1 Koridɨ 13

1Nɨmɨ Gotɨyare yagaalya' a'mweraavɨre yagaala dala pɨnɨnna pɨnɨnnanyangɨjɨ yɨ ejelɨyaraavɨre yagaala kɨnɨngɨjɨ myawɨryadɨnyangɨna a'mweraavɨ wɨdɨwɨja' kɨrɨ' sahwaraavɨna tewaanya manyɨvu'nyaja' yɨ nɨmɨ sareinyɨ beloya gɨrɨngɨ'devaaibɨsainyɨ. Gwarewa' jaka yaasɨwa'na yɨnnɨgodevaaibɨ' aaya kaavɨlya maayainyɨ waryaanyainyɨ wɨdɨdevaaibɨsainyɨ. 2Nabaai nɨmɨ Gotɨyarɨ wɨ'nadɨ pwaraavɨ wɨjɨwaakya'ne yange kɨnɨnnakeinyɨ mwaaimuja', yɨ yuya sɨmunya Gotɨyare nebulya, yagaala kuku'nya yoimavajalɨkurakya sa yawɨ'muja', yɨ yuya yawɨta pɨnɨ kɨnɨjɨ kɨnɨnnakeinyɨ mwaaimuja', yɨ nɨmɨ yawɨ'na “Gotɨyai mugunya sa makwannelyɨ,” sara wɨja'ne dɨragɨnaanga lɨmwanga nebulya'nanya' kɨnɨnnakeinyɨ mwaaimuja', sare kɨrɨ' a'mweraavɨna tewaanya manyɨvu'nyaja' yɨ sarevɨ saba sana yaasɨwa'nanyainyɨra. 3Yɨ nabaai nɨmɨ “Nɨmɨre yaya' munyaba makinɨma!” da'mujɨ nɨmɨre gɨlyɨvɨta yuya a'mwe gɨlyɨvɨ'maayaraavɨna yanga mudɨna yɨwɨja', yɨ nɨmɨ nɨmɨre kɨlaakejɨ'na “Gotɨyare yɨkamaangera dɨkevɨ maranyɨrapɨka!” dɨwɨja' marɨmwangɨnyɨna yɨwɨja', sare kɨrɨ' a'mweraavɨna tewaanya manyɨvu'nyaja' yɨ sarevɨ aane pɨrɨ' aane kɨrɨ' yɨnɨga wi'na nyɨgaimwagatheinyɨ mɨ'.

4A'mwe pwai pwaraavɨna wɨvu'nadei sai kwaamu'nanyabwi wiadelyɨ. Yɨ wɨvu'nade sai pwaraavɨ bwiwanna wɨgaimwadelyɨ. Yɨ sai pwaraavɨrennajɨ pwaraavɨreburanajɨ tɨganaarya myadelyɨ. Yɨ wɨvu'nade sai gamɨnne yaya' makinadei mɨ'. Yɨ sai pihadɨka yadei mɨ'. 5Yɨ sai kayaa'na mi, wagɨlyabwina yadei mɨ'. Yɨ sai yune gannyanna, gannyabwina sɨmunya kwalaalya yawɨ'dei mɨ'. Yɨ sai sɨmɨlɨka yarai widei mɨ'. Yɨ sai gamɨnyɨ kayaa'na wiadɨvɨta sanna ata magɨlyada sanna kuna yawɨ'dei mɨ'. 6Yɨ sai pwara kayaa'nanyajɨ yɨwetawakyajɨ yadɨvɨsanna yɨlaaya yadei mɨ'. Aawa. Nebulya'nanya yadɨvɨsanna yɨlaaya yadelyɨ. 7Yɨ sai gamɨnyɨ yuya kayaa'na wiadɨvɨta sabwi yarai tɨvɨkɨ'dei mɨ'. Yuyagaa' sai dɨragɨnna lɨmwaga'delyɨ. Yuyagaa' Gotɨyarɨna “Nyɨgaimwagana!” dada kave yemwaaidelyɨ. Yuya taanginya sangɨ dɨragɨnna daa'delyɨ.

8Gotɨyarɨnajɨ pwaraavɨnajɨ wɨvu'nya dazabwi yɨwawodevwi mɨ'. Aawa nebulyasɨ. Sabwi kuna waragodevulyɨ. Yɨ Gotɨyarɨ wɨ'nawɨjɨwaakadɨvɨsabwi Gotɨyai kunebwi wakadevulyɨ. Yɨ yagaala nabinabinyangɨ myawɨryadɨvɨ' dadɨvɨsabwi jɨ'mwannadevulyɨ. Yɨ sɨmunya tewaanyabwi yawɨramaa'dɨvɨsabwi Gotɨyai kunebwi wakadevulyɨ. 9Sare' darevɨnyɨ. Dahaa' nemɨ pɨmɨlɨ'na maalɨ'na yawɨrangamanɨgo. Nabaai Gotɨyarɨna pɨmɨlɨ'na maalɨ'na wɨ'nawɨjɨwaakɨvanɨgo. 10Sare' kɨrɨ' dɨvidaa'nyɨ yɨnɨga wi'nanyabwi yɨma'naabathehaa' yɨ dazagaa' Gotɨyai yuya pɨmɨlɨ'na maalɨ'nanya kune wakadelyɨ. 11Sɨnnawɨ nɨmɨ kaimɨraaya maalɨkeinyɨ kuna mwaalena yɨ dazagaa' kaimɨraayai dadevaaibɨ'na yagaalya' daheinyɨ. Nɨmɨ kaimɨraayai yɨbwakɨdevaaibɨ'na sara yɨbwakɨneinyɨ. Nɨmɨ kaimɨraayai sɨmunya' yawɨ'devaaibɨ'na sara yawɨreinyɨ. Yɨ nabaai a'mwe naanga mena yɨma'nena kaimɨraayamɨlɨkaavɨre sabwi mena yagalya'maveinyɨ. Yɨ sabwi kunebwi wakeinyɨ. 12Sare' darevɨnyɨ. Dahaa' Gotɨyarebura nayaa myawɨranganyɨvanɨgo. Yɨ sɨnɨmwavananya kayaa'nanyavɨ nemɨre sɨnnyɨ' kayaa'na yennadaanyabaaibɨ' nayaa myawɨranganyadaanyɨ. Dɨvidaa'nyɨ aayagaa' yɨ nemɨ Gotɨyare sɨnnyɨkɨ nebulya'na wanganaadehaa' Gotɨyarebura nebwina yawɨranganaadelyɨ. Dahaa' nɨmɨ pɨmɨlɨ'na maalɨ'na yawɨ'manɨge. Dɨvi gamɨ nɨmɨnyɨ nebulya'na nyawɨranganakabaaibɨ' nɨmɨ nebulya'na yawɨranganɨdeinyɨ. 13Dahaa' dɨvi dɨragɨnna lɨmwagasabulyɨ, Gotɨyarɨna yemwaalyabulyɨ Gotɨyarɨnajɨ pwaraavɨnajɨ wɨvu'nyabulyɨ dawaai data daza yuyagaa' waragothengɨ. Nabaai dawaai data sangɨya wana naangebwinanyabwi sa' yɨ Gotɨyarɨnajɨ pwaraavɨnajɨ nevu'nadevulyɨ.

Currently Selected:

1 Koridɨ 13: byr

Highlight

Copy

Compare