Isaya 28
28
Musinsimi ulatapatila zibi zyaba-Efraimu azyaba-Juda
1Maawe kumusini wakulisumpula wabasikukolwa ba-Efraimu! Maawe kudubaluba lipusama lyabulemu bwabo bweebesi likede amutwe wakuti lyamafuta lyabaabo bakoledwe bukoko. 2#Is 30:30; Ezk 13:11Amubone! Mwami ulijisi sintaze singuzu. Ulawaala bantu ansi kujanza lyakwe mbubonya mbuli iguwo lyacivulamabwe, mbuli iguwo liungisya, mbuli maanzi manji apayisya. 3Musini wakulisumpula wabasikukolwa ba-Efraimu uyoolyataulwa, 4adubaluba lipusama lyabulemu bwabo bweebesi likede amutwe wakuti lyamafuta liyooba mbuli inkuyu itaanguna kubizwa mainza naatana kusika, nkaambo muntu aibone buyo, niicili mujanza lyakwe ulailya ndilyonya.
5Mubuzuba obo Jehova wamakamu uyoobeda bantu bakwe bacisyeede musini wabulemu angala yabweebesi. 6Uyoobeda mubetesi muuya walubeta naakede mukubeteka, anguzu zyabaabo bapilusya basinkondonyina munkondo nibasika kale kumulyango wamunzi.
7 #
Lev 10:9; Dt 29:6; Tus 20:1; Hos 4:11; Is 56:10-12 Pele aba bantu abalo bapambuka munzila nkaambo kabukoko, baleya nkaambo kazyakunywa zikola. Bapaizi abasinsimi boonse bapambuka nkaambo kazyakunywa zikola. Bukoko bwabamenenena, zyakunywa zikola nzezibapambusya. Balapampalika mukubona kwabo akudadalika mukubeteka kwabo. 8Nkaambo intafule zyoonse zilizwide malusi amatombe, Taakwe antu aasalala pe.
9 #
Jer 6:10
Ino mbobani mbayanda kwiiyisya luzibo? Mbobani mbayanda kucita kuti bamvwisye makani? Sa mbabo balekede kunyonka lino lino? Sa mbabo bazwa kukasigwa kunkolo? 10Nkaambo mulao ulabikilwa mulao, mulao ulabikilwa mulao, kabala kalabikilwa kabala, kabala kalabikilwa kabala, kulaiyigwa buniini, kulaiyigwa buniini. 11#1 Kor 14:21Ii, ncobeni uyooambila bantu aba amilomo iimamauka amumwaambo umbi. 12#2 Mak 14:7Nkaambo mbombabo mbaakaambila kuti, Nceeci cilyokezezyo, cilyokezezyo cabakateede; nceeci cikatalusyo. Pele bakakaka kuswiilila. 13Nkaambo kako makani aa-Jehova ababeda mulao uubikilwa mulao, mulao uubikilwa mulao, kabala kabikilwa kabala, kabala kabikilwa kabala, kwiiyigwa buniini, kwiiyigwa buniini. Aboobo balaya kukulebwa kusule. Bayoopwayigwa akucegwa akujatwa.
14Lino amuswiilile majwi aa-Jehova nubantu basampaula, inywe numweendelezya bantu aba bakede mu-Jerusalemu. 15Mwaamba kuti, Tulitangene cizuminano alufu, acikalilo cabafu twaswiilizyanya aco; mitatula yakukoma yainda, tiikooyoosika kulindiswe pe, nkaambo twabika zyakubeja zibe macijilo esu, amulweeno motuyubide. 16#Matl 49:24; Mt 21:42; Inc 4:11; Ef 2:20; Int 118:22-23; Rom 9:33; 10:11; 1 Pet 2:6Nkaambo kako mbuboobu mbwaamba Mwami Jehova. Amubone! Ndasitikizya mu-Zioni ibbwe lyakuciswi, lisale, liyandisi, lilisimpikidwe nji, ayooyo uumusyoma takooyoofwambaana kucija. 17Nkabela njoobika lubeta lube ceelesyo, abululami bube cipimyo. Lino civulamabwe ciyookukula macijilo aazyakubeja, amaanzi ayootonta ciyubilo canu. 18Elyo cizuminano ncimutangene alufu ciyooloba, akuswiilizyanya kwanu alufu takukooyoojata pe. Mitatula yakukoma yainda buyo, muyoolyataulwa kulinjiyo. 19Kufumbwa ciindi niinda iyoomutola, nkaambo iyooinda cifumo cimwi acimwi, iyooinda isikati amasiku. Nkabela kumvwisya makani kuyooyoosya buyo. 20Nkaambo bulo bwafwimpa bwakulyolola, acilivumbyo caata cakulivumba. 21#1 Sam 3:11; Jer 30:14; Malo 3:33; Ezk 5:16; Lk 19:27; Rom 11:8; Jos 10:10-12; 2 Sam 5:20; 1 Mak 14:11Nkaambo Jehova uyoobuka mbwaakacita kucilundu ca-Perazimu, uyookalala mbwaakakalala mukuti lya-Gibeoni, kuti abeleke milimo yakwe, milimo iiyoosya, akumanisya incito zyakwe, incito iigambya. 22Lino mutasampauli pe, cita zyaanzyo zyanu zijatisye, nkaambo ku-Mwami Jehova wamakamu ndimvwide impuo yamamanino aakosokede aati sike kunyika yoonse.
23Amuswiilile, mumvwe ijwi lyangu. Amubike myoyo yanu, mumvwe majwi aangu. 24Sa mulimi ulalima buzuba boonse kuti abyale? Sa ciindi coonse uli mukusya akupwayaula makankala aakwe? 25Amana kubambasika, sa taminzi imbuto zyakezahi akumwaya imbuto zyakumini? Sa tabyali bulotwe mumifolo yabo abbaale mumitundulu amaila kumagolelo aamuunda? 26Ulibwene mbukweelede kucitwa, nkaambo Leza wakwe ngumwiiyisya. 27Nkaambo cisyu cakezali tacipolwi acipozyo, acisyu cakumini tacipwandwi ivwili lyaŋola pe. Kezahi cilaumisigwa cisamu, akumini cilaumisigwa musako. 28Sa bulotwe bulapwayigwa? Muntu tabulyatauli cakutaleka pe. Amana kwiinzya mavwili aaŋola yakwe amabbiza aakwe, tapwayauli limbi pe. 29#Int 40:5; Jer 32:19; Rom 11:33Aya makani aalo azwa kuli-Jehova wamakamu. Ulagambya mululayo lwakwe, abusongo bwakwe mbubotu.
Currently Selected:
Isaya 28: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
