1 Koridɨ 3

Kɨraazɨtɨyare kusɨlaanyavɨyara Koridɨ mwaalyara jaapainesaraavɨnesɨ.

1Nya'mweihi, nabaai nɨmɨ a'mwe Kurya Tewaanyai kɨnɨnnakeraavɨ wɨdadɨnyabaaibɨ' mihɨzɨ yɨwɨneinyɨ. Aawa. Sɨmunya sɨnnawɨnya' kɨnɨnnakera kɨlaakejɨkɨya yawɨsa maremwaalɨkeraavɨ wɨdadɨnyabaaibɨ' yɨhɨthɨweinyɨ. Kɨraazɨtɨyarɨ wɨlamwaaihata bwaranyarabɨsaihɨrɨ yɨhɨthɨweinyɨ. 2Nya'ne aamunya yɨhɨzaaveinyɨ. Wapaaya dɨragɨnya mihɨzaayeinyɨ. Sare' darevɨdaa'nyɨnyɨ. Dazagaa' wapaaya dɨragɨnya tɨka pi'maanganya ye'. Yune sare'na mɨ'. Aawa. Dahaa' kɨgaasɨ sarɨmɨ kuna mi yɨpɨneihɨlyɨ. 3Sare' darevɨdaa'nyɨnyɨ. Kɨlaakejɨkɨya yawɨsajɨyaihi kuna mwaaiha'. Darevɨnyɨ. Sarɨmɨjɨya pwai gya'mwerɨna tɨganaarya sabulyɨ yɨ nabaai maimaangebulyɨ sasare sabwi kuna yɨhwarɨ'. Sareyaba kɨlaakejɨkɨya yawɨsajɨyaihi midaaka! A'mweraavɨreburɨna kaanya yamaryadɨvɨsaihi midaaka! 4Yɨhɨthɨwe sare' aaya kaavɨlya' daresɨ. Yɨ sarɨmɨjɨya pwai dara dɨna “Nɨmɨ Polɨmɨreinyɨ.” Yɨ pwai dɨna “Nɨmɨ Aapolɨzareinyɨ.” Sana sana yɨvanɨga'. Yɨ sasare dazaburɨ sarɨmɨ Kwaaka davakɨyaihi kuna damwaaihava!

5Sarevɨdaa'nyɨ Aapolɨzai sai bewalaka! Polɨnyɨ sainyɨ bewainyaka! Naarɨmɨ sainaai yuna wɨdaayadasainaalyɨ. Naangei naarɨmɨnyɨ wawɨnya' sarɨ pɨrɨ'na pwainyɨ pɨrɨ'na nehɨzaavakabaaibɨ' wɨdaayadasainaai sara kyagoi naarɨmɨre yagolyavɨ sarɨmɨ Kɨraazɨtɨyarɨ lɨmwagaresaihɨlyɨ. 6Nɨmɨ tɨka wapaayavɨre wia burɨdeinyɨ. Aapolɨzai wia sangɨ aalya' wɨjaavakelyɨ. Sare kɨrɨvɨ Gotɨyaina yadaasɨ arɨwɨnya bilyadengɨ. 7Sarevɨ a'mwei tɨka wapaayavɨre wia burɨdei sai maalɨkelyɨ. Nabaai a'mwei aalya wɨjaavadei sai kwalyɨ maalɨkelyɨ. Naangeraai mɨ'. Aawa. Sai yadaasɨ arɨwɨnya bilyadei Gotɨyai sai gave sahwainanyai naangelyɨra. 8Yɨ a'mwei wia burɨdelyɨ yɨ a'mwei aalya wɨjaavadelyɨ saraai kɨrɨmɨre wawɨnyavɨna yune avaainanyaraalyɨ. Saraarɨdaa'nyɨ pwai tɨvɨkɨta pɨrɨ'na pwai pɨrɨ'na saraare wawɨnya yadisawaarɨna maarikaderaalyɨ. 9Sare' aaya kaavɨlya' daresɨ. Naarɨmɨ sainaai Gotɨyare avaaiwawɨnyainaalyɨ. Sarɨmɨ Gotɨyare wawɨnyaihɨlyɨ. Sahwai sarɨmɨnyɨ yɨvanɨkelyɨ.

