1 Koridɨ 7

A'mwe kwala maarya'nebwinesɨ.

1Dahaa' pɨkarɨyɨkwiavɨ sarɨmɨ yɨda'mwa'daata a'mweraavɨre mwaalyabwina nɨmɨ dara ja'nayɨhɨthɨde'nanyɨ. A'mwei a'mwevɨ kwala mamaarya'ne' sa' yaasɨwa' mwaalyabwi tewaanyasɨra. 2Sare kɨrɨvɨ dala pɨburana pɨburananya yaasɨwa'na marɨdaakunanyɨnyabura a'mweraavɨ kayaaka ya'nebura warɨke'na gazaizai gamɨ sarɨne gannya balaange' kɨnɨnnakeinanyai mwaalana! Yɨ nabaai a'mwe gazasa' gannya a'mwei kɨnɨnnake'nanya' mwaalana! 3Gamɨre a'mwevɨ kwala maaryabwine tɨvɨkɨsa' kwalaangei nayaa wɨjaavana! Sasarebaaibɨ' gamɨre kwalaangerɨ tɨvɨkɨta sa' balaange' nayaa wɨjaavana! 4Sare' darevɨnyɨ. A'mwe' yune gannya kɨlaakejɨkɨna maremwaaidezɨ' mɨ'. Aawa. Kwalaangei maremwaalɨ'. Yɨ sasarebaaibɨ' kwalaangei gannya yune kɨlaakejɨkɨna mamaremwaalyɨ'. Aawa. Gamɨre a'mwe' maremwaalɨ'. 5Kɨrɨmɨ sayoihi kwaiyagaala dadisabwi nawɨ'nyabulyɨ. A'mweigɨ gɨnnya a'mwevɨ “Aala!” madɨnna! A'mwe'gɨ gɨnnya a'mwerɨ “Aala!” madɨnna! Sara yɨkajavwi yɨ sa' kukebulyɨ. Kɨrɨ' pɨgaa'na pɨrɨ' yɨma'nadehaa' dɨngaka? Kɨrɨmɨ sawaaihi avaaizɨmunya'na yakɨlyɨ kɨbawegaa' kɨrɨnnya kɨlaakejɨ' yɨtaata jɨ'nakɨlyɨ “Gotɨyarɨ wɨja'negaa' yune mwaalaka!” dakɨlyɨ geva geva dɨmwaalyideyoihɨlyɨ. Sa' wikɨra. Nabaai sara yakɨlyɨ dɨvidaa'nyɨ sayoihi kɨrɨnnya kɨlaakejɨ' ayahi jɨraku'nemwaalyideyoihɨlyɨ. Akai, sara mi yakɨlyɨ kɨrɨnnya kɨlaakejɨkɨ wi'na nayaa mamaremwaalyɨ yɨkaja' Saataanɨ yaamɨjɨ yɨjɨwaala nayɨhyadɨka! Nabaai sarevɨ ata lɨmwangebwi nyɨkadɨka! Sare'na Gotɨyarɨ mi'na wɨdakɨlyɨ ayahi jɨraku'nemwaalyideyoihɨlyɨ. 6Dɨwe sa' kɨwɨnya'bɨta' mɨ'. “Sara jɨla!” madakyɨvanɨge. 7Kɨrɨ' “A'mwe yuyara nɨmɨ yadɨnyabaaibɨ' mwaaibɨ'de' tewaanyasɨ,” sɨmunya yawɨ'manɨge. Sara nyɨvu'nɨvanɨ'. Sare kɨrɨvɨ Gotɨyai tewaanya sɨhumale dala pɨnɨnna pɨnɨnnanya yanga wɨjaavakengɨ. A'mwe gazaizai Gotɨyarɨna gannya sɨhumale' kɨnɨnnakelyɨ. Pwarɨna a'mwe' kɨnɨnnakei mwaalya'nebwi wɨjaavakesɨ. Pwarɨna a'mwe' maayai mwaalya'nebwi wɨjaavakesɨ.

