1 Koridɨ 12

Kurya Tewaanyare sɨhumale dala pɨnɨnna pɨnɨnnanyannesɨ.

1Nya'mweihi, nyɨda'mwa'daasa'na Kurya Tewaanyai yanga nejaavade sanna sarɨmɨ navɨka ya'na sɨmunyavɨ nɨmɨ “Aala!” dɨwa. 2Sarɨmɨ mena dara yawɨ'manɨga'. Sɨnnawɨ sarɨmɨ ajɨmya yuyangɨyaihi mu'nyadɨvɨsaihi kuna mwaaleva yɨ dazagaa' Saataanɨ kwaasɨgotɨyaraayawɨnna yagaala majadɨvɨsaraayawɨnna yɨhɨmwagi'namakwawakeihɨlyɨ. Sara yɨhyadaa'nyɨ sarɨmɨ lɨkadɨke' galarɨlavɨmwaaihɨnɨkeihi mɨdɨnna yesaihɨlyɨ. 3Sarevɨ nɨmɨ sarɨmɨnyɨna sɨmunya' dara yɨhɨzaavanɨge. Aane pwai kwai Gotɨyare Kuryai wɨlamwaaidei yagaala wɨdadei dara dannei mɨ' “Jizaazarɨ Dɨkevɨ Gotɨyai wɨmarasɨ'nya'nelyɨra.” Nabaai a'mwe aane pwai kwai dara majɨ yannelyɨra “Jizaazai Naangei.” Aawa. Kurya Tewaanyarɨ wɨlamwaalajai yɨ sai sara dannelyɨra.

4Kurya Tewaanyare sɨhumale dala pɨnɨnna pɨnɨnnanya jaapainya'ne warɨkengɨ. Sare kɨrɨvɨ sɨhumale sa yanga nejaavadei Kurya gave pwainanyalyɨra. 5Yɨ wɨdaaya dala pɨnɨnna pɨnɨnnanya jaapainya'ne warɨkengɨ. Naangei gave pwainanyarɨ yuya sa wɨdayadaanyalyɨ. 6Wawɨnya ya'ne dɨragɨnya dala pɨnɨnna pɨnɨnnanya jaapainya'ne warɨkengɨ. Sare kɨrɨ' Gotɨyai gave pwainanyai a'mwe yuyaraavɨna dɨragɨnya sa wɨjaavadelyɨ. Yɨ sahwai yuya saraavɨ yuya wawɨnya sa yɨnɨga wi'na yannelyɨra. 7Yuyaraavɨ gaimwagya'ne'na Gotɨyai gazarɨzarɨ Kuryare dɨragɨnya' marima'naabadelyɨ. Yange wɨjaavake ku'maayabanna yɨbwarɨdaakwadelyɨ. 8Sare' darevɨnyɨ. A'mwe kwarɨna Kurya Tewaanyai a'mweraavɨna sɨmunya tewaanyabwi yɨbwarɨdaakwia'ne dɨragɨnya' wɨjaavadelyɨ. Nabaai a'mwe kwarɨna Kurya gave pwainanya dazai yagaala wɨjɨwaakya'ne dɨragɨnya' Gotɨyare sabwina a'mwera nayaa yawɨramaapɨ'de'na sa' wɨjaavadelyɨ. 9Nabaai Kurya gave pwainanya dazarɨ a'mwe kwai dɨragɨnna lɨmwangebwi maaradelyɨ. Yɨ sahwai “Sasare' ya Gotɨyare dɨragɨnyavɨ yaanneinera,” dada sara yadelyɨ. Nabaai gave pwainanya Kurya dazarɨ a'mwe kwai nalaavɨnakeraavɨ nawɨ'nya yavada'galya'ne dɨragɨnya sɨhumale maaradelyɨ. 10A'mwe kwarɨna dɨragɨnyangɨ wawɨnya ya'ne wɨjaavɨna. A'mwe kwarɨna Gotɨyarɨ wɨ'nawɨjɨwaakya'ne dɨragɨnya' yanga wɨjaavɨna. Gotɨyare Kuryai yagaala wɨjaaya nedadɨvɨsaraavɨjɨ yɨmakera yagaala wɨjaaya nedadɨvɨsaraavɨjɨ sɨduta maryawɨbwaranganya'ne' a'mwe kwarɨna wɨjaavɨna. Yagaala ge gengɨ aaya kaavɨlya myawɨryade wɨja'ne' a'mwe kwarɨna wɨjaavɨna. Yagaala ge gengɨ aaya kaavɨlya myawɨryade marija'ne' a'mwe kwarɨna wɨjaavɨna. 11Yune Kurya gave pwainanya dazai sɨhumale yuya daza marima'naabya'nei yadelyɨ. Yune gannya sɨmunyavɨna mɨdɨdehaa' yanga pɨrɨ' a'mwe pwarɨna yɨ yanga pɨrɨ' a'mwe pwarɨna sana sana maryawɨbwa'devaaibɨ' jaapaidelyɨ.

