1 Jonɨ 2

1Nɨmɨre kaimɨraaya maalɨkeihi, yagaala daza' pɨkarya yɨhithawasɨvanaabɨhe. Sarɨmɨ kayaa'nanya mipɨne'na “Wɨjɨwaakɨma!” dena yɨhithawasɨvanaabɨhe. Sare' kɨrɨ' a'mwe pwai kwai kayaa'nanya' yaja' nemɨnyɨne kayaa'nanyanna Nɨmwarɨ marewɨdadei mwaalɨ'. Sahwai Jizaazai Kɨraazɨtɨyai yɨda'maraangelyɨ. 2Sarei nemɨre kayaa'nanyanna Gotɨyarɨ sɨnna tɨka wɨda'devwi mubamarasɨ'nya'nei balakelyɨ. Nemɨrenna gavenna mɨ'. Aawa. Kwaaka yuya davakɨyaraavɨne kayaa'nanyannanyɨra.

Gotɨyai nemɨnyɨna dɨnɨkejɨ kale wia'nebulyɨ mɨdɨnya'nesɨ.

3Naangere kɨwɨnyanna mɨdɨnaaja da'na nebulya'na nayaa dara yawɨ'daanyɨ “Kɨraazɨtɨyarɨ nayaa yawɨ'manɨgo. Sahwareinera.” 4Nabaai pwai dɨna “Nɨmɨ Kɨraazɨtɨyarɨ nayaa yawɨ'dɨnyainyɨ.” Dɨna yaja' kɨrɨ' Kɨraazɨtɨyare kɨwɨnyanna mamɨdɨnya dazai Kɨraazɨtɨyarɨna kwaasɨ yagaala dadelyɨ. Gotɨyare nebulya' gamɨre sɨmunyavɨ wɨlawa'de' mɨ'. 5-6Aawa. A'mwe gazaizai gamɨre yagaalya' mɨdɨdere sɨmunyavɨ yunebanna Gotɨyare yɨlaaya wia'nebwi wɨlawa'devulyɨ. A'mwe pwai dɨna “Nɨmɨ Kɨraazɨtɨyarɨ wɨlamwaaihe.” Dɨna yadei nabaai sahwai mwaalakabaaibɨ' sara mwaalana! Sara yade darevɨ nebulya'na nayaa dara yawɨ'daanyɨ “Kɨraazɨtɨyarɨ wɨlamwaalɨ'.”

7Nyɨvu'nadeihi, kɨwɨnya mudɨke' pɨkarya yɨhithawasɨvanaabɨhe' mɨ'. Aawa. Kɨwɨnya aya' sɨnnawɨ sagaa' dɨnɨke' sarɨmɨ maaresasɨ. Naangerɨ lɨmwagesagaa' yagaala daza' mena kadɨka wɨ'nesasɨ. 8Kɨrɨ' kɨwɨnya sa' mudɨke' pɨkarya yɨhithawasɨvanaabɨhesɨ. Sabwina Kɨraazɨtɨyai mwaalya tewaanyabulyɨ sarɨmɨ mwaalya tewaanyabulyɨ yawɨrangadaa dara dadaanyɨ “Kɨwɨnya sa' nebulyasɨ.” Nabaai dara dadaanyɨ “Yɨthaanyi, Kɨraazɨtɨyare baaka nebulya' mena wannadaa'nyɨ jɨhɨnya' yɨmaanɨvanɨ'.”

9Pwai “Nɨmɨ baakevɨ mwaaiheinyɨ,” dɨna yada kɨrɨ' gannya gya'mwerɨna sɨnna tɨka wɨda'daa'nyɨ yɨ a'mwe dazai jɨhɨnyavɨ kuna mwaalɨkegaa'nanyɨ. 10Pwai gannya gya'mwerɨna kale wiadei dazai baakevɨ mwaaidelyɨ. Sahwai tewaanna yada baakevɨ pwai midɨhwakɨ'nariwakabaaibɨ' kayaa'nanya myada kayaaka migalyadelyɨ. 11Aawa. Gannya gya'mwerɨna sɨnna tɨka wɨda'dei jɨhɨnyavɨ mwaaida jɨhɨnyavɨ yamaryadelyɨ. Jɨhɨnya' gamɨre tɨnnyaraarɨ mena wɨjɨnnamaaraja'na tusavɨna yɨraataatakaanya wodelyɨ.

