1 Koridɨ 10

“Nemɨ yɨjɨwaalyaburɨ nalarawaadɨka!” dɨnɨke'nesɨ.

1Sare' darevɨnyɨ. Nya'mweihi, yagaala dangɨ sarɨmɨ navɨka ya'na nɨmɨ sɨmunyavɨ “Aala!” dɨwa. Yuya nemɨre aataravaavɨ Ne Mozɨzai Kwaaka Yɨzɨpɨdaasɨ makabadaa'nyɨ sahwara yɨraaya' maremwaalakevɨ kwaakewɨ wɨla'dɨvɨ' kaanya yamaryesare. Yadɨvɨ' yuyara yune sɨvɨlyajɨna saalaalyavɨ tewaanna wɨlaawesare. 2Sara yadɨvɨ' yuyara sahwara bavɨtaazɨya' maaresare. Yɨraaya savɨjɨ saalaalya savɨjɨ sawaarɨ yɨ bavɨtaazɨya daza' Mozɨzalyɨ ye'mwannamwaalya'ne' wakɨnɨkesɨ. 3Yɨ yuyara sahwara wapaaya Gotɨyare Kuryai wɨjavadaasɨya nesare. 4Yɨ yuyara sahwara aalya Gotɨyare Kuryai wɨjavadaasɨya nesare. Sare' darevɨnyɨ. Sahwara Kuryare aalya' sɨlaangerɨ nyɨna. Sɨlaanga sahwarɨ Gotɨyare Kuryai wɨjavadaasɨya sɨlaanga sai kumɨnyɨ mɨdɨnna yada yɨ sai Kɨraazɨtɨyalyɨra. 5Gotɨyai nawɨ'nya yada sare kɨrɨ' kumɨrebwina sahwai kumɨnyɨdaa'nyɨ kwala naangevaakɨ yɨlaaya mwigalya'. Sare' darevɨnyɨ. Kwaaka a'mwera maayavɨ saba gazabazaba balesare.

6Yɨ yuya daza nemɨnyɨne ke'ba'nanya yɨma'nakengɨ. Kumɨnyɨ kayaa'nanyabwina sara wɨvu'nakabaaibɨ' nemɨnyɨ kayaa'nanyabwina nevu'nadeina kyɨma'naadɨkevɨ ke'ba'nanya yɨma'nakengɨ. 7Sahwaraavɨ tɨnnyabanya pwara yetabaaibɨ' sarɨmɨ kwaasɨgotɨyare sabwi mamɨdɨbɨna! Yɨ sahwaraavɨna dara dɨnɨkabaaibɨsasɨ. A'mwera tɨka munne wapeyɨdɨka naanga savɨ walamwaaidɨvɨ' tɨka wapaaya aalya nadɨvɨ' kwaasɨgotɨyarɨne yɨlaaya'na kwarame avaanna gɨrya'nera daavesarera. 8Sahwaraavɨ tɨnnyabanya pwara yetabaaibɨ' nemɨ kayaa'na gɨrɨkita'nanya sabwi myaanna! Yɨ Gotɨyai sɨnna tɨka wɨda'daa'nyɨ yɨrɨka gave pɨrɨkɨ sarera kwala naangera 23,000 saba sana balaramarina yesarera. 9Nabaai sahwaraavɨ pwara “Kwaamu'na kuna mwaaladei dɨngaka!” deva Naanga kwarɨ yɨjɨwaaletabaaibɨ' sarɨ yune yɨjɨwaala myaanna! Sareraavɨ kamaalyara tɨka davɨna kye' sahwara saba sana yu'daramarina yesa'nanyɨ. 10Nabaai sahwaraavɨ pwara kɨnɨmyagaala detabaaibɨ' sarɨmɨ Gotɨyarɨna maamayagaala madɨpɨna! Sareraavɨ ejelɨya a'mweraavɨ tamakadei karamaka' yɨ sahwara saba sana yu'daramarina yesa'nanyɨ. 11Yuya daza ke'ba'nanya yawɨrya'neinaavɨna kɨgaakuna a'mwe sahwaraavɨ yɨma'nakengɨ. Kayaa'nanya avaalya nyaadɨ'de'na nemɨnyɨ sɨmunya nejaaya'ne yagaala daza Gotɨyare bukuyavɨ yɨda'nɨkengɨ. Yɨ yuya kɨgaasa mi'nanyɨ. Nemɨnyɨna dɨvidaa'nyainaavɨna dahaa' mwaaihoinaavɨ dazagaasa aaya kaavɨlya neyɨma'nakeinera. 12Sarevɨdaa'nyɨ a'mwei gamɨ sai yawɨ'manɨkei “Nɨmɨ sainyɨ dɨragɨnaangeinyɨ. Dɨragɨnya nayaa yadɨnyainyɨ daa'dɨnyainyɨ.” Sai kayaa'nanyaburɨ nalaraawadɨka! Sai nayaa mala yɨwannana! 13Yaamɨjɨ yɨjɨwaalyabwi yɨhima'naabadevwi yɨ sa' mudɨka pɨrɨ'bɨta' mɨ'. Aawa. Sa' avaainanya' a'mwe yuyaraavɨ yɨma'nadevaaibɨsasɨ yɨjɨwaalya'. Yɨ yɨjɨwaala savɨna Gotɨyai gannya nebulya'nanya dɨragɨnya' mɨdɨdelyɨ. Sahwai lɨmwaga'delyɨ. Sahwai sarɨmɨre dɨragɨnyavɨ nayɨhwavɨlavadɨ'de'na yɨjɨwaala pɨrɨ' wanganakadei mɨ'. Aawa. Yɨjɨwaalyabwi sarɨmɨnyɨ kayɨhima'naabozɨ yɨ sarɨmɨ savɨna dɨthathɨvalyide'na gaimwanga yɨhya'ne tusa' Gotɨyai bɨryakadelyɨ. Tuta daza' yɨ sa' dare'na. Sahwai dɨragɨnya pada'galayɨvaimwanga yɨhyadelyɨ. Yɨ sarɨmɨ yɨjɨwaalyaburɨ dɨragɨnya yɨnɨga wi'na dɨthaayideihɨlyɨ.