Nemɨ yuyaina kɨlaaka gave pɨjɨ'nanyajɨkɨyainaavɨnesɨ.

12Gotɨyare Kuryai dɨragɨnya yanga nejaavade sare' darevɨnyɨ. Kɨlaakejɨkɨne ke'ba'nanya' daresɨ. Kɨlaaka sajɨ' gave pɨjɨ'nanyajɨ' yaka kɨrɨ' a'mwe pwarɨ kwalaalya warɨkejɨkɨ. Yɨ kwalaalya warɨka kɨrɨ' sa yuya kɨlaaka gave pɨjɨ'na warɨkejɨkɨ. Sasarebaaibɨ' Kɨraazɨtɨyai kwai kɨlaaka gave pɨjɨ'nanyai kwai kwalaalya kɨnɨnnakei mwaalɨkelyɨ. 13Sare' darevɨnyɨ. Kurya gave pwainanyai bavɨtaazɨya' neyakevɨdaa'nyɨ kɨlaaka sajɨ'na gave pɨjɨ'na yɨma'noinera. Yɨ Juya pwara Gɨrikɨya kwara, yɨ yaasɨwa'wawɨnya pwara kumɨre wawɨnya maremwaaidɨvɨta kwara, yɨ nemɨ geina geina kɨlaaka gave pɨjɨ'na yɨma'noinera. Nabaai Kurya gave pwainanyarɨ aalya'bɨsarɨ yuna nya'neinaavɨna sahwarɨ nejaavakeinera.

14Sare' darevɨnyɨ. Kɨlaakejɨ' sajɨ' gave pimagɨnya'nanyajɨ' mɨ'. Aawa. Kwalaalyɨmagɨnya kɨnɨnnakejɨkɨra. 15Yɨ sɨvɨlya' dara daza' “Nɨmɨ ata'nyɨ mɨ'. Sarevɨ yɨ nɨmɨ kɨlaakejɨkɨya pimagɨnya'nyɨ mɨ',” yɨ sarevɨna daza' kɨrɨ' sa' kɨlaaka pimagɨnya' kuna waradesɨ. Yagaala sare' daza'na mɨ'. 16Nabaai kadɨki' dara daza' “Nɨmɨ tɨnnainyɨ mɨ'. Sarevɨdaasɨ nɨmɨ kɨlaakejɨkɨya pimagɨnyainyɨ mɨ',” yɨ sarevɨna daza' kɨrɨ' sɨ' kɨlaaka pimagɨnyɨ' kuna waradikɨ. Yagaala sarevɨna mɨ'. 17Kɨlaaka yuyajɨ' sajɨ' yune tɨnnyainanyai warajɨ kwajɨ kadɨka gatha'dara ku'nadɨkejɨkaka! Kɨlaaka yuyajɨ' yune kadɨki'na yɨma'najɨ kwajɨ tɨrɨnyavɨ gatha'dara kwinnadɨkejɨkaka! 18Kɨlaakejɨ' sasarejɨ' mɨ'. Aawa. Gotɨyai sɨmunyavɨ sara yawɨrakabaaibɨ' kɨlaakejɨkɨ pimagɨnya gazarɨzarɨ nayaa wakaka yuya kumɨ sangɨ kumɨrebanna wakakejɨkɨ. 19Nabaai kɨlaaka yuyajɨ' yuyɨmagɨnya avaala pimagɨnya' yɨma'najɨ kwajɨ yɨ kɨlaaka nebulyajɨ' gawɨ warɨkejɨkaka! 20Kɨrɨ' sasare' mɨ'. Aawa. Kɨlaaka pimagɨnya kwalaalya kɨnɨnnakejɨkɨ. Sara yaka kɨrɨ' kɨlaaka gave pɨjɨ'nanyajɨkɨ. 21Nabaai tɨnnyai asɨrɨ yɨnɨga wi'na wɨdannei mɨ' “Yɨ gɨmɨ mwarija' gaveinyɨ warɨdeinyɨ wikɨra.” Nabaai mɨnyagɨnya kɨrɨ' sɨvɨlyavɨ wɨdanne' mɨ' “Gɨmɨ mwarija' nɨmɨ gave'nyɨ warɨde'nyɨ wikɨra.” 22Aawa. Kɨlaaka pimagɨnyanna nemɨ yawɨ'daanya “Kumɨ dɨragɨnya mɨ',” daza mwaryadori yɨ kɨlaakejɨ' nawɨ'nya waradezɨ' mɨ'. Aawa nebulyasɨ. 23Yɨ nemɨre kɨlaaka pimagɨnya nemɨ yawɨ'daanya “Kumɨ waryaanyangɨ. Maalɨkengɨ,” nemɨ yɨwaala naanga nayaa baazɨ'ma'nadaanyɨ. Nabaai kɨlaaka pimagɨnya “Nawɨ'nya mɨ'. Sangɨna majadaanyangɨ,” wagɨla mamaarya'neina nemɨ yuyagaa' yulyakadaa nawɨ'nya maremwaidaanyaine. 24Nemɨre kɨlaaka pimagɨnya nawɨ'nyangɨna sarebwina mugainyadengɨ sara myadaanyangɨ. Aawa. Gotɨyai yuya kɨlaakejɨ' ye'mwagakya yakelyɨ. Yɨ kɨlaaka pimagɨnya' yɨ savɨne yaya' kwaakebanna warɨke' yɨ savɨne yaya' munyaba naanga makidelyɨ. 25Sara yade sa' yɨ kɨlaakejɨ' pimagɨ pimagɨ najaapainadɨ'de'nanyɨ. Aawa. Yuya kɨlaaka pimagɨnya yuya kɨlaaka pimagɨnyangɨne'na avaaina nayaa maremwaaibɨza sara yɨpɨ'de'nanyɨ. 26Nabaai kɨlaaka pimagɨnya' daanga wɨvɨnaja' kɨlaaka yuyajɨ' daanga yunewɨnna bavɨnɨgulɨna yadezɨkɨ. Nabaai kɨlaaka pimagɨnyavɨne yaya' munyaba makɨlaja' kɨlaaka yuya pimagɨnya sa yɨlaaya ye'mwannamaaradezɨkɨ.

