Ezekieli 12
12
Citondezyo cakulibamba kuya mubuzike
1Lino ijwi lya-Jehova lyakandisikila, liti, 2#Mt 13:13; Is 6:9-10; Jer 5:21; Mk 8:18O mwana amuntu, ulikede akati kaluzubo lukataazya, bantu bajisi meso aakubona nekubaboobo tababoni, bajisi matwi aakuswiilila, nekubaboobo tabaswiilili, nkaambo nduzubo lukataazya. 3Lino uwe, O mwana amuntu, kolibambila impasya zyakutolelela mubuzike, uinke mubuzike ciindi casikati kantandambwene. Uleelede kwiinka mubuzike kuzwa kubusena bwako kuya kubusena bumbi kantandambwene. Ambweni bayoobika myoyo yabo kumakani, nekuba kuti nduzubo lukataazya. 4Gwisya impasya zyako ciindi casikati, mbuli impasya zyakutolelela mubuzike, kantandambwene, lino uwe omwini uleelede kwiinka ciindi cakumazuba kantandambwene, mbubonya mbubacita abo batolwa mubuzike. 5Donkola mubulambo kantandambwene, ukainde mpawo. 6#Is 8:18; Ezk 4:3Lino yumuna akuko lyako kantandambwene mumudima uusia mbi. Kovumba meso aako kuti utaboni nyika, nkaambo ndakubika kuti ubede luzubo lwa-Israyeli citondezyo.
7Mpoonya awo ndakacita mbubonya mbundakalaililwa. Ciindi casikati ndakagwisya impasya zyangu mbuli impasya zyakutolelela mubuzike, elyo ciindi camangolezya ndakadonkola bulambo amaanza aangu, ndagwisya zintu mumudima, ndaziyumuna akuko lyangu kantandambwene.
8Nibwakaca, ijwi lya-Jehova lyakandisikila, liti, 9#Ezk 24:19O mwana amuntu, sa bantu baluzubo lwa-Israyeli, luzubo lukataazya, tabakubuzyi kuti, Ucitanzi? 10#Mal 1:1Kobaambila kuti, Mbuboobu mbwaamba Mwami Jehova. Cisinsimo eci cilaamba makani aamwami uuli mu-Jerusalemu, aluzubo loonse lwa-Israyeli, boonse bali mukati kawo. 11Amba kuti, Ndime citondezyo canu. Mbuli mbundacita mebo, mbubonya obo mbubayoocitilwa. Bayootandwa akutolwa mubuzike. 12#Jer 39:4Alakwe mwami uuli akati kabo uyooyumuna impasya zyakwe akuko lyakwe mumudima akwiinka. Uyoodonkola bulambo akwiinda mpawo. Uyoovumba busyu bwakwe kuti meso aakwe ataboni nyika. 13#Job 19:6; Malo 1:13; Ezk 17:16; 2 Bam 25:7; Jer 52:9,11Njoomuvumbya buzamba bwangu, nkabela uyoocegwa mukakole kangu, aboobo njoomusisya ku-Babuloni munyika yaba-Kasidi. Nyika eyi takooyooibona pe, nekubaboobo nkuko nkwayoofwida. 14#Ezk 5:10Lino boonse mbaali abo, basikumugwasya ampi zyakwe, njoobamwaisya kumabazu oonse, alimwi njoosomona ipanga lyakubatandya. 15#Int 9:16; Is 26:9Lino bayooziba kuti, ndime Jehova ciindi eco nenooyoobamwaisizye akati kabamasi akubapalanganya munyika zyoonse. 16#Is 1:8; Jer 4:27; Ezk 6:8Pele njooleka bantu bace akati kabo kuti baloboke kupanga akunzala akumalwazi, kuti bayubulule zisesemyo zyabo oko akati kabamasi nkubasikide, lino bayooziba kuti ndime Jehova.
17Elyo ijwi lya-Jehova lyakandisikila alimwi, liti, 18#Ezk 4:16; Malo 5:9O mwana amuntu, kolya insima yako cakukankama, akunywa maanzi aako cakuyoowa acabucenjenzu, 19#Zek 7:14; Matl 13:10; Int 107:34Alimwi ambila bantu bacisi kuti, Mbuboobu mbwaamba Mwami Jehova aabantu bakede mu-Jerusalemu amucisi ca-Juda. Bayoolya insima yabo cabucenjezu akunywa maanzi aabo cakuyoowa, kuti nyika yabo isaalwe azintu zyoonse zili mulinjiyo, nkaambo kaluuni lwabaabo bakede mumo. 20Minzi iisyeede iyooba matongo, anyika iyoosaalwa, lino muyooziba kuti ndime Jehova.
Majwi aa-Leza ayoozuzikizigwa
21Alimwi ijwi lya-Jehova lyakandisikila, liti, 22#Is 5:19; Ezk 11:3; 2 Pet 3:4mwana amuntu, nkasimpinzi aka nkemujisi kunyika ya-Israyeli, kakuti, Mazuba avula, azilengaano zyoonse buyo zyaalilwa? 23#Joel 2:1; Ob 1:15Kobaambila kuti, Mbuboobu mbwaamba Mwami Jehova. Njoolobya kasimpi aka, nkabela takakooyooambwa limbi mucisi ca-Israyeli. Kobaambila kuti, Mazuba ali afwiifwi zilengano zyoonse niziyoozuzikizigwa. 24#Ezk 13:23; Malo 2:14Nkaambo takukooyooba limbi zilengano zyabuyo nibuba busondi bwakuupaika muluzubo lwa-Israyeli. 25#Is 55:11; Dan 9:12; Zek 1:6Pele mebo nde-Jehova njooamba kufumbwa majwi ngenjanda kwaamba, elyo ayoozuzikizigwa, taakooyoomuka limbi pe. Mumazuba aakupona kwanu, O luzubo lukataazya, njooamba majwi akwaacita, mbwaamba Mwami Jehova.
26Alimwi ijwi lya-Jehova lyakandisikila liti, 27#Is 5:19; 2 Pet 3:4O mwana amuntu, swiilila mbubaamba bantu baluzubo lwa-Israyeli, Balati, Cilengano ncabona ncamazuba aacili kunembo; ulasinsima aaziindi zicili kule. 28#Jer 4:7; Ciy 3:3; Mt 24:48-51Nkaambo kako kobaambila kuti, Mbuboobu mbwaamba Mwami Jehova. Taakwe ijwi lyangu niliba lyomwe liyoomuka pe. Majwi ngendaamba ayoozuzikizigwa, mbwaamba Mwami Jehova.
Currently Selected:
Ezekieli 12: Ibbaib63
Highlight
Copy
Compare
Share
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