Kwaasɨgotɨyaraavɨre tɨka munnesɨ Naangere nadaanyasɨ sawaarɨnesɨ.

14Nya'mweihɨrɨna tewaanya nyɨvu'nadeihi, sasarevɨdaa'nyɨ kwaasɨgotɨyare sabwina lɨkaanya dɨwila! Bule'na duzaayɨla! 15Sarɨmɨ sɨmunya' kɨnɨnnakeihɨrɨ dara yɨhɨthɨvanɨge. Sareihi nɨmɨre yagaala kwaasɨgotɨyare yɨlaayavɨna nayaa dɨmarayawɨbwarila! 16Naangere yɨ'bɨnyavɨ nadaanyagaa' kaapɨya tewaanya naanga yanga kɨnɨnnakerɨna nemɨ Gotɨyarɨ “Su! Su! Gɨmɨre yaya' makimanɨgo,” wɨdadaawori yɨ kaapɨya sai Kɨraazɨtɨyare tawesɨ nemɨnyɨ maraneyɨ'bwarayɨrakurakadei midaaka! Yɨ bɨretɨya gunyanadaanya daza' nemɨnyɨ Kɨraazɨtɨyare kɨlaakejɨsɨ ye'mwannaneyɨ'bwarakade' midaaka! 17Bɨretɨya sa' gave pɨrɨ'nanya' warɨke'na nemɨ a'mwe kwalaalyaina yune kɨlaaka gave pɨjɨ'na mwaaihoinera. Sare' darevɨnyɨ. Nemɨ yuyaina bɨretɨya gave pɨrɨ'nanya sahɨrɨvɨna nadaanyainera. 18Sarɨmɨ Yɨzɨrelɨyare Kɨlaakejɨkɨdaa'nyaraavɨna jawɨranganyɨla! Gotɨyarɨna mubɨthɨka yɨra'dɨvɨsara kwaraanyabanne mɨwɨta nadɨvɨsara yɨ sahwara Gotɨyalyɨ ye'mwannemwaaidɨvɨsara midaaka! 19Sarevɨdaa'nyɨ nɨmɨ yagaala gara dɨvanɨge? “Kwaasɨgotɨyare tɨka wapaaya sa' nebulya pɨrɨ' kɨrɨ' dɨngaka? Ge' dɨngaka?” nabaai “Kwaasɨgotɨyai gamɨ sai nebulya'nanyai pwai kwai dɨngaka?” 20Aawa. Nɨmɨ dara dɨvanɨge. Naangerɨna mu'nyadɨvɨsara ajɨmya yuyangɨyara yɨdɨka yɨra'dɨvɨta tɨka munne sa yɨ Saataanɨmɨre yɨmakeraavɨna yɨra'dɨvɨtangɨ. Gotɨya nebulya'nanyarɨna yɨra'dɨvɨta mɨ'. Yɨmakerajɨ sarɨmɨ ye'mwannemwaalya'neihi jɨma'nyide'na nɨmɨ sɨmunyavɨ “Aala!” dɨwa. Sareihi nyɨma'nɨpɨdɨka! 21Naangere kaapɨyarɨjɨ yɨmakere kaapɨyarɨjɨ aalya ye'mwannanya'na sarɨmɨ yɨnɨga wi'na nɨpɨneihi mɨ'. Aawaawa. Nabaai Naangere wapeyɨ'bɨnyavɨjɨ yɨmakere wapeyɨ'bɨnyavɨjɨ wapaaya ye'mwannanya'na yɨnɨga wi'na nɨpɨneihi mɨ'. Aawa. 22Yɨ sara yaaja' nemɨnyɨna Naangei sɨmɨlɨka wɨlade' yaade'na daa! Nemɨre dɨragɨnya' gamɨre dɨragɨnyavɨ wavɨlavade' dɨngaka?