27Yɨ sarɨmɨ saihi Kɨraazɨtɨyare kɨlaakejɨkɨra. Yɨ sarɨmɨ yuyaihɨre gazaigɨzaigɨ gamɨre kɨlaaka pimagɨnyajɨ'gɨnyɨ. Yɨ yuyaihi pimagɨnyajɨkɨ. 28Nabaai Gotɨyai Kɨraazɨtɨyare kusɨlaanyavɨ pwaraavɨ wakakelyɨ. Aaya munyabanyara Apozelɨyara Naangei Wɨdaasadera, ayawɨdaasara Gotɨyarɨ wɨ'nadɨvɨ' a'mweraavɨ wɨjɨwaakya'nera, dahasaai dahaasara wɨjɨwɨrya'nere. Sahwaraavɨ dɨvidaasara dɨragɨnyangɨ ya'nera, ayahi dɨvidaasɨ nalaavɨnakeraavɨ tewaanya yavada'galya'nera, yɨ a'mweraavɨ gaimwanga ya'nera, yɨ wawɨnya dala pɨnɨnna pɨnɨnnanyangɨ maremwaalya'nera, yɨ yagaala nabinabinya myawɨryadɨvɨ' kɨrɨ' ja'nera. 29Gatha'darevaka! Yuyara Apozelɨyara daaka! Yuyara Gotɨyarɨ wɨ'nawɨjɨwaakadɨvɨsara daaka! Yuyara wɨjɨwɨryadɨvɨsara daaka! Yuyara dɨragɨnya ya'ne dɨragɨnya' kɨnɨnnakera daaka! 30Yuyara nalaavɨnakeraavɨ nawɨ'nya yavada'galya'ne yanga kɨnɨnnakera daa! Yuyara yagaala myawɨryara dadɨvɨsara daa! Yuyara yagaala sa yɨnɨga wi'na maridadɨvɨsara daa! Aawa. 31Sare kɨrɨ' yanga naanga sanna “Dɨragɨnna yawɨramaraana!” dadɨvɨ' dɨmwaalyɨla!

Tewaanya wɨvu'nadevurɨnesɨ.

Yɨ dahaa' gave pɨrɨ'nanyabwi nebulya'nanya nawɨ'nyaangebwi sɨnnawɨnyabwi davwi yɨhibwarɨdaakuma!

Currently Selected:

1 Koridɨ 12: byr

Highlight

Copy

Compare