Isaya 30
30
Kusyoma ba-Egepita mbufubafuba buyo
1 #
Dt 29:19; Rom 2:5; 2 Tim 3:13 Maawe kubana bapapila! mbwaamba Jehova. Balalayigwa lulayo, pele taluzwi kulindime; balalivumbya cilivumbyo, pele taceensi ca-Muuya wangu; kuti baliyungizizye zibi atala lyazibi. 2#My 27:21; 1 Bam 22:7; Jer 21:2Banyamuka kuya ku-Egepita, pele tabana kubuzya makani kumulomo wangu, Balayanda kuliyumya munguzu zya-Farao akusyoma cenzule ca-Egepita. 3#Jer 37:5,7Lino inguzu zya-Farao nzeziyoomuusya bweeme, akusyoma eenzule ca-Egepita nkokuyoomulwisya insoni. 4Nekuba kuti basilutwe bakwe bali ku-Zoani, abatumwa bakwe basika aku-Hanesi, 5#Jer 2:36boonse balausa insoni nkaambo kabantu aba batakonzya kubagwasya. Tabagwasyi, tabakwe milimo, balausya bweeme buyo akuleta lusampauko.
Makani aakasinsimwa aabanyama ba-Negebi
6 #
Hos 8:9
Ngaaya makani aasinsimwa aabanyama ba-Negebi, Munyika yamapenzi ayamafwabi, mebajenwe balavu abasyuumbwa, munyingwe anzoka inkali iiuluka, balayumuna imbono zyabo amisana yambongolo, azintu zyabo ziyandisi balaziyumuna antunda zyankamele, bazitola kubantu batakonzya kubagwasya. 7#Jer 37:7Lugwasyo lwa-Egepita ndwabuyo, talukwe milimo pe, Nciceeco ncindamuulikila izina lya-Rahabu uukede buyo.
8Lino koya ukalembe acilembelo, ukagwale makani mubbuku, kuti kube ciibalusyo mumazuba aaciza mane kukabe kutamani. 9#Dt 32:20Nkaambo mbantu bapapila, bana babeja, bana bata yandi kuswiilila mulao wa-Jehova. 10#Jer 11:21; 1 Bam 22:13Balaambila balunguluzi kuti, Mutalungululi Abasinsimi balabaambila kuti, Mutatusinsimini zyakutapatila, amutwaambile majwi matete akubona zilengano zyakweena-ena; 11#Inc 13:8amuleye kuzwa munzila, mutole mugwagwa umbi; mutatwaambili limbi makani aa-Uusalala wa-Israyeli. 12Nkaambo kako mbuboobu mbwaamba Uusalala wa-Israyeli, Mbuli mbumusampaula aya majwi, akubika myoyo yanu kulunyansyo akulupapilo akusyoma nzizyo, 13lino oyu mulandu wanu uyooba mbuli lwaanzi luyanda kuwa; lulaboneka kujulu kubulambo, elyo kaba kaindi bulafwamba kuwa akumwaika ndilyonya. 14#Int 2:9; 2 Pet 2:4,5Lumwayo lwabo luli mbuli lumwayo lwanongo yamubumbi; ilapwayigwa pwa akutafwidwa luzyalo, aboobo akati katupanzipanzi takujenwe niluba lukaye lwakubweza mulilo kuciko niluba lwakutesya maanzi kumukalo,
15 #
Is 7:4; Int 81:11; Tus 1:24; Jer 44:16; Mt 23:37 Nkaambo mbuboobu mbwaamba Mwami Jehova Uusalala wa-Israyeli, Mukupiluka amukulyookezya momuti futulwe, Mukutontolelwa amulusyomo momuti jane inguzu. Pele mwakakaka. 16Mwakati, Pe, tulacija amabbiza, Nkaambo kako muyoocijisya. Mwakati, Tunooya butantide abanyama basiluno. Nkaambo kako abo bamutanda bayooba aluno. 17#Lev 26:8; Dt 28:25; Jos 23:10Bantu bali cuulu bayoocija cakuyoowa muntu omwe, muyoocija cakuyoowa bantu bosanwe buyo, mane mwasyaala mbuli kasamu kandembela amutwe wacilundu na mbuli citondezyo atala lyakalundu. 18#2 Pet 3:9; Int 2:12; Tus 16:20; Jer 17:7Jehova ulalindila kuti amufwide luzyalo. Ulalisumpula kuti amufwide buuya. Nkaambo Jehova ngu-Leza wabululami. Bali acoolwe boonse bamulindilila.
