1 Koridɨ 4

Gotɨyare wawɨnya' yadɨvɨsaraavɨnesɨ.

1Sare'na nemɨnyɨna Kɨraazɨtɨyarɨne yadaanyainaavɨna a'mwei dara yawɨrana! “Sahwara Kɨraazɨtɨyare wɨdaayadɨvɨsare. Yɨ Gotɨyare yagaala kuku'nya, nebulya' yoimavajalɨkurakya maremwaaidɨvɨ' wɨjɨwaakadɨvɨsare.” 2Sarevɨ maremwaaide wawɨnyavɨ kɨwɨnya' kɨnɨnnake' dara warɨkesɨ. Gyakwai maremwaala dare pwai kwarɨ bɨ'delyɨ “Maremwaalyabwina nayaa pada'galalɨmwaga'dei daaka!” 3Nabaai nɨmɨnyɨ sarɨmɨ kwaihi a'mwe pwara a'mweraavɨre kotɨya' maryawɨbwarya'neinyɨ yɨ nɨmɨ daza'na yawɨrɨdeinyɨ “Sa' maalɨtaayasɨra.” Nabaai nɨmɨ kwainyɨ nɨnnya sabwi maryawɨbwa'dɨ “Tewaanyasɨra,” dadɨnyainyɨ mɨ'. 4Sare' aaya kaavɨlya' daresɨ. Nɨmɨre wawɨnya'na yɨwetawakya aane pɨrɨ' kɨrɨ' myawɨ'nyainyɨ. Sare kɨrɨ' nɨmɨ wi'na dara madɨwɨna! Nɨmɨ a'mwe yɨda'maraangeinyɨra. Nɨmɨnyɨna maryawɨbwarya'neinyɨ daaka! Aawa. Sabwi sa' wawɨnya yune Naangeresɨ. 5Sarevɨdaa'nyɨ Naangei walaabathehaa'na sɨnnawɨ sarɨmɨ aane pɨrɨ' kɨrɨ' mamaryawɨbwapɨna! Walaabathehaa' sahwai sawɨsavɨ lɨka kɨma'nyawɨ yulyarɨke yɨ baakebanna marakadengɨ. Yojɨ sahwai yuyaraavɨre sɨmunyabwi ku'maayabanna marima'naabathelyɨ. Yɨ dazagaa' sarɨkɨ Gotɨyarɨ gazaizai yakevɨne tɨvɨkɨta maaradelyɨ.

6Nya'mweihi, sarɨmɨnyɨna yagaala dazangɨ ke'ba'na dɨwengɨ. Yɨ nɨmɨ sainyɨjɨ Aapolɨzalyɨ sainaarɨna ke'ba'na dɨwa. Sarɨmɨ saihi naarɨmɨnyɨna yawɨ'dɨvɨ' yɨ yagaala gavenna dɨnɨke mwavɨlapɨna! Nawɨ'nya yɨdasabwi dɨmɨdɨnyide'nanyɨ. Sara yadɨvɨ' pihadɨka nyɨpɨka! Wɨjɨwaakadɨvɨsarajɨya yaya pwarɨne'na makina, pwarɨne yaya' walamarakɨna yadɨvɨsa'na pihadɨka jideihi dɨngaka! 7Sare' darevɨnyɨ. Gɨmɨnyɨ a'mwe naangei aaihwai gwakakaigɨnaka! Gotɨyarɨ mamaaryagɨnya kɨnɨnnakeigɨre benɨngaka! Yɨ yuya sanna “Gotɨyai yanga nyɨjaavadeinyɨ daakajɨ,” yune gɨmɨnne yaya'na makimanɨgɨnya' be'na yɨvanɨgɨ! Gotɨyarɨ mamaaryadɨvɨtabaaibɨ' be'na yɨvanɨgɨ!

8Dahaa' sarɨmɨre kuryaraavɨ yunebanna tɨvi'na mena yɨhiwakeihi daaka! Dahaa' Gotɨyare yuya kɨnɨnnakeihɨrɨ kwaala pɨnɨngɨna mena mihɨmudaasɨwakeihi daaka! Nemɨ Apozelɨyainajɨ maneye'mwannyadɨvɨ' kingɨyaibɨ' Gotɨyarɨna maremwaaimanɨgasaihi daaka! Aka! Nɨmɨ sahɨrɨ'na nyɨvu'nɨwa'. Sarɨmɨ kingɨyaibɨsaihi maremwaaibɨzɨ kwajɨ “Apozelɨyaina sarɨmɨjɨ yɨhye'mwannamaremwalaana!” dona sara kamwalaadɨka! 9Sare' darevɨnyɨ. Nɨmɨ dara yawɨ'manɨge. Gotɨyai nemɨ Apozelɨyainaavɨ maalɨkeinaavɨ nemwaaiha'. A'mwe pwaraavɨ kwaakewɨ nemwaaihakeine. Nemɨ dareinabɨsaine. A'mwera kotɨya' mena yadɨvɨ' yɨ nemɨ nayaa balaade'na nejɨdavesaine. Sarevɨ yɨ sahwara neramakɨpɨ'de'na avaangwaasavɨ yuyaraavɨre tɨnnyarɨ ejelɨya kwaraavɨrerɨjɨ a'mwe kwaraavɨrerɨjɨ sara nemwaaihake'nanyɨ. 10Kɨraazɨtɨyarɨna wɨjɨwakadaanya'na “Sɨmumaayarera,” nedadɨvɨsaine. Kɨrɨ' sarɨmɨ “Kɨraazɨtɨyarɨna kunnakeinera,” dɨdɨvɨsaihɨlyɨ. Nemɨ waryaanyaina, yɨ sarɨmɨ dɨragɨnaangeihi. Sarɨmɨnyɨne yaya makidɨvɨsaihɨlyɨ. Yɨ nemɨnyɨne yaya mamakɨlyadɨvɨsaine. 11Yune dathahaa'na nemɨ wawɨnya yɨvanɨgo'na mɨjɨka mwaaimanɨgo. Yadaa nemɨre kulalyangɨ wana yaalɨka neyɨhɨrasɨ'manɨ'. Nabaai nemɨnyɨ kwaabɨhannyanna negainɨvanɨ'. Asa gwaamwadɨvɨ' nemɨnyɨ yaasɨwa' maina neramamarivanɨgasaine. Yɨ sara neyadaapi nemɨ anga nayaa mwaalya'neba pɨba aawa. 12Nemɨ saina pwaraavɨ nemɨre wapaayanna myɨdaanganyadaa yagɨyagɨ wawɨnya nebulya'na yune nennya asɨrajɨna yadaanyaine. A'mwera paasiyagaala nedangadaapɨjɨ yagaala nawɨ'nyanna ja'nawɨdadaanyaine. Sahwara nemɨnyɨ wana kayaa'na neyɨgaidaapɨri nemɨ kave nayaa tɨnnaina wanganna yadaanyaine. 13A'mwera walapapalakya yagaala kayaa'nanya yɨnahunya sawɨnne saza nedadaapɨjɨ nemɨ yagaalya kave wɨdadaanyɨ. Kwaaka yuyawɨnna nemɨ wana yaaye tɨrita'nanya nebulya' yɨma'nadaanyaine. Yuyaraavɨre gɨrɨkita'nanyaina mwaaiho. Nemɨ Apozelɨyainaavɨre wawɨnya yadaanyavɨ sara kuna mwaaiho yɨmabaka nabaai dahaa'nanyɨra.