8Kwala mamaaryarajɨ yɨ a'mwe yaanyɨwaakemɨlɨkajɨ sangɨ nɨmɨ dara dɨwa. Sangihi nɨmɨbɨ' kwala mamaaryaihi mwaaibɨza' yɨ sa' tewaanyasɨ. 9Kɨrɨ' kunnya kɨlaakejɨsɨ sɨmunyasɨ nayaa mamaremwaalyɨpɨja' yɨ kwala maarɨna yɨpɨka! Sare' darevɨnyɨ. Yaasɨwa' mwaalɨna yapɨjɨ kumɨre munyɨ' dɨka widathe' kayaa'nanyasɨ. Yɨ kwala maapɨja' sa' nawɨ'nyasɨ.

10Kwala maaryarajɨ kwala maa'nyajɨ sangɨna nɨmɨ kɨwɨnya datha' wɨjaavɨma! Kɨwɨnya sa' nɨmɨre'na mɨ'. Aawa. Kɨwɨnya sa' Naangeresɨra. Sa' yɨ dare'na “A'mwe' gannya kwalaangerɨ myagalya'mavanna!” 11Kɨrɨ' a'mwe sa' gannya a'mwerɨ mena yagalya'mavaja' yɨ daza' yaasɨwa' mwaalɨna yade' dɨngaka? Gannya a'mweryawɨnna ayɨna wawojɨ kwalaangelyɨ avaaimunyɨ'na ayɨna ye'mwannamwaalyɨkade' dɨngaka? Pɨbwi aawa. Nabaai kwalaanga kwalyɨ gannya balaangevɨ mudaasanna!

12Nabaai kwaala pɨyuraavɨ nɨmɨ sainyɨ dara dɨwa. Yagaala sa' Naangei wɨdaka' mɨ'. Nɨmɨresɨra. Yɨ Kɨraazɨtɨyarɨne neya'mwe pwai kwai, yɨ gannya balaange' Kɨraazɨtɨyarɨ malɨmwagyade' kɨnɨnnakei mwaalajai yɨ a'mwe sa' “A'mwe salyɨ kuna ye'mwannemwaalɨma!” daza' yɨ neya'mwe dazai a'mwe sa' malɨmwagya'na savɨ myagalya'mavanna! 13Nabaai a'mwe pɨrɨ' gannya kwalaangei Kɨraazɨtɨyarɨ malɨmwagyadei kɨnɨnnake' mwaalaja' yɨ a'mwe sai “A'mwe sasɨ kuna ye'mwannemwaalɨma!” dazai yɨ neya'mwe daza' a'mwe sai malɨmwagya'na myagalya'mavanna! 14Sare' darevɨnyɨ. A'mwei Naangerɨ malɨmwagyada gannya balaangesɨ ye'mwannemwaalajarɨna balaanga sa' Gotɨyare tewaanya' mwaalake sasare savɨ kɨrɨmɨre mwaalyabwi tewaanyabwi yɨma'nake' Gotɨyai tɨnna wangadelyɨ. Nabaai a'mwe' Naangerɨ malɨmwagyada gannya kwalaangelyɨ ye'mwannemwaalajavɨna neya'mwe sai Gotɨyare tewaanyai mwaalake sasare savɨ kɨrɨmɨre mwaalyabwi sabwi tewaanyabwi yɨma'nake' Gotɨyai tɨnna wangadelyɨ. Sare' mi warajɨ kwajɨ yɨ sarɨmɨre kaimɨraaya gɨrɨkita'nanyara kamwaaibɨthɨ'. Kɨrɨ' dahaa' tewaanyara Gotɨyareraavɨ wɨmwaaihaderera. 15Sare kɨrɨvɨ a'mwe pwai a'mwe kɨrɨ' Naangerɨ malɨmwagyada gannya a'mwe pɨrɨvɨ a'mwe kwarɨ yagalya'mavaja' yɨ sa' wikɨra. Yagalya'mavana! Sasarebwi yɨma'najavɨ neya'mwe pwai neya'mwe kɨrɨ' yaasɨwa'wawɨnya'bɨsavɨ mamwaalyɨ'. Aane pɨrɨ' kɨrɨ' wɨla myɨryɨnɨkesɨ. Kwaamu'nanyaburɨ mwaalya'neihɨrɨ Gotɨyai sarɨmɨnyɨ jaka yɨhɨzɨvwaramaarakevɨnyɨ. 16Sare' darevɨnyɨ. Sarere balaange'gɨ, nebulya'na gara yawɨ'manɨgɨ! “Nɨnnya kwalaangerɨ yɨnɨga padaihasamaarɨde'nyɨ dɨngaka?” Sa' myawɨrivanɨgɨ. Nabaai kwalaangeigɨ, nebulya'na gara yawɨ'manɨgɨ! “Nɨnnya balaangevɨ yɨnɨga padaihasamaarɨdeinyɨ dɨngaka?” Sa' myawɨrivanɨgɨ. Sare'na madahalalɨmwadɨnna!

