1 Koridɨ 8

Mɨwɨsa kwaasɨgotɨyarɨ, yɨtazɨlyaraavɨ tamawɨjaavadɨvɨsaburɨnesɨ.

1Kwaasɨgotɨyaraavɨna mubɨthɨka tamira'dɨvɨta mɨwɨta pimagɨnyangɨna, nyɨda'mwa'daasangɨna, ja'nawɨdɨma! “Nemɨ yuyaina sɨmunya' kɨnɨnnakeinera,” yawɨ'daanyɨreva. Yɨ sɨmunyabwina pihadɨkebwi yada yaya munyaba makinyaburɨ neyɨdɨkaa'desɨ. Kɨrɨ' nabaai kale neyabwina kuryaraavɨ yɨvaimwadesɨ. 2A'mwe pwai kwai gannya yaya' munyaba makinada dara yawɨrajai “Yɨ pɨrɨ' kɨrɨ' nɨmɨ sɨmunya mena yawɨ'nɨkeinyɨra,” yɨ a'mwe sare sɨmunya yawɨsa nayaa yawɨrya'nei Gotɨyai sara dakadevaaibɨ'na myawɨryadelyɨ. 3Kɨrɨ' a'mwe pwai kwai Gotɨyarɨna tewaanya wɨvu'najai yɨ sarɨna Gotɨyai dara yawɨ'nɨkelyɨ “A'mwe sai wavɨla'dei nɨmɨrelyɨ.”

4Sarevɨdaa'nyɨ sasare mɨwɨta tɨka nya'ne sabwina yɨ kwaasɨgotɨyaraavɨna tamira'dɨvɨta mɨwɨta pimagɨnya tɨka nyabwina nɨmɨ dɨma! Nemɨ dara yawɨ'daanyɨ. Kwaakevakɨ kwaasɨgotɨya aane pwai kwai mamwaalyɨ'. Sa' yaasɨwa' saba sana yavɨkaridaakwia yaasɨwa'nanyangɨ. Sarevɨ yɨ gotɨya kwalaalyara mɨ'. Aawa. Gotɨyai gave pwainanyaina mwaalɨ'. Pwara mɨ'. 5Sare' darevɨnyɨ. Sɨgunya pɨrɨvɨ Kwaaka kɨvakɨ kwalaalyanna Gotɨyarɨ mu'nyadɨvɨsara “Yɨ sahwara gotɨyarera,” dadɨvɨsa mwaaidɨvɨsangɨra. Yɨ gotɨya kwalaalyarajɨ maremwaaidɨvɨta kwalaalyarajɨ mwaaihata 6kɨrɨ' nemɨ Kɨraazɨtɨyareina dara yawɨ'daanyɨ. Nemɨnyɨne Nɨmwai Gotɨya yune gave pwainanyai mwaalɨ'. Sahwai yuyangɨna aaya kaavɨlyalyɨ. Yɨ nemɨ gamɨnyɨneina mwaaiho. Nabaai Jizaazai Kɨraazɨtɨyai Naanga yune gave pwainanyai mwaalɨ'. Sahwai yuyangɨ wakyaakelyɨ. Yɨ sahwai nevadaihasamaarakeinera. Yɨ sahwarɨ nemɨ gaalyabwi kɨnɨnnakeinera.

7Kɨrɨ' nabaai a'mwe yuyara pwaraavɨ Kɨraazɨtɨyareraavɨne sɨmunya daza' muwarikesɨ. Pwara kɨgaa' mwalyaasaburɨna sɨnnawɨnya kwaasɨgotɨyareburɨ mɨdɨnɨbainesare. Sarevɨ sahwara kuna yawɨ'dɨvɨsare “Mɨwɨta da' kwaasɨgotɨyarɨne yɨdɨka yɨvanɨgasa' nebulya'nanyasɨra.” Sara dadɨvɨ' kɨrɨ' mɨwɨta sa tɨka nyɨna yɨvanɨgasare. Kumɨre sɨmunya waryaanya' yune nayaa myawɨryada sara nadɨvɨ' sɨmunya kwalaalya yawɨ'dɨvɨ' kumɨre sɨmunyai dada “Kwaasɨgotɨyarɨne mɨwɨsa' gɨmɨre yɨwetawakya sanna yɨwaa,” kumɨre sɨmunyai gɨrɨkebwi maa'manɨkerera. 8Kɨrɨ' tɨka wapaaya nya'neina nemɨnyɨ Gotɨyarɨna gidɨkusaba nemakwode mɨ'. Tɨka wapaaya sa nemɨ nya'na Gotɨyai sɨmunya kwalaalya yawɨ'dei mɨ'. Nabaai nemɨ tɨka manyaaja' yɨ nemɨ Gotɨyare tɨnnyarɨ kayaa'na mwalaadeina mɨ'. Yɨ nemɨ tɨka naaja' yɨ nemɨ Gotɨyare tɨnnyarɨ nawɨ'nya mwalaadeina mɨ'. 9Kɨrɨ' sarɨmɨ mala nayaa jɨwannyɨla! Akai, sasare sabwi sarɨmɨre dɨragɨnya' waryaanyaraavɨ nyadɨ'de'na sa' a'mweraavɨre sɨvɨlyangɨ wɨrinadaasɨ dɨragɨnya mi yadɨvɨ' yɨ sahwara wagɨlyavɨna walaraawɨna nyɨpɨdɨka! Sare'na mala nayaa jɨwannyi! 10Sare' darevɨnyɨ. A'mweigɨ sɨmunya' kɨnɨnnakeigɨ, yɨ gɨmɨ kwaasɨgotɨyarɨna yɨ'bwa'nemwaaidɨvɨsabanna mwalaawɨja' mɨwɨta nadaa'gɨzɨ yɨ a'mwe pwai kwai gamɨre sɨmunyai waryaanyalyɨyai sai gɨmɨnyɨ gwanganaja' yɨ sare sa' kwaasɨgotɨyarɨne tɨka sa nɨja savɨ gamɨre sɨmunyarɨ yɨdɨkaata jɨthei daaka! 11Sare' darevɨnyɨ. Sarei pɨbwi yawɨ'dei kɨrɨ' tɨka naja'na yɨ gɨmɨre sɨmunya dɨragɨnya sa' a'mwe sarɨ, dɨragɨnya maayarɨ kayaaka jɨhaidelyɨ. Yɨ sai neya'mwe dazarɨna Kɨraazɨtɨyai mena balakelyɨ. Yɨ dazahwarɨ padaihasamaarya'nei mena balakelyɨ. 12Neya'mweraavɨ kayaa'nanyabwi dazara yapɨjɨ yɨ kumɨre sɨmunya waryaanyai yaderɨ jɨnga tamajɨrakapɨjɨ yɨ sasare saburɨ Kɨraazɨtɨyarɨjɨ kayaa'nanyabwi sara jidelyɨ. 13Sasare'na tɨka wapaaya nya'nebwi nɨmɨnyɨ nya'mwerɨ wagɨlyavɨ walamarakaja' yuyagaa' aaya yɨwawajahaa'na mɨwɨta sa tɨka manɨwɨna! Arɨkewɨ. Akai, nɨmɨnyɨ nya'mwerɨ mi yɨwɨja' sai wagɨlyavɨ nalaraawadɨka!

Currently Selected:

1 Koridɨ 8: byr

Highlight

Copy

Compare