1 Koridɨ 9

Apozelɨyaraavɨre dɨragɨnyajɨ yɨpɨnejɨ sangɨnesɨ.

1Sareinyɨ Polɨnyɨ Kɨraazɨtɨyarɨna aane pɨrɨ' kɨrɨ' wɨla nyɨpwɨyadeinyɨ daaka! Nɨmɨ Apozelɨyainyɨ midaaka! Jizaazarɨ nemɨre Naangerɨ tɨnna mena wanganeneinyɨ midaaka! Naangerɨ, nɨmɨ wawɨnya yevɨdaa'nyɨ yɨ sarɨmɨ gamɨreihi midaaka! Sare'na a'mwera nɨmɨre sɨmunyavɨ yɨde' madahalanyɨlɨmwabɨneinyɨ. 2A'mwe pwara nɨmɨnyɨna yawɨ'dɨvɨkɨ “Sai Apozelɨyai mɨka!” Kɨrɨ' nɨmɨ dɨwa “Gesɨra.” Aawa. Sarɨmɨ nɨmɨ Apozelɨyainyɨna tɨvi'na nyawɨramaa'dɨvɨkɨ. Sare' darevɨnyɨ. Sarɨmɨ Naangerɨ wɨlamwaaihasa' yɨ sa' dɨragɨnna dara wɨjɨwaainyasɨ. Sarɨmɨ nɨmɨnyɨne' Apozelɨyaraavɨre yavɨkwajɨkesɨyaihɨlyɨra. Yɨ “Naangei nyɨdasaawadeinyɨ,” nebulya'nanyaihɨlyɨ.

3A'mwe pwara nɨmɨre wawɨnya'na kotɨya maanga dɨdɨvɨsaraavɨ nɨmɨ kumɨre yagaalyangɨna ja'nawɨdadɨnya' daresɨra. 4Nemɨ Apozelɨyaina nemɨnyɨne wawɨnya'na a'mwera nerɨvɨkɨrya'neraavɨ wapaayajɨ aalyajɨ maraannenna yɨdaanganya'ne dɨragɨnya' kɨnɨnnakeina midaaka! 5Apozelɨya pwarajɨ Naangere gahwaalaangerajɨ Pitalyɨ sara kumɨre balaange neya'mwe Kɨraazɨtɨyarejɨ ye'mwannayamarivanɨgatabaaibɨ' dɨnegaimwagyide'na nemɨ sara yaanne' dɨragɨnya' kɨnɨnnakeina midaaka! 6Nɨmɨ gaveinyɨjɨ Baanavaazalyɨ sainaai asasɨ wawɨnya' yagalya'mavakwoihɨjɨ sarɨmɨre nɨgwia maarakane' dɨragɨnya' kɨnɨnnakeinaai midaaka! 7Aamiyavɨ mwaaidehaa' aawɨlasai gannya nɨgwiajɨ gɨlyɨvɨsajɨ bɨramaa'de bewalaka! Pwai wapewawɨnya burɨda gannya tɨka wapaaya pimagɨnya mamaranyade be a'mwelaka! Pwai bulɨmakaawoyangɨ maremwaaida gannya maremwaaidengɨre aamunya pimagɨnya manyade be a'mwelaka! Sabaaibɨ' nɨmɨre wawɨnya'na maa'mujavwi nawɨ'nyabulyɨ.

8Sarengɨna nɨmɨ a'mweraavɨreburaavɨna mɨdɨdɨ dahathɨvanɨgena. Yɨ nabaai Kɨwɨnya kɨrɨ' sara madɨnyɨke' dɨngaka! 9Yɨ sare' darevɨnyɨ. Ne Mozɨzare Kɨwɨnyavɨ dara yɨda'nɨkesɨ. Bulɨmakaawoyara witɨzɨla bwalaraawɨna ya'nera witɨyangɨ sɨvɨla lɨlɨvɨvainada'daapi tɨka manya'neraavɨ maangevɨ wɨla mavwɨyɨnnera! Sare' jaakegaa' sɨmunya' yune bulɨmakaawoyaraavɨna yawɨryaakei daa'! 10Aawa. Yɨ nemɨ kwainaavɨnajɨ yune dɨragɨnna dakakei daaka! Yo, nemɨnyɨne'nanyɨ. Sare' darevɨnyɨ. Pɨkarya sa' dɨnɨke' nemɨ dara yawɨranganya'nanyɨ. A'mwei wawɨnyavɨ lɨkɨlɨkya yadaaworiyalyɨ yɨ a'mwei tɨka wapaaya mya mena yɨnnɨke maarojɨyalyɨ saraai dara yawɨrikaja' “Nɨnnya wapaaya pimagɨnya nɨmɨnyɨne maarya'neinyɨ wawɨnya yɨma!” 11Nemɨnyɨne' dare'nesɨ. Nemɨ sarɨmɨre sɨmunyangɨ Kuryarenna yɨhɨburɨdovaaibɨ' kuryaraavɨya tewaanyanna yɨhɨmakabyo. Sarevɨ tɨvɨkɨsa'na sarɨmɨ nemɨnyɨ kɨlaakejɨkɨya negaimwagya'neihi mari'bwarakaajavaaibɨ' gɨlyɨvɨsa nejaavɨpɨne' naange' daaka! 12A'mwe pwara gɨlyɨvɨsanna sarɨmɨnyɨ yɨhyɨdaangadɨvɨta dɨragɨnya' kɨnɨnnakera mwaaihasa'na nemɨ sareina sɨnnawɨ yɨhyoina naanga yɨnɨga maraanneina daaka!