17Sare' kɨrɨ' Naangei gazarɨzarɨ yanga mudakabaaibɨ' yɨ sahwai sara mwaaidɨ'nyɨyavɨ Gotɨyai jaka wɨjɨvwaramaarakegaa' mwaalakeburɨ yɨ sai yune sahɨrɨsavɨna kuna yamaryana! Yuya Kɨraazɨtɨyare kusɨlaanyangɨyaraavɨ nɨmɨ kɨwɨnya sara wakadɨnyainyɨ. 18Dara dɨwa. A'mwe pwai kwai kɨlaakejɨ' gurya davesarɨna Gotɨyai jaka wɨjɨvwaramaarakei dɨngaka? Sahwai gannya kɨlaakejɨ' ayahi mamariwɨbwa'nanna! A'mwe pwai kɨlaaka gurya mada'nyɨnɨkerɨ Gotɨyai jaka wɨjɨvwaramaarakei dɨngaka? Sahwai gurya da'nɨkei mima'nanna! 19Kɨlaaka gurya daya sabwi, yɨ sabwi gevulyɨ. Yɨ kɨlaaka gurya madaya sabwi, yɨ sabwi kɨbulyɨ gevulyɨ. Aawa. Gotɨyai Kɨraazɨtɨyarɨne yagaala wakake mɨdɨnyabwi yɨ sa' naangaangebulyɨ. 20A'mwe gazaizai wawɨnya pɨrɨvɨ mwaaiderɨ yɨ Gotɨyai jaka wɨjɨvwaramaarakegaa' sai sahɨrɨvɨ yɨnahu nayaa mwalɨbainyɨna yana! 21Yaasɨwa'wawɨnya wɨdaayadɨnyaigɨ mwaaida'gɨzɨ Gotɨyai jaka gɨzɨvwaramaarakeigɨ daaka? Dazavɨna gɨmɨ sɨmunya' taanga maginanna! Aawa. Kɨrɨ' yaasɨwa'wawɨnya wɨdaayadɨnya' yagalya'maya'ne' tusa' kɨnɨnnakeigɨ yɨma'nɨja' yɨ tuta dazavɨ mɨdɨnna jɨ! 22Sare' darevɨdaa'nyɨnyɨ. A'mwei yaasɨwa'wawɨnya wɨdaayaderɨ Naangei jaka wɨjɨvwaramaarakei yɨ dahaa' Naangere tewaanya mwaaidelyɨ. Yɨ Naangerɨ tɨnnyarɨ sai kayaa'nanyabwine yaasɨwa'wawɨnya ayahi wɨdaayadei mɨ'. Sasarebaaibɨ' a'mwei tewaanya mwaalɨna, yaasɨwa'wawɨnya mudayadaawori Naangei jaka wɨjɨvwaramaarakei yɨ dahaa' Kɨraazɨtɨyare yaasɨwa'wawɨnya wɨdaayadelyɨ. 23Gotɨyai nɨgwia naangesɨ ayahi mena yɨhɨmubamaarakeihɨlyɨ. A'mweraavɨre yaasɨwa'wawɨnya wɨdaayadɨvɨtaihi mima'nɨpɨna! 24Nya'mweihi, gazaizai wawɨnya pɨrɨvɨ mwaaiderɨ jaka wɨjɨvwaramaarakei yɨ sai wawɨnya' yune sahɨrɨvɨna Gotɨyalyɨ mwaalana!

