1 Koridɨ 2

1Nabaai, nya'mweihi, nɨmɨ kwainyɨ sɨnnawɨ sarɨmɨnyawɨnna wawegaa' Gotɨyarɨne jalɨkurakya' yɨhɨzɨwaakadɨ yagaala sɨmunya yawɨrirɨkɨsajɨ mamakabyeinyɨ. Sarɨmɨ “ ‘Ai, a'mwe sai sɨmunyavɨ nemɨnyɨ newavɨla'delyɨ,’ nadɨpɨdɨka!” dena sara mihɨzɨwaakyeinyɨ. 2Sare' aaya kaavɨla daresɨ. Sarɨmɨnyawɨnna mwɨyagaa' nɨmɨ mena dara yawɨbwarayawɨramarake, “Sahwaraayaba Jizaazai Kɨraazɨtɨyarɨna sɨmunya' yune sahwarɨne'na nayaa yawɨrɨdeinyɨ. Yɨ yɨta yovihɨrarannɨkevɨ mararamarɨmwesarɨna nayaa yawɨrɨdeinyɨ. Sɨmunya aane pɨrɨ' kɨrɨ' yawɨrɨdeinyɨ mɨ'.” 3Yɨ nɨmɨ sɨnnawɨ sarɨmɨnyaba yɨhye'mwannamwaalegaa' nɨmɨ sainyɨ waryaanyainyɨ. Nɨmɨ “Gotɨyare wawɨnya naange' nayaa yɨwɨneinyɨ dɨngaka?” dadɨ wawɨnya sa'na lɨka naanga yadɨ bɨ'bɨta yadɨ yɨhɨzɨwaakeinyɨ. 4Nabaai yagaalya' yɨhɨthadɨnyasɨ nɨmɨre yɨhɨzɨwaakadɨnyasɨ yɨ dazawaai a'mwe sɨmunya yawɨ'nɨkeraavɨre yagaalyaburɨ mihɨzɨwaakye. Nɨmɨre sɨmunya savɨ sarɨmɨre sabwi marima'nya ya'nevɨ mihɨzɨwaakye. Aawa. Kurya Tewaanyai gannya dɨragɨnyavɨ yɨhibwarɨdaakwakesɨ. 5Kɨraazɨtɨyarɨ lɨmwagya'neihɨrɨna waryaanyaibɨsainyɨ mwaale. Yɨ nɨmɨ “A'mweraavɨre sɨmunya saburɨ sarɨmɨ nebulya'na lɨmwagata nyɨpɨdɨka! Aawa. Yune Gotɨyare dɨragɨnyavɨna lɨmwabɨka!” dena sara yɨhyeinyɨ.

Gotɨyare Kuryai sɨmunya nejaavanɨke'nesɨ.

6Sara yɨhɨthɨwe kɨrɨ' a'mweraavɨ Gotɨyare sabwi dɨragɨnya mena yɨvaimwannɨkeraavɨ nemɨ sɨmunya yawɨ'nɨke' wɨjɨwakadaanyaine. Sare kɨrɨ' sa' a'mwe dahaasɨyaraavɨre sɨmunya yawɨta' mɨ'. Nabaai dahaasara maremwaaidɨvɨta sahwaraavɨre sɨmunya yawɨta' mɨ'. Dahaasara yɨwɨya'nere. 7Aawa. Nemɨ Gotɨyare sɨmunya' wɨjɨwakadaanyasɨ. Yagaala daza' Gotɨyai lɨka yulyaryaakesɨ. Daza' nebulya' yoimavajalɨkurakyavɨnanyasɨ. Gotɨyai Kwaakeva' mwakyaakegaa' yɨ sahwai sɨmunya daza' mena dahɨlakakelyɨ. Nemɨ byaanna dɨragɨnyavɨ nawɨ'nyavɨ mwaalya'ne'na sara dahɨlakɨna yakelyɨ. 8A'mwe dahaasaraavɨ maremwaaidɨvɨta sarajɨya aane pwai kwai sɨmunya savɨ aaya kaavɨla dazavɨ yawɨramaa'nɨkei mɨ'. Sare' dɨwevɨ aaya kaavɨlya' daresɨ. Sɨmunya sa' yawɨ'nɨkara mwaaibɨzɨ kwajɨ yɨ sahwara Naangei Sɨgunyavɨyai byaanna dɨragɨnya' kɨnɨnnakerɨ yɨta yovihɨrarannɨkevɨ mamararamarɨmwi kipɨdɨka! 9Aawa. Sahwara savɨna myawɨryesara yeta dazanna Gotɨyare bukuyavɨ sanna dara dɨnɨkabaaibɨsasɨ.