23“Yuya ya kɨmaakɨya madakɨnyɨkengɨreva,” kɨrɨ' yuya sa a'mweraavɨ wɨgaimwade mɨ'. “Yuya ya kɨmaakɨya madakɨnyɨkengɨreva,” kɨrɨ' yuya ya sa dɨragɨnya pada'galayɨvaimwange' neyade mɨ'. 24Sarevɨna a'mwe aane pwai kwai nayaa pada'galamaremwaainya' yune gamɨ sarɨna myanna! Aawa. “Nɨmɨ sara yɨwɨjavɨ a'mwe pwarajɨ nayaa mwaaibɨkajɨ,” a'mwe yuyara nayaa pada'galamaremwaainɨpɨka! 25Yuya mɨwɨta sa sɨtɨwaayavɨ mubadɨvɨta sa sarɨmɨ navɨ'na nyɨna jɨla! Sarɨmɨre sɨmunyara padaihɨrakaderaavɨna yɨdaanganya aane pɨmɨlɨ' kɨmɨlɨ' mipɨna! Yuya sa dɨnyɨla! 26Sare' darevɨnyɨ. Dara dɨnɨkesɨ. Kwaaka dathavasɨ yuya yunewɨnna waraka yunebanna mɨlemwaalɨkejɨ sa yune Naangerennanyangɨ. Sare'na yuya naanne' wikɨra. 27Nabaai a'mwe pwai kwai Kɨraazɨtɨyarɨ malɨmwagyadei “Wapaaya naade'nana!” dazai kagɨthozɨ yɨ gɨmɨ sarɨ kadɨka yɨna ya'gɨzɨ wɨna yaja' gɨmɨnyɨ gɨzaavaja gazasa' tɨka wapaaya mɨwɨta sa' navɨ'na nyɨna ja! Gɨmɨre sɨmunya padaihɨrakaderɨna “Mɨwɨta da' gawɨdaa'nyavaka?” yɨdaanganya minna! Yuya sa dɨnana! 28Sare kɨrɨvɨ a'mwe pwai kwai dara yɨhɨthaza' “Mɨwɨta da' nemɨ naade' davanyaraavɨre gotɨyaraavɨ wɨjawaasasɨ,” yɨ sare sa'na yɨhɨthathe a'mwe dazarɨnajɨ sɨmunyai padaihɨrakyarɨnajɨ sarɨmɨ tɨka sare' manɨpɨna! 29Nɨmɨ yune gɨmɨre sɨmunyai padaihɨrakyarɨna majɨvanɨge. Aawa. A'mwe sahwai gɨthazai yɨ dazarerɨna dɨvanɨge. Sare' darevɨnyɨ. Kɨraazɨtɨyareinyɨ yuya yɨnɨga wi'na nɨwɨneinyɨ kɨrɨ' a'mwe pware sɨmunyarɨ kayaaka nyɨgaimudɨkajɨ sagaa' manɨnna! Sare'na nɨmɨre dɨragɨnyabwi yɨwɨja' pwara sɨmunyai maranyawɨbwaraja' tewaanya berɨ'na maarɨdeinyaka! 30Yɨ nɨmɨ Gotɨyarɨ “Su! Su!” wɨda'mujɨ nɨwɨne' tewaanyasɨ. Kɨrɨ' “Su! Su!” wɨdɨwɨja daza'na pwara bɨraiyagaala nyɨdɨpɨ'de' tewaanya' berɨ'nanaka!

31Sarevɨdaa'nyɨ sarɨmɨ tɨka wapaaya nadaapɨjɨ dɨngaka? Aalyajɨ nadaapɨjɨ dɨngaka? Nabaai pɨnɨ yadaapɨjɨ dɨngaka? Yɨ Gotɨyarɨne yaya' munyaba makɨlya'ne'na yuya sa jɨla! Sarɨmɨ pɨrɨ' kɨrɨ' yɨpɨja'na Gotɨyarɨne yaya' munyaba makɨlaja' gave' sara jɨla! 32Yɨ Juyaraavɨnajɨ Gɨrikɨyaraavɨnajɨ Gotɨyare kusɨlaanyavɨyaraavɨnajɨ kave jɨla! Sahwara kayaa'nanyaburɨ walarya'nebwi kɨnɨnnakeihi nyɨma'nɨpɨdɨka! Sahwara kayaa'nanyabwi yawɨrya'neraavɨ numwaaihɨpɨdɨka! Sahwara Gotɨyarera yɨma'nya'neraavɨna sarɨmɨ sasarebwi nyɨpɨdɨka! 33Nɨmɨ kwainyɨ a'mwe yuyara yɨnɨga wi'na yuya sabwina tewaanya wɨvu'nade yuya sara yadɨnyainyɨ. Yune nɨmɨ sainyɨna gaimwannya'ne yadɨnyainyɨ mɨ'. Aawa. Nɨmɨ “Gotɨyai a'mwe kwalaalyaraavɨ padaihasamaarana!” dadɨ sahwaraavɨna gaimwagya'ne yadɨnyainyɨ.

Currently Selected:

1 Koridɨ 10: byr

Highlight

Copy

Compare