Isaya 26
26
Lwiimbo lwakutembaula
1Mubuzuba obo kuyooimbwa lwiimbo olu munyika ya-Juda. Tulijisi munzi muyumu, Uyoobika lufutuko lube bulambo bwesu alubaya lwesu. 2#Int 118:19; Is 60:11; Ciy 21:13,24-27Amujalule milyango kuti musyobo uululeme uusyomeka unjile. 3Oyo uupangika moyo wakwe kulinduwe, uyoomukazika muluumuno lwakasimpe, nkaambo kakuti ulakusyoma. 4Amusyome Jehova lyoonse, nkaambo mu-Mwami Jehova momujenwe indomba iitamani. 5Nkaambo wafwiinsya abo bakede kujulu, nkukuti munzi uusumpwidwe, Wauselusya, wauselusizya ansi, wausisya akubulongo. 6Uyoolyataulwa zituta. Uyoolyataulwa zituta zyabacete azilyatililo zyabatengwana, 7#Dt 32:4Inzila yabaluleme njabulu-Jami. Uwe noluleme uleenzya baluleme munzila zyabo. 8#Int 18:22; Is 64:5; Mal 4:4; Lk 1:6Ee, ncobeni twali kukulindila, O Jehova, munzila yambeta zyako. Izina lyako aciibalusyo caka, nzenzizyo nziiyandisya myoyo yesu. 9#Int 63:6; 83:16; Lwi 3:1; Lk 6:12Moyo wangu wali kuku yandisya ciindi camasiku, Ncobeni moyo wangu uuli mukati kangu uyoofuma kukuyandaula, Nkaambo imbeta zyako niziboneka ansi, bantu baluwa balaiya bululami. 10#Muk 8:12; Rom 2:4; Int 143:10Muntu sizibi afwidwa buuya, taiyi bululami pe. Munyika yabulome uyoopilinganya milimo yakwe. Takoobona bulemu bwa-Jehova pe.
11 #
Job 34:27; Heb 10:27 O Jehova, ijanza lyako lilisumpwidwe, nekubaboobo tababoni. Babone busungu mbosungwaalila bantu bako, bafwe insoni. Ii, mulilo utente basinkondonyoko. 12O Jehova, kotubambila luumuno, nkaambo milimo yesu yoonse nduwe waicita mukati kesu. 13#Int 66:12O Jehova Leza wesu, bami bambi batali nduwe batweendelezya, pele nduwe olike ngutuyanda; tulate-mba ula izina lyako olike. 14Bafwa, tabakooyoopona limbi. Mbasangu, tabakooyoobuka pe. Nkaambo kako wabaswaya, wabanyonyoona, wajaya ciibalusyo cabo coonse. 15Wavuzya bantu bacisi, O Jehova, wavuzya bantu bacisi. Nduwe walemekwa. Wakomezya migaano yoonse yanyika.
16 #
2 Mak 33:12; Hos 5:15 O Jehova, mumapenzi aabo balibikide myoyo yabo kulinduwe. Baka-kukomba ciindi eco niwakali kubakoma. 17Mbuli mwanakazi uuminsi uuli kufwaafwi kutumbuka mbwaamvwa inzunto, alimwi ulalila mukuciswa kwakwe, mbubonya obo mbutwakabede kumeso aako, O Jehova. 18#Int 17:14Twakaminta, twakamvwa inzunto, pele ncitwatumbuka muuwo buyo. Tatuna kucita buvuni ansi, abantu bakede munyika tabana kuwa. 19#Is 25:8; Hos 13:14; Joh 5:28,29; Dan 12:2Bafu bako bayoopona, mitunta yangu iyoobuka. Amubuke, mwiimbe, inywe nobakede mubulongo, nkaambo mume wako uli mbubonya mbuli mume wamumuni. Nyika iyoobusya basangu bayo.
20 #
Matl 7:1; Int 30:5; 2 Kor 4:17 Amuboole nubantu bangu, munjile mumaanda aanu aamukati, mulijalile milyango yako, muyube kaindi kaniini, mane bukali bukamane. 21#Mik 1:3; Jud 1:14Nkaambo amubone! Jehova ulazwa kubusena bwakwe kuti abweedezye bantu bakede munyika mulandu wabubi bwabo. Ayalo nyika iyooyubununa bulowa bwayo, tiikooyoovumba limbi bajayidwe bayo.
Currently Selected:
Isaya 26: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
