa'de' lɨka ya saburɨ marasɨ'desɨ. Lɨka ya'ne kaavɨlya' daresɨ. Nɨmɨre kayaa'nanyanna nyɨrɨvɨkɨrade'na lɨka yɨwana! Sarei lɨka yadere sɨmunyavɨ yunebanna Gotɨyare kale naanga wia'nebwi naanga yune nebulya'na mularyade'nanyɨ.

19Sɨnnawɨ Gotɨyai nemɨnyɨna kale naanga wike'na nemɨ tewaanya nevu'nadeine. 20A'mwe pwai kwai wɨdɨna “Gotɨyarɨna tewaanya nyɨvu'nadeinyɨ,” dazai nabaai gya'mwerɨna sɨmɨlɨka wimwaalɨkei kwaasɨ yagaala dadelyɨ. Sare' dare'nesɨ. Sahwai gya'mwerɨ tɨnna wangaderɨna kale mwivanɨkei Gotɨyarɨ tɨnna mwanganyaderɨna tewaanya gara wɨvu'nannelaka! 21Kɨwɨnya dɨnɨka da' Kɨraazɨtɨyai dare' neda' “Gotɨyarɨna tewaanya wɨvu'nadei gya'mwe kwarɨnajɨ kale wiana!”

Currently Selected:

1 Jonɨ 4: byr

Highlight

Copy

Compare