Nabaai Gotɨyare anga mannɨkeihɨlyɨ. Sahwai sarɨmɨnyɨ yɨhɨmadɨthaakwadelyɨ. 10Gotɨyai nɨmɨnyɨna yanga gaimwangebwi nyɨjaavakevɨna anga majavɨne maremwaaide sɨdu'nakei yadevaaibɨ' nɨmɨ tɨvi'na lɨkɨleinyɨ. Sara lɨkɨlevɨ a'ba a'mwe pwara ye'mwannayɨlamadɨvɨsare. Sarevɨ nabaai sahwaraavɨ gazaizai mala nayaa yɨwannada nayaa ye'mwannayɨlamadana! Yagaala nawɨ'nya wɨjɨwaakana! 11Sare' aaya kaavɨlya' daresɨ. Angevɨya lɨkɨlya nebulya'nanyai mena warɨ'. Sai Jizaazai Kɨraazɨtɨyalyɨ. Nabaai lɨkɨlya pɨnɨ a'mwe aane pwai kwai yɨnɨga wi'na lɨkɨlannei mɨ'. 12Yɨ nabaai a'mwe pwai lɨkɨlya dazarɨ “Ange' munyawɨ yɨlamadɨma!” dazai golɨyajɨ madathei dɨngaka? Sɨlɨvaayajɨ madathei dɨngaka? Sɨla nawɨ'nya mubya naanga yadɨvɨsajɨ madathei dɨngaka? Nabaai yɨsajɨ madathei dɨngaka? Yannyajɨ dɨngaka? Kwavɨsajɨ dɨngaka? Kaabinnyajɨ dɨngaka? 13Yɨ a'mwera sara mabɨza' dɨvi gazarezare wawɨnya' ku'maayaba yɨma'naabathesɨ. Sare' aaya kaavɨlya' daresɨ. Kotɨya ya'negaa' yɨrɨkerɨ' yɨjɨwaainadesɨ. Yɨ dɨkevɨ wɨjalangasakade'nanyɨ. Dɨka daza' yawɨranganya'ne' a'mwe gazarezare wawɨnya' sara kanojɨ dara wɨjalangasakade' “O, ange' madakegaa' wawɨnya savɨne dɨragɨnya' sasare' daaka!” 14A'mwe pwai kwai lɨkɨlya dazarɨ nayaa madazavɨ dɨka manyɨ kyojɨ yɨ gamɨre wawɨnya'na tɨvɨkɨta nawɨ'nya' maaradelyɨ. 15A'mwe pwai gamɨre wawɨnyavɨ dɨka sa' kanasɨ'nojɨ yɨ sarei tɨvɨkɨta sa' mamaari yadelyɨ. Sare kɨrɨ' anga made gamɨ sarɨ Gotɨyai padaihasamaaradelyɨ. Kɨrɨ' angadɨkevɨ pwarɨ magiropalama'daanyabaaibɨ' dɨkevɨ kusawɨ Gotɨyai sarɨ padaihasamaaradelyɨ.

16Sarɨmɨ Gotɨyare anga tewaanyasɨra. Yɨ Gotɨyare Kuryai sarɨmɨnyɨ wɨlayɨhɨmwaalɨkeihɨlyɨ. Sarɨmɨ daza'na myawɨrijɨwaa'! 17A'mwe pwai kwai Gotɨyare anga tewaanya' kayaaka yɨgalajai yɨ a'mwe dazarɨ Gotɨyai kayaaka yɨgalakadelyɨ. Gotɨyare ange', sa' tewaanaange'nanyɨ. Gamɨresɨra. Daza' yɨ sarɨmɨ saihɨlyɨra.

18Aka, a'mwe aane pwai kwai gamɨ sarɨne'na kwaasɨ madɨnanna! A'mwe pwai sarɨmɨnyɨ tɨnnyabanyai dahaasa saburɨ mɨdɨnajai yɨ gannya sɨmunyavɨ “Nɨmɨ sɨmunya naangebwi kɨnɨnnakeinyɨ yɨma'nɨma!” dozɨ sahwai gɨnyɨwanna yojɨ Kwaakevakɨyaburɨna sɨmumaayai yɨma'nana! 19Sare' darevɨnyɨ. Gotɨyaryaba Kwaaka davakɨya sɨmunya yawɨta sabwi yɨ sa' sɨduta maaya navɨ'navɨkebulyɨ. Daza'na Gotɨyare bukuya' Gotɨyarɨna dara dɨnɨkevɨnyɨ.

“A'mwe sɨduta yawɨ'nɨkeinera,” dadɨvɨsara kwaasɨya yadaapɨjɨ

Kwaasɨya sabwi yɨnahunyabulyɨ Gotɨyai kayaaka yɨgaladelyɨ.

20Nabaai yagaala dare kɨrɨsɨ dɨnɨ'

“Naangei nayaa dara yawɨ'manɨ'

‘Sɨduta yawɨ'nɨkeraavɨre sɨmunya

Yɨ sa yaasɨwa'nanyangɨ.’”

21Sarevɨdaa'nyɨ a'mwe aane pwai kwai a'mweraavɨne yaya namakɨladɨka! Sare' darevɨnyɨ. Yuya yuya yɨ sarɨmɨnyɨnengɨ. 22Yɨ Polɨnyɨ dɨngaka? Yɨ Aapolɨzai dɨngaka? Yɨ Pitai dɨngaka? Yɨ Kwaaka datha' dɨngaka? Yɨ gaalyabwi dɨngaka? Yɨ baryabwi dɨngaka? Yɨ dahaa' warɨke dɨngaka? Yɨ dɨvi yɨma'nade dɨngaka? Ai, yuya sa, yɨ sarɨmɨnyɨnengɨ. 23Nabaai sarɨmɨ Kɨraazɨtɨyareihɨlyɨ. Sabaaibɨ' Kɨraazɨtɨyai sai Gotɨyarelyɨ.

Currently Selected:

1 Koridɨ 3: byr

Highlight

Copy

Compare