1 Koridɨ 11

1Nɨmɨ kwainyɨ Kɨraazɨtɨyarɨ yawɨrangadɨ ke'ba'nanya sahwarɨ wɨmɨdɨdɨnyainyɨ. Sasarebaaibɨ' nɨmɨnyɨ nyawɨrangadɨvɨ' ke'ba'nanya sahwainyɨ dɨnyɨmɨdɨnyɨla!

Gotɨyarɨ yɨlaayagaa' a'mwe kawaaka yɨ'nadɨvɨsa'nesɨ.

2Sarɨmɨ yuyagaa' nɨmɨnyɨna yawɨ'dɨvɨ' yuya yagaala daza maa'dɨ yɨhɨzaavadɨnyabaaibɨ' nayaa lɨmwaga'dɨvɨsa'na yɨ nɨmɨ dɨwa. Sarɨmɨ tewaanya nebulya'nanyabwi yadɨvɨsaihɨlyɨ. 3Nabaai sare kɨrɨvɨ “Sarɨmɨ yagaala datha' yawɨpɨka!” sɨmunyavɨ yawɨ'manɨge. A'mwe gazaizare mɨnyagɨnya sai yɨ Kɨraazɨtɨyalyɨ. Yɨ a'mwevɨre mɨnyagɨnyai yɨ gannya a'mwelyɨ. Yɨ Kɨraazɨtɨyare mɨnyagɨnyai yɨ Gotɨyalyɨ. 4Nabaai a'mwe gazaizai gannya mɨnyagɨnyavɨ bwakɨnarojɨ pɨgaa' Gotɨyarɨ yagaala wɨdazai, yɨ pɨgaa' Gotɨyarɨne yagaalya' wɨ'nawɨjɨwaakajai, a'mwe dazai gannya mɨnyagɨnyavɨ wagɨla wɨjaawa'. Aaya kaavɨlya' daresɨ. Sara yajai gamɨre mɨnyagɨnyai Kɨraazɨtɨyarɨ bwakakaja'na pwarɨ kwaakewɨ mwaaladelyɨ. Kɨraazɨtɨyarɨ kwaakewɨ mwaaladei mɨ'. 5Nabaai a'mwe gazasa' gannya mɨnyagɨnyavɨ mabwakaki yaja' pɨgaa' Gotɨyarɨ yagaala wɨdaza', yɨ pɨgaa' Gotɨyarɨ wɨ'nawɨjɨwaakaja', sa' kɨrɨsɨ gannya mɨnyagɨnyavɨna (gannya kwalaangerɨna) wagɨla wɨjaawa'. Sare' darevɨnyɨ. A'mwe sare' a'mwe kayaa'nanyavɨna wagɨla wɨjaaya'ne'na mɨjata yuya davakwikwiryadɨvɨtabaaibɨ' avaaina yɨwa'. 6Sare' darevɨnyɨ. A'mwe' Gotɨyarɨ wɨdathehaa' gannya mɨnyagɨnyavɨ mabwakakya yaja' yɨ nabaai savɨ gamɨre mɨjasa' tu'na dawasɨ'nɨpɨka! Kɨrɨ' a'mwevɨre mɨjasa' tu'na dawasɨ'nya pɨrɨ' davakwikwirya kɨrɨ' yɨpɨja'na wagɨla nuvwa'nadɨ'de'na yɨ sa' gannya mɨnyagɨnyavɨ bwakɨnarana! 7Sare' darevɨnyɨ. Yɨ a'mwei gannya mɨnyagɨnyavɨ mabwakakanna! Sarei Gotɨyare ke'ba'nanya nawɨ'nyɨmaraangelyɨ. Gotɨyare byaanna dɨragɨnya' yɨjɨwaainadelyɨ. Sare kɨrɨ' a'mwe' a'mwere byaanna dɨragɨnya' yɨjɨwaainadesɨ. Sare' a'mwe' gannya mɨnyagɨnyavɨ bwakakana! 8Sare' darevɨnyɨ. Gotɨyai a'mwerɨ a'mwevɨre kɨlaakejɨkɨdaa'nyɨ myavɨkaryaa'. Aawa. A'mwevɨ a'mwere kɨlaakejɨkɨdaa'nyɨ yavɨkaryaakesɨ. 9Nabaai sare' darevɨnyɨ. Gotɨyai a'mwevɨna yawɨraka yavɨkaryaakai mɨ'. Aawa. A'mwerɨna “Sahwarɨ wɨgaimwagatheva!” daka yavɨkaryaakesɨ. 10Sarevɨ ejelɨyara tɨnna wanganya'ne' a'mwevɨre mɨnyagɨnyavɨ dɨragɨnya' kɨnɨnnake' mwaalana! Sa' a'mwerɨ dalaangewɨ mwaalɨkesɨ. 11Sare kɨrɨ' Naangerɨ wɨlamwaaihovɨ a'mwenna mwaaidɨvɨ' a'mweraavɨne maaya mɨ'. Yɨ a'mwerana mwaaidɨvɨ' a'mwengɨne maayara mɨ'. 12Sare' darevɨdaa'nyɨnyɨ. Gotɨyai a'mwevɨ a'mwere kɨlaakejɨsɨ yavɨkaryaakabaaibɨ' Gotɨyai sara dakakevɨna dahaa' a'mwevɨre kɨlaakejɨkɨ a'mwerɨ maa'desɨ. Yɨ Gotɨyai sai a'mwerajɨ a'mwejɨ pɨnɨjɨ sa yuyangɨ aaya kaavɨlyalyɨ. 13Sarɨmɨ saihi yagaala daza' nayaa dɨmaryawɨbwaryɨla! Yɨ yɨlaayagaa' a'mwe' gannya mɨnyagɨnyavɨ mabwakaki yojɨ Gotɨyarɨ wɨdaza', yɨ sa' nawɨ'nyabwi daaka! 14Nabaai nemɨ Kwaaka davakɨne a'mweinaavɨre sabwi yɨ sarɨmɨnyɨ dara yɨhibwarɨdaakuvanɨ' “Nabaai a'mwei mɨjata saamɨnyasɨyai yɨda'nanyai daaka! Wagɨla wɨvwa'manɨkei midaaka!” 15Nabaai a'mwe' mɨjata saamɨnyasɨya' yɨ mɨjata daza' gannya byaanna dɨragɨnya' midaaka! Gotɨyai gamɨre mɨnyagɨnyavɨ bwakɨnarya'ne' mɨjata saamɨnaange' nayaa wɨjaavakesɨ. 16A'mwe pwai kwai a'mwe mabwakɨnarya'ne sahɨrɨ'na “Gavamarasɨ'nyɨyagaala dɨma!” dazai, yɨ nɨmɨ dara wɨdɨdeinyɨ. Gotɨyarɨ yɨlaaya yaadehaa' nemɨ sasare sabwi kuneine. Nabaai Gotɨyare kusɨlaanyangɨyarajɨ sasare sabwi kunerera.