14Yagaala daza sarɨmɨnyɨ wagɨla yɨhɨzaaya'ne' yɨda'mwe mɨ'. Aawa. Nɨmɨre kaimɨraayaihɨrɨna tewaanya nyɨvu'nɨvanɨke'na yɨ “Kumɨre sɨmunya nɨmɨ yawɨrarɨlaaya yɨma!” dena yɨda'mwengɨ. 15Sare' darevɨnyɨ. Kɨraazɨtɨyarɨ wɨlamwaaihasavɨ nebulya'na sɨrɨgihɨvaanga kwala naanga naangera kɨnɨnnakeihi mwaaibɨzaihi kɨrɨ' sɨrɨnɨmaanga kwalaalyara maayaihɨlyɨ. Aawa. Gave pwalyɨ. Darevɨnyɨ. Nɨmɨ yagaala tewaanya' yɨhɨzɨwaakevɨ Kɨraazɨtɨyai Jizaazarɨ wɨlamwaaidɨvɨsaihɨrɨne sɨrɨnɨmaangeinyɨ yɨma'neinyɨ gaveinyɨ. 16Sarevɨdaa'nyɨ dara dɨhaa'bwata yɨhima! Sarɨmɨnyɨne ke'ba'nanyainyɨ nɨmɨre sabwina lɨmwadɨvɨ' jamarila! 17Yɨ dazahɨrɨsavɨna sarɨmɨnyawɨnna Timotirɨ marayɨhyasaabɨwelyɨ. Sahwai Kɨraazɨtɨyarɨne nɨmɨre kaimɨraayarɨna tewaanya nyɨvu'nadelyɨ. Naangerɨna lɨmwannɨkelyɨ. Sahwai nɨmɨ Kɨraazɨtɨyarɨ wɨlamwaaiheinyɨre tuta mɨdɨdɨnyangɨ sarɨmɨre sɨmunyavɨ ayahi maradɨhaa'bwata yɨhyathelyɨ. Anga yuyabanya yuya Kɨraazɨtɨyare kusɨlaanyavɨya gazasavɨ nɨmɨ wɨjɨwaakadɨnyabaaibɨ' nɨmɨre sasare dazabwina yɨhɨthathelyɨ. 18Sarɨmɨjɨya pwara “Nemɨnyawɨnna Polɨ mabi yaka maneyavada'galyɨ yadelyɨra,” yawɨ'dɨvɨtabaaibɨ' pihadɨka yeva kunnya yaya munyaba makinyɨna yɨwaasare. 19Kɨrɨ' Naangei sɨmunyavɨ sara yawɨraja' sarɨmɨnyawɨnna maalɨkegaa' bɨdeinyɨ. Bi'mava'mujɨ pihadɨka yadɨvɨsaraavɨre yagaala sannanɨku' yaamɨjɨ wɨ'nɨde' gave' mɨ'. Aawa. Kumɨre dɨragɨnya' yɨdakwasanganɨdeinyɨ. 20Sare' darevɨnyɨ. Gotɨyai nemaremwaaidevɨ yune yagaala gave' kadɨka mu'nyadaanyɨ. Aawa. Dɨragɨnaange' yadengɨjɨ tɨnna wangadaanyaine. 21Sarɨmɨ be yaawiabwina yɨhɨvu'nɨvanɨ'? Dare da'na dahayɨhɨvu'nɨwa'? “Yɨsarɨ' nemɨnyɨ yavada'gala neya'nerɨ' lɨmwagozɨ nemɨnyawɨnna bathe'nanyɨ.” Dara dahayawɨ'mwaa'? “Nemɨ saina kyavada'gainawaajɨ sahwai tɨnna nengada kale yada kwaamu'nanyabulyɨ nemɨnyawɨnna bathe'nanyɨ.”

Currently Selected:

1 Koridɨ 4: byr

Highlight

Copy

Compare