25Nabaai sɨdɨraaya kwala mamaa'nyangɨne' nyɨda'mwa'daasa'na dɨma! Nɨmɨ Naangere kɨwɨnya sarevɨne' kuneinyɨ. Sare kɨrɨvɨ nɨmɨre sɨmunyavɨna yawɨbwarɨde'nanyɨ. Naangei nɨmɨnyɨ kale tewaanya nyada yɨ nɨmɨnyɨ yɨnɨga wi'na nyada nebulyabwi lɨmwaga'dɨnyainyɨre yagaala nyu'nɨpɨneihɨlyɨ. 26Sarevɨdaa'nyɨ dara yawɨ'mwa. Dahaa' dathahaasagaa' taanginya warɨkevɨ kwala mamaarya sare sabwi tewaanyabulyɨra. Yɨ dahaa' sarɨmɨ mwaaihatabaaibɨ' kuna dɨmwaalyɨla! 27Yɨ gɨmɨ a'mwe' kwala tɨvi'na maaragɨnyaigɨ a'mwevɨ yagalya'maya'ne'na tusa'na bɨrɨbɨrya minna! Yɨ gɨmɨ kwala mamaaryaigɨ a'mwe' kwala maarya'na myawɨ'dɨnna! 28Kɨrɨ' gɨmɨ a'mwe' kwala maa'dɨza' sa' kayaa'nanyabwi jɨtheigɨ mɨ'. Nabaai sɨdɨraaya' kwala maa'naja' sa' kayaa'nanyabwi yade' mɨ'. Sare kɨrɨvɨ “A'mwe kwala maa'napɨjɨ yɨ sahɨyuraavɨ Kwaaka davakɨ taanginya nyɨma'nadɨka!” dena sarɨmɨnyɨ yɨhivainya'neinyɨ dɨwa. 29Nya'mweihi, sarevɨna nɨmɨ dara dɨwa. Yɨrɨkerɨ' yɨma'nadehaa' maalɨkegaa' yesɨma'nɨkegaakɨ. Yɨrɨka dathahaa' kuna warɨ'. A'mwe pwara a'mwe kɨnɨnnakera kumɨ a'mwe maayarabɨ' Gotɨyarɨna sɨmunyavɨ yuneba nayaa yɨpɨka! 30Nabaai a'mwe kɨnna dɨvanɨgasara kɨnna majɨvanɨgasarabɨ' Gotɨyarɨna nayaa wɨdaayɨpɨka! Nabaai a'mwe yɨlaaya yɨvanɨgasara yɨlaaya myɨvanɨgasarabɨ' Gotɨyarɨ nayaa wɨdaayɨpɨka! Nabaai a'mwe gɨlyɨvɨta mubamaa'manɨgasara kumɨ gɨlyɨvɨta maayarabɨ' Gotɨyarɨna nayaa mwaaibɨka! 31Yɨ a'mwe sahwara Kwaakevakɨneburana yadɨvɨsara yuya sahɨnɨngɨ yune'na mamarayɨpɨna! Sare' darevɨnyɨ. Kwaaka dathavakɨne yuya warɨke daza yɨwɨvanɨkengɨ. Sarevɨdaa'nyɨ yawɨta kwalaalya yawɨ'dɨvɨsaihi mamwaaibɨna!