Naangei balakevɨne yawɨsa'ne aalya, wapaaya nadɨvɨsa'nesɨ.

17Sɨnnawɨ yɨhɨthɨwa. Tewaanya nebulya'nanyabwi yadɨvɨsaihɨlyɨ. Sarɨmɨnyɨne yaya' munyaba yɨhɨmakimwa. Kɨrɨ' dare'na sara myɨhɨzɨvanɨge. Sarɨmɨre yɨ'bwa'nawɨ'nya savɨna tewaanya kwalaalya mima'nyadengɨ. Aawa. Kayaa'nanya kwalaalya yɨma'nadengɨ. 18Sare' darevɨnyɨ. Aayagaa' nɨmɨ savɨdaasɨ da'mujɨyainyɨ. Sarɨmɨ Naangere kusɨlaanyavɨyaihi yɨrakuramwaaaidɨvɨ' yaasɨwa' mɨlɨkasamarya yadɨvɨsaihɨlyɨ. Nɨmɨ yagaala daza' sara wɨ'nɨvanɨge. Sara wɨ'nena yagaala dazavɨna maalɨ'na lɨmwamwa. 19Sare' darevɨnyɨ. Gotɨyai “Sarɨmɨnyɨdaa'nya pwaraavɨ nɨmɨ yawɨradahɨlakyara ku'maayabanna yɨma'naabɨpɨka!” kadozɨ sarɨmɨre tɨnnyarɨ sahwara tewaanyara mwaaibɨ'de'nanyɨ. 20Sarevɨdaa'nyɨ sarɨmɨ yuyaihi Naangerɨ yɨlaaya'na avaalyaba yɨ'bwa'nemwaaidɨvɨsagaa' Naangere wapaaya dɨnyide'ne wapaaya mɨ'. 21Sare' darevɨnyɨ. Sarɨmɨ yuyaihɨrɨ gazaizai yɨme'nya'bɨ' yada yɨ gannya wapaaya maa'da tɨka nadelyɨ. Sara yadɨvɨ' mye'mwannanyadɨvɨ' pwai mɨjɨ'na mwaidaasɨ yɨ pwai wapaayajɨ aalya waainɨya nyɨna yada yɨmaka widelyɨ. 22Gatha'darevɨnaka! Yɨ sarɨmɨ wapaaya aalya nya'ne ange kuneihi dɨngaka! Sarɨmɨ dara dahayawɨ'manɨga'! “Gotɨyare kusɨlaanya sa' yaasɨwa'nanyasɨra.” Yadɨvɨ' neya'mwe pwara wapaaya maayaraavɨna sarɨmɨ wagɨla wɨjaavanɨgasaihi daaka! Sa'na nɨmɨ yagaalya' gara yɨhɨthɨjɨwana! Nɨmɨ sarɨmɨnne yaya' munyabanna yɨhɨmakɨlɨjɨhyɨwa! Aawa! Yuya dazanna yadɨvɨsa'na sarɨmɨnne yaya' makɨlɨdeinyɨ mɨ'. Sarɨmɨnyɨ yɨhɨzɨdavɨdeinyɨ.