12Nɨmɨre kaimɨraaya maalɨkeihi, Kɨraazɨtɨyarɨna (gamɨre yayavɨna) Gotɨyai sarɨmɨre kayaa'nanya mena marasɨ'nake'na yagaala da' pɨkarya yɨhithawasɨvanaabɨhe'nanyɨ. 13Nɨmwaravaavihi, sɨnnawɨ kɨgaakuna aayawɨdaa'nyɨ Naangei mwaaida kuna mwaalɨkerɨ nayaa yawɨrangamwaasa'na yagaala da' yɨhithawasɨvanaabɨhe. Mɨgɨnyaihi, Kayaa'nanaangei Saataanɨmɨ mena dathɨwamwaasa'na yagaala da' yɨhithawasɨvanaabɨhe.

14Kaimɨraayamɨlɨki, Nɨmwarɨ nayaa yawɨrangamwaasa'na yagaala da' yɨhithawasɨwaabe. Nɨmwaravaavihi, sɨnnawɨ kɨgaakuna aayawɨdaa'nyɨ mwaaida kuna mwaalɨkerɨ nayaa yawɨrangamwaasa'na yagaala da' yɨhithawasɨwaabe. Mɨgɨnyaihi, dɨragɨnyaihi mwaaidɨvɨ' Gotɨyare yagaalya' sarɨmɨre sɨmunyavɨ yuna wɨlayɨhɨmwaaidɨ'nyɨ Kayaa'nanaangerɨ mena dathɨwamwaasanna yagaala da' yɨhithawasɨwaabe.

15Kwaakevakɨya sabwina mihɨvu'nannera! Nabaai Kwaakevakɨya sanna mihɨvu'nannera! A'mwe pwai kwai Kwaakevakɨya sabwina wɨvu'najai gannya sɨmunyavɨ Nɨmwarɨna nayaa wɨvu'nya'ne' mularikelyɨ. 16Kwaakevakɨya yuyanna, kɨlaakevɨne dɨka widadevulyɨ a'mwera tɨnna wangadɨvɨsanna “Maa'mujainyɨ,” yawɨ'dɨvɨsasɨ kunnya yaya munyaba makinadɨvɨtara “Gɨlyɨvɨsanna nɨmeinyɨra,” yawɨ'dɨvɨsasɨ yuya sazanna Gotɨyaryabadaa'nya mɨ'. Aawa. Kwaakevakɨya saburɨdaa'nyangɨra. 17Kwaakevakɨya sabwi mena yɨmaanyɨna yɨvanɨkebulyɨ. Dɨka widade sabulyɨ mena yɨmaanyɨna yɨvanɨkebulyɨ. Kɨrɨ' Gotɨyare sɨmunyabwi mɨdɨnajai yuyagaa' yuyagaa' mwaalagothelyɨ.

Kɨraazɨtɨyarɨ Yɨkamaangerɨnesɨ.

18Kaimɨraayaihi aayagaa'ne' aya kɨba warɨkegaakɨ. Kɨgaa' dara wɨ'nesaihɨlyɨ “Kɨraazɨtɨyarɨne Yɨkamaangei yɨma'naabathelyɨ.” Sara wɨ'netabaaibɨ' dahaa' Kɨraazɨtɨyarɨne yɨkamaanga kwalaalyara mena yɨma'nɨwaa'. Sarevɨdaa'nyɨ yawɨ'mwo “Aayagaa' aya kɨba yɨma'nɨwakegaakɨ.” 19Yɨkamaanga sahwara mena neyagalya'ma'mwaa'. Sarera nemɨrera mɨka! Sare' dare'nesɨ. Nemɨrera nebwina mwaaibɨzɨ kwajɨ nemɨjɨ kuna ye'mwannemwaaina kipɨdɨka! Kɨrɨ' Gotɨyai nemɨnyɨna “ ‘A'mwe yuya dazara nemɨrera mɨ',’ yawɨpɨka!” kada' mena neyagalya'ma'mwaa'. 20Sarɨmɨ yɨkamaangerabɨsaihi mɨ'. Saihɨre sɨmunyangɨ Gotɨyare Kuryai wɨlayɨhɨmwaalɨke'na yuyaihi nebulya' sɨmunnakeihɨlyɨ. 21Sare' sarɨmɨ nebulya' myawɨrivanɨgasa'na pɨkarya da' midayɨwa. Aawa. Saihi nebulya' yawɨ'dɨvɨsa'na yɨda'mwa. Nabaai “Kwaasɨ yagaalya' nebulyavɨdaa'nya' mɨka!” yawɨ'dɨvɨsa'na yɨda'mwa.

