1 Jonɨ 3

Gotɨyare kaimɨraayainaavɨnesɨ.

1Yɨthaanyi! Nɨmwai nemɨnyɨne kale naanga wiwakelyɨ. “ ‘Nɨmɨre kaimɨraayara,’ dɨma!” daka Kɨraazɨtɨyarɨ lɨmwadaanyainaavɨna kale naanga wideine. “Gotɨyainyɨre kaimɨraayarera,” dake' nebulyasɨ. Gamɨre kaimɨraayainera. A'mwe Kwaakevakɨyabwinera Kɨraazɨtɨyarɨna myawɨryesavɨna “Gamɨre kaimɨraayarera,” maneyawɨrivanɨga'. 2Nyɨvu'nadeihi, dahaa' nemɨ Gotɨyare kaimɨraayaine. Dɨvi nemɨ bewarabɨsaina yɨma'nabaatheinaavaka? Sa' myawɨranganyaine. Kɨrɨ' nemɨ dara yawɨ'manɨgo. Dɨvi sagaa' Kɨraazɨtɨyai ku'maayabanna yɨma'naabathehaa' gamɨ sahwaibɨ' yɨma'naadeine. Sagaa' dara wanganaadesɨ. Ai, Kɨraazɨtɨyai sasarei daaka! Sara Kɨraazɨtɨyarɨ nayaa yawɨranganawaajɨya'na sahwaibɨ' yɨma'naadeine. 3Nabaai sai tewaanyai gɨrɨkita'nanya maayai mwaalɨkabaaibɨ' a'mwe gazaizai sahwarɨna sara yemwaalɨkei Kɨraazɨtɨyarɨna tewaanyai yɨma'nɨvanɨkelyɨ.

4Gazaizai kayaa'nanyabwi yadei, Gotɨyare kɨwɨnya dɨnɨke' galazekɨvaidelyɨ. Kayaa'nanya sabwi kɨwɨnya dɨnɨke' galazekɨvalyabulyɨ. 5Nemɨ yawɨ'manɨgo. “Sai kayaa'nanyabwi makwawana!” kada' sahwarɨ wɨjɨwaainakelyɨ. Sahwarɨ kayaa'nanyabwi yuna muwarikelyɨ. 6Sarevɨdaa'nyɨ sahwarɨ gazaizai wɨlamwaaidei kayaa'nanya sabwi yadei mɨ'. Gazaizai kayaa'nanyabwi yadei sahwarɨ yawɨranganna yɨkei mɨ'. Sarɨna sɨmunnakei mɨ'. 7Nɨmɨre kaimɨraaya maalɨkeihi, aane pwai kwai sarɨmɨre sɨmunyangɨ kwaasɨ nabayɨhɨthathɨka! Mala nayaa jɨwannyɨla! Yɨda'maraangebwina yadei sai yɨda'maraangelyɨ. Sahwai yɨda'maraangei mwaalɨkabaaibɨ' sai yɨda'maraangelyɨ. 8Kayaa'nanyabwina yadei Kotɨya Maryaderelyɨ. Sɨnnawɨ kɨgaakuna Kotɨya Maryadei kayaa'nanyabwi yɨke'na Saataanɨmɨrebwina kayaa'nanyabwi avaaina yadei Saataanɨmɨrelyɨ. “Kotɨya Maryadei Saataanɨ kayaa'nanya yadengɨ kayaaka yɨgalasɨ'nɨma!” daka Gotɨyare Gawaalɨvaangei ku'maayabanna walaabakelyɨ. 9Gazaizai Gotɨyarei yɨma'najai kayaa'nanyabwina yadei mɨ'. Gamɨre sɨmunyavɨ Gotɨyare mwaalyabwi wɨlamwaalɨke'na sahwai kayaa'nanyabwina yadei mɨ'. Gotɨyarei mwaalɨke'na sahwai kayaa'nanyabwina kuna yannei mɨ'. 10Nabaai yawɨranganaaja' “Gotɨyarei aaihwai dɨngaka? Kotɨya Maryaderei aaihwai dɨngaka?” nemɨ dara yawɨraade'nanyɨ “Gazaizai yɨda'maraangebwi mi yajai sai Gotɨyarei mɨ'. Nabaai gya'mwerɨna tewaanya kale mwiadei sai kwai Gotɨyarei mɨka!”

Neya'mweraavɨna kale yabwinesɨ.

11Sɨnnawɨ aayawɨdaa'nyɨ sarɨmɨ yagaalya' kadɨka dara wɨ'nesa'nanyɨ “Neya'mweraavɨna tewaanya kale neyadeine. 12Kenɨbɨ' mamwalaannera!” Sai Kayaa'nanyarei mwaalaka gannya gahwaalaangerɨ tamakyaakelyɨ. Be'na tamakyaakalaka? Sarei kayaa'nanya' yadaa'nyɨ gahwaalaangei yɨda'maraange' yaake'na sɨmɨlɨka wimwaaina kyaa' tamakyaake'nanyɨ. 13Nya'mweihi, sarevɨdaa'nyɨ sarɨmɨ yɨda'maraangebwi yɨvanɨgasa'na Kenɨbɨtara a'mwe Kwaakevakɨyabwinera sarɨmɨnyɨna sɨmɨlɨka wimwaalɨke'na atɨka mamaru'napɨna!