Sare kɨrɨ' gɨlyɨvɨta daza nemɨ yɨnɨga wi'na maraannengɨ sare nemɨ mamaaryagongɨ. Aawa. Nemɨ dara do. Nemɨnyɨna pwai kwai nyawɨradɨka! “Polɨmɨva nɨgwia mwagi'namaarya'nera Kɨraazɨtɨyare yagaala tewaanya' nyɨdadɨvɨsarera.” Sarevɨdaa'nyɨ yagaala sa'na “Aala!” dɨma! “Yɨ yawɨta savɨ tusa' kaanya tihɨraana!” dona negainadennajɨ taanginya pɨnɨnna pɨnɨnnanyannajɨ dɨragɨnna daako. 13Ayɨna yɨhɨthɨma! A'mwera Gotɨyare Angevɨ wawɨnya yadɨvɨsara Gotɨyare Angevɨya wapaaya maa'dɨvɨsare. Kwaraanyaba Gotɨyarɨna mubɨthɨka yɨra'dɨvɨsavɨre wawɨnya yadɨvɨsara savɨya mɨwɨta pimagɨnya maranadɨvɨsare. Yɨ sarɨmɨ dazavɨna myawɨrijɨvanɨga'! 14Sasarevɨdaa'nyɨ, nabaai Naangei kɨwɨnya da' wakakesɨ. A'mwera yagaala tewaanya' wɨjɨwaakadɨvɨsarajɨ yagaala sa' maa'manɨgasaraavɨ gɨlyɨvɨta kɨlaakejɨkɨ gaimwagya'ne maapɨka!

15Sare kɨrɨ' nɨmɨ dɨragɨnya aane pɨrɨ' kɨrɨ' marayadɨnyainyɨ mɨ'. Sarɨmɨnyɨ myɨhidaanganye. Yɨ nabaai “Dahaakɨgaasɨ sarɨmɨnyɨ pɨnɨ sara maarɨma!” dena yagaala daza pɨkarya midayɨwa. Aawa. Sare' darevɨnyɨ. Nɨmɨ mamaarya'na yɨlaaya yɨvanɨgeinyɨ. “A'mwe pwai nɨmɨre yɨlaaya yadɨnyavɨre aaya kaavɨlya' namarasɨ'nadɨka!” dadɨ mɨjɨke'na mena balɨde' yɨ sa' nawɨ'nyasɨ. Kɨrɨ' yagaala tewaanya' wɨjɨwaake'na tɨvɨkɨta maa'mujɨ kwajɨ sa' nɨmɨre yaya munyaba makinyabwi kayaaka kigaladɨke' yɨ sa' kayaa'nanyasɨ. 16Sare' darevɨnyɨ. Nɨmɨ yagaala tewaanya' wɨjɨwaakadɨnya'na nɨmɨre yaya' munyaba makimujavɨre aaya kaavɨlya' mwari'. Sare' darevɨnyɨ. Sa' mujɨwaakya'ne' tusa' pɨrɨ' minyɨ'. Aawa. Naangei wawɨnya sa' nyakakeinyɨ. Sare' darevɨnyɨ. We'! Yagaala tewaanya' mujɨwaakiwɨja' kale nyadeinyɨ. Yɨ sara myɨwɨja' wana kayaa'na mwaalɨdeinyɨ. 17Sare' darevɨnyɨ. Nɨmɨre sɨmunyavɨdaasɨ wawɨnya daza' yɨwɨjɨ kwajɨ yɨ nɨmɨ tɨvɨkɨta maarya'neinyɨ kyɨdaangamudɨka! Kɨrɨ' wawɨnya daza' nɨmɨre sɨmunyavɨdaasɨ mivanɨgeinyɨ. Wawɨnya sa' ya'neinyɨ Naangei kanyɨdahɨlaka' sara yɨvanɨgeinyɨ. 18Sarevɨdaa'nyɨ nɨmɨre tɨvɨkɨta berɨvaka! Nɨmɨre sɨmunya' “Gɨmɨ yadɨnya' tewaanyasɨ,” dɨvanɨke tɨvɨkɨta daresɨ. Yagaala tewaanya' wɨjɨwaakadɨnyavɨne gɨlyɨvɨsa yɨnɨga wi'na maa'muneinyɨ yɨ sa mamaari yadɨnyainyɨ. Yagaala tewaanya' wɨjɨwaakadɨnyavɨre dɨragɨnya kɨnɨnnakeinyɨ kɨrɨ' sare' “Aala!” dena “A'mweraavɨ yagaala sa' yanga wɨjaavɨdeinyɨ,” dena sara yɨwa. Yɨ sara yadɨnyavɨne yawɨta daza' nɨmɨre kuryarɨne tɨvɨkɨsasɨ.