22A'mwe kwaasɨ yagaala dadei aaihwalaka? A'mwe dazai yɨ, dara dadelyɨ “Jizaazarɨ Gotɨyai dahɨlakaka maryasaabakei mɨka! Kɨraazɨtɨyai mɨka!” Yɨ dazai kwaasɨ yagaala dadelyɨ. Sara dade'na Kɨraazɨtɨyarɨne yɨkamaangelyɨ. Sara dadei Nɨmwarɨnajɨ Gawaalɨkɨnajɨ “Aala!” yawɨ'delyɨ. 23Gazaizai Gawaalɨkɨna “Aala!” yawɨrajai Nɨmwai kwarɨnajɨ “Aala!” yawɨ'delyɨ. Nɨmwalyɨyai mɨka! Pwai a'mweraayaba Gawaalɨkɨna “Gotɨyai dahɨlakaka maryasaabakelyɨ. Kɨraazɨtɨyalyɨra,” dazai Nɨmwalyɨ Gawaalɨsɨ saraalyɨyalyɨra.

24Saihi yagaala sɨnnawɨ sagaa' kadɨka wɨ'neve daza sarɨmɨre sɨmunyangɨ kuna wɨlayɨhwarana! Sɨnnawɨ kadɨka wɨ'neve daza sarɨmɨre sɨmunyangɨ kuna wɨlayɨhwaraja sarevɨdaa'nyɨ Gawaalɨkɨjɨ Nɨmwarɨjɨ kuna dulawɨmwaalyideihɨlyɨra. 25Nabaai dare' Kɨraazɨtɨyai yagaala yune naanga nebulya'na dara neda' “Yuyagaa' yuyagaa'ne gaalyabwi yɨhɨzaavɨdeihɨlyɨ.” 26Kwaasɨ yɨhɨthɨpɨjaraavɨna pɨkarya daza yɨda'mwengɨ. 27Sarɨmɨre sɨmunyangɨ Kɨraazɨtɨyai gannya Kurya Tewaanyarɨ kulayɨhɨmwaaiha' kuna wɨlayɨhɨmwaalɨ'. A'mwe pwara mihiwɨrivanɨga'. Myɨhɨgainyadeihɨlyɨ. Aawa. Sarɨmɨre sɨmunyangɨ Kurya Tewaanyai wɨlayɨhɨmwaalɨkei yuyanna yɨhiwɨrivanɨ'. Kurya dazahwai yɨhiwɨrivanɨke' nebulyasɨ. Kwaasɨ yagaalya' mɨ'. Kuryai wɨlayɨhɨmwaalɨkei yɨhiwɨryakabaaibɨ' Kɨraazɨtɨyarɨ kuna dulamwaalyɨla! Sarevɨdaa'nyɨ sara jɨla!

28Sarevɨ kaimɨraaya maalɨkeihi kuna dulamwaalyɨla! Sahwai Sɨgunyavɨdaa'nyɨ ku'maayabanna yɨma'naabathehaa' “Gamɨnyaba dɨragɨnna davaana!” dapi Kɨraazɨtɨyarɨ kuna dulamwaalyɨla! Yɨ'mavaabathevɨ gamɨnyɨna lɨka myadaa wagɨla mamaryadaa magwamwannaanne'na sahwarɨ kuna dulamwaalyɨla! 29“Sahwai yɨda'maraangelyɨ,” yawɨ'dɨvɨsavɨdaa'nyɨ “Gazaizai yɨda'maraangebwina yajai Gotɨyare kaimɨraayai mwaalɨkelyɨ,” yawɨrangabɨneihɨlyɨra.

Currently Selected:

1 Jonɨ 2: byr

Highlight

Copy

Compare