14Nemɨ yawɨ'manɨgo. Neya'mweraavɨna kale neyɨvanɨke'na dara yawɨ'manɨgo. Dɨkevɨ marasɨ'nya'ne sabwi mena baryabwi yagalya'ma'mwona. Sara yona gaala saburɨ mena wɨlamwaaiho. Kale mwivanɨkei Dɨkevɨ marasɨ'nya'neburɨ barya saburɨ kuna wɨlamwaalɨ'. 15Gazaizai gya'mwerɨna sɨmɨlɨka widei sahwai a'mweraavɨ tamakadelyɨ. Nabaai sarɨmɨ yawɨ'manɨga' “A'mwei pwaraavɨ tamakadei gamɨre sɨmunyavɨ yuyagaa' yuyagaa'ne gaalyabwi wɨwa'dei mɨ'.” 16Kale wia'nevɨne kaavɨlya' yawɨ'mwo daresɨ. Sai gannya mwaalyabwi yagalya'mavakelyɨ nemɨnyɨneba. Sarevɨ nemɨnyɨna kale wia'nebwina yawɨ'manɨgo. Nabaai sarevɨ nemɨ kwainajɨ neya'mweraavɨneba nennya mwaalyabwi yagalya'mavaanneinera. 17Sare' kɨrɨ' pwai Kwaaka davakɨya mwaalya'ne kɨnɨnnakei mwaalajai nabaai gya'mwerɨ wɨmudasadaawori tɨnna wanganna yojɨ kɨrɨ' gya'mwerɨna sɨmunya' tihɨ'na yojɨ sahware sɨmunyavɨ Gotɨyarɨne kale wia'ne' gara wɨwarɨka! 18Nɨmɨre kaimɨraaya maalɨkeihi, kale wia'ne'na neya'mweraavɨ yune yagaalyanna nudaathɨka! Yune maangi'na nudaathɨka! Aawa. Nemɨnyɨ kale neyadaawori sahwaraavɨ tewaanna yadaa wɨgaimwagaana! Nebwina wɨgaimwagaana! Wɨmudaasɨvanɨke duzaayɨla!

Kɨraazɨtɨyarɨ lɨmwadɨvɨsara Gotɨyarɨna lɨka myadɨvɨsaraavɨnesɨ.

19Sareina kale wia'neina sasare saburɨ yawɨraade “Nebulyavɨdaa'nyainyɨ. Gotɨyaryaba nɨmɨre sɨmunya' kavena waradeinyɨ. Nɨmɨre kayaa'nanyanna myawɨrivanɨgeinyɨ.” 20Sa' dare'nanyɨ. Nemɨre kayaa'nanya mena marasɨ'nyagaa' nemɨre sɨmunyangɨ “Nɨmɨ kuna kayaa'nanyainyɨ,” yarai kwaasɨ yawɨraajahaa' Gotɨyai yuyangɨna yawɨrangadei nemɨre sɨmunya wavɨlawakadei yawɨ'na “Gɨmɨre kayaa'nanya sa' mi'na marasɨ'neneinyɨ.” “Marasɨ'neneinyɨ,” sara yawɨ'na yade'na nemɨre kayaa'nanyanna myawɨraanneine. Nemɨre sɨmunya kavena waradesɨ. Nabaai sara yawɨ'de'na “Nebulyavɨdaa'nyaine,” yawɨraadeine. 21Nyɨvu'nadeihi, sarevɨdaa'nyɨ nemɨre sɨmunya kayaa'nanya sanna myawɨri yaaja' Gotɨyarɨna dɨragɨnna da'daanyɨ. 22Nabaai gamɨre kɨwɨnya dɨnɨke kuna mɨdɨdaa yɨlaaya wɨvu'nadenna yadaanya'na yuya pɨnɨnna yɨdanganaaja' sahwai wɨjaavɨna neyadelyɨ. 23Gamɨre kɨwɨnya dɨnɨke' daresɨ. Nyɨbwaalɨvaangei Jizaazai Kɨraazɨtɨyarɨ lɨmwabɨzaihɨlyɨ. Kɨraazɨtɨyai sara yɨhɨthakabaaibɨ' “Sarɨmɨnyɨ pwara pwaraavɨna kale yɨhyana!” sara jɨla! 24Nabaai gamɨre kɨwɨnya dɨnɨke mɨdɨmanɨkei Gotɨyarɨ kuna wɨlawɨmwaaidelyɨ. Nabaai Gotɨyai a'mwe sahwarɨ kuna wɨlawɨmwaaidelyɨ. Gotɨyai gannya Kuryai nejaavake'na Kuryai neyɨbwarɨdaakwada da'na yawɨ'daanyɨ “Gotɨyai wɨlanemwaalɨkelyɨ.”

Currently Selected:

1 Jonɨ 3: byr

Highlight

Copy

Compare