19Sare' darevɨnyɨ. Nɨmɨ tewaanya mwaaiheinyɨ. A'mwe aane pwai kwareinyɨ mɨ'. Sareinyɨ kɨrɨ' yuyaraavɨne yaasɨwa'wawɨnyainyɨ sara wakɨneinyɨ. “Yɨ a'mwe Gotɨyarɨne kwalaalyaraavɨ naanga mɨjama'muma!” dadɨ sara yadɨnyainyɨ. 20Sarevɨ yɨ “Juyaraavɨ maarɨma!” dadɨ Juyaraavɨre tɨnnyarɨ kumɨrebwina Juyainyɨbɨ' mwaale. Nɨmɨ sainyɨ Mozɨzare Kɨwɨnyavɨ kwaakewɨ mula'narige kɨrɨ' “Kɨwɨnyavɨ kwaakevɨ mwaaihasaraavɨ maarɨma?” dadɨ sahwaraayaba Kɨwɨnyavɨ kwaakewɨ wɨlamwaaiheinyɨbɨ' yɨma'nɨweinyɨ. 21Sabaaibɨ' nɨmɨ Gotɨyare kɨwɨnya' maayainyɨ mɨ'. Aawa. Kɨraazɨtɨyare kɨwɨnyavɨ kwaakewɨ wɨla'na'dɨnyainyɨ. Sareinyɨ kɨrɨ' a'mwe Kɨwɨnya' maayaraavɨre tɨnnyarɨ mwaaidɨ “A'mwe Kɨwɨnya' maayaraavɨ maarɨma!” dena nɨmɨ sainyɨ a'mwe Kɨwɨnya' maayainyɨbɨ' yɨma'neinyɨ. 22“Nabaai a'mwe dɨragɨnya maayaraavɨ maarɨma!” dena sahwaraayaba nɨmɨ dɨragɨnya maayainyɨ yɨma'nɨweinyɨ. Nɨmɨ a'mwe yuyaraayaba sahwaraavɨrebura yadɨ “Pwaraavɨ padaihasamaarɨma!” dena tutaanya yuyangɨ yaamɨjɨ yadɨnyainyɨ. 23“Yagaala tewaanyavɨya nawɨ'nyaburaavɨ a'mwe pwarajɨ ye'mwannamaarɨma!” dadɨ yagaala tewaanya savɨna yuya daza yadɨnyainyɨ.

24Sarɨmɨ davɨna myawɨrijɨvanɨga'! Gavamarasɨ'nyɨkaanyabanna a'mwe yuyara sara kaanyave'na wodɨvɨta kɨrɨ' gave pwaina wavɨla'nɨkere' maa'delyɨ. Kaanyave'na wodei kaanyave'na nayaa dɨragɨnna wodevaaibɨ' “Gotɨyarɨ wavɨla'nɨkere tewaanya' maraana!” dapɨjɨ kaanyave'na dɨwila! 25Yɨ a'mwe gazaizai gavamarasɨ'nyɨkaanyangɨna “Wavɨlavɨma!” dada kɨlaaka dɨragɨnyajɨ' yɨma'nya'nei yuya kɨlaakejɨkɨya sabwi walamarakadelyɨ. A'mwe dazai tɨvɨkɨta kayaaka yɨgainade'na “Maarɨma!” dada sasara yadelyɨ. Nabaai kɨrɨ' nemɨ tewaanaange' kayaaka minyade' maarya'neina kwaasɨ kwaasɨ yaadeina daaka! 26Sarevɨna nɨmɨ sainyɨ yaasɨwa' maranganamarya myadɨ kaanyave'na wodɨnyainyɨra. Gavamarasɨ'nyɨramyavɨ asa gwaamwada asa yɨhusavɨ yaasɨwa' malɨvaramamaryadevaaibɨ' Gotɨyarɨna dɨragɨnna yadɨnyainyɨ. 27Sara yaasɨwa'na myadɨnyainyɨ. Aawa. Nɨmɨre kɨlaakejɨ' nayaa dɨragɨnna ya'nejɨsɨ malya' nebulya'na tadɨnyɨ. Nɨmɨre kɨlaakejɨ' nɨmɨre kuryare yaasɨwa'wawɨnya yadei yɨma'nya'nejɨkɨ dɨragɨnna walamarakadɨnyainyɨ. Akai, a'mwe pwaraavɨ wɨjɨwaakadɨ “Kɨraazɨtɨyareihi yunebanna dɨragɨnna lɨmwagarapɨjɨ wavɨla'nɨkere tewaanya' Gotɨyare' dɨmaaryideihɨlyɨ,” wɨjɨwaakadɨnya kɨrɨ' kanyawɨranganojɨ mamaari nyɨwɨdɨ'de'na nɨmɨre kɨlaakejɨ' dɨragɨnna walamarakadɨnyainyɨ.

Currently Selected:

1 Koridɨ 9: byr

Highlight

Copy

Compare