23Sare' darevɨdaa'nyɨnyɨ. Nɨmɨ Naangerɨ yagaala da' maarena sarɨmɨnyɨ mena yɨhɨzaave. Yagaala daza' yɨ daresɨ. Yɨ sawɨsavɨ Juthaazai Jizaazarɨ yɨkamaangeraavɨre asɨrɨ marɨmwangakegaa' yɨ dazagaa' Naanga Jizaazai bɨretɨya' maaraka 24Gotɨyarɨ, suya wɨdakegaa' gunyɨna yaka dara wɨda' “Datha' yɨ sarɨmɨnyɨneba nɨmɨre kɨlaakejɨkɨra. Nɨmɨnyɨna yawɨrya'neihi kuna sara jidevulyɨ.” 25Aya sahɨbaaibɨ'na kumɨ tɨvi'na nevegaa' yɨ sai kaapɨyai maarɨna yaka wɨda' “Kaapɨya dathai yɨ nɨnnya tawe' yagaala yɨhɨlɨmwagarɨka mudɨkesɨ. Gazagaasagaa' sarɨmɨ sahwarɨya' dɨnyidehaa' nɨmɨnyɨna yawɨrya'neihi nayaa sara jidevulyɨ.” 26Sare' darevɨnyɨ. Gazagaasagaa' nɨpɨjahaa' sarɨmɨ bɨretɨya daza' nadɨvɨ' yɨ kaapɨya dazarɨjɨ nadɨvɨ' yɨ dazagaasagaa' Naangei mena balake'na wibwarɨdaakwadɨvɨsaihɨlyɨ. Sarɨmɨ sana sana yɨwɨna yapɨjɨ yune gamɨ bya'negaa'nanyɨ.

27Sarevɨ yɨ nabaai a'mwe sɨmunya' nayaa myawɨryojɨyai Naangere bɨretɨya daza' yaasɨwa' tɨka maranajai Naangere kaapɨya dazarɨjɨ yaasɨwa' maranya yajai sai sa' dara yadelyɨ. Naangere kɨlaakejɨkɨnajɨ tawejɨkɨnajɨ kayaa'na yadelyɨ. Sara yaja dazavɨna yɨ gamɨ yɨwetawakya kɨnɨnnakelyɨ. 28A'mwei gannya sɨmunyavɨ nayaa yawɨramaarana! Tewaanya yavada'galayawɨrojɨ bɨretɨya daza' sai yɨnɨga wi'na nana! Yojɨ kaapɨyarɨjɨ wi'na nyɨna yana! 29Sare' darevɨnyɨ. Naangere kɨlaakejɨ'na nayaa mamaryawɨbwari yaja'na, “Sa' naangaangesɨra,” myawɨri yaja'na sai wapaayasɨ aalyasɨ tɨka yaasɨwa'na nyɨna yada sarei yɨwetawakya' maaradelyɨ. Yɨ sahwarɨ jɨdavadelyɨ. 30Sarevɨ sarɨmɨnyɨ a'mwe kwalaalyara wɨrɨta mwaaidɨvɨ' nalaaya kɨnɨnnakere. Nabaai pwara baryavɨ se mena wakasare. 31Tɨka manyagaa' nemɨre sɨmunyavɨ nayaa maryawɨbwaraaja' yɨ yɨwetawakya sa' neyɨma'nade' mɨ'. Nejɨdavade' mɨ'. 32Yɨ Naangei nemɨre sabwi maryawɨbwa'da yɨ kayaa'nanya' nerɨvɨkɨraja' yɨ daza' sai nemɨnyɨ marayɨda'mata neyɨvanɨkelyɨ. Sara neyaja sa' “A'mwe Kwaakevakɨyabulyɨyaraavɨjɨ maneye'mwannajɨdaya'nei nye'mwannajɨdavadɨka!” dozɨ sara neyavada'galadelyɨra.

33Nɨmɨre nya'mweihi, sarevɨ yɨ sarɨmɨ “Tɨka naajɨ,” yɨ'bwa'nemwaalapɨjɨ yuya pwaraavɨna nayaa pɨzɨ'gwa jemwaalyɨla! 34Nabaai pwarɨ mɨjɨka wɨyaja' sai gannya angevɨ nadelyɨ. “Nemɨnyɨ nanemaryawɨbwaradɨka!” dapɨjɨ sarɨnnya yɨ'bwa'nemwaalyagaa' nayaa sara jɨla!

Yagaala pimagɨnya kuna warɨkenna dɨvidaa'nyɨ sarɨmɨnyawɨnna bi'mava'mujɨ yɨ nɨmɨ yɨda'mawakɨdeinyɨ.

Currently Selected:

1 Koridɨ 11: byr

Highlight

Copy

Compare