1 Koridɨ 5

Gɨrɨkita'nanyabwi Koridɨ mwaalyaraavɨ warake'nesɨ.

1Nɨmɨ nebwina dara wɨ'nɨwa. Koridɨ mwaalyara lɨmwadɨvɨsaraavɨ gɨrɨkita'nanyabwi warɨkesɨ. Yɨ nabaai gɨrɨkita'nanya sa' nabinyabulyɨ. Yɨ sasare sabwi ajɨmya yuyangɨyara mu'nyadɨvɨsara “Aala!” dadɨvɨ' yadɨvɨtabwi mɨ'. Sa' daresɨ. A'mwe pwai sarɨmɨjɨyai ganɨmaangere a'mwe' maarɨna. 2Sarelyɨyaihi mwaalɨna yadɨvɨta kɨrɨ' “Nemɨrebwi tewaanya gavesɨra,” dadɨvɨ' pihadɨka yadɨvɨ' sarɨnnya yaya munyaba yaasɨwa'na makinadɨvɨsaihɨlyɨ. Sare' mipɨna! Aawa. Kayaa'nanya sabwi yagalya'ma'na yapi sarɨmɨ kɨnna dɨzɨla! Yɨ “Nemɨ sasare sabwi yade sarɨ nemɨnyawɨdaasɨ wɨdasaana!” dapɨjɨ kɨnna dɨzɨla! 3Sare' darevɨnyɨ. Nɨmɨ sainyɨ sarɨmɨnyɨ menyaba mwaaideri kɨrɨ' nɨmɨre sɨmunya'na sarɨmɨjɨ mwaaidɨnyainyɨ mena maryawɨbwa'mwesɨ. Yɨ sarɨmɨnyaba mwaaihebaaibɨ' yɨ a'mwei sarei dazabwina “Sai kayaa'na wagɨla yadelyɨ,” dena tɨvi'na maryawɨbwa'mwesɨ. 4Nɨmɨ tɨvi'na dara dɨwa. Naanga Jizaazai Kɨraazɨtɨyarɨne dɨragɨnyavɨ a'mwe dazarɨ Saataanɨmɨna marɨmwangɨna jɨla! Yɨ sarɨmɨ yɨ'bwa'nawɨ'nadaapiyagaa' nɨmɨre kuryalyɨ nemɨre Naangei Jizaazare dɨragɨnyasɨ yɨhye'mwannamwaaladeihi 5Saataanɨmɨre maremwaalyabanna a'mwe dazarɨ marɨmwangɨna jɨla! “Gamɨre yawɨsa' yavada'galakojɨ Naangere yɨrɨkerɨkɨ Gotɨyai a'mwe dazare kuryarɨ padaihasamaarana!” dapɨjɨ dɨmarɨmwangyɨla! Saataanɨ daanga wɨjaavadevɨdaa'nyɨ gamɨre kɨlaakejɨkɨya yawɨsangɨ kayaaka yɨgalade'na duthaasɨla!