19Ncobeni nubantu ba-Zioni bakede mu-Jerusalemu, tamukooyoolila limbi. Uyoomufwida luzyalo aswiilila ijwi lyakukwiila kwanu. Alimvwe buyo, uyoovuwa ndilyonya. 20Nekuba kuti Mwami wamwaabila insima yamapenzi amaanzi aakufwaba, Mwiyi wanu takooyooyuba limbi pe; meso aanu ayoobona Mwiyi wanu. 21#Dt 5:32; Jos 1:7; 2 Bam 22:2; Tus 4:27Nkabela matwi aako ayoomvwa ijwi kusule lyako liti, Njeeyi inzila, amweende mulinjiyo, kufumbwa ciindi nimuleya nikuba kululyo nikuba kulumwensi. 22#2 Mak 31:1; Is 2:20Lino muyoosofwaazya civumbyo cazikozyano zyako zifulidwe zyansiliva acizululuzyo cazikozyano zyako zyangolida. Muyoozisowa mbuli zintu zisofweede akuzyaambila kuti, Kamuzwa!
23 #
Mt 6:33; 1 Tim 4:8 Lino uyootuma imvula zyakumeneka imbuto zyako nzyobyala munyika, akukupa cilyo, micelo yamunyika, cinone akuvula. Mubuzuba obo iŋombe zyako ziyoocela mumacelelo mapati. 24Abalo basune ambongolo zilima nyika ziyoolya malilu aalungidwe, aapupulwidwe acikombozyo acipupuluzyo. 25Nkabela atala azilundu zyoonse zilamfu atulundu toonse tusumpwidwe ayooba tulonga amifolo yamaanzi mubuzuba obo bwabujayi bupati, maanda malamfu naazoowa. 26#Is 60:19; Zek 2:5; Ciy 21:23Alimwi mumuni wamwezi uzooba mbubonya mbuli mumuni wazuba, amumuni wazuba uyoovuzigwa ziindi zili musanu azibili, ube mbuli mumuni wamazuba aali musanu aabili, mubuzuba obo Jehova naazooanga zyuumo zyabantu bakwe akusilika mabunda ngubayasidwe.
27Amubone! Izina lya-Jehova lilazwa kule, lilapya bukali bwakwe, lili abusi buuntumuka, Milomo yakwe ilizwile bukali, alwalo lulimi lwakwe luli mbuli mulilo uutentesya. 28#2 Tes 2:8Luyooyo lwakwe luyooba mbuli kalonga kapaya katanwa munsingo. Uyooseba bamasi mulusebo lwabuyo. Amumyeebo yabantu muyooba lumingwa lubaleesya. 29Muyooba alwiimbo, mbubonya mbuli ciindi camasiku ipobwe nililigwa, akukondwa kwamumoyo mbubonya mbuli ciindi cakuya busiba nyeele kuya kucilundu ca-Jehova Mandomba aa-Israyeli. 30Lino Jehova uyoocita kuti ijwi lyakwe lilemu limvwigwe akutondezya kuvukula kwakuboko kwakwe, abukali bwalunyemo lwakwe: amabangabanga aamulilo uutentesya, aguwo amvula impati acivulamabwe. 31Nkaambo ijwi lya-Jehova ndeliti pwaye mu-Asuri iwakali kuumya bantu musako. 32Nkabela zyuumo zyoonse zyamusako uubikidwe Jehova nguuti muumye, ziyooba anyeele atuntimbwa, Uyoobalwida munkondo azipaizyo zivukuzidwe. 33#Jer 7:31Nkaambo Tofeti wakabambwa kalekale. Wakabambilwa mwami, Wacilampya kunsi, abwaamba bwaco wabukomezya. Calundikilwa mulilo ankuni zinji loko, Luyooyo lwa-Jehova luli mbuli kalonga kasulufa, ndondulo lucikunka.
Currently Selected:
Isaya 30: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