Pɨnɨngɨ tɨnnyai mwanganyaja

Nabaai kadɨki' mu'nyaja

A'mweraavɨ sɨmunyangɨ mima'nyaja

Gamɨnyɨna tewaanya wɨvu'naderaavɨne

Nabaai sahwaraavɨ wɨgaimwagya'neraavɨne

Gotɨyai mena yovɨrawakakengɨ.

10Sare' aaya kaavɨlya' daresɨ. Yɨ gamɨre Kuryarɨ nevu'nadeinaavɨna Gotɨyai lɨka yulyaryaake neyɨbwarɨdaakwakengɨ. Sare' aaya kaavɨlya' daresɨ. Kurya Tewaanyai kaavɨla yuya sangɨ wɨjalangasakadelyɨ. Yɨ Gotɨyare sabwi nemɨnyɨ lɨka mena yulya'de sangɨjɨ Gotɨyare sɨmunyavɨ wɨjalangasakɨwaidaawadelyɨra. 11Sare' darevɨnyɨ. A'mwe pware sɨmunyaburɨ be a'mwei yawɨrangadelaka! Aawa. A'mwe dazare gannya kuryaina, sai gamɨnyɨ kusawɨ wɨlamwaaide sarei yawɨrangadelyɨ. Sabaaibɨ' Gotɨyare sɨmunyabwi yawɨrangadei a'mwe pwai mɨ'. Aawa. Gotɨyare gannya Kuryaina gave sahwaina yawɨrangadelyɨ. 12Yɨ nemɨ Kwaaka davakɨya sɨmunya mamaaryo. Aawa. Gotɨyaryawɨdaa'nya sɨmunya Kuryarɨ maarolyɨra. Yɨ Gotɨyai nemɨnyɨna “Sahwaraavɨna yange'na wɨjaave yuya gaimwanga sanna yawɨrangabɨka!” daka kaneya' Kurya sahwarɨ maarolyɨra. 13Yɨ gaimwanga dazangɨ nemɨ yagaalya' wɨdadaanyɨ. A'mweraavɨre sɨmunyabwine yagaalya neyɨwɨryadɨvɨsangɨ wɨdadaanya mɨ'. Aawa. Kuryare sɨmunyabwine yagaalya neyɨwɨryadengɨ wɨdadaanyangɨra. Kurya Tewaanyai yagaalya nejaavadejɨ Kuryare nebulyanna wɨjɨwakadaanyaine. 14A'mwe kwai, Kurya Tewaanyai maayai Gotɨyare Kuryare yagaalya maa'dei mɨ'. Sare' aaya kaavɨlya' daresɨ. Sai dara yawɨ'delyɨ “Daza'na yagaala sɨmumaayasɨra.” Yune Gotɨyare Kuryai negaimwada nayaa yawɨbwarama'daanya'na dazai Kurya Tewaanyai maayai dazavɨre aaya kaavɨlya' myawɨranganyɨ yannelyɨ. Myawɨranganyɨ yanne'na “Sɨmumaayasɨra,” sara yawɨ'dei. 15Kɨrɨ', pɨrɨ' daresɨ. A'mwei Kurya Tewaanyai kɨnɨnnakei sai yuyangɨ nayaa yawɨbwarangadelyɨ. Pɨrɨ' daresɨ. A'mwe aane pwai kwai Kurya Tewaanyai kɨnɨnnakerɨna yɨnɨga wi'na yawɨbwarangadei mɨ'. 16Sare' darevɨdaa'nyɨnyɨ. Dara dɨnɨkabaaibɨkɨ

“Naangere sɨmunya' aaihwai yawɨrangadelaka!

Yɨnɨga wi'na yawɨrayannei aaihwalaka!”

Nabaai sare kɨrɨvɨ nemɨ Kɨraazɨtɨyare sɨmunya' kɨnɨnnakeine.

Currently Selected:

1 Koridɨ 2: byr

Highlight

Copy

Compare