6Sarɨmɨ Koridɨ mwaalyaihi sarɨnnya yaya munyaba makinadɨvɨ' “Nemɨ yɨda'nanyainera,” dadɨvɨsaihɨlyɨra. Kɨrɨ' yaasɨwa'na sasara dadɨvɨsa' nawɨ'nyabwi mɨ'. A'mwe dadɨvɨta dare'na myawɨrijɨvanɨga'! “Yɨzɨya maalɨke' gɨrɨkula yuyavɨna lɨwɨnya mimwadesɨ.” Nabaai, sabaaibɨ' kayaa'nanya wanganakɨpɨja sarɨmɨnyɨ yunebanna nayɨhɨladawaradɨka! 7Sarɨmɨ “Bɨretɨya gaala mudɨke'na yɨzɨya maaya'neina mwalaana!” dapɨjɨ yɨzɨya aya kɨgaasa nayaa dɨmarasɨ'nyɨla! Yɨ yɨzɨya maayaihi mwaaihatabaaibɨ' sara dɨmwaalyɨla! Sare' darevɨnyɨ. Yɨ Kɨraazɨtɨyai nemɨnyɨne Pari'ma'munnevɨre sipɨzipɨyai nemɨre kayaa'nanyabwi marasɨ'nya'nei balya'nerɨ tamiravetabaaibɨ' nemɨnyɨne'na mena balakevɨ mudɨkeihi dɨmwaalyɨla! 8Sarevɨdaa'nyɨ nemɨ munnevɨ bɨretɨya yɨzɨya aya kɨgaasa maaya tɨka naana! Yɨ yɨzɨya sɨmɨlɨka wɨlya'nesɨ yɨzɨya wana kayaa'nanyasɨ tɨka manaanna! Aawa. Bɨretɨya mamimwannyɨke' nayaa naana! Yɨ daresɨ. Nemɨre sɨmunyavɨ yɨda'nanyabwi yunebanna newarana! Nemɨ yagaala nebulya'nanyanna nayaa daana!

9Pɨkarɨyɨkwiavɨ nɨmɨ sarɨmɨnyɨ yɨhithave. Dara de. A'mwe a'mwengɨ ata lɨmwadɨvɨsarajɨ nya'mwana madɨnyadɨvɨ' mye'mwannamwaaibɨnera! 10Nɨmɨ yuyaraavɨ wana yune nebulya' yagalya'mata'na majɨvanɨge. Yɨ a'mwe yuya Kwaaka davakɨyara a'mwengɨ ata lɨmwadɨvɨsaraavɨna dɨngaka? Tɨganaaryarajɨ kuka yɨpalamaa'dɨvɨsarajɨ saraavɨna dɨngaka? A'mwera kwaasɨya gotɨya yɨta, sɨla saraavɨrebwi mɨdɨdɨvɨsaraavɨna dɨngaka? Yɨ sarɨmɨ “Sasare saraavɨ nebulya'na yagalya'mavaana!” dɨpɨja' yɨ sarɨmɨ Kwaakevakɨdaasɨ nayaa jahalya'mayideihi daaka! Yuya saraavɨna myɨhɨzɨvanɨge. 11Nabaai kɨrɨ' nɨmɨ yagaalyavɨ aaya kaavɨlya' yɨhithave' yɨ sa' daresɨ. A'mwe pwai kwai sarɨmɨ “Kɨraazɨtɨyarɨne neya'mwela!” dadɨvɨsarɨ jahalya'mayɨla! Yɨ sarɨna a'mwengɨ ata lɨmwadei dɨngaka? Sai tɨganaaryai dɨngaka? Sai kwaasɨya gotɨya yɨta, sɨla saraavɨrebwi mɨdɨdei dɨngaka? Sai bɨraiyagaala dadei dɨngaka? Sai nada yɨmaka widei dɨngaka? Sai gɨlyɨvɨta a'mwe pwaraavɨrengɨ mwagi'nadei dɨngaka? Yɨ sasarebura yajai salyɨ sarɨmɨ nya'mwana mye'mwannayɨpɨna! Tɨka wapaaya a'mwe sasarelyɨ mye'mwannanɨpɨna! 12-13Sare' darevɨnyɨ. A'mwe mwasɨlaanyaraavɨ maryawɨbwarya'neinyɨ nɨmɨre wawɨnya' daaka! Sahwaraavɨ yune Gotɨyaina maryawɨbwaradere. Kusɨlaanyaraavɨ sarɨmɨ maryawɨbwa'dɨvɨsara midaaka! Yɨ sarɨmɨresɨ. Dara dɨnɨkabaaibɨ' jɨla! “Sarɨmɨ saihɨrɨdaa'nyɨ a'mwe kayaa'nanyabwi yaderɨ dɨmarasɨ'nyɨla!”

Currently Selected:

1 Koridɨ 5: byr

Highlight

Copy

Compare