32Nɨmɨre sɨmunya sarɨmɨnyɨne yɨ darengɨra. Yuyangɨna sɨmunya kwalaalya myawɨryadɨvɨsaihi dɨmwaalyɨla! A'mwe kwala mamaaryai sai Naangere sabwina sɨmunya nayaa yawɨ'delyɨ. “Naangerɨ wɨvu'nɨvanɨka sabwi yɨma!” dadelyɨ. 33Kɨrɨ' a'mwe kwala tɨvɨ maarakei sai Kwaaka davakɨne saburana sɨmunya kwalaalya yawɨ'delyɨ. Yɨ “Nɨmɨre a'mwevɨjɨ wɨvu'nɨvanɨka sabwi yɨma!” dadelyɨ. 34Sarevɨdaa'nyɨ gamɨre sɨmunyabwi mɨlɨkita yadewaalyɨ. Yɨ Naangerɨnajɨ gamɨre a'mwevɨnajɨ yuyawaarɨna yawɨ'delyɨ. Nabaai a'mwe' kwala mamaa'nyasɨ sɨdɨraayasɨ Naangere sabwina sɨmunya nayaa yawɨ'disawaalyɨ. “Nɨmɨre kɨlaakejɨkɨjɨ nɨmɨre kurya kwarɨjɨ tewaanya' Gotɨyare' yuna mwaalya'ne' sara yɨma'nana!” dadi' sara yawɨ'disawaalyɨ. Kɨrɨ' a'mwe kwala tɨvɨ maa'nɨke' sa' Kwaaka davakɨne saburana sɨmunya kwalaalya yawɨ'desɨ. Yɨ “Nɨmɨre kwalaangerɨjɨ wɨvu'nɨvanɨka sabwi yɨma!” dadesɨ. 35Nɨmɨ yagaala dɨvanɨge datha' yɨ sarɨmɨ tewaanya mwaalya'nevɨ yɨhɨgaimwagya'nesɨ. “Kwala maaryabwina sarɨmɨnyɨ nyɨgidɨravemwaaimudɨka!” dena yɨhɨthɨwa. Aawa. Sarɨmɨ nayaa yɨda'na mwaalya'nesɨ. Yadɨvɨ' yuyagaa' Naangerɨ duthaayide'na sarɨmɨre sɨmunyangɨ pɨnɨjɨ pɨburajɨ yaasɨwa' mwagi'namarya yɨhyadeihi mɨ'.

36Kɨrɨ' a'mwe pwai gamɨre sɨdɨraayavɨna dara yawɨraja' “Nɨmɨ kwainyɨne sɨdɨraaya' dahɨlakɨnɨkevɨ yɨda'nanyabwi mivanɨgeinyɨ. Yaasɨwa'na mwaaiheinyɨ,” nabaai sahwai yune mɨgɨnya naangei mena yɨma'naja' yɨ tusa' gamɨnyɨne pɨrɨ' minyadori gamɨ sara wanganaja' yɨ sai gannya sɨmunyaburɨ mɨdɨnana! Sarevɨ gamɨnyɨ kayaa'nanyabwi mɨ'. Kwala maa'nyɨna yɨka! 37Kɨrɨ' a'mwei gannya sɨmunyavɨ dɨragɨnna yawɨ'da sahwarɨ “Yarala! Sara ja!” wɨja'ne mwari yada gannya sɨmunyaburɨ gamɨ sai yɨnɨga wi'na maremwaalannei mwaaida yɨ sai gannya sɨmunyavɨ tɨvi'na dara yawɨramihakada “A'mwazɨdɨraaya nɨmɨnne dahɨlakɨnɨka sa' yaasɨwa' saba kuna mwaalana!” yɨ sa' tewaanyasɨra. 38Sarevɨ a'mwei gannya a'mwazɨdɨraaya' maaraja' yɨ sai tewaanyabwi yadelyɨ. Nabaai a'mwei kwala mamaaryajai yɨ taanginanyagaa'na sai tewaanaangebwi yadelyɨra.

39A'mwe kɨrɨvɨre kwalaangei gaala kuna mwaaidori yɨ sagaa' a'mwe sa' gannya a'mwelyɨ yɨraku'nemwaaidesɨ. Kɨrɨ' gannya kwalaangei se kabalojɨ a'mwe' ayahi pɨrɨ' yɨraku'nemwaalanne' mɨ'. Sa' “A'mwe pwarɨ kwala maa'nɨma!” dozɨ yɨ sa' kwala maa'nyɨna yade'na mwaaladesɨ. Nabaai sare kɨrɨ' mwasɨlaanyarɨ mamaa'nanna! Naangerɨnerɨ kwala maa'nana! 40Kɨrɨ' sabwina nɨmɨ sainyɨ dara yawɨ'manɨge. Taanginya neyɨvanɨke'na sa' yaasɨwa' kuna mwaalɨna yaja' yɨ gamɨ yɨlaaya naanga yada tewaanaanga yɨnɨke' mwaaladesɨ. Nɨmɨ Gotɨyare Kuryai kɨnɨnnakeinyɨ. Yɨ nɨmɨ kwainyɨjɨ Kurya Tewaanyai wɨlanyɨmwaalɨkeinyɨ dɨwa.

Currently Selected:

1 Koridɨ 7: byr

Highlight

